Saturday, April 11, 2015

စဉ်းစားလို့ တုန့်ပြန်ပါ

စဉ်းစားလို့ တုန့်ပြန်ပါ
==========

မောင်ကြီးသျှင် လာရေ လာရေ
ရီလောင်းကတ်ပါမည်
နှစ်သစ်ကူး သင်္ကြန်ပွဲမှာ
မရီးရို့နန့် အတူပြိုင်လို့
ရီလောင်းဖို့ လာရေ --။

ကျန်းခန့်သာ မာစီကြောင်းကို
တောင်းဆုမိတ္တာ ပို့ပါရေ
ဒေနှစ် သင်္ကြန်ပွဲမှာလေ
သူနိုင်ကိုယ်နိုင် ရှိဆိုင်လောင်းကတ်မည် --။

မင်္ဂလာအပေါင်းနန့် ပြည့်စီကြောင်း
ဆုမွန်တောင်းပျာယ် မိတ္တာဝီ
အခါသင်္ကြန် နှစ်သစ်ပြောင်းမှာ
လောင်းလိုက်မည် အတာရီ --။

မာစီသာစီ ကျမ္မာချမ်းသာ ဖီးကင်းကတ်စီ
ဌာနီဖြာဝီ စီးပွားဥစ္စာ တိုးပွားကတ်စီ
သူငါတူညီ စွမ်းဆောင်ကြိုးပန်းပါလီ
ပြည်ရခိုင်လေးဝတီ တပြည်းညီ ဖွံ့ဖြိုးတိုးတက်စီ --။

နှစ်ဆန်းစ မင်္ဂလာချိန်မှာ
ပိတောက်ရွှေဝါ ဖူးပွင့်ပါလို့
အတာရီသဘင် သင်္ကြန်ပွဲကို
ဆင်နွှဲနှစ်စိုင် မပျက်ပါ --။

ရခိုင်ဓလေ့ ရခိုင်ဘာသာ
ဖိုးဖီးစိုင်လာ ထူးလှပါယင့်
မြူးပျော်ရွှင် ရိုးရာပွဲမှာ
ယဉ်ကျေးမှုနှင့် ပြည့်ဝပါယင့်လေ --။

ရှိအဆက်ဆက် အစိုင်အလာ
ရခိုင့်ရိုးရာ ဟိခပါယင့်
နံသာရီစင် ၀ိုင်းပျာယ်သွီး
ဆိုတီးကခုန် မြူးကာ --။

ဘုရားတရား မြတ်သံဃာ
မိဘဆရာ ကန်တော့ပါယင့်
ကိုယ့်ရိုးရာ သင်္ကြန်ပွဲကို
အမြဲမပျက်အောင် ကျင့်ပပါယင့်လေ --။

အခါတော် တန်းခူးလ
သင်္ကြန်ကျလို့ မောင်ရို့ပျော်ရေ
ပိတောက်ခိုင်ညှာ ရွှေဝါဖူး
ဥသြကျူးလို့ မြူးပျော်ရွှင်ရေ --။

အတာရီ စုပျာယ်လောင်းရေ
မာစီသာစီ ဆုမွန်တောင်းရေ
မာပါစီ သာပါစီ
ကျန်းကန်းသာလို့ မာကတ်ပါစီ --။

မောင်ကြီးသျှင် ၀ိုင်းတော်သား
မိတ္တာထားလို့ ပြောကြားပါမည်
သင်္ကြန်ခါ ပြုံးရွှင်ပြီး
နှလုံးဘ၀င်အီးဖို့ တေးဖွဲ့ဆိုရေ --။

ပန်းပိတောက်ပိုင် မွှီးပါကတ်စီ
သင်္ကြန်ရီပိုင် အီးပါကတ်စီ --။

အယင်ခါ ရွှေထီးဆောင်း
ယင်းအကြောင်းကိုကျည်း မပြောစီချင်ပါ
အခုချိန်ခါ တိုင်းပြည်အကျိုး
ကြိုးစားလုပ်မှ တိုးတက်သာယာ --။

စကားကို လျှော့ပါလျော့ပါ
လုပ်အားကို တိုးပါတိုးပါ
ပြည်သာယာ ပြည်သာယာ
ဖြစ်လာစီဖို့ အနာဂါတ်နောင်ခါ --။

မရီးအလှ အသွင်ရူပါ
မောင်မောင့်ရင်မှာ စွဲမိပါယင့်
အတာရီစင် လောင်းနီတုန်း
ရွှင်ပြုံးအီးမြ အလှပို --။

မျက်လုံးက ရွှန်းစိုစို
မျက်နှာချိုချို အီးချမ်းသာလို့
ပန်းပိတောက်ပိုင် လှပုံဆန်း
စွဲလန်းလို့ ချစ်မိပါယင့်လေ --။

ချစ်ရဖို့ လူကိုရှာခါ
ငွေဖလားကိုင်ကာ ပြုံးပြနီယင့်
ထိုမှာမြင်ပျာယ် မဏ္ဍပ်ကြား
လောင်းအနားက မရီးချေ --။

 ငွေဖလားကြီးနန့် ရီကိုယူပျာယ်
မရီးပျိုဖြူ လောင်းလိုက်ပါဖိ
မူယာပျူငှာ ခြောက်ပြစ်ကင်း
ညမင်းအရုပ် မျက်နှာ --။

တွိရလို့ ဒေချိန်ဒေခါ
မောင်မောင့်ရင်မှာ ချမ်းမြေ့ပါယင့်
ခါတော်သင်္ကြန် ရက်မြတ်များ
လွန်လားလတ်မည် စိုးရေ --။

မဏ္ဍပ်တွင်းက လမင်းတရာ
ဝင်းဝါပြိုင်တူ ထွက်တေအလား
အသက်လျှူ ပင် မှားလောက်ပါယင့်
အသဲကြားမှာ စွဲထားချင်ယင့်လေ --။

ရီတဖလားလောက် လောင်းပါမည်
ချစ်တေဆိုရေ စကားကိုလည်း
နားလည်အောင် ပြောခပါယင့်
စဉ်းစားလို့ တုန့်ပြန်ပါဖိလေ  --။

(စစ်တွေ ညိုသန့်)

Thursday, April 2, 2015

ဆရာကြီးဦးသာထွန်းသို့ ဂုဏ်ပြုကဗျာ

ဆရာကြီးဦးသာထွန်းသို့ ဂုဏ်ပြုကဗျာ
============================

ရခိုင်လူမျိုး တိုးတက်ခကြောင်း
မီးမောင်းထိုးပြ လမ်းညွှန်ခရေ
အာဂသမိုင်းဆရာကြီး --။

ရခိုင်လူမျိုး တိုးတက်စီကြောင်း
မီးမောင်းထိုးပြ ဟောပြောခရေ
အာဂသမိုင်းဆရာကြီး --။

ဆရာကြီးရေ
ဒီမိုကရေစီ တန်းတူညီရေး
အရေးတော်အတွက် ရှိကတက်၍
ဆောင်ရွက်ကြိုးပန်းလီခရေ --။

ဆောင်ရွက်လီယင်း  ကြိုးပမ်းယင်းပင်
ထောာင်တွင်းစံရ ကွယ်လွန်ခဗျာယ်
စီးကျမျက်ရည် ဖြေမဆည်နိုင်
ရခိုင်သားရို့အားလုံးတည်း --။

ဆရာကြီးအား
ခြီဖျားဦးတိုက်  ရှိခိုးလိုက်၏
ဖြစ်ရာဘ၀ ဘ၀ဆက်ဆက်
အမျိုးတွက်ကို ဆောင်ရွက်ဦးဆောင်
အောင်မြင်ပါစီ သာကီမျိုးကောင်း
သူတော်ကောင်းကြီး ဆရာကြီးရေ
မ၀ီးနိဗ္ဗာန် စံဝင်နိုင်စီ
ဆုပန်ခြွီယင့် ဇီတင်ယင့် --။

(ဆရာကြီး၏အသုဘတွင် ဖြန့်ဝီခွင့်မရခသောကဗျာ)

ရခိုင်ရာမယနဇတ်

ရခိုင်ရာမယနဇတ်
========

ဗီဇကပင် ဇတ်ကဖို့ဝါသနာပါလို့
ပတ်သံကြားစွာနန့်
ရွစိစိဖြစ်ပါလတ်တေ --။

မယ်သီတာကို ဒသာဂီရိခိုးခန်း
ပတ်ကြမ်းကြမ်းနန့်
တခန်းနွှဲလိုက်ချင်ရေ --။

ဟာနုမန်မျောက်ကလည်း
လိမ္မာလိုက်တေနန့်
သိန်းခိုပြည်ကို မီးတိုက်လို့
အလောင်းတော်ရာမဖက်က
စစ်ကူတိုက်တေ --။

ဇတ်သိမ်းမှာ
အလောင်းတော်ရာမနန့် မယ်သီတာပေါင်းဖက်
ပရိဿတ်ကျမျက်ရည်
ဝမ်းသာကြည်နှုးဖြစ်ရရေ --။

ရခိုင်သားတိ မျန်မာစကား မပီကလာ ပီကလာနန့်
ကပြရေ ခရမ်းသီးဇတ်ကို
ရှိဆုံးက ဖျာခင်း
မိုးတလင်းကြည့်လည်း မညီး --။

ယေလည်း လက်တွိမှာ
မယ်သီတာကို ဒသာဂီရိ ခိုး
မုဒိမ်းလည်းကျင့် အသီသတ်
ခေါင်းလည်းဖြတ်ပစ်လိုက်တေ --။

အလောင်းတော်ရာမလည်း သူခိုးလိုက်စွာ
သူခိုးက အပြန်လိုက်လို့
ဒယွားမရ ထွက်ပြီးဖို့ကျရေ --။

ဟာနုမန်မျောက်ကလည်း
ရိက္ခာတိုက်ကို ၀င်ဖောက်လို့
ထမင်းငတ်ကေ
မြို့ထဲပြန်ဝင်လာရရေ --။

ညီတော်လက္ခဏလည်း
ကာလနဂါးဖြစ်လို့
ကောက်ရိုးပုံထက်မှာ အိပ်နီစွာ
မိုးကြိုးပစ်လို့ မနိုး --။

ပတ်သံ ဗုံသံ နှဲသံကြားကေ မနီနိုင်လို့
တချက် ထကကြည့်ခီမှာ
အလောင်းတော်ရာမနန့် ညီတော်လက္ခဏ
မျက်ရည်စက်လက်နန့်
(နောက်ဘိတ်ဆုံးမှာ)
မယ်သီတာအုပ်ဂူရှိမှာ
ပန်းခွီချဖို့ရာကျရေ --။ ။

(သာလှဦး) (April 2, 2015, (ကသစ်ဗုဒ္ဓိ) နိ။