Friday, June 1, 2012

ဖက်ခွက်လက်ချက် သဇင်တခက် ရာဇဝင်


Download

”အမိ ကျောင်းမှာအာစရိယပူဇော်ပွဲလုပ်ဖို့ ဖေသာ ၃၀၀ စီထည့်ရဖို့”

လေးတန်းကျောင်းသားချေ အောင်မြတ်ထွန်း ကျောင်းကအပြန်အိမ်ကို ရောက်ရောက်ချင်း လွယ်အိတ်ကို ဝေးချပနာ အမိနားကပ်ပြောလိုက်တေ။ မိစောနု သက်ပြင်းတချက် ချလိုက်မိရေ။ လင်ယောင်္ကျားသီလားစွာ ၄ နှစ်ပြည့်ဖို့ဗျာယ်။ လင်သည်သက်ဟိထင်ရှားဟိနီခါ ဒေကိစ္စတိကို မပူခရ။ ချစ်လင် မြတ်ထွန်းဦးက မြန်မာ့ဆိပ်ကမ်းက အစိုးရဝန်ထမ်းတယောက်ပါ။ တတောက်ပပြောင်မဟိကေလည်း ဒေကိစ္စချေတိကိုမပူခရ။ သူမအလုပ်က အိမ်တွင်းရီးကိစ္စ။ အချေတိကိုအိမ်တွင်းကနီ လိုအပ်စွာတိ အားလုံးလုပ်ပီးရေ။ သူမမှာ သမီးနှစ်ယောက်။ သားတယောက်။ အကြီးဆုံးသမီး ဦးသိန်းနုက လွန်ခရေနှစ်က ဆယ်တန်းအောင်လားပြီးဗျာယ်။ သားချေအောင်မြတ်ထွန်းက ဒေနှစ်လေးတန်း။ သမီးထွီး နုသဲဖြူက သုံးတန်း။ သမီးကြီးက ဆယ်တန်းအောင်ဗျာယ်ဆိုခါ အိမ်တွင်းရီးကိစ္စ စိတ်မပူရ။ သူမ ဈီးထွက်ရောင်းတိုင်း အစစအရာရာကို သမီးကြီးက ဒိုင်ခံလုပ်ပီးရေ။ အဖမဟိရေနောက်ပိုင်း မောင်ချေနန့် နှမချေကို အစရာရာပြုစု ဂရုစိုက်ပီးရေ။ ဖေသာမတတ်နိုင်လို့ အချေတိညကျောင်း မထားနိုင်ကေလည်း သမီးကြီးက သူရို့နှစ်ယောက်ကို စာပြပီးရေ။ လိမ္မာရီးခြားဟိရေသမီး၊ သမီးကြီးအမိအရာဆိုရေအတိုင်း၊ အမိနန့် လောင်းကူလှော်ဖက်ရရေ။

”အမိ မေကြီး အမိကိုကူညီနိုင်ဗျာယ်”

မိစောနု အတွေးစတိပျက်လားရေ။ အိမ်ထဲကိုပြီးဝင်လာရေ သမီးကြီဦးသိန်းနု အမိသည်လိုင်ပင်းကိုဖက်ပနာ ပြောလိုက်စွာဖြစ်တေ။

”ဇာဖြစ်လာစွာလဲ မေကြီး၊ ပျော်လုံးကြီးဆို့လို့ကာ”

”အမိ မေကြီးအလုပ်ရဗျာယ်။ ထိုတလောက ရန်ကုန်ကလာလို့ အသစ်ဖွင့်ရေ ဆီးကုမ္ပဏီမှာ”

”ဟိန့်…. မကြီးအလုပ်ရကေ မောင်မောင်ကို အာစရိယပူဇော်ပွဲအတွက် ဖေချာနန့် ဘောင်းဘီအသစ်တလုံးဝယ်ပီးနန်း”

မောင်ချေ အောင်မြတ်ထွန်းက အေးမကြီး အလုပ်ရစွာကိုကြားစွာနန့် သူလိုချင်စွာကို ချက်ချင်း တောင်းဆိုလိုက်တေ။

”မကြီးအလုပ်ရှာစွာ မင်းရို့အတွက်၊ မောင်မောင် စာရာကြိုးစားနန်း၊ မကြီးအားလုံးပီးမေ။”

မောင်မောင်တယောက် သူတောင်းစွာတိရဖို့ဆိုလို့ အပျော်ကြီးပျော်နီရေ။ မိစောနုက မျက်ရည်တိပင်ဝဲလို့ ပီတိဖြာနီရေ။ မိထွီးချေက အိမ်မှာမဟိ။ ထုံးစံအတိုင် အပြင်မှာ တခြားအချေတိနန့် ကဇတ်နီကတ်တေ။

ယင်းနိညဇာ မိသားစုထမင်းပွဲ စစည်ကကား။ ခါတိုင်းပိုင် အပေါစား ဟင်းငါးတိမဟုတ်။ မေကြီးအလုပ်ရရေ အထိမ်းအမှတ်နန့် မိစောနု ကြက်ရင်အုံတအုံဝယ်လာရေ။ ကြက်သားဆိုစွာ သူရို့ပိုင်လက်လုပ်လက်စားတိအတွက် နတ်သုဒ္ဓါ။ ယင်းနိ ထမင်းဝိုင်းမှာ ကြက်သားဆီပြန်၊ ငရုတ်ကြိတ်နန့် တို့စား၊၊ ကြာဆံနန့်ဘူးသီးဟင်းရည်သောက်၊ ကော်ဖီပွင့်ကျော်ရို့နန့် စစုံလလင် စားကတ်ရရေ။ မောင်မောင်နန့် မိထွီးက ထမင်းအလုပ်ပြတ်နန့် သူရို့လိုချင်ရေ လိုအပ်တေ ဘောလ်ပန်၊ ခဲတန်၊ ပေတံတိကို လစာထွက်တေနိ ဝယ်ပီးဖို့အတွက် တခုချင်းစီချပြနီကတ်တေ။ ပုံမှန်ဆို မကုန်တတ်တေ ထမင်းအိုးကြီး တတက်ပြောင်လားရေ။ မိစောနုတယောက် သားသမီးချေတိ ပျော်နီကတ်စွာကို ကြည့်လို့ပီတိဖြာပနာ သူမမျက်လုံးအိမ်ချေမှာ တမ်းတခြင်း၊ အောက်မိသတိရခြင်းတိ တရိပ်ရိပ်တက်လာရေ။ အော်…ကိုမြတ်ထွန်းဦး…..သူရာ ဒေထမင်းဝိုင်းမှာဟိကေ ဇာလောက်ပျော်ဖို့ကောင်းဖို့နန်း…….

အလုပ်ရလို့ နှစ်ပတ်ကြာရေခါ မေကြီးတယောက် အလုပ်ကိစ္စနန့် ခရီးထွက်ဖို့ကျရေ။ အရောင်းစာရေးမဆိုရေအတိုင်း မြို့ထဲက ဆီးခန်း၊ ဆီးဆိုင်တိမှာ တဆိုင်ဝင်တဆိုင်ထွက် ဆီးလားဖြန့်ရရေပိုင် နှစ်ပတ်တခါစီ တခြားမြို့တိကိုလားလို့ ဖြန့်ဝီရရေ။ သူမဖြန့်ချီရီး တာဝန်ကျရေမြို့က ဘူးသီးတောင်နန့် မောင်တောပါ။ သူမဘဝမှာ ဘူးသီးတောင်ဆိုရေမြို့ ပထမဆုံးခရီး။ ဒေတခေါက် မောင်တောထိတက်စရာမလို။ ဘူးသီးတောင်က ဆိုင်တချို့မှာဖြန့်ရဖို့။ ကိစ္စမဟိ။ သူမမှာ ဘူသီးတောင်မှာ အဝီးသင်တက်ဖက် သူငယ်ချင်း ကျန်သဲဖြူ အိမ်ဟိရေ။

တလင်္လာနိ မိုးထစစော အိမ်ဘေးက အခင်ဖြူသီး ဆိုက္ကားနန့် သင်္ဘောဆိပ်ကို ဆင်းကတ်တေ။ ဆိုက္ကားနောက်မှာ ဆီးကာတွန်းဗူးကြီးကို တင်လိုက်တေ။ မောင်ချေကို ရင်ခွင်ထက်မှာတင်လိုက်တေ။ ညကပင် မောင်ချေက မကြီးကိုသင်္ဘောဆိပ်ထိ လိုက်ပို့ပီးမေလတ်။ အမိက စစောကပင် ဈီးကြီးက ဟင်းချွတ်ဖို့ ထလားခဗျာယ်။ မောင်ချေကို မလိုက်ကဲ့ မကြီးတယောက်တည်းလားမေဆိုလို့မရ။ အေးမကိုစိတ်မချ။ ဇာစိတ်ချဖို့လဲ။ အချေဆိုကေလည်း သိရေ။ တခါတရီ မောင်နှမတတော လမ်းလျှောက်ထွက်ကတ်ကေ ယောင်္ကျားတိမြင်တိုင်း သူ မလွတ်တမ်း မျက်စိနောက်လို့ ကြည့်ထားရေ။ ကြည့်ဖို့နင်းရာ။ မြင်ရေယောကျာင်္းတိုင်း သူ့အေးမ ခန္ဓာကိုယ်က မျက်စိလုံးဝမခွါ။ မျက်စိထွက်ကျဖို့ပိုင် ကြည့်နီကတ်တေ။ ဦးသိန်းနုက အမိတူသမီး။ အသားကဖြူစွာလည်းမဟုတ် ညိုစွာလည်းမဟုတ်ပါ။ နီစပ်စပ်၊ နှာတံစစင်း၊ မျက်နှာသသွယ်၊ ဆံပင်က မတိုမရှည်၊ တင်းကား၊ ရင်စွင့်၊ မြင်ရေပုရိသယောင်္ကျားတိုင်း အကြည့်မခွါ သက်ပြင်းရှည်ချရစီရေ အလှပိုင်သျှင်မ။

စစ်တွေ၊ ပြည်တွင်းရီကြောင်း၊ သင်္ဘောဆိပ်ကိုရောက်ဗျာယ်။ ဇာချိန်ကပင်ရောက်နီကတ်တေ ခရီးသည်တိလည်းမသိ၊ ဖောင်တော်တန်းခါးဝမှာ ကျိတ်ကျတိုးနီကတ်တေ။ တန်းခါးဖွင့်ဖို့စွာကို စောင့်နီကတ်စွာ ထင်ယင့်။ သူမ ဘူးသီးတောင်၊ မောင်တောကို ခရီးမထွက်ဖူးကေလည်း သူငယ်ချင်း ကျန်သဲဖြူပါးက အသေးစိတ်မီးထားရေ။ ယင်းတန်းခါးဘေးမှာ ရိုးရိုးလက်မှတ် အရောင်းဌါနဟိရေ။ သူမအတွက် ရိုးရိုးလက်မှတ်ဝယ်လိုက်ကေ အဆင်ပြေဖို့မထင်။ ဆီးဘူးတန်းလန်းနန့် ဒုက္ခကျဖို့မနား။ ရိုးရိုးလက်မှတ်က သဘောင်္ကုန်းပတ်ထက်မှာ ထိုင်လိုက်ရစွာမနား။ ကုမ္ပဏီကလည်း အထက်တန်းလက်မှတ်အတွက် ခရီးစရိတ်ပီးထားရေ။ ဖောင်တော်တန်းခါးမကြီးဘေးမှာ လူတကိုယ်စာ အပေါက်တပေါက်ဟိရေ။ ကိုဖြူသီးက အထက်တန်းလက်မှတ်ဝယ်ချင်ကေ ယင်းအပေါက်က ဝယ်ရရေလတ်။

တန်းခါးပေါက်ကို လှမ်းကြည့်လိုက်တေခါ မြန်မာစစ်သားတိ ဝင်လိုက်ထွက်လိုက်လုပ်နီကတ်တေ။ မြန်မာစစ်သားဆိုလို့ ဘာဘာပြောရေစကားကိုသတိရလားရေ။ ”ဒေလင်းပြန်မသား မြန်မာစစ်သားတိ ကိုယ်ချင်းစာတရားမဟိရေ အကောင်တိ” လတ်။ ဘာဘာ ဇာဖြစ်လို့ဒေပိုင်ပြောရေ သူမနားမလည်ပါ။ ဘာဘာ စာဖတ်ကောင်းဝါသနာပါရေပိုင် လူပေါင်းဆန့်ရေ လူတယောက်လည်းဖြစ်တေ။ ယေလည်း မြန်မာတိနန့် ပေါင်းသင်းဆက်ဆံခါ မယုံသင်္ခါမျက်စိတိနန့် ရက်ပြတ်ကြည့်တတ်တေ။ ဇာဖြစ်လို့လည်းမေကြီးမသိ။ သိဖို့လည်းမကြိုးစားခပါ။ ဒေဂုဆီးကုမ္ပဏီက Supervisor မြန်မာကို ဘာဘာရာမြင်ခကေ ကြိုက်ချင်ဖို့မဟုတ်။ အင်တာဗျူးရေနိက မေကြီးပိုင် အင်တာဗျူးလာဖြေရေ မမချေတိမကန်။ ခန့်ဖို့စွာက ၃ ယောက်ရာ။ အင်တာဗျူးမှာ ထထွေထထူး တခုလည်းမမီးခ။ အလုပ်နန့်မဆိုင်စွာတိမီးပြီးကေ ”ညီမလေးကသိပ်ချောတာဘဲ” လတ်။ ရဖို့မထင်ခ။ Result ထွက်ခါ ဦးသိန်းနု နာမည် ထိပ်ဆုံးကပါရေ။ အံ့သြဖို့ကောင်းရေ။ အလုပ်ရှာရစွာ ယင်းလောက်လွယ်ဖို့မထင်ခ။

ဦးသိန်းနု တန်းခါးအပေါက်နားကို မရဲတရဲ ကပ်လိုက်တေ။ အပေါက်နားမှာ မြန်မာစစ်သားတယောက် အငမ်းမရ မျက်စိနန့်

” ညီမလေး ဘာရှာတာလဲ? ” (မြန်မာဘာသာ)

”အထက်တန်းလက်မှတ်ဝယ်မလို့ပါ၊” (မြန်မာဘာသာ)

”ဦးလှမောင်သိန်းရယ် လက်မှတ်ဝယ်မလို့တဲ့။” (မြန်မာဘာသာ)


ယင်းစစ်သား မဆီမဆိုင် အရောတဝင် ပြောလာရေ။ အခန်းထဲကို ဦးသိန်းနု မဝံ့မရဲဝင်လားလိုက်တေ။ ဆိပ်ကမ်းမှူး ဦးလှမောင်သိန်းဆိုစွာ အခင်ကြီးထင်ရေ။ ရခိုင်သား၊ အသက်အကြီးပိုင်း၊ လေးထောင့်စားပွဲအလယ် ကုလားထိုင်တလုံးမှာ ထိုင်နီရေ။ သူ့ဘေးပတ်လယ်မှာ အားလုံးစစ်သားတိပါ။ ဇာလုပ်နီကတ်တေမသိ။ ဝေါ်ကီတော်ကီ ခါးမှာချိတ်ထားရေ အရပ်ဝတ်နန့် မြန်မာတိလည်းမြင်ရေ။ ထောက်လှမ်းရီးဆိုစွာ လူတိထင်ရေ။ ဦးသိန်းနု ဆိပ်ကမ်းမှူးနားကို ကပ်ပြီးကေ ပြောလိုက်တေ။

” အခင်… Upper တန်း တနီရာချေ ရပါဖို့လား?”

” မချေ ညက.. Booking လုပ်ထားလာ?”

”Booking လုပ်ဖို့ရောက်လာပါသိမ့်ရေ။ လက်မှတ်စာရီးက Upper တန်းဆိုကေ မိုးထစောစောမှ လာဝယ်ရဖို့ပြောလိုက်ပါရေ။”


ဆိပ်ကမ်းမှူးကြီးတခုလည်းမပြောပါ။ မကြားလား၊ မကြားကွန်ဆောင်နီစွာလား မသိ။ မျက်နှာကလည်း ဂေါင်းချုပ်နီရေမျက်နှာမျိုး၊ စရင်းစာအုပ်ကို ရှိတခေါက် နောက်တလှန်ကြည့်နီရေ။

”မချေ အခန်းရဖို့က မသေချာကာ။ တနားလောက်စောင့်ကြည့်လိုက်နန်း”

”ဒေမှာ လူကြီးတိနန့်ပြည့်နီရေ။ သူရို့မလိုက်ဆိုကေတော့ ရလိမ့်မေ။”

လူကြီးဆိုစွာ အသက်ကြီးရေလူထက်၊ မြန်မာစစ်သား အရာဟိတိကို ခေါ်စွာလို့ သူမသဘောပေါက်လိုက်တေ။ သူ့မသူငယ်ချင်းပြောစွာ မှန်ရေထင်ယင့်။ အထက်တန်းလက်မှတ် ဆိုစွာက အမြဲတမ်းပြည့်နီရေလတ်။ မြန်မာစစ်တပ်အတွက်ရာလတ်။ စစ်သားတိမလားကေလည်း သူရို့နန့်နီးစပ်တေ လူတိရာ ရရေလတ်။ ဦးသိန်းနု ထထွေထထူးမစိုင်းစားစဗျာယ်။ ရိုးရိုးလက်မှတ်ရောင်းရေ အပေါက်နားကိုပြီးလားရေ။ ရှိက ဟိနီရေလူတိကို တိုးပြီးကေ လက်မှတ်တစောင်ဝယ်လိုက်တေ။ ပြီးကေ ဆီးဗူးအတွက် တန်ဆာ (ကုန်ခွန်ခ) ဆောင်လိုက်တေ။ အပြင်မှာ မောင်ချေနန့် ကိုဖြူသီး ရပ်စောင့်နီတုန်းသိမ့်ပါ။

”မောင်ချေ မမလက်မှတ်ရဗျာယ်။ ကိုဖြူးသီးနန့်ပြန်လီနန်း။ ကိုဖြူသီးကျေးဇူးတင်ပါရေနန်း။”

လို့ပြောယင်း ဆိုက္ကားခထုတ်ပီးပြီးကေ ဖောင်တော်အပေါက်ကတဆင့်ဖြတ်ယင်း သင်္ဘောထက်ကို တက်လိုက်ပါရေ။

ကုန်းဘတ်ထက်အရောက် ရှိက ဆီးကာတွန်းဗူးကို ထမ်းလာရေ အထမ်းသမားကို တနားစောင့်ခိုင်းယင်း သင်္ဘောသားတယောက်ပါးက ဝန်ထမ်းသက်သာ ကုလားထိုင်တလုံးကို ဖေသာ ၃၀၀ ပီးလို့ ငှါးလိုက်တေ။ အားလုံးချချောမမောပါ။ သူမ ရလိုက်တေ ကုလားထိုင်နီရာက နီရာကောင်း။ သင်္ဘောဘေးဘောင်တန်းနန့် မနီးမဝီး။ လီသသွတ်ချေနန့် ပပိုက်နနှိုက်ကျရေ။ ယေလည်း တခုမကောင်းစွာက ညှာဖက်ဒေါင့် လူငါးယောက်လောက်အခြားမှာ စစ်သားတအုပ်စုပါလာရေ။ သူရို့တိကိုကြည့်ရစွာ ဒေသင်္ဘောထက်မှာ သူရို့အုပ်စုကအပ ကျန်လူတယောက်လည်း မပါလို့ထင်နီပုံရရေ။ အော်ကျယ်ဟစ်ကျယ်နန့် ရရောင်သတ်ပြီးကေ ဖိုသံပီးနီကတ်တေ။ သူ့ရို့မျက်လုံးတိက အပြစ်ဒဏ်အပီးခံထားရရေ မျက်လုံးတိပိုင် သူမကို မျက်လုံးကျွတ်ထွက်အောင်ကြည့်နီကတ်တေ။ သူမဂရုမစိုက်ပါ။ တခါတရီ သူမကိုယ်သူမ မုန်းချင်ရေ။ ဇာဖြစ်လို့ ငါ့ခန္ဓာကိုမှ ယောင်္ကျားတိ စိတ်ဝင်စားကတ်တေလဲ။ သက်ပြင်းတချက်ချလိုက်ပြီးကေ မျက်နှာကို တခြားတဖက်ကို လွှဲထားလိုက်တေ။

သင်္ဘောစထွက်လာဗျာယ်။ သင်္ဘောနာမည် ”ဓညဝတီ (၁)” ပါ။ ဆတ်ရိုးကျချောင်းက သင်္ဘောတရွိရွိနန့် လိပ်ချေတကောင်ပိုင် ထွက်လာရေ။ မလိခဆိပ်နားလောက်ကိုရောက်စွာနန့် သဘောင်္တဖက်တချက်ကို ဆန်အိတ်တိတင်ထားရေ သန်ဗာန်တိ သူ့ထက်ငါအယင် ကပ်လာလတ်တေ။ ဘူးသီးတောင်ကို မှောင်ခိုခိုးတင်နီကတ်စွာတိဆိုစွာ မပြောလည်းသိရေ။ မိန်းမ၊ ယောင်္ကျားမကျန် အားလုံးသူ တက်ညီလက်ညီ သူထက်ငါယင် လုတင်နီကတ်တေ။ လူတိ တဝမ်းတခါးအတွက် အမျိုးမျိုးလုပ်ကတ်ရစွာမနား။ ဘာဘာ ရက်ပြတ်ပြောနီကျစကားတခွန်းကို နားထဲကြားယောင်လာရေ။ ငါရို့ရခိုင်ပြည်ရေ ရီခံမြီခံကောင်းရေ၊ သယံဇာတ၊ ဆန်ရီစပါးတိပွါးရေ။ ယေလည်း ဒေစနစ်ဆိုးကြောင့် ငါရို့ ထမင်းနပ်မှန်ဖို့အတွက် ကကောင်းကြိုးစားနီကတ်ရရေလတ်။ ဇာစနစ်ဆိုးလဲ သူမ မတွေးတတ်။

သင်္ဘောတရွိရွိနန့် ဆတ်ရိုးကျချောင်းကအထွက် ဘယ်ဖက်ကိုလှည့်ပြီးကေ ဂစ္စပနဒီ မြစ်ကြောင်းအတိုင်း စုန်ဆင်းလိုက်လာရေ။ သင်္ဘောကုန်းဘတ်က ကမ်းဖက်ကိုငေးကြည့်နီယင်းနန့် ကျီကရောင်ဘာကရောင်မြည်ပြီးကေ လိုက်လာလတ်တေ စိုင်းဒြားမင်းခွါငှက်တရွီကို မြင်လိုက်တေ။ အော်….ဝင်းကိုခိုင်တေးခြင်းထဲက စိုင်းဒြားငှက်ဆိုစွာ ဒေငှက်တိကိုပြောစွာမနားယေ။ သူမ ဝင်းကိုခိုင်တေးခြင်းဆိုကေ ကကောင်းကြိုက်တေ။ သူကရခိုင်ပြည်မှာ နာမည်ကြီးအဆိုတော်မနား။ သူမသူငယ်ချင်းတိလည်း အားလုံးသူ့ကိုကြိုက်ကတ်တေ။ ကုလားထိုင် နောက်မှီမှာ ဂေါင်းတင်ဗျာယ် တောင်မြောက်တွေးယင်း မျက်လုံးချေ စင်းပါလတ်တေ……………

ပူး….ပူး…..ပူး………….

သင်္ဘောဥသြသံကြောင့် သူမလန့်နိူးလားရေ။ ယာ…..ရသေ့တောင်မြို့ကိုတောင် ဆိုက်ဖို့ပျင်နီဗျာယ်။ ရသေ့တောင်ချောင်းကိုဝင်ယင်း သင်္ဘောဦးကို လှည့်နီရေ။ ဖောင်တော် အရင်းဖက်မှာ နည်းရေလူအုပ်ကြီးမဟုတ်။ ဖောင်တော်ထက်မှာတော့ခါ စစ်ယူနီဖောင်းဝတ်လို့ မြန်မာစစ်သားတိလည်းအများကြီးမြင်ရရေ။ တခုထူးဆန်းစွာက ထမင်းထုပ်၊ ဒေသထွက် အစားအစာတိ လာရောင်းကတ်တေ ဈီးသည်တိက သင်္ဘောမှာပါလာရေ ခရီးသည်တိ သာသာလောက်ဟိဖို့ထင်ရေ။ တရက်နီမှ ရသေ့တောင်မြို့ကို သင်္ဘောအစုံတစီး၊ အဆန်တစီးရာကပ်တေ။ ဒေဈီးသည်တိဘဝက သနားဖို့ကောင်းရေ။ သူမအရွယ် ဈီးသည်မချေတိကို အစောင့်ရဲတိက သင်္ဘောမကပ်ဘဲနန့် မတက်ရလို့တားနီရေကြားက ထဗိန်တတိုတိုချေဝတ်ပနာ လက်တဖက်က ဗန်းချေတိကိုင်လို့ အလုအယက် တက်ဖို့ကြိုးစားနီကတ်တေ။ အော်…အမိ..အဖ..ကျေးဇူးကြောင့်သူမ ဆယ်တန်းချေ အောင်ပြီးကေ အလုပ်ချေတခု ရရေမနား။

သင်္ဘောရသေ့တောင်ဆိပ်မှာ နာရီဝက်လောက်နားပြီးကေ မယူမြစ်အတိုင်း စုန်ဆင်းလာရေ။ ဂုနားက သင်္ဘောသားတယောက် ပြောစွာကြားလိုက်တေ။ ဒေနိ ဖြားသင့်ရေ သင်္ဘော ဘူးသီးတောင်ကို စစောရောက်ဖို့လတ်။

ဘူးသီးတောင်ရောက်ကေ ယုံးကပီးလိုက်တေ ဆီးဆိုင်လိပ်စာအတိုင်း လားရောင်းဖို့။ ယင်းအပြင် ဆိုင်အသစ်တိရှာပြီးကေ အများကြီးထွက်အောင်ရောင်းခဖို့။ အများထွက်လီ သူမအတွက် ကော်မသျှင် ပိုရလီမနား။ ဒေအတိုင်းဆိုကေ ခရီးစရိတ်ကလည်း စိကေတဗွေထွက်ဖို့။ ယုံးက အထက်တန်းလက်မှတ်ခ ပီးရေ။ သူမရိုးရိုးတန်းနန့် လာရေ။ ထမင်းစရိတ်လည်းသက်သာရေ အိမ်ကထမင်းဗူးချေ ယူလာရေ။ ပိုစွာဖေသာချေတိကို မောင်ချေ၊ ညမချေတိ အတွက်လိုအပ်စွာချေတိ ဝယ်ပီးလို့ရရေ။ အမိလည်း အယင်ပိုင် ပပင်ပပန်းလုပ်စရာမလို။ သူမတဖက်တလမ်းက ဖေသာထောက်ပံ့ပီးကေ အမိအယင်ပိုင် ပင်ပန်းစရာမလို။ သူမလည်း ရရေ ဖေသာချေတိစုပြီးကေ အဝီးသင်ကျောင်းစရိတ်အတွက် အမိပါးက တောင်းစရာမလိုဗျာယ်။ အချိန်ရကေ သူမကောင်းတက်ချင်ရေ ကွန်ပျူတာသင်တန်း၊ အင်္ဂလိပ်စကားပြောသင်တန်းတိ တက်လို့ရရေ။ သူမကိုယ့်စိတ်ကူးနန့်ကိုယ် တက်ကြွနီရေ။သူမမိသားစုကိုလည်း ကူညီနိုင်ဗျာယ်ဆိုရေ ခံစားမူတိနန့် လန်းဆန်းပျော်မြူးနီရေ။ ဖူးပွင့်စ သဇင်ပန်းချေတပွင့်၊ ယုံကြည်မူအပြည့်နန့်။

ယေလည်း ဒေလောကကြီးမှာ မထင်ထားစွာတိဖြစ်တတ်ပါရေ။ ဘဝပီးကံကြောင်းလား? စနစ်ဆိုးကြောင်းလား? လူပုဂ္ဂိုလ်ကြောင့်လား? သူမပါးကို ဒေပိုင်ဆိုးဝါးရေ အဖြစ်ဆိုးကြီးကျလာဖို့စွာ မသိစွာအမှန်ပင်။

ခရီးသည်တိ ရွစိရွစိ ဖြစ်နီကတ်တေ။ သင်္ဘောဆိုက်ဖို့ ဦးလှည့်နီဗျာယ်။ ထူးဆန်းစွာက ရသေ့တောင်ဆိပ်ကမ်းမှာထက် များရေလူအုပ်ကြီးပင်ဖြစ်တေ။ ကူလီသမားတိက တဝက်လောက်ဟိဖို့ထင်ယင့်။ ကျန်တဝက်က မြန်မာစစ်သားတိနန့် လာကြိုရေလူတိပင်ဖြစ်တေ။ နောက်တခုက ဘူးသီးတောင်မှာ ဒေလောက်ကုလားများဖို့မထင်ခ။ ဒေမြို့လူဦးရေ ၈၀ ရာခိုင်နှုန်းစွာ ကုလားတိလတ်။

သူမနားကို အထမ်းသမား တရွီရောက်လာရေ။ စက္ကူဗူးချေတဗူးကို သူထမ်းဖို့ ငါထမ်းဖို့ လုနီကတ်တေ။ သူမမျက်နှာတတင်းနန့် သူမနားကို အယင်ရောက်လာရေ အထမ်းသမား ထမ်းဖို့ပီးလိုက်တေ။ ဆီးကာတွန်းကို မျက်စိချယင်း ရှိကခရီးသည်တိနောက်က မျှောင်လိုက်လာလတ်တေ။ မြန်မာစစ်သားတိနန့် ယင်းသူရို့မိသားစုတိ အယင်တက်ပြီးမှ ကျန်ခရီးသည်တိကို တက်ခွင့်ပြုရေ။ သူမရှိက ခရီးသည်တိကို ရဲ၊ လဝက၊ ကာစတင်၊ တဖွဲ့ပြီးတဖွဲ့စစ်ဆေးနီရေ။ ထူးဆန်းစွာက ကာစတင်ဆိုရေ လူတိကလည်း စစ်ယူနီဖောင်းဝတ်ထားရေ။

သူမအလှည့်ကျလာရေ။ ယင်းတပ်ဖွဲ့က နှာဘူးတိ သူမခန္ဓာက မျက်စိလုံးဝမခွါ။ အဆိုးဆုံးက ကာစတင်ဆိုရေ စစ်ယူနီဖောင်းဝတ်ထားရေ မြန်မာစစ်သားနှစ်ယောက်။ ကိုယ့်နှမ သူ့နှမ မစာနာ၊ ဒေလောက်ပင် ရရိုင်းစစိုင်းကြည့်ရလာ။ လဝကခုံရှိကိုအရောက် အလုပ်မဟိအလုပ်ရှာလို့ မှတ်ပုံတင်ပြခိုင်းရေ။ အော်….ရခိုင်က ရခိုင်ပြည်မှာ မှတ်ပုံတင်ပြရရေဘဝ။ လဝက ကပြုံးစိစိနန့် မှတ်ပုံတင်ပြန်ပီးရေ။ ဒုတိယ ခုံတန်းကိုရောက်လာရေ။ အရှက်မဟိရေ တဏှာရူးတိခုံတန်း။ ထိုလူနှစ်ယောက်နားကို ရောက်စွာနန့် သူမ ဖော်မပြတတ်တေ အန္တရာယ်အငွိအသက်တခု ရလိုက်တေပိုင်။

”ညီမလေးက ဆေးကုမ္ပဏီကလား?” (မြန်မာဘာသာ)

”ဟုတ်ကဲ့” (မြန်မာဘာသာ)

”ဒီကိုမရောက်ဖူးဘူးထင်တယ်” (မြန်မာဘာသာ)

တယောက်မျက်နှာ တယောက်ကြည့်လို့ ပြုံးစိစိနန့် ကြည့်လိုက်ကတ်တေ။ သူရို့မျက်နှာတိက စားနီကျကြောင်ဖားတိပိုင်။ ငါရို့အတွက် ဂွင်တဂွင်မိဗျာယ်ဆိုရေအတိုင်း။ သူမတခု စိုင်းစားမိလိုက်တေ။ ဒေတဏှာရူးတိ ငါဆီးကုမ္ပဏီကဆိုစွာ ဇာပိုင်သိလဲဂု? အော်…. သိဗျာယ် ငါ့ဆီးကာတွန်းဘူးကိုမြင်လို့ထင်ရေ။ ယင်းပိုင်စိုင်းစားနီယင်း……..

”ညီမလေးမှာ ဆီးသယ်ယူခွင့် စာရွက်ပါရဲ့လား?” (မြန်မာဘာသာ)

သူမမှာ ပါလာရေခါ ဆီးစရင်းကိုထုတ်ပီးလိုက်တေ။ ကုမ္ပဏီက သယ်ယူခွင့်ဆိုရေစာကို မပီးလိုက်။ တခြားကိုယ်စားလှယ်တိလည်း လိုရေလို့ တခါလည်းမပြောဖူး။ အော်…တခုခုဖြစ်လို့ကမလွယ်။ Supervisor က ဒေဆီးကာတွန်းကို ဂရုစိုက်ဖို့နန့် မပျောက်ချဖို့ သူမကို အတန်တန်မှာလိုက်တေ။ ပစ္စည်းပျက်စီးဆုံးယှုံးကေ သူမအပြစ်လတ်။ ဆီးတန်ဖိုးက လွယ်စွာမဟုတ်။

”မပါဘူး” (မြန်မာဘာသာ)

သူမပစက ပြုတ်နန့်ပင် ထွက်လာရေစကားလုံးပါ။ သူရို့နှစ်ယောက် ဒုတိယအကြိမ်တယောက်မျက်နှာကိုတယောက် ထပ်ပနာ ကြည့်ယင်း ပြုံးလိုက်ကတ်စွာ သူမမြင်လိုက်တေ။ သူရို့လိုချင်ရေ အဖြေရလားရေပုံမျိုး။

”ဒါဆို ညီမဆေးကာတွန်းကို အကိုကြီးတို့ ခဏသိမ်းထားလိုက်မယ်။ စိတ်ချ ညီမဆေးတွေ မပျောက်စေရဘူး။ ညနေ ၉ နာရီမှာ ဒီလိပ်စာအတိုင်း လာယူလိုက်နော်။” (မြန်မာဘာသာ)

သူမစိတ်မှာ စိုးရိမ်မူနန့်အတူ အားငယ်စိတ်ပါဖြစ်လာလတ်တေ။ တခြားသူတိလည်း ဒေအတိုင်း လာနီကတ်စွာဗျာယ်မနား။ ငါ့ခါကျမှ ဇာတွက် သိမ်းထားလိုက်စွာလဲ။ ဇာပင်ဖြစ်ဖြစ် ညဇာ ၉ ချက်တီး လားယူခီရဖို့။ အားလုံးအဆင်ပြေလိမ့်မေလို့ သူမကိုယ်သူမ အားတင်းလိုက်တေ။ သင်္ဘောဆိပ်တတည့်မှာ တည်းခိုခန်းတခုတွိစွာနန့် ယင်းတည်းခိုခန်းကို တန်းဝင်လိုက်တေ။ မှတ်ပုံတင်နန့် ကျသင့်ရေ ဖေသာာကို ယှင်းပြီးနာ သူမအတွက် ပီးရေအခန်းထဲကို ဝင်လိုက်တေ။ ဂုမှ ၆ ချက်တီးရေသိမ့်။ ၉ ချက်မတီးခင် ရီမိုးချိုးပြီးနာ ထမင်းစားပြီးကေ အသင့်လုပ်ထားရဖို့မနား။ သူမရီချိုးပြီးကေ ဝမ်းဆာလာစွာနန့် တည်းခိုခန်းဘေးက ထမင်းဆိုင်ကို ဝင်စားလိုက်တေ။ ထမင်းစားရစွာရာတခု ထမင်းမခြီ။ ထမင်းဆိုင်မှာ ထိုင်ယင်းနန့် ထိုဒေတွေးနီလိုက်ယင်း ၈ ချက်တီးခွဲလားရေ။ ဘူးသီးတောင်မြို့မှာ နီဝင်စွာနန့် လူတိ အလားအလာ နည်းပါလတ်တေ။ သူမ ကုလားဆိုက်ကားတစီး ငှါးပနာ လိပ်စာအတိုင်း မောင်းခိုင်းလိုက်တေ။ ဘူသီးတောင်မြို့ထဲမှာ ဒေအချိန်ဆိုကေ လမ်းမှာ လူအလားအလာ ကောင်းနည်းလားဗျာယ်။ ဆိုက်က္ကားသမား မြို့ပြင်ဖက်ကို ဦးတည်နင်းနီရေ။ သူမကြောက်စိတ်တိဝင်လာရေ။ တလမ်းလုံးမှောင်နီရေ။ ယေပင်လည်း သူမကိုသူမ အားတင်းလိုက်တေ။ ကောင်းမကြာခင် လိပ်စာကအိမ်ရှိကို ရောက်လာရေ။ ဆိုက္ကားသမားကို ဖေသာပီးပနာ အိမ်တန်းခါးဝကို လျှောက်လိုက်တေ။ ဘေးပတ်ဝန်းကျင်တခုလုံး မှောင်ပနာ တိတ်ဆိတ်နီရေ။ အိမ်တန်းခါးနားကိုရောက်စွာနန့် အိမ်ထက်က လူတယောက်ဆင်းလာရေ။

”ဝင်လာခဲ့ညီမ” (မြန်မာဘာသာ)

သူမပါးက အထုပ်သိမ်းယူထားလိုက်တေလူဆိုစွာ သူမချက်ချင်းမှတ်မိလိုက်တေ။ ယင်းလူက အိမ်ထက်ကို ဦးဆောင်ခေါ်လားရေ။ ယောင်ပြင်ခန်းကို ရောက်စွာနန့် နောက်တယောက်ကို တွိလိုက်တေ။ ယင်းလူလည်း သင်္ဘောဆိပ်မှာ သူမပါးက အထုပ်သိမ်းထားရေလူထဲကတယောက်ပါ။ သူရို့နှစ်ယောက်လုံးကို ကြည့်ရစွာ မျက်စိတိ ဂနာမငြိမ်ဖြစ်နီကတ်တေ။ ဆတ်တီခုံထက် အရက်ပုလင်းထောင်ထားကတ်တေ။ ဒေလူတိ အရက်သောက်နီကတ်တေ။ ဇာတွက်ငါ့ကို ဒေအချိန်မှ ခေါ်စွာလဲ။ ဒေလူတိ ရိုးကရိုးယင့်လား။ သူမကြောက်စိတ်ဝင်လာရေ။ ယေလည်း အားတင်းပြီးကေ ခုံဝိုင်းမှာ ဝင်ထိုင်လိုက်ယင်း စိုးရိမ်တကြီးမီးလိုက်တေ။

”ကျမ ဆေးတွေ ….” (မြန်မာဘာသာ)

”ဘာမှမစိုးရိမ်နဲ့ အကိုတို့ အဆင်ပြေအောင်လုပ်ထားတယ်” (မြန်မာဘာသာ)

လို့ သူမစကားမဆုံးခင် ထိုင်နီရေလူက ဝင်ပြောလိုက်တယ်။

”အဲလိုဆိုရင် ကျမဆေးယူပြီး ပြန်တော့မယ်၊ အပြင်မှာ မှောင်နေပြီ။” (မြန်မာဘာသာ)

”ဖြည်းဖြည်းပေါ့ ငါတို့က နင်ကိုမြင်ကတည်းက အယမ်းခင်ချင်နေတာ” ”ရခိုင်မလေးတွေက အယမ်းခင်ဖို့ ကောင်းတာ” (မြန်မာဘာသာ)

လို့ပြောယင်း အရက်တခွက်မော့သောက်လိုက်တေ။ ယင်းလူထိုင်နီရေ ခုံဘေးနားမှာ ဆီးကာတွန်း ချထားစွာကို သူမမြင်လိုက်တေ။

”မှောင်နေလို့ ကျမပြန်တောမယ်နော်….” (မြန်မာဘာသာ)

လို့ပြောပြီးကေ ဆီးကာတွန်းကို ထယူဖို့ အပျင်……

သူမပက်ခုံးးထက်ကို နောက်ကရပ်နီရေလူ လက်နှစ်ချောင်းတင်ယင်း သိုင်းဖက်ဖို့ကြိုးစားလာရေ။ သူမ ရှက်ခြင်း၊ ဒေါသထွက်ခြင်း၊ ကြောက်ခြင်းတိ တပြိုင်တည်းဖြစ်လားရေ။ သူမခန္ဓာ တဆတ်ဆတ်တုန်နီရေ။ ငါဇာလုပ်ကေ ကောင်းဖို့လဲ။ အော်လိုက်ကေ ကောင်းဖို့လား။ မဖြစ်သိမ့် အော်လို့ လူတိသိလားကေ ရှက်ကောင်းထမန်း။ ငါဒေက အယင်ထွက်ပြီးရဖို့လို့ ဆုံးဖြတ်ယင်း ယင်းလူလက်ကို ပုတ်ခါပြီးကေ တန်းခါးဝကို ထွက်ပြီးရေ။ လှီကားထစ်ကို ဆင်းဖို့အပျင်မှာ ယင်းလူ သူမလက်ကိုဆွဲဖို့ကြိုးစားရေ။ ကြောက်စိတ်နန့် ဇကုန်လက်ပြန်တုတ်ပနာ ခြံပြင်ကိုထွက်ပြီးရေ။ ယင်းလူယုတ်မာနှစ်ကောင် နောက်က ထက်ကြပ်လိုက်တေ။ ခြီလှမ်း အလှမ်းလေးငါးဆယ်လောက်ရာပြီးလိုက်ရရေ။ နောက်ကလိုက်လာရေလူ သူမကို မှီလာရေ။ သူမအင်္ကျီကိုအားနန့်ဆွဲပြီးနာ ရှိကိုဆောင့်တိုးလိုက်တေ။ ယောင်္ကျားနန့် မမအား ဇာပိုင်နိုင်ဖို့လဲ။ သူမ ရှိကို အားလွန်ကျပနာ ဘေးကမြောင်းကို လူးကျလားရေ။ နောက်ကလိုက်လာရေ လူယုတ်မာ သူမကိုခွပြီးကေ လက်နှစ်ဖက်ကို ချုပ်ဖို့ကြိုးစားနီရေ။ ဒေတခါတော့ မထူးဗျာယ်။ ငါအော်လိုက်ဖို့ဗျာယ်။ ဒေခွီးသား လူယုတ်မာတိလက်ထဲမှာတော့ ငါအရောက်မခံနိုင်။ သူမ ဟိသမျှအားကို ညှစ်ထုတ်ပနာ အသံကုန်အော်ချလိုက်တေ။ ဇာအသံလည်းမထွက်လာ။ နောက်ကထပ်လိုက်လာရေ နောက်တယောက်လူယုတ်မာက သူမပစကိုဖိထားလိုက်တေ။ တယောက်က ပစပိတ်ယင်း နောက်တယောက်က သူမပေါင်နှစ်ဖက်ကို လှမ်းချုပ်လိုက်တေ။ သူမဟိသမျှအားနန့် အစွမ်းကုန်ရုန်းယင်း ကြောက်လန့်ခြင်း၊ ဒေါသထွက်ခြင်း၊ ရှက်ခြင်း၊ မွန်းကျပ်ခြင်းတိနန့်အတူ အမှောင်ထဲမှာ အမှောင်ကို ထပ်ဆင့်လူးကျလားရေ။

”တေး….တေး….တေး……”

ကားဟွန်းသံကြောင့် သူမ လန့်နိုးးသတိရလာရေ။ ငါဇာကိုရောက်နီစွာလဲ။ အော်..သိဗျာယ် ထိုလင်းပြန်မသား လူယုတ်မှာတိ ငါ့ကို အဓမ္မကျင့်လားခဗျာယ်။ သူမအင်္ကျီသီးတိကို ပြန်တပ်ပနာအထ ဆီးဗူးကို လက်နန့်တိုက်မိလိုက်တေ။ ယင်းလူယုတ်မာတိ သူရို့ဆန္ဒကိုဖြည့်ပြီးကေ ဆီးဗူးကို ထားပစ်ခကတ်တေ။ သူမ ဝမ်းနည်းပက်လက် ငိုချလိုက်တေ။ အော်…မဖြစ်သိမ့်။ လူတိမြင်လို့မဖြစ်။ ဆီးကာတွန်းဗူးကို ကိုင်ထလိုက်တေ။ ဘူးသီးတောင် ဆောင်းရာသီ အအီးဒဏ်ကလည်း သူမကို တစိချေလည်းမညှာတာ။ နှင်းထုတိကြောင့် အားလုံးကို ဝဝါးချေရာမြင်ရရေ။

”ကလိမ်….ကလိမ်….ကလိမ်….” ဆိုက္ကားသမားတယောက် သူမအနားမှာ လာရပ်လိုက်တေ။

”မမ ဆိုက္ကားစီးပါဖို့လား?”

သူမ ဆိုက္ကားသမားနားကို ကပ်လိုက်တေ။ ဆိုက္ကားသမားသူမကို အနီးကပ်မြင်လိုက်စွာနန့် ပြဿနာတခုတက်ထားဗျာယ်ဆိုစွာ သူနားလည်လိုက်တေ။ သူမခန္ဓာမှာ ကျုပ်တိလူးလို့၊ ပြီးကေ ငိုထားရေ။

”မမ ဇာဖြစ်စွာပါလဲ?” ”ကျွန်တော် ဇာကူညီပီးရပါဖို့လဲ?”

သူမ မပြောလို့မဖြစ်ပါ။ သူကတဆင့် လူတိကိုပြောလိုက်ကေ ဒုက္ခကျဖို့ဆိုစွာသူမ သဘောပေါက်တေ။ ယင်းခမီးအမျိုးသားကို အကျဉ်းချုပ်ပြောပြလိုက်တေ။

”တောက်….ခွီးသမီးသား အောက်သားတိ…….တခါမဟုတ်…….” ရင်ထဲကခံပြင်းသံနန့် ပြောလိုက်တေ။

သင်္ဘောဆိပ်ကိုအရောက်မှာ သူမပါးက ငါးရာတန် သုံးရွက်ထုတ်ပီးရေ။ သူအတန်တန်ငြင်းရေကြားက သူမအတင်းပီးပြီးကေ ကတိတခုတောင်းလိုက်တေ။

”အခင် ကျေးဇူးပြုလို့ တယောက်ကိုလည်းမပြောပါကဲ့နန်း။”

သူမအပြန်သင်္ဘောထက်မှာ မငိုအောင်းတတ်နိုင်သရွိထိမ်းချုပ်ထားရေ။ ဝမ်းနည်းခြင်း၊ ဒေါသထွက်ခြင်း၊ မုန်းတီးနာကျီးခြင်း အားငယ်ခြင်းတိနန့်အတူ……. ဘာဘာ ပြောခရေစကားချေကို သတိရလိုက်တေ။

”ဒေလင်းပြန်မသား မြန်မာစစ်သားတိ ကိုယ်ချင်းစာတရားမဟိရေ အကောင်တိ”


မျိုးသာဂီ (ရခိုင်ပြည်)
မှတ်ချက်။ ။ ခမီးအမျိုးသားသူငယ်ချင်းက ပြောပြရေ အဖြစ်မှန်ကို အခြီခံရွီးသားထားပါရေ။

No comments:

Post a Comment