လူ့ဘောင်ပင်ပျို၏ အသက်သခင်ရီသောက်မြစ်

လူ့ဘောင်ပင်ပျို၏ အသက်သခင်ရီသောက်မြစ်
-----------------------------------------------
လူတိကို အခိုင်ခန့်ဆုံးနန့် ကာလအရှည်ကြာဆုံး ညီညွတ်နိုင်စီစွာက ဘာသာစကားနန့်ချိုင်ထားခြင်းပင် ဖြစ်တေလို့ (၁၉) ရာစု ပြင်သစ်နိုင်ငံရေးနန့် လူမှုတွေးခေါ်ပညာသျှင် (တော့ကွီဗီလာ) က သူ၏အထင်ရှားဆုံးစာအုပ်ဖြစ်တေ အမေရိကန်ဒီမိုကရေစီစာအုပ်မှာ ထောက်ပြရွီးထားခစွာကို ဖတ်ရရေ။ အပင်တပင် အသက်ရှင်ကြီးပါလတ်ဖို့ အဓိကကျရေတာဝန်ကို ထမ်းဆောင်နီစွာက ရီသောက်မြစ်ဖြစ်တေပိုင် ဒေအသက်သွီးကြောရီသောက်မြစ်ရာ အဖြတ်ခံလားရဖို့ဆိုကေ ယင်းအပင် နိဂုံးချူပ်ဇာတ်သိမ်းလားဖို့စွာက ကျိန်းသီနီရေ။ ယင်းပိုင်ပျာယ် တယောက်လည်း ကျွန်းချေတိမဟုတ်၊ လူတယောက်ချင်းစီက လူ့အဖွဲ့ အစည်း၏အစိတ်အပိုင်းတိဖြစ်တေဆိုရေ ဆိုရိုးစကားပိုင် လူ့ဘောင်ထဲက လူတိကို ဆက်သွယ်ပီးထားရေ လမ်းမကြီးက ဘာသာစကားပင်ဖြစ်တေ။ ယင်းအတွက်နန့် လူ့ဘောင်ပင်ပျို အသက်ရှင်ဖို့ထောက်ပံ့နီရေ အဓိကမဏ္ဍိုင်ရီသောက်မြစ်က ဘာသာစကားစာပီပင်ဖြစ်တေဆိုစွာ ကမ္ဘာ့လူ့ဘောင်သမိုင်းတိက သက်သီခံနီပါရေ။

ဘာသာစာပီစကားတိ တိမ်ကောပျောက်ကွယ်လားခခြင်းတိကို လေ့လာကြည့်လိုက်ကေ ပြင်ပဖိအားနန့် အတွင်းဖိအားဆိုရေ အဓိကအကြောင်းရင်းနှစ်ခုကို တွိကတ်ရရေ။ ပြင်ပဖိအားကို ဥပမာပီးရဖို့ဆိုကေ လူမျိုးတမျိုးကို တခြားလူမျိုးတမျိုးက သိမ်းပိုက်လိုက်ပနာ အုပ်ချူပ်တေလူမျိုး၏ဘာသာစကားကို အတင်းအဓမ္မသင်ယူကျင့်သုံးစီခြင်းကြောင့် အသိမ်းပိုက်ခံလူမျိုး၏ဘာသာစကားရေ ပျောက်ကွယ်လားတတ်တေ။ အတွင်းဖိအားကတော့ကေ မိမိရို့ဘာသာစာပီစကားကို မိမိရို့ကိုယ်တိုင်က တန်ဖိုးမထားပဲ ပြင်ပ၀န်းကျင်လောကအပြောင်းအလဲနန့် သဟဇာတဖြစ်အောင် ပြုပျင်ပြောင်းလဲမှုမလုပ်နိုင်ခြင်းကြောင့် တိမ်ကောလားတတ်ခြင်းပင်ဖြစ်ပါရေ။

ရိုမန်အင်ပါယာ၏ယုံးသုံးဘာသာစကားအဖြစ်သုံးစွဲလာပနာ (၁၇) ရာစုတိုင်အောင် နိုင်ငံတကာသိပ္ပံပညာနန့် ပညာသျှင်လောကဘာသာဗေဒအဖြစ် ဥရောပတိုက်အနောက်နန့် အလယ်ပိုင်းနိုင်ငံတိမှာကျင့်သုံးခကတ်တေ လက်တင်ဘာသာစကားရေ အခုအချိန်ကာလမှာ တိမ်ကောပျောက်ကွယ်လားခပါပျာယ်။ အုပ်ချူပ်ရေးစနစ်နန့်အတူတူပါလာလတ်တေ ဘာသာစကားဖြစ်လို့ ရိုမန်အင်ပါယာ နှစ်ခြမ်းပြိုကွဲပြီးကေ အာဏာပါဝါတိ တဖြည်းဖြည်းကျဆုံးနိဂုံးချူပ်နီဝင်လားရေအချိန်မှာ လက်တင်ဘာသားစကားလည်း ကပ်ပါလားခရရေ။

ကမ္ဘာကြီးထက်မှာ ဆိတ်သုဉ်းပျောက်ကွယ်လားခရရေ လူမျိုးတိအကြောင်းကို လေ့လာထားရေ သုတေသနစာတမ်းတိက စာပီပျောက်ကေ လူမျိုးပါပျောက်တတ်ကြောင်းကို ဖော်ပြထားကတ်စွာ ဖတ်ရရေ။ စာပီက လူမျိုးတမျိုး ဇာလောက်ယိုင်ကျေးမှုမြင့်ခရေလဲဆိုစွာကို ဖော်ပြရေ။ စာပီမှာ လူမျိုးတမျိုး၏ကိုယ်ပိုင်လက္ခဏာ၊ အဆင့်အတန်း၊ တွေးခေါ်စိုင်းစားမှု အနာဂါတ်အမြင်သဘောထားတိအားလုံးကို ထင်ဟပ်ပေါ်စီရေ။ ယင်းအတွက်နန့် လူမျိုးတမျိုးအကြောင်းကို အတွင်းကျကျသိချင်လေ့လာချင်ကေ ဘာသာစာပီတန်းခါးပေါက်က အယင်ဆုံးဝင်ကတ်ရရေ။ ဘာသာစကားစာပီက လူ့အဖွဲ့အစည်းတိမှာ ပိတ်ထားရေ လက်ခုပ်သီးတိကိုဖွင့်နိုင်ရေ သော့တချောင်းပင် ဖြစ်တေလို့ ပြောကတ်ရပါဖို့။

ကမ္ဘာကြီးတည်တံ့နီရေအချိန်ကာလထိ ရခိုင်ရို့လူ့ဘောင်ပင်ပျို ရှင်သန်နီစီဖို့ ရခိုင့်စာပီရီသောက်မြစ်ကို ရက်ပြတ်လန်းဆန်းနီအောင် ရီလောင်းပြုစုပီးကတ်ရဖို့စွာက ရခိုင်သားတိုင်းတာဝန်ပင်ဖြစ်ပါရေ။ ရခိုင်သားရို့ရင်ဘတ်ထဲက အသွီးအသားတိနန့် ဖြစ်တည်ပါလတ်တေ ဒေရခိုင့်စာပီကို ရခိုင်သားတိကတန်ဖိုးမထားကေ အရာဇာသူရို့က လာပနာတန်ဖိုးထားကတ်ပါဖို့လဲ။

ရခိုင့်မော်ဒန်ကဗျာဆရာမောင်ခိုင်အောင်က ရွက်နုပြန်ချိန် ရခိုင်ကဗျာသီးသန့်စုစည်းမှုစာအုပ်ထဲက ရခိုင်ကဗျာစာတမ်းမှာ “ရခိုင်စကားကိုမသုံး၊ ရခိုင်လီ ရခိုင်နရီမပါကေ ရခိုင်ကဗျာမဟုတ်။ ရခိုင်ကဗျာမဖြစ်။ ရခိုင်ကဗျာလို့ လုံးဝ (လုံးဝ) မသတ်မှတ်နိုင်ပါ။ ကဗျာဆရာတယောက် စကားလုံးရှာစွာရေ စိန်ကောင်းကျောက်ကောင်းရှာစွာနန့်တူရေ။ ယူရေနီယမ်တူးစွာဖြစ်တေ။ ကိုယ့်ရို့ဘာသာစကားထဲက ရင်ထဲကို၊ သွီးထဲကို၊ ဦးနှောက်ထဲကို၊ အာရုံထဲကို စူးကနန်းဝင်ပြီးကေ ဖြိန်းကနန်းဖြစ်လားနိုင်ရေစကားတိကို ရွီးရစွာပါ။ ရှာရစွာပါ။ ဇာလူသားဖြစ်ဖြစ် စွမ်းအားမြင့်ပြီးတန်ဖိုးဟိရေ ဂီတနန့်ကဗျာကို ကိုယ့်အမိဘာသာစကားနန့်ရာ ရီးလို့ရရေ” လို့  စာပီစကား၏အနှစ်သာရကို ထုဆစ်ပြထားပါရေ။

အမင်ကိုချစ်ကတ်တေပိုင် လူ့အဖွဲ့အစည်း၏အသက်သခင်ဖြစ်တေ ဘာသာစကားစာပီကို တန်ဖိုးထားချစ်မြတ်နိုးခြင်းက မြင့်မြတ်တေလူသားဖြစ်ခြင်း၏ ဂုဏ်အင်္ဂါရပ်ကို ဖော်ညွှန်းပြခြင်းပင်ဖြစ်ပါရေ။ မျိုးဆက်သစ်ညွန့်ဖူးချေတိ ရခိုင်ရို့ လူ့ဘောင်မှာ စိုင်ဆက်မပြတ်ရှင်သန်လာပနာ ကျေးဇူးသျှင်အဘိုးအဖီးရို့ခံစားချက် ရင်ထဲမှာဖြစ်တည်နီခကတ်စွာတိကို လက်ခံယူလားနိုင်ဖို့ ပေါင်းကူးတန်းထားက ရခိုင်ရို့ဘာသာစကားစာပီရာဖြစ်တေလို့ ပြောချင်ပါရေ။ စာပီမဟိကေ နားလည်မှုမဟိရေပိုင် သွီးစစ်တေအမျိုးသားညီညွတ်ရေးကိုလည်း တည်ဆောက်လို့ရဖို့ မဟုတ်ပါ။ ရခိုင်ဘာသာစကားတိုးတက်ဖွံ့ဖြိုးခြင်းကရာ ရခိုင်ရို့ လူ့ဘောင်အနာဂါတ်ကိုလားဖို့  လမ်းမှန်ပြအလင်းရောင်ထွန်းပီးနိုင်ဖို့လို့ ယုံကြည်မိပါယင့်။

ခိုင်အောင်အောင်
(29/03/2009)