Wednesday, September 16, 2009

လင်းဋ (သို့မဟုတ်) လဒ


လင်းဋ (သို့မဟုတ်) လဒ
=================
အခါတပါးတွင် အလွန်သန်မာဖြတ်လတ်သော ၀ံလက်ငှက်တကောင်သည် ပင်လယ်ကမ်းစပ်နား ကျောက်ဆောင်များကို မင်းမူကျက်စားလျှက်ဟိသည်။ သူသည်မျက်စိအမြင်လည်း အလွန်ကောင်းသည်။ ပင်လယ်ရီပြင်အောက် (၁၂) တောင်အနက်ကို ဖောက်ထွင်းမြင်နိုင်စွမ်းဟိသည်။ ငါးကြီးငါးငယ် ငါးလိပ်ကျောက် ငါးလက်ခွာ တကောင်မကျန် သူ၏စူးချွန်သော ခြီလက်သဲဖြင့် ကုတ်ယူဖမ်းယူနိုင်စွမ်းဟိသည်။ ထို့ကြောင့် သူအား ရီပြင်၊ မြီပြင်၊ လီပြင် သုံးခွင်ပိုင်စိုး ၀ံလက်မျိုးဟု တင်စားခေါ်ဝေါ်သည်။ ထို့ကြောင့် သူသည် သူ့ကိုယ်သူ အလွန်မြောက်ကြွဂုဏ်ယူသည်။ ငါ့ပိုင်လူ အေကမ္ဘာမှာ မဟိ။

အခါတပါး သူသည် ဈာန်ဝင်၍ လီပြင်အာကာကောင်းခင်၌ လီဟုန်စီးဝဲပျံနီဆိုက် သူမင်းမူကျက်စားရာ ကျောက်ဆောင်အနီးအနားပတ်ဝန်းကျင် တောနက်ထဲတွင် အလွန်လှပသော ဥဒေါင်းတကောင်ကို မမျှော်လင့်ဘဲ ဖူးတွိရလိုက်သည်။ ဥဒေါင်းမင်းသည် နီခြည်အောက်တွင် သူ၏အမွှီးအတောင်များကို ဖြန့်ကားလျှက် ကမြူးနီဆိုက်ဖြစ်သည်။ ပြိုးပြက်သောရောင်ခြည် နီဝါသောရွှီအဆင်းဖြင့် ကတ္တီပါကော်ဇောဖြန့်ကြက်ထားသကဲ့သို့ တောက်ပသောဇာခြည်ဇာကွက်များဖြင့် အလွန်လှပတင့်တယ်သည်ဖြစ်၍ သူ့စိတ်ကူးထဲတွင် ဥဒေါင်းမင်းကဲ့သို့ လှပသောအမွှီးအတောင်များပိုင်ဆိုင်လိုစိတ် တဖွားဖွားဖြစ်ပေါ်လာသည်။

(ငါ့မှာ သံလျှက်ကဲ့သို့ ထက်မြက်သော ခြီသဲလက်သဲတိလည်းဟိဗျာ။ ပတ္တမြားကဲ့သို့ စူးရှတောက်ပသော မျက်လုံးအစုံလည်းဟိဗျာ။ ကမ္ဘာမြီပြင် တော်ငလျှင် သိမ့်သိမ့်တုန်စီလောက်သော ပြင်းပြသော တောင်ဖံတစုံလည်းဟိဗျာ။ ငါ့အမွှီးအမျှင်များသည်ရာ ဥဒေါင်းမင်းကဲ့သို့ ရောင်စုံဇာကွက်များဖြင့် ပြိုးပြက်တောက်ပ လှပသည်ဟိသော် အစာလောက်ကောင်းလိုက်မည်နည်း။ အေကမ္ဘာမှာ ငါ့ပိုင်ယှောင် သတ္တ၀ါဟိခန့်သိမ့်လား။)


သို့သော် ၀ံလက်မင်းသည် သူ့အမွှီးအမျှင်များ အရောင်တောက်ပလာအောင် ပဇောင်လုပ်ရခန့်နည်း အကြံအိုက်လျှက်ဟိသည်။ ငါးသတ္တ၀ါများထဲတွင် ၀မ်းဖောင်းဖောင်းဖြင့် ပကျင်းသတ္တ၀ါများသည် အလွန်ပညာဟိသည်ဟုကြားဖူးသည်။ သူ့အားမီးမြန်းစုံစမ်းကြည့်မှဖြစ်မည်ဟု အကြံရသည်။ သို့ဖြင့် သူသည် သျှစ်မိုင်အကွာ ဖြားရီတက်တွင် ပေါလောမျိုးနီသော ပကျင်းတကောင်အား တဟုန်တည်းဖြင့်ချီကုတ်လိုက်သည်။

(ဟေ ပကျင်း သင်သည် အသက်ရှင်သည်ကို အလိုဟိခန့်၏လော။ သင်သည် အသင်ရှင်ခြင်းကို အလိုဟိခန့်ဖြစ်သည်ဆိုပါက ငါ့အားမှန်ရာကို သံတော်ဦးမြတ်လျှောက်တင်လော့။ ငါ့အမွှီးအမျှင်များ အရောင်တောက်ပလာအောင် ပဇာလုပ်ရခန့်နည်း။)

(အို ကျေးဇူးကြီးလှစွာသော အသက်သခင်ဝံလက်မင်းဘုရား။ အသျှင့်၏အမွှီးအမျှင်များ ရောင်စုံပြိုးပြက်တောက်ပသည်ကို အလိုဟိတော်မူပါက ပင်လယ်ထဲသို့ မိုးထက်တကြိမ်၊ နိခြင်းတကြိမ် ညဇာတကြိမ် တနိသုံးကြိမ် ဒိုင်ပင်ထိုးတော်မူပါဘုရား။ ရက်များမကြာ အသျှင်၏အမွှီးအမျှင်များသည် ပင်လယ်ငွေဇာခြည်လွှာများကဲ့သို့ ပြိုးပြက်တောက်ပလာမည်မှာ အမှန်ဖြစ်ပါသည်ဘုရား။)

(ပညာဟိ ပီသပါပေ၏ အိုအသင်ပကျင်း။ သင်သည် သင်၏ဥပဓိရုပ်ရည်ရူပက ကြန်အင်လက္ခဏာနှင့်အညီ သူတော်သူမြတ်ဖြစ်ပေ၏။ သင့်အသက်ကို ငါချမ်းသာပီးမည်။ ဤနိဤရက်မှစ၍ သင့်အသားစားခြင်းကို ငါယှောင်ကြည်မည်။ ထိုအချိန်မှစ၍ ၀ံလက်ငှက်သည် ပကျင်းသားကို မစားခြင်းဖြစ်သည်။)

ပညာဟိပကျင်း၏အကြံကိုရယူပြီးနောက် ၀ံလက်မင်းသည် တနိသုံးကြိမ် ပင်လယ်ထဲသို့ မပျက်မကွက်ဒိုင်ပင်ထိုးသည်။ အာကာတိမ်စွန်ဖျားသို့ တောင်ဖံကို တဟုန်ချင်းရိုက်ခတ်ပျံတက်ပြီး ပင်လယ်ပြင်သို့ မိုးကြိုးပစ်သကဲ့သို့ ဒိုင်ပင်ထိုးချလိုက်သည်။ အသျှိန်အဟုန်သည် ပြင်းထန်လှသည်ဖြစ်၍ လှိုင်းလုံးကြီးများကျောက်ဆောင်သဲသောင်ပြင်သို့ တဘုန်းဘုန်းတအုံးအုံး ရိုက်ခတ်မြည်ဟီးလားသည်။ ရက်များမကြာ ၀ံလက်မင်း၏နဖူးလိုင်ဖင်းက အမွှီးမျှင်များအားလုံး ကျွတ်ထွက်ကုန်သည်။ အအီးပက်၍ နှာစီးခြောင်းဆိုးသနပတ်လိုက်သည်။ အင်အားများလည်း ချိနည်းလာသည်။ မျက်စိလည်းမှုန်လာသည်။ ငါးအစာများကိုလည်း အယင်ပိုင်ယှောင် ထိုးကုတ်ဖမ်းယူနိုင်ခြင်းမဟိတော့။ ကုတ်ရာတခြား ခြစ်ရာတခြားဖြစ်ကုန်သည်။ အစာဖမ်းမရသောအခါ သောင်ပြင်ကမ်းစပ်က ခွီးသီပုတ်ကောင်များကိုရာ စားကိန်းကြုံသည်။ ခွီးပုတ်နွားပုတ်များကိုစားယင်းသောက်ယင်း အများမကြာ ၀ံလက်မင်းသည် ဥဒေါင်းမင်းဖြစ်မလာဘဲ (လဒမျိုး) ဖြစ်လားရလီပါတော့သည်။

လူအများက လဒများလည်း မိုးထိအောင်ပျံနိုင်သဖြင့် ၀ံလက်ငှက်နှင့်ထင်မှတ်မှားတတ်ပါသည်။ သို့သော် လဒများမှာ လဒအကျင့်ကိုကျင့်၍ လဒစိတ်ဟိသူများဖြစ်သည်။

(သာလှဦး)

No comments:

Post a Comment