Friday, May 8, 2009

ဂျတ်လူမျိုးများ (၂)


ဂျတ်လူမျိုးများ(၂)
------------------------
ကြာဆိပ်အင်းရွာတရွာလုံး ငြိမ်ဆိတ်လျှက်ဟိသည်။ ပုရစ်ချေ၊ မြွီချေ၊ ဖားချေမြည်သံကလွဲလို့ လူသူတိတ်ဆိတ်နီသည်။ မြောင်ဘက်င်္သချိုင်းတောက ခဲဝါအူသံများ တချက်နှစ်ချက်ကြားနီရသည်။ အဘောင်ကြာဇံသာတယောက် သဘောက်ခင်းအိပ်ဖို့ပျင်နီစဉ်တွင် ခဲဝါအူသံများထွက်ပါလတ်သည်။ ကြားနီကျဖြစ်၍ အဘောင်ကြာဇံသာ ခဲဝါအူသံများကိုဂရုမစိုက်ဘဲ အိပ်ရာတွင် ဂေါင်းချလိုက်သည်။ ကကောင်းမကြာ လူတစု အဘောင်အိမ်ရှိတန်းခါးကို လာခေါက်သည်။ "အသူရို့လဲ ညဥ့်မိုက်သိုင်ခေါင်" ဟု အဘောင်က မီးလိုက်သည်။ “အကျွန်ရို့ ထိုဖက်ရွာကပါ၊ အကျွန့်မယား ကိုယ်ဝန်ကြင်နီလို့။ ကျေးဇူးပြုလို့ ကူညီပါ"

အဘောင်ကြာဇံသာသည် ဗိန္ဓောလက်သည်တယောက်ဖြစ်သည်။ ရွာနီးဝန်းကျင်တွင် သူမ မမွီးပီးခသော လူမဟိ။ အသူပင် ကိုယ်ဝန်ကြင်ကြင် အဘောင်ဘားသို့ အပြီးလာကတ်သည်။ အဘောင်က ဇာချိန်မှာလာခေါ်လာခေါ် ပြီး၍လား၍ ကူညီတတ်သည်။ အခုလည်း အဘောင်တယောက် ပရုန်းနရုန်းထပြီး တန်းခါးလားဖွင့်ပီးလိုက်သည်။ အလွန်လှပခန့်ငြားသော လူလတ်ပိုင်းအရွယ် (၅) ယောက်သည် အဘောင်ကို အပြုံးနှင့်ဆီးကြိူလျှက်ဟိသည်။ "အဘောင် အကျွန်ရို့ အင်္ဂရားချိုင်ရွာကပါ။ အကျွန့်မယား အချေမမွီးနိုင်လို့ အကူအညီလာတောင်းစွာပါ။ အဘောင် လမ်းလျှောက်ကေ ညောင်းဖို့မှန်းသိလို့ အကျွန်ရို့ ထမ်းကုတင်ပါ တခါတည်းယူလာပါရေ" ဟု လူရွယ်တယောက်က ရှိကိုတလှမ်းတိုး၍ပြောသည်။ "အေး ကောင်းယင့်" ဆိုပနာ အဘောင်လည်း ကုတင်ထက် တက်ထိုင်လိုက်သည်။ ထိုရွာသို့ရောက်ဖို့ (၂) ချက်တီးလောက်ကြာသည်။ ထူးဆန်းသည်မှာ ထိုလူရွယ်များသည် တယောက်နှင့်တယောက် စကားလုံးဝမပြော။ အဘောင်စိတ်ထဲတွင် “ကကောင်းစကားနည်းရေ အချေတိရာမလား” ဟု စဉ်းစားနီမိသည်။

(၂) ချက်တီးလောက်အကြာတွင် သူရို့ရွာစကို နင်းမိသည်။ တရွာလုံး တိတ်ဆိတ်နီသည်။ ရွာလယ်ကောင်တည့်တည့် အိမ်တအိမ်မှ မီးရောင်ကိုမြင်ရသည်။ ကျွန်းရွာအတိုင်းအတာအရ ဒေအိမ်သည် လူရတတ်အိမ်ဖြစ်ဖို့များသည်။ လူများသည် အဘောင်ကြာဇံသာအား ထိုအိမ်ထက်သို့ ဆောင်ယူလားကတ်သည်။ အိမ်သည် ပျိုင်စီပျိုင်ထောင် အိမ်ကြီးရခိုင်ဖြစ်သည်။ တန်းပျင်းခန်းကိုဝင်သောအခါ အလွန်တရာမွှီးကြိုင်လန်းဆန်းသော အနံ့တမျိုးကို လျှူလိုက်မိသည်။ အဘောင်ကို အသက် (၅၀) ခန့်အရွယ် အမျိုးသမီးနှစ်ယောက်က ဘယ်လက်ခေါင်အခန်းသို့ ခေါ်ဆောင်လားသည်။ လူရွယ်များကမူ တန်းပျင်းခန်းတွင် ထိုင်လျှက်စောင့်ကြည့်နီသည်။ ဘယ်လက်ခေါင်အခန်းတွင် အသက် (၂၅) ခန့်အရွယ် အလွန်တရာချောမောလှပသော အမျိုးသမီးတယောက် အချေမမွီးနိုင်ဘဲ အော်ညီးလျှက်ဟိသည်။ အများမကြာ "အုံးဝန်၊ အုံးဝန်" ဟု အချေငိုသံထွက်လာသည်။ တန်းပျင်းခန်းတွင်ထိုင်စောင့်နီသော အဖသေလည်း ကောင်းကောင်းပျော်လားသည်။ အချေမှာ တုတ်တုတ်၀၀ချစ်ဖို့ ကကောင်းကောင်းသည်။ တအိမ်လုံးသား အဘောင်ကို ကောင်းကောင်းကျေးဇူးတင်သည်။

မွီးဖွားပြီးသောအခါ အဘောင်က အ်ိမ်ပြန်ပို့ရန် လူရွယ်များကိုပြောသည်။ ထိုအခါ လူရွယ်များက "အဘောင် သန်းခေါင်လည်းကျော်လားပါယာ၊ အိမ်ကို မိုးထခါ ပြန်ပါဖိ၊ အကျွန်ရို့ အဘောင်အတွက် အိပ်ရာခင်းထားပြီးပါယာ၊ အေမှာ တညအိပ်လိုက်ပါ" ဟုဆိုသည်။ အဘောင်လည်း ခရီးညောင်းလာသဖြင့် မိုးထမှပြန်ရန် သဘောတူလိုက်သည်။ ထိုအထဲမှ လူရွယ်တဦးသည် အဘောင်အား အိပ်ခန်းထဲသို့ ခေါ်ဆောင်လားသည်။ အိမ်ကလည်းကြီးရေပိုင် အိပ်ခန်းကလည်း ကျယ်သည်။ အခန်း၏နံရံလေးဖက်တွင် မျိုးစိုင်ဘောင်ဆက်ဟုထင်ရသော ဓာတ်ပုံကြီးများ ချိတ်ဆွဲထားသည်။ အိပ်ကုတင်မွိရာကြီးမှာ အလွန်နုညံ့ညက်ညောလှသည်။ အခန်းထဲမှ စံကားနံ့ကဲ့သို့ မဖော်ပြနိုင်သော အနံ့တမျိုးရသည်။ ထိုအနံ့ကြောင့် အဘောင်သည် အိပ်ရာထက်တွင် လှဲလိုက်သည်နှင့်ချက်ချင်း အိပ်ပျော်လားသည်။

ကြာဆိပ်အင်းရွာမှ အဘိုးသာကျော်ဦးသည် ထုံးစံအတိုင်း မိုးထ (၅) ချက်တီးလောက်တွင် အိပ်ရာမှထလိုက်သည်။ မိုးမလင်းခင် သူများထက် အယင်ထမှ နွားချီးမှိုအများကြီးကောက်လို့ရဖို့။ နွားချီးခြောက်များမှ ဖြူဖြုဆွဆွထွက်နီသောမှိုပွင့်များကို ဆောင်းရာသီတွင် စောစောထ၍ အလုအယက်ကောက်ရသည်။ ယင်းအလုပ်ကို အဘိုးတသက်လုပ်စားပါလတ်စွာ။ ဒေနိလည်း အဘိုးတယောက် ၀မ်းရီးအတွက် ချမ်းချမ်းနှင့် ပုဆိုးကိုခေါင်းကချုံလျှက် မှိုကောက်ထွက်လာသည်။ ရွာတောင်ဖက် နှစ်ခရီးလောက်လျှောက်ပြီးသောအခါ လယ်စွက်အများကြီးဟိသော ချောင်းနားဖက်သို့ရောက်သည်။ အရှိဝါးလေးပြန်လောက်အကွာ လယ်ကန်းသင်းထက်တွင် ထူးထူးဆန်းဆန်း လူတယောက်လဲနီသည်ကို တွိရသည်။ ထိုလူသည် အသက်အားဖြင့် အဘိုးနှင့် ရွယ်တူဟုထင်ရသည်။ အဘိုးသည် ထိုလူနားသို့လားကြည့်သောအခါ သူရို့ရွာက ၀ါကြီးမ အဘောင်ကြာဇံသာဖြစ်နီသည်။ အဘိုးသည် အဘောင်အား သူမလက်မောင်းကိုကိုင်လျှက် "ယော် ၀ါကြီးမ ကန်းသင်းထက်မှာ အိပ်နီရေကာ။ မိုးလင်းယာ ထဖိ" ဟု နှိုးလိုက်သည်။ အဘောင်သည် ဗြုန်းဆို ငေါက်စောက်ထလိုက်သည်။ ပြီးနောက် အဘိုးကိုကြည့်လျှက် "ယော်.. ငါဇာကိုရောက်နီရေလဲ။ ညက မွိရာထက်မှာအိပ်နီစွာ အခု ကန်းသင်းထက်မှာရာ ရောက်နီရေကား" ဟု ယောင်ယမ်းပြီးပြောသည်။ ထိုအခါ အဘိုးသာကျော်ဦးက "ဘလောက်ရယ်ဖို့ကောင်းရေ ၀ါကြီးမလည်းချင့်။ ကန်းသင်းထက်မှာ တုံးစင်းစင်းလို့။ မိုးလင်းကြောင်တောင်ထိ အိပ်နီပြီးကေ" ဟုပြောလျှက် အူဆို့ပါအောင်ရယ်သည်။ ထိုအခါမှ အဘောင်သည် ညကတွိကြုံခရသော အဖြစ်အပျက်ကို အတွက်ရသည်။ ညက ဂျတ်လူမျိုးများခေါ်ဆောင်ခြင်းခံရသည်ကို အဘောင်ကြာဇံသာကလွဲလို့ တခြားမည်သူတယောက်ကလည်း သိနိုင်လိမ့်မည်မဟုတ်။

အေးမောင် (ရင်အုံတော်ဓာတ်)

No comments:

Post a Comment