စောင့်လီမျိုးနွယ်

စောင့်လီမျိုးနွယ်
-----------
အော် ငါ့၏ချစ်သွီး ရခိုင်သူ ရခိုင်သားရို့ နှလုံးသားမှာ စာတင်မှတ်လို့ အတုယူဖို့ ငါ့သွီးငါ့သားရို့ကို အဖိုးပုံပြင်တပုဒ် ထုတ်ကာပြလို့ ပြောပြမယ်ဝေ နားစိုက်ထောင်ကတ် ငါ့ချစ်သွီးရို့။

ထိုးလွန်လီခကာ ပြည်ဗာရာမှာ ဗြဟ္မာဒတ်မင်း မင်းပြုစိုးစံအုပ်ချုပ်လို့ နီရေလတ်ဝေ ငါ့ချစ်သွီးရို့။ ယင်းအချိန်မှာ စိန္တာမယံ ဘုရားလောင်းလည်း တောတောင်အုပ်စိုး ခြင်္သေ့ဖြစ်၍ ဟိမ၀န္တာ ရွှီဂူသာမှာ နီရေလတ်။ ထိုခြင်္သေ့မှာ နှမတကောင် ညီခြောက်ကောင်ဟု သွီးရင်းချစ်လည်း ဟိရေလတ်။ ခြင်္သေ့အုပ်စိုး ရွှီဂူနားဝယ် ငွေတောင်ထွဋ်သာ ဖန်ဂူမှာကား တိရိစ္ဆန်ဖြစ်ငြား မျိုးမစစ်သား ခဲဝါယုတ်လည်း နီရေလတ်ဝေ။ မျိုးမြတ်သခင်ခြင်္သေ့ရို့ကား သဲချစ်နှမ ညီမချေအား ဂူဝယ်ထားကာ အစာရှာထွက်၍ ပြန်လာသောခါ ညီမငယ်အတွက် ၀မ်းစာဖြည့်ဖို့ စားကောင်းမျိုးစုံ ယူဆောင်လာခါ ကျွေးကတ်တေလတ်။

တနိသောခါ မျိုးမစစ်သား ခဲဝါယုတ်သည်ကား ခြင်္သေ့မကို မြင်သောခါဝယ် ချစ်ခင်နှစ်သက် ဖြစ်မိရေလတ်။ ထိုကြောင့်သာပင် အစ်ကို ခုနှစ်ကောင် ခြင်္သေ့မင်းရို့ အစာရှာထွက်ချိန် အခွင့်သာကို စောင့်ယူလတ်၍ မျိုးမြတ်က်ိန်းရာ ရွှီဂူသာသို့ လားလတ်ပြီးကေ ခြင်္သေ့မအား...

“အသဲနက်နဲ ဘ၀အပ်၍ ချစ်ခင်ရသော အော်နှမငယ်။ အသျှင်မလည်း ခြီလေးချောင်ဟိ သတ္တ၀ါမျိုး ဖြစ်ဘိလတ်၏။ အကျွန်သည်လည်း သျှင်မပိုင်ယာ ခြီလေးချောင်းဟိ သတ္တ၀ါမျိုး ဖြစ်ဘိလတ်၏ ။ သို့အတွက်ကြောင့် နတ်မျှမက ရုပ်သွင်တင့်ဘိ သျှင်မသည်ကား အကျွန်ုပ်အား ကြိုက်တော်မူခါ ချစ်ခွင့်သာပန်း ပီးလတ်ပါ သျှင်မ။ အကျွန် တူနှစ်ကိုယ် ရွှီရည်ဆင်း၍ အကြင်လင်မယား အဖြစ်ဆောင်ကာ နီကတ်ပါအံ့ အို ချစ်သောနှမ ဘ၀သျှင်။ တူနှစ်ကိုယ်ပေါင်း သာယာအိမ်ထောင် တည်ဆောက်ကတ်မေ အို ချစ်နှမချေ အိမ်မက်သျှင်" လို့ ချစ်ခွင့်ပန်ခါ ပြောရေလတ်ဝေ အော် ချစ်သွီးရို့။

အော် ငါ့ချစ်သွီးရို့

ခြင်္သေ့မကား မျိုးမစစ်သား ခဲဝါစကား ကြားလတ်တေခါ နှလုံးမသာ ကိုယ့်ကိုယ်ကိုပင် ရှက်ကြောက်လတ်၍ ဤကဲ့သို့ပင် ကြံမိရေလတ်။ "ဒေခဲဝါကား ခြီလေးချောင်းဟိ သားကောင်ရို့တွင် အယုတ်ညံ့ဆုံး မျိုးမစစ်၍ စက်ဆုပ်ဖွယ်ပင် ဟိချေ၏တည်း။ ငါ့ရို့သည်ကား မျိုးမြတ်သားနွယ် မင်းမျိုးသျှင်ဟု လောကသားတိုင်း သမုတ်အပ်သော စံဝင်သူများ ဖြစ်ချေဘိ၏ ။ ဒေခဲဝါကား ငါနန့်မထိုက် စကားကိုရာ ဆိုလာဘိ၏။ ငါသည်သာကား မျိုးမစစ်သား ခဲဝါစကား ကြားခါမျှပင် ရှက်လှချေ၏။ အသက်ရှင်လျှက် ငါမနီယာ ကိုယ့်ကိုယ်စတေး သတ်သီလတ်၍ ငါ့အမျိုးအား ငါစောင့်မည်ဟု ကြံစည်ရေလတ်ဝေ ငါ့ချစ်သွီးရို့"

ထိုနောက်မှာကား ကိုယ့်ကိုကိုယ်ထိမ်း တခါဆင်ခြင် စိုင်းစားပြန်ကေ ယုတ်ညံ့စကား ခဲဝါယုတ်ကြောင့် ဒေအကြံကား မသင့်လှပေ။ ငါ၏အစ်ကို မောင်ရို့လာမှ ဖြစ်အင်သနစ် အစုံလှစ်၍ ပြောပြပြီးမှ ငါသီမယ်ဟု ဆုံးဖြတ်ပြီးခါ အစ်ကိုအလာ စောင့်နီရေလတ်။ ခဲဝါယုတ်လည်း ခြင်္သေ့မငယ် နှုတ်ခမ်းလွှာမှ တုံ့ပြန်စကား မကြားသောခါ နှလုံးမသာ စိတ်မရွှင်ပဲ ဖန်ဂူသို့ယာ ပြန်လားပြီးခါ အိပ်နီရေလတ် အို ချစ်သွီးရို့။

ထိုချိန်ခါဝယ် အစ်ကိုငယ်ကား နှမအတွက် အစာချီလျှက် တောမှပြန်လာ ၀မ်းသာစွာဖြင့် အစာကောင်းအား ၀မ်းစာဖြည့်ဖို့ ပီးရေလတ်ဝေ။ ထိုသောခါဝယ် နှမငယ်က "အော် အစ်ကိုငယ် ငါသည်မူကား ဇာအစာမျှ မစားလိုပါ။ ကိုယ့်ကိုကိုယ်ရာ သတ်သီဖို့ယာ အော် အစ်ကိုငယ်" ဟုပြောရေလတ်ဝေ။ အစ်ကိုငယ်ကား နှမစကား ကြားသောခါဝယ် "အော် ငါ့၏ချစ်သွီး ငါ့နှမငယ် စွာအကြောင်းကြောင့် သီချင်လဲဝေ။ ငါ့ကိုပြောပြ ယှင်းပြအုံးဝေ နှမချေ" လို့ ပြန်မီးလိုက်တေလတ်ဝေ။ ယင်းချိန်ခါဝယ် ခြင်္သေ့ညီမ နှမချေလည်း ခဲဝါဆိုလာ စကားဖြာကို ပြန်ပြောင်းပြောပြ သိစီရေလတ်။ ညီမစကား ကြားသောခါဝယ် ခြင်္သေ့ငယ်မှာ ပြင်းစွာဒေါသ ခြောင်းခြောင်းထွက်၍ မစူးစမ်းဘဲ ခဲဝါဟိရာ အရပ်သို့ယာ ပြီးလားရေလတ်။ ဖန်ဂူထဲမှ အိပ်နီသောသူ ခဲဝါယုတ်ကို မြင်သောခါကား ဟင်းလင်းပြင်ထဲ တလင်းထဲဝယ် အိပ်နီရေဟု ထင်မှားမှတ်၍ ကိုက်သတ်မေဟု အချိန်ပြင်းပြင်း တဟုန်ထိုးဖြင့် ပြီးဝင်သောခါ ဖန်ဂူမှာဆောင့် ရင်ကိုထိ၍ ရင်ကွဲခါပင် တောင်ခြီရင်းသို့ လွင့်စိုင်မျောပါး ကျလတ်၍သာ သီရလီ၏ အို ချစ်သွီးရို့။

ကျန်ရစ်ငါးကောင် အစ်ကိုငယ်ရို့ ထိုအတိုင်းပင် ဖန်ဂူနှင့်ဆောင့် ရင်ကိုထိ၍ ရင်ကွဲကာပင် တောင်ခြီသို့ကျ လွင့်စိုင်မျောလို့ သီကတ်ရရေ ငါ့ချစ်သွီးရို့။ နောက်ဆုံးမှာကား အကြီးဖြစ်သူ ရာဇာခြင်္သေ့ ပြန်လာသောခါ နှမငယ်လည်း ခဲဝါစကား ယင်းအတိုင်းသာ အကြောင်းစုံလျှောက် ပြောပြလတ်၏။ ခြင်္သေ့မင်းကား ညီမငယ်အား "အော် ချစ်နှမငယ် မျိုးမစစ်သား ယင်းခဲဝါကား စွာမှာနီလဲ" လို့ မီးလိုက်တေလတ်။ နှမချေလည်း "အော် အစ်ကိုရာဇာ ငွေတောင်ထိပ်သာ ဟင်းလင်းပြင်မှာ အိပ်နီစွာကို မမြင်လား" လို့ လက်ညှိုးညွှန်ထိုး ပြရေလတ်။

ထိုသောခါဝယ် ခြင်္သေ့မင်းကား "ဤ ခဲဝါသည် ဟင်းလင်းပြင်ထဲ အိပ်ဖို့မထင်။ ဖန်ဂူမှာယာ အိပ်နီစွာပင် ဖြစ်ရမည်" ဟု စိတ်မှာစွဲထင် ကြံစည်ပြီး၍ တောင်ခြီရင်းသို့ ဆင်းရေလတ်ဝေ။ တောင်ခြီရင်းသို့ ရောက်သောခါဝယ် ဇီဝိန်ကင်းချုပ် အသက်ပျောက်၍ သီပွဲဝင်လတ် ညီငယ်ရို့ကို တွိလီသော်ကား "ငါ့၏ချစ်သွီး ညီငယ်ရို့ကား စူးစမ်းဆင်ခြင် ပညာညာဏ်မဲ့ မိုက်မဲကြောင့်သာ ဖန်ဂူကိုမမြင် မသိလီဘဲ ရင်ဖြင့်တိုက်ကာ သီကုန်ကတ်” ဟု ဆင်ခြင်ပြီးကာ “ပါးစတွင်းသို့ ထိုးသွင်းအပ်ရေ ပူသောအစာ အာဟာရကား ပါးစကိုရာ ပူလောင်စီသို့ ယင်းကဲ့သို့ပင် ညာဏ်ပညာကင်း မစူးစမ်းပဲ ဆင်ခြင်နည်းမှု ပြုလုပ်လတ်တေ ကိစ္စသည်ကား ပြုလုပ်သူအား ပူလောင်စီသည် မှန်စွာမလွဲ မုချသာတည်း" ဟု ပြောဆိုပြီးကာ ငါ့ညီရို့ကား လိမ္မာမှုကင်း ဆင်ခြင်နည်း၍ သီကတ်ရ၏။ ငါသည်မူကား ငါ့ညီရို့ပိုင် မပြုလီပဲ မျိုးမစစ်သား ခဲဝါယုတ်အား ဖန်ဂူထဲဝယ် အိပ်လျှက်ပင် နှလုံးကွဲကာ သီဆုံးစီအံ့" ကြုံးဝါးရေလတ် ငါ့ချစ်သွီးရို့။ ထိုသို့ပြီးခါ ခဲဝါတက်ရာ ဆင်းသက်ရာဟု လမ်းကိုမှတ်၍ ထိုလမ်းသို့ရာ ရှိရှုပြီး၍ သုံးကြိမ်စွက်စွက် ဟောက်ရေလတ်။ ခြင်္သေ့ဟောက်သံ မိုးကောင်းခင်ထိ ပဲ့တင်ထပ်လို့ မြိုင်လီသောကြောင့် ဖန်ဂူမှာအောင်း ခဲဝါစုတ်လည်း အိပ်လျှက်ပင် နှလုံးကွဲအက် သီလီရေလတ် အော် ချစ်သွီးရို့။

ရာဇာခြင်င်္သေ့ မင်းမဟာလည်း ခဲဝါသီမှန်း သိသောခါဝယ် ညီငယ်သွီးချစ် ခြောက်ကောင်ရို့အား စုကာပေါင်းလို့ တောအုပ်မြိုင်သာ နန်းရိပ်သာဝယ် မြီမြှုပ်သဂြိုဟ် ပြုလီရေလတ်ဝေ။ ထိုပြီးသောခါ နှမဟိရာ ရွှီဂူသာသို့ ပြန်ကာနှင်း၍ နှမချေအား ခဲဝါနှင့်ညီ ခြောက်ကောင်ရို့မှာ သီဆုံးလားကြောင်းပြောပြရေလတ်။ ခြင်္သေ့နှမ ညီမချေလည်း ခဲဝါသီမှန်း သိသောခါဝယ် စိတ်မှာရွှင်လန်း သက်သာရ၍ ရွှီဂူ၌ပင် အသက်ထက်ဆုံးနီလားရေလတ် ချစ်သွီးရို့။

အော်ချစ်သွီးရို့ အဖိုးပြောလတ် ပုံပြင်ဟောင်းလည်း ဒေနီရာမှာပင် ဆုံးယာဝေ။(တဒုကနိပတ် သိင်္ဂါလဇာတ်)

(သျှင်အရိယာဝံသ)