Arakan Online Magazine: May 2015

သာလှဦး
=====

သာလှဦးဆိုသည်မှာ နာမည်နှင့်လိုက်အောင် သာလည်းသာ လှလည်းလှ ဦးလည်းဦးသူဖြစ်သည်။ သူသည် သူ့ကိုသူ ရခိုင်စာပီသုတေသီကြီးအဖြစ် အလှပလှ ဘ၀င်မြင့်လျှက်ဟိသည်။ ရခိုင်စာပီနှင့်ပါတ်သက်၍ ဆောင်းပါးများစွာ စာအုပ်များစွာ ရွီးသားထုတ်ဝီပြီးဖြစ်သဖြင့် ပရိသာတ်ထောက်ခံမှုအား အပြည့်အ၀ရဟိထားသူဖြင့်သဖြင့် မိမိကိုယ်ကို ကောင်းကောင်း ကြေနပ်အားရဖြစ်လျှက်ဟိသည်။ သို့သော် သူ၏စိတ်ထဲမှာ တခုခု ဘ၀င်မကျဖြစ်လျှက်ဟိသည်။ တခြားသော ရခိုင်စာပီပညာသျှင်များမှာက သတ်ပုံတယောက်တလုံးကျစီ ပိုင်ပိုင်နိုင်နိုင်ဖျက်ဆီးနိုင်လိုက်ပြီးဖြစ်သည်။ ဖျက်ဆီးဖို့ သတ်ပုံမကျန်လိုက်ပျာဖြစ်လို့ သူ့ခမျာ အကြံမရအကျပ်ရိုက်နီသည်။ တခါတရီ (ဤ) ကို (ကျွဲ) ပြောင်းကေကောင်းဖို့လား စဉ်းစားကြည့်သည်။ ပြောင်းခါနီးဆဲဆဲ နာမည်ကြီးစကားပုံကို လားပြောင်းခီကေ လူသိပြီးသား နာမည်မရ ကော်နှက်ခံရဖို့ ဆိုပျာ နောက်ဆုတ်လိုက်သည်။ (၏) လည်း မကျန်လိုက်ပျာ။ (မှာ) လည်း မကျန်လိုက်ပျာ။ ပြောင်းဖို့ကျန်ရေအလုံးက (ဤ) နှင့် (၍) (၌) အေသုံးလုံးရာကျန်ပျာ။ တခါတခါ (ဤ) ကို (ဣေ) ပြောင်းကြည့်ကေ ကောင်းဖို့လား စိတ်ကူးရသည်။ ဖြစ်တန်ခြေဟိသည်။ (၌) ကို (နှိုက်) လို့ ပြောင်းခီပြန်ကေလည်း အယင်ခေတ်က ခေတ်ဟောင်းစာပီတိမှာ ဟိခပြီးသား။ မသိနားမလည်ရေ အချေတိပါးမှာ မျက်နှာရကေလည်း စာပီဗဟုသုတ အနည်းအကျဉ်းဟိရေ လူတိပါးမှာ အဆဲကျဖို့ နောက်ဆုတ်လိုက်သည်။ (၍) ကို ကျခါ ငါးဂဏန်းကို ပွတ်တင်လိုက်ကေ (၅ိ) ဖြစ်တေ။ အရာတယောက်လည်း မလုပ်သိမ့်။ လူမလုပ်သိမ့်ရေ အလုပ်ကို လုပ်မှ ပါရဂူဖြစ်ဖို့ မဟုတ်ကေ နောက်လိုက်ကျည်း ရက်ပြတ်ဖြစ်နီဖို့။ ရခိုင်စာပီလောကမှာ သတ်ပုံမဖျက်ရ မချင်း ပါရဂူမဖြစ်နိုင်။ ထို့ကြောင့် သာလှဦးမှာ (၅ိ) သားသတ်ပုံကို စီမံကိန်းချလျှက်ဟိသည်။ (ဆက်ရန်)

သာလှဦး၏စာကြည့်ခန်းသည်ကား ဖုံတက်ကြပ်လိုက်လျှက်ဟိသည်။ ပင့်ခူအိမ်ကြက်လျှက် စာအုပ်အင်တန်များများမှာ ခြကိုက်စားလျှက်ဟိသည်။ သူ့သူငယ်ချင်းများက ဆရာကြီးစာကြည့်ခန်းက အဂယင့် ရှိဟောင်းသုတေသနပြတိုက်နှင့်တူရေဟုဆိုလျှင် သာလှဦးမှာ ဘ၀င်ခွေ့လျှက် ငါးသလောက်ပြုံး ပြုံးနီတတ်သည်။ သာလှဦးသည် အချေကပင် မျက်စိအားကောင်းသူဖြစ်သည်။ စာဇာလောက်ဖတ်ဖတ် မျက်စိမှုန်သည်မဟိ။ ယင်း မျက်စိကောင်းသည်ကိုပင် သူက စိတ်ပျက်လျှက်ဟိသည်။ သူ မျက်မှန်တပ်ချင်သည်။ မျက်မှန်တပ်မှ ပညာဟိနှင့်တူသည်။ ထို့ကြောင့် မျက်စိကောင်းသော်လည်း ပါဝါပါသည့်မျက်မှန်ကို စတပ်ကြည့်သည်။ အစပိုင်းတွင် တစိချေ အခက်အခဲဟိသည်။ သုံးမိနိလောက် တပ်ကြည့်သည်နှင့် ခေါင်းနည်းနည်းကိုက်လာသည်။ ကြာလာသောအခါ ကျင့်သားရလာသည်။ သို့ဖြင့် မျက်မှန်တပ်လျှက် လမ်းလျှောက်ကြည့်သည်။ မိမိ အခန်းထဲတွင် ခေါက်တုန့်ခေါက်ပြန်လမ်းလျှောက်ကြည့်သည်။ အဆင်ပြေသည်။ ထို့ကြောင့် ပါဝါမျက်မှန်ဝယ်ပြီး သုံးရက်မြောက်သောနိတွင် စပွဲထုတ်သည်။ စစ်တွေကောလိပ်သို့ စတက်သောနိလည်းဖြစ်သည်။ စာသင်ခန်းက ဒုတိယထပ်တွင်ဖြစ်နီသည်။ လှီကားထစ်ဖြင့်တက်ရသည်ကို အစတွင် စိုးရိမ်စိတ်ဟိသည်။ သတိထားပြီးတက်ကြည့်သောအခါ အားလုံးအဆင်ပြေသည်။ အထစ်အငေါ့မဟိ။ ကောလိပ်သည်ကား ဆယ်တန်းနှင့်မတူ။ ကျောင်းသားများမှာ အခန်းအတည်မဟိ။ ဘာသာရပ်လိုက် အခန်းပြောင်းပြောင်းသင်ရသည်။ နောက်တဘာသာမှာ အောက်ထပ်ဖြစ်နီသည်။ သာလှဦးကား စာသင်ခန်းတွင်လည်း ရှိဆုံးက ထိုင်ရမှ ကြေနပ်သည်။ ထို့ကြောင့် အယင်ထိုင်ခုံနီရာဦးဖို့ စာအုပ်ကို လက်ဆွဲလျှက် ကမန်းကတန်း ပြီးဆင်းပါလတ်သည်။ ပါဝါမျက်မှန်တပ်ထားသည်ကို သူက မိနီသည်။ အတက်တွင် အဆင်ပြေသော်လည်း အဆင်းတွင် ပါဝါမျက်မှန်ကြောင့် လှီကားထစ်ကို အနီးချေထင်၍ ချနင်းလိုက်သည်တွင် ခြီခေါက်လျှက် သာလှဦးမှာ သမံတလင်းကြမ်းပြင်တွင် ဒုန်းပေါက်ဆောက်၍ကျသည်။ ကံကောင်းထောက်မ၍ မျက်မှန်ကားမကွဲ။ လက်ခေါက်ကျသဖြင့် တစိချေနာလားသည်။ မမချေတိရှိမှာ အရှက်မရအောင် ဒယွားကိုဖုန်ခါလျှက် စာသင်ခန်းမထဲသို့ အယင်အယင် လှမ်းဝင်လိုက်သည်။ အစပိုင်းတွင် သွီးပူနီ၍ ခြီထောက်မနာ။ နောက် တဖြည်းဖြည်းကိုက်လာသည်။ စာသင်ခန်းထဲက ပြန်ထွက်သောအခါ ဣနြေ္ဒမပျက်အောင် မနည်းကြိုးစားအားထုတ်ပြီး မိမိ၏ဗိမာန် ဝေသာလီဆောင် အခန်းနံပါတ် (ရ) သို့ အယင်အရောက် လမ်းလျှောက်လာလတ်ရသည်။ တော်ပါသိမ့်ယင့်။ မျက်မှန်ကြောင့် လှီကားထစ်က လူးကျသည်ကို တယောက်ချေလည်း မရိပ်မိ။ (ဆက်ရန်)

သတ်ပုံတလုံးပြောင်းသည်မှာ အလွယ်ချေမဟုတ်။ ကျိုးကြောင်းဆီလျှော်မှု ယုတ္တိဟိဖို့လိုသည်။ ထို့ကြောင့် သူ့မှာ အကျိုးအကြောင်းကို လိုက်ရှာရသည်။ (၍) ဆိုသည်မှာ (ငါရို့) က ဆင်းသက်လာခြင်းဖြစ်သည်။ ရှိအယင်က (လည်းကောင်း) ကို (၄င်း) ဟူ၍ ဂဏန်းနှင့် အက္ခရာပေါင်းပြီးရွီးသားခကတ်သည်။ အခုလည်း (၅) ဂဏန်းနှင့် ပွတ်လုံးပေါင်းစပ်လိုက်ခြင်းသည် မူရင်းအဓိပ္ပါယ်နှင့် မူလအရွီးအသား (ငါရို့) ကို အနီးစပ်ဆုံးဖေါ်ဆောင်ခြင်းဖြစ်သည်။ မြန်မာနှင့် မတူကွဲပြားသည်။ သို့ဖြင့် များမကြာ သာလှဦးသည် သူတပည့်တယောက်၏ Facebook Account ကို အသုံးပြုလျှက် ပေါင်းကူးအိန်တာနတ်ထက်တွင် (၅ိ) သား သတ်ပုံကို စတင်မိတ်ဆက်ပီးလိုက်သည်။ တခဏနှင့်ချက်ချင်း တောမီးလောင်သကဲ့သို့ ကမ္ဘာတ၀ှမ်း ပျံ့နှံ့လားသည်။ ထောက်ခံမှု မဲအများဆုံးရဟိသည်မှာ မလေးသျှားနိုင်ငံရောက် ရခိုင်စာပီအုပ်စုဖြစ်သည်။ လက်ခုပ်လက်ဝါးဖြောက်ဖြောက်တီး၍ ကြိုဆိုလက်ခံကတ်သည်။ အမေရိကသို့ ရောက်ဟိနီသော သူများကလည်း လိုက်ရွီးကတ်သည်။ ဘင်္ဂလားသို့ ရခိုင်ပြည်သီးခြားလွတ်လပ်ရီးအတွက် ရောက်ဟိနီသူများကလည်း လက်ခံလာကတ်သည်။ တချို့မဂ္ဂဇင်းများတွင် ပုံနှိပ်စာလုံးအဖြစ်မိတ်ဆက်ပီးလာသောအခါ သာလှဦး၏(၅ိ) သား သတ်ပုံမှာ နောင်းနောင်းနင်းနင်း အောက်ခြီခိုင်လာသည်။ ဦးသန်းစိန်လက်ထက် ဒီမိုကရေစီရခါစ ရခိုင်သားများကို ရခိုင်စာပီသင်ကြားပိုင်ခွင့်ပီးလာသောအခါ မူလတန်းရခိုင်စာသင်ရိုးညွှန်းတမ်းတွင်ပါ ပါလာသောကြောင့် သာလှဦး၏ (၅ိ) သားသတ်ပုံ အတည်ဖြစ်လားလီပါသည်တည်း။ သာလှဦးမှာ မိမိရည်မှန်းချက် ပြီးပြည့်စုံလားပြီးဖြစ်သည်အတွက် ကောင်းကောင်းကြီးကြေနပ်အားရဖြစ်ကာ ရခိုင်စာပီလောက ထာဝရအနားယူလိုက်ပါသည်။ (ဆက်ရန်)

သို့သော် လူ့အလိုကို နတ်မလိုက်နိုင်ဆိုသောစကားအတိုင်း တခုပြည့်စုံလျှင် တခုလိုလာသည်။ သာလှဦးသည် တဘ၀လုံး စာအုပ်ပုံကြား၌ သူ့ဘ၀ကို မြှုပ်နှံခရသဖြင့် အစားဆင်းရဲ အ၀တ်ဆင်းရဲ အနီဆင်းရဲ နီခရသည်။ ထို့ကြောင့် မယားလည်း အသက်လေးဆယ်ကျော်မှ ရသည်။ မယားမရခင် သူ ရခိုင်သမတယောက်ရဖို့ Facebook ထက်တွင် အသဲအသန်လိုက်ရှာခပါသည်။ Facebook ထက်တွင် ရခိုင်သမအလှပချေတိကို တွိသည်။ ယေကေလည်း အားလုံးသူက မြန်မာစကားဖြင့်ရွီးနီကတ်သည်ကို ရခိုင်စာပီသမားပီပီ ဘ၀င်မကျ။ တခါတခါ မချေရခိုင်သမ မဟုတ်လား၊ ရခိုင်ပိုင် ရွီးပါပလင် ပြောပါပလင်ထောက်ပြခီကေ အများနားလည်အောင် မြန်မာပိုင်ရွီးရစွာပါဆိုပြီးကေ သာလှဦးကို Block လုပ်လိုက်ကတ်တေ။ ရခိုင်အခြင်းနှင့် ရွီးကတ်တေ မမချေတိကို တွိခီပြန်ကေလည်း အရုပ်ကမလှ အသက်ကကြီး သာလှဦးမှာ မျောက်သစ်ကိုင်းလက်လွတ်ဖြစ်ပြီးသနာ နောက်ဘိတ်ဆုံးမှာ ချင်းမနှင့်ရာ ယူဖို့ကျသည်။ (ဆက်ရန်)

သာလှဦးမှာ တဘ၀လုံးဆင်းရဲခရသဖြင့် ဘ၀၌လူရတတ်ကြီးဖြစ်ဖူးချင်ပါသည်။ ထို့ကြောင့် နိမအား ညအား အလုပ်နှစိခုလုပ်သည်။ မကြာခင် ဒေါ်လာမြောက်များစွာ စုဆောင်းရဟိလာသည်။ ထို့ကြောင့် ရန်ကုန်တွင် တိုက်ခန်း (၂) ခန်း စစ်တွေတွင် အိမ်တအိမ်၊ မြောက်ဦးတွင် ခြံနှစ်ခြံလှမ်းဝယ်လိုက်သည်။ သို့သော် သူ့အလိုကား မပြည့်စုံသိမ့်။ ၀မ်းမပူသိမ့်။ ၀မ်းမပူဘဲ ဇာပိုင် သူဌီးဖြစ်ဖို့လဲ။ ၀မ်းပူအောင် လေ့ကျင့်ရသည်။ ရီများများသောက်ပြီး လီမျာများလျှူရသည်။ အဆီပါသော ၀က်သားကို ညိတိုင်းချက်စားသည်။ မကြာခင် ၀မ်းဗိုက်ထွက်လာသည်။ သူငယ်ချင်းများက ယာ သာလှဦးမှာ မယားဝမ်းမပူဘဲ လင်ကရာ ၀မ်းပူလာရေကားဆိုလျှင် သာလှဦးက ကောင်းကောင်း ပျော်သည်။

ဦးသိန်းစိန်လက်ထက် လွတ်ငြိမ်းချင်းသာခွင့်ပီးသဖြင့် သာလှဦး ကိုယ့်တိုင်းပြည်ကို အဖမ်းအဆီးမဟိပြန်လာရသည်။ နိုင်ငံခြားပြန် ဒေါ်လာသူဌီးကြီးဖြစ်နီသဖြင့် သာလှဦးမှာ လားလီရာရာ မျက်နှာပန်းလှ စန်းပွင့်လှပါသည်။ လူတိုင်းလူတိုင်းက ထမင်းခေါ်ကျွေးဖိတ်ကြားခြင်းခံရသည်။ ရခိုင်စာပီဟောပြောပွဲတိုင်း မနားတမ်းလိုက်ဟောရသည်။ နားချိန်မဟိ။ သို့သော် သာလှဦးကား မပျော်။ သူ့မှာ နှလုံးရောဂါမဟိ။ သွီးတိုးရောဂါမဟိ။ နှလုံးရောဂါ သွီးတိုးရောဂါမဟိဘဲ မြန်မာပြည်မှာ ဇာပိုင် သူဌီးစာရင်းဝင်ဖို့လဲ။ သွီးတိုးရောဂါဖြစ်ဖို့ ညိတိုင်းဆားအများကြီးစားပီးရသည်။ သွီးတိုးဖြစ်မဖြစ် ဆီးခန်းညိတိုင်းလားစစ်သည်။ သူငယ်ချင်းဆရာဝန်က သူငယ်ချင်းမှာ သွီးတိုးမဟိ စာဖတ်များလို့ လိုင်ကြောတက်စွာရာပြောကေ လုံးဝသဘောမကျ။ တရက်နိ သူငယ်ချင်းဆရာဝန်က အမြင်ကပ်ကပ်နှင့် ဂိုးချေမှာ သွီးတိုးဟိနီယာ နှလုံးရောဂါလည်း ဟိနီယာမြှောက်ပြောလိုက်သောအခါ သာလှဦးမှာ ကောင်းကောင်းပျော်ပါသည်။

များမကြာ (၅ိ) သားဆရာကြီး သာလှဦးတယောက် မိမိမွီးရပ်ဇာတိ မြောက်ဦးမြို့တွင် မရဏနှင့်ဈာန်ကြွပါသည်။ လူအများက အထူးကြည်ညိုလေးစားခြင်းခံရသော ရခိုင်စာပီသုတေသီကြီးတဦးဖြစ်သဖြင့် ဆရာကြီးဦးသာထွန်းနှင့် တတန်းတည်းထားကာ သာလှဦး၏အရိုးပြာကို ဂူသပ်လျှက် သျှစ်သောင်းဘုရား၌ မြှုပ်နှံခြင်းခံရသည်။

သာလှဦး၏အရိုးပြာအုပ်ဂူ၌စာတမ်းထိုးထားသည်မှာကား

အမျိုးသီလ နှစ်ဌာနကို
ပြည့်ဝမဏ္ဍိုင် စောင့်စွမ်းနိုင်၅ိ (အသံထွက် (၅ိ) သား)
ရက္ခိုင်နာမ ဘွဲ့မည်လှဖြင့်
အနွတ္တသညာ ခေါ်အပ်စွာတည်း --။
ဟူ၅ိ (အသံထွက် (၅ိ) သား) ဖြစ်ပါလီသည်တည်း။

(ရခိုင်ပေါင်းကူး သာလှဦး)
မေလ (၃) ရက် ၂၀၁၅ ခု တလဂုင်္နီနိ မိုးထ (၄) ချက်တီး အချိန်တိတိတွင် ရွီးပြီးဆုံးပါသည်။

Arakan Online Magazine

Sunday, May 3, 2015

သာလှဦး

Saturday, May 2, 2015

အဖမြီ

Search This Blog

ဆောင်ပုဒ်

ရခိုင်ဝတ္ထုတိုများ

ဆောင်းပါးများ

Labels

Blog Archive

Send Your Poems Here !!!

Total Pageviews