မဟာဝိဟိံက ရခိုင်ရာဇ၀င်လင်္ကာ

မဟာဝိဟိံက ရခိုင်ရာဇ၀င်လင်္ကာ
(ဒွါရာဝတီ လမုချောင်းဆရာကျော်မဲ)

နမောတဿ ဘဂ၀တော အာရဟတော သမ္မာသမ္ဗုဒ္ဓဿတိ။

(၁) ဇေယျံအောင်ထွန်း၊ ဤတောင်ကျွန်း၌၊ ဦးစွန်းလုထွတ်၊ သုံးလုနတ်လျှင်၊ ကိုးရပ်န၀ဂုဏ်၊ ထက်အောက်ချုံ၍၊ ဆန်တုံတက်လှစ်၊ ဇာတိခေတ်ဟု၊ စင်စစ်တည်လျှောင်း၊ တိုက်တသောင်းကို၊ လင်းကြောင်းထွန်းလျှံ၊ ညာဏ်တော်သန်သား၊ ဆရံသိတော်၊ ခြောက်ရောင်ကျော်သည်၊ သျှင်တော်လုဆွေ၊ သမ္ဗုဒ္ဓေကို၊ ဖြိုးဝေပန်ဆင်၊ ဦးထိပ်တင်လျှက်၊ သုံးခွင်လုဘ၊ မုနိန္ဒ၏၊ ဟောထဓမ္မက္ခန်၊ တရားမှန်ကို၊ မကျန်လုံးချုံ၊ ပူဇော်ကုမ်၍၊ ကြည်ယုံစေတနာ၊ ပြုကုမ်ပါ၏။ မဂ္ဂဖလ၊ သင်္ဃာစသည့်၊ ပွားပြည့်များစွာ၊ အရိယာသာဝါ၊ ရဟန္တာကို၊ သဂါရဝေ၊ ၀န္ဒိတေဖြင့်၊ ကြီးထွေဂရုဏ၊ မိနှင့်ဘကို၊ ထပ်ကာပန်ထွာ၊ ရှိခိုးပါ၏။ ငယ်ခါသင်ထ၊ ဆရာစသား၊ များလှပဏ္ဍိ၊ ပညာဟိအား၊ ဦးရှိကြည်နူး၊ ပူဇော်ကျူးမှ၊ ပေါ်ဦးကျွန်းချာ၊ ဤကမ္ဘာထက်၊ ရက္ခပူရ၊ မည်နာမဖြင့်၊ ဓည၀တီ၊ လေးဌာနီနှင့်၊ ဤရခိုင်ပြည်၊ တိုင်းရပ်စည်၌၊ ဖြစ်သည်ထင်ရှား၊ မင်းအများအား၊ မှတ်သားစီချင်၊ ရာဇ၀င်ကို၊ ဆင်သွယ်နိဒါန်း၊ လင်္ကာညွှန်းအံ့၊ ရဟန်းပုဏ္ဏား၊ မျိုးလေးပါးရို့၊ သင်ကြားစိမ့်ငှာ၊ ထုတ်ဆိုမှာသည်၊ နောင်လာလူရို့တတ်လိမ့်တည်း။ ။

(၂) တတ်လိမ့်သောသူ၊ မှတ်စိမ့်ယူ၍၊ နောင်မူပဏ္ဍိ၊ သိကုမ်ဘိလော့။ အဂ္ဂိဥဒ၊ ၀ါတပဟု၊ လောကသုံးပါး၊ ပျက်ဖန်များလျှက်၊ တခြားမှန်လှ၊ တေဇောတဖြင့်၊ ပဌမသုံးရွာ၊ မိုးဗြဟ္မာ၏၊ ဘုံသာတိုင်းအောင်၊ မီးဖြင့်ဆောင်၍၊ လောင်သောအခါ၊ သတ္တ၀ါရို့၊ ကြမ္မာဖန်ထွေ၊ မိုးကြီးစွေ၍၊ ကုဋေတသိန်း၊ ကျော်လွန်ဟိန်းလျှက်၊ ရီကိန်းစကြာဠာ၊ ပေါ်သောခါ၌၊ စိုင်ကာဘုန်းကောင်း၊ ရွီတွက်လျှောင်းက၊ အပေါင်းရူပ၊ သောဠဿတွင်၊ နာမပညတ်၊ အတ္ထုပ္ပတ်ဖြင့်၊ ဥပ္ပါဒ်တင်ပြ၊ ဖြစ်ကုမ်ကြသော်၊ ကမ္မဣဒ္ဓိ၊ တန်ခိုးဟိ၍၊ များဘိကိုယ်ရောင်၊ တပြောင်ပြောင်လျှင်၊ မိုက်မှောင်ပျောက်ကွယ်၊ ကောင်းခင်လယ်၌၊ ငှက်နှယ်ဝဲပျံ၊ ကွန့်မြူးစံ၏။ မိုးယံထက်မှ၊ သက်လာကျမူ၊ ရွီတွက်မယွန်း၊ သင်္ချာမှန်းသော်၊ ခြောက်သန်းသုံးသိန်း၊ မှန်မယိမ်းလျှင်၊ တွက်ကိန်းဗြဟ္မာ၊ ရောက်ကုန်လာ၏။ ဒီပါစတု၊ ကျွန်းလေးခုဝယ်၊ ခေါ်မှုတွင်ညီ၊ လက်ယာနီသည်၊ သပြီဇမ္ဗူ၊ ငါးဆူလှလှ၊ ကုမုဒ္ဒကို၊ ဆွတ်ကြလျှင်စွာ၊ ယူပြီးခါမှ၊ ဗြဟ္မာသက်ရှည်၊ ဇာနည်သည်ရို့၊ မှတ်ရည်ကုန်ကြ၊ ဤကပ္ပကား၊ ဗုဒ္ဓငါးဆူ၊ ပွင့်တော်မူအံ့။ ယူတုံနမိတ်၊ တြင်းတိတ်ဖြင့်၊ တံဆိပ်ခတ်ကာ၊ ဘွဲ့နာမာမူ၊ မဟာဘဒ္ဒ၊ ကမ္ဘာမဟု၊ မှည့်ကြပြီးခါ၊ မိုးရပ်ချာသို့၊ ထွက်ခွါလုံးချုံ၊ ပြန်လျှင်းကုမ်သည်၊ လုဘုံဌာနဖြစ်စိမ့်တည်း။ ။

(၃) ဖြစ်စိမ့်ဌာန၊ အာဘဿဟု၊ မိုးဝဘုံမှ၊ သက်လာကျသည်၊ ကမ္မဥတကာ၊ သြဘာသက၊ ဥတုဇဟု၊ တိက္ခဣဿိ၊ အမည်ဟိသား၊ ခေါ်ဘိတွင်မြောက်၊ အရောင်တောက်သည့်၊ လေးယောက်ဗြဟ္မာ၊ ကျွန်းဒီပါကို၊ လေးဖြာဝီစု၊ အပိုင်ပြု၍၊ ကြီးထုမှန်စွာ၊ မြီသြဇာနှင့်၊ ရသာနွယ်ချို၊ ဆိမ့်မျိုးကိုလျှင်၊ နှစ်လိုသောတိ၊ ဖြစ်ပြန်ဘိ၍၊ သာလိပတ္တ၊ လွရွရွကို၊ စားကြသော်အား၊ ရန်မက်ပွား၍၊ ကိုယ်သားရောင်ဝါ၊ ဟိသောခါ၌၊ ကမ္ဘာဦးသူ၊ မှောင်မိုက်ထူလျှက်၊ အူအူသောင်းသောင်း၊ လင်းဆုတောင်းသော်၊ လူပေါင်းပုည၊ ကုသလကြောင့်၊ သက္ကရာဇာ၊ သတ္တိသာဟု၊ ဦးစွာတည်မှ၊ တပေါင်းလသည်၊ ပြည့်ထတိထီ၊ ပုဏ္ဏမီဝယ်၊ သောရီဒိဝါ၊ နိမြတ်စွာ၌၊ ရတ္တိယာခေါ်၊ သန်းခေါင်ကျော်၍၊ စွန်းပေါ်ခါမှီ၊ တရီရီသည်၊ အညီရောက်က၊ ထိုကာလ၌၊ သူရိယစန္ဒာ၊ ကြယ်တာရာရို့၊ ပေါ်လာထွန်းတက်၊ တပြိုင်နက်လျှင်၊ ပြက်ပြက်ထင်၍၊ ကောင်းခင်ထက်က၊ သက်ကျင်ကြမူ၊ ရွှင်ပသာယာ၊ ဟိသောခါ၌၊ ဗြဟ္မာလေးပါး၊ လောဘအားကြောင့်၊ အများစည်းဝေး၊ ကွပ်အုပ်ကဲသော်၊ ခပဲများလူ၊ ကမ္ဘာသူရို့၊ ငြင်းမူသကန်၊ မလွတ်ပြန်ဘဲ၊ ဧကန်မုက္ချ၊ နီကုမ်ရသည်၊ ခြင်းထမကျန်နှစ်သိမ့်တည်း။ ။

(၄) နှစ်သိမ့်မကျန်၊ ခိုက်ရန်ပူဆာ၊ ဖြစ်ကြရာတွင်၊ ဗြဟ္မာအဘသ်၊ သရနတ်ရို့၊ ရောက်လတ်သောခါ၊ လုခန္ဓာလျှင်၊ န၀ါအသစ်၊ အမှန်ဖြစ်၏။ ပြုလစ်မယွန်း၊ တွက်စစ်ထွန်းသော်၊ တကျွန်းကိုးယောက်၊ ဆိုကုမ်မြောက်၏။ အထောက်သင့်ကြိန်၊ ဣတိလိင်နှင့်၊ ပုလ္လိင်ပေါ်က၊ သံဝါသသည်၊ ပေါင်းကြပြူမြောက်၊ ဒွေးစုံရောက်၍၊ လေးယောက်ဗြဟ္မာ၊ မျိုးလေးဖြာဟု၊ မည်သာခံကြ၊ ပြုပြီးမှလျှင်၊ လှပသာယာ၊ မြို့များစွာကို၊ ကုသာဝတီ၊ ပြည်ပူရီ၌၊ အညီအညာ၊ တည်ကုမ်ပါ၏။ သစ္စာပွင့်ထန်၊ ကက္ကုသံဟု၊ ဘုန်းလျှံအလောင်း၊ နတ်မင်းကောင်းလျှင်၊ လျှင်ကြောင်းမကြာ၊ သက်တုံလာ၍၊ ကျင့်ရာစုံစီ၊ ပါရမီကို၊ အညီမှန်စွာ၊ ဖြည့်အံ့ငှာဟု၊ ရောက်လာဖြစ်ထ၊ ပုရိသရို့၊ ရာဇဘိသေ၊ ခံတုံပေမှ၊ ညာဏ်ဝေသမ္ဘာ၊ ဘုန်းတေဇာနှင့်၊ မဟာသမတ၊ ခေါ်တွင်ကြချင့်။ မြတ်လှရသေ့၊ ကျင့်ချမ်းမြေ့စွာ၊ ဖြစ်သည့်အားဖြင့်၊ တပါးသောသူ၊ ရသေ့မူ၍၊ လူဟူသစ်ပင်၊ ဖြစ်ကြောင်းထင်နှင့်၊ ခေါ်တွင်သတ္တ၀ါ၊ မည်ရေမှာကို၊ ကမ္ဘာစောင့်နတ်၊ ရသေ့မြတ်က၊ ဟောရပ်သာယာ၊ ဆိုကုမ်ပါ၏။ အခါကာလ၊ ဟူသမျှလည်း၊ ၀ရဘူပတိ၊ ခေါ်တွင်ဘိသား၊ မင်းဟိတိုင်းဘောင်၊ သိကြားဆောင်၍၊ ထို့နောင်တဖန်၊ ဈာန်နှင့်ပျံသည်၊ ဂ၀မ္ပတိ၊ ထရ်ဘုန်းဟိလျှင်၊ ဣသိသျစ်သောင်း၊ လေးထောင်ပေါင်းနှင့်၊ ကျမ်းဟောင်းဗေဒင်၊ လှည့်လည်ပျင်ကာ၊ များဖျင်သူအား၊ ကျိုးစီးပွါးကို၊ လျှင်လျားဆောင်ထွေ၊ နှစ်ရွီပေသော်၊ ကုဋေကိုးသန်း၊ မကထွန်းတည်း၊ မယွန်းလှည့်လည်၊ လုသက်ပေကား၊ ကိုးကုဋေသကြစ်၊ မြင့်ကြာဖြစ်သည်၊ ကျော်လှစ်မင်းနှယ်သက်ရောက်တည်း။ ။

(၅) သက်ရောက်မင်းနှယ်၊ ထိုခါဝယ်၌၊ ဘုန်းကြွယ်သမ္ဘာ၊ မင်းသားလျာမူ၊ မဟာဘူပတိ၊ ဖြစ်တုံဘိ၍၊ နွယ်ဟိစိုင်လာ၊ သည်နောက်မှာကား၊ သည်းချာဘူပတိ၊ ဖြစ်တုံဘိ၏။ ထွန်းညီးသာလှ၊ ကြီးတေဇဖြင့်၊ ၀ရဘူပတိ၊ စိုးအုပ်ပြီးခါ၊ ဘုန်းဟိမင်းလှ၊ သုဝဏ္ဏနှင့်၊ ၀ရသုဝဏ္ဏ၊ တေဇနက၊ ၀ရတေဇနာ၊ ဆက်ပြန်လာ၏။ မည်သာခေါ်ထွေ၊ သုန္ဓရေတွင်၊ ဖွားပေမျက်နှာ၊ မြင်တုံပါသား၊ ဥက္ကရာဇ်နွယ်၊ သားပုတ္တေကို၊ မဟေသရာ၊ နတ်ဒေ၀ါ၏၊ သည်းချာစံသီး၊ ချစ်သမီးဟု၊ ထွန်းညီးရောင်မြ၊ နာမရမူ၊ သုဝဏ္ဏသမ္ဘာ၊ နှင့်သင့်ရာဝယ်၊ တေဇာကြီးဘိ၊ တန်ခိုးဟိသည့်၊ သမုတ္တိဒေ၀၊ သားတော်လှကို၊ ဖွားထပြီးသော်၊ ပရမီသွာ၊ နတ်ရာဇာ၏၊ စိတာသမီး၊ ထိန်ညီးသာလှ၊ သုဂန္ဓကလျာ၊ မိဒေ၀ါနှင့်၊ ဃာရာဝါသ၊ အိမ်ထောင်ချ များလှခြံရွေ၊ မင်းပြုပေသော်၊ မဟေသရာ၊ နတ်မြတ်စွာနှင့်၊ တေဇာထွန်းဘိ၊ ကြီးဣဒ္ဓိဖြင့်၊ ပရမီသွာ၊ နှစ်ယောက်လာ၍၊ ဒွါရာဝတီ၊ မြို့သိင်ဂီကို၊ စုံညီပြည့်ထ၊ သမုတ်ချကာ၊ ဓည၀တီ၊ ဝေသာလီဟု၊ ခေါ်ညီထင်ပေါ်၊ ဟိုးဟိုးကျော်သား၊ မြို့တော်ရမ္မာ၊ ပူရာစသည်၊ ဌာနသာစည်၊ လေးမြို့တည်၏။ ပတ်လည်တချို့၊ လေးထောင်ရို့ကား၊ ရာကိုးဆယ့်သျှစ်၊ ဖြစ်တုံလှစ်ကာ၊ တလှစ်ပြင်မြို့၊ လေးထောင်ရို့ကို၊ လုပ်ဖို့နတ်များ၊ ရောက်လာအားသည်၊ မင်းဖျားဘုန်းတော်တောက်ထွန်းတည်း။ ။

(၆) ထွန်းတောက်ဘုန်းတော်၊ တန်ခိုးကျော်သား၊ ပြိုင်ဘော်မဲ့ငြား၊ ရန်မျိုးယှားသည်၊ မင်းဖျားဘူပါလ၊ သားတော်လှကား၊ ၀ရဘူပါလ၊ နရိန္ဒတည်း။ ၀ရနရိန္ဒာ၊ စိုးပြန်လာမူ၊ သမ္ဘာရင့်ထိန်၊ ချမ်းရိပ်ငြိမ်ပြီး၊ မဟိပတိ၊ ဆက်ပြန်ဘိ၏။ ဘုမ္မိတွင်ထ၊ သားမင်းလှမူ၊ ၀ရဘုမ္မိဇေယျ၊ မင်းမြတ်လှတည်း။ ဣ၀လောကာ၊ ဤလုရွာ၌၊ ကမ္ဘာစောင့်နတ်၊ ရသေ့မြတ်ရို့၊ မိန့်လတ်သရော၊ ဖော်ထုတ်ဟော၏။ ခတ္တိယောတိ၊ အမည်ဟိသား၊ ဘုမ္မိပါလာ၊ စိုင်ဆက်ကာဖြင့်၊ နရဒိပ္ပ၊ နရိန္ဒဟု၊ ခေါ်ထထင်ရှား၊ လေးမည်အားကို၊ မှတ်သားမုက္ချ၊ ခံကုန်ကြလျှက်၊ ရှိကများစွာ၊ မင်းတကာရို့၊ ဒိဋ္ဌာနုဂ္ဂတိ၊ အစဟိသား၊ ကျင့်ဘိတရား၊ သင်ဆိုကြားမှ၊ တိုင်းကားပြည်ရွာ၊ ခွန်ဘဏ္ဍာမူ၊ တရွာတခု၊ ကောက်ယူမှုဖြင့်၊ ပြုစုကျွေမွီး၊ သားမြီးအသွင်၊ ချစ်ကြခင်လျှက်၊ ကျင့်စင်တရား၊ ဆယ်ပါးအားကို၊ မမှားစောင့်ယှောက်၊ ဖြစ်တုံမြောက်၏။ ထိုနောက်မှလျှင်၊ ဘိဇ္ဇောသရ၊ မင်းပြုကလည်း၊ မြတ်လှထရ်ပျံ၊ တန်းခိုးထန်သည်၊ ဂ၀မ္ပတိ၊ ဈာန်ဣဒ္ဓိဖြင့်၊ ဣသိသျှစ်သောင်း၊ လေးထောင်ပေါင်းနှင့်၊ နတ်ကောင်းစန္ဒီ၊ သုန္ဒရီဟု၊ ပရမီသွာ၊ တတ်ပညာနှင့်၊ ၀ိဇ္ဇာဂျော်ဂျီ၊ ကျမ်းဗာဟီဖြင့်၊ ပါဒ်ဗီဇနာ၊ ပြန်ခရာလျှင်၊ ပိဿာစိုက်မှောင်း၊ လုပ်တုံလျှောင်း၏။ အပေါင်းသိရစ်၊ ကောင်းခြင်းဖြစ်သည်၊ လက်သစ်အင်္ဂုလော၊ နန်းမုယောတည်း။ ပြန့်ပြောထိုမှ၊ နာဂရဟု၊ မြို့ပြပစ္စင်၊ ထိုမင်းတွင်ကား၊ သတင်းညာကြီ၊ ကျွန်းသပြီ၌၊ သုန္ဓရီနတ်၊ ခေါ်တွင်မှတ်သား၊ မြတ်မိဘုရား၊ တွင်ဆပွားသည်၊ မင်းသားတကျိတ်ခြောက်ယောက်တည်း။ ။

(၇) တကျိတ်ခြောက်ယောက်၊ မင်းသားမြောက်တွင်၊ ကျော်ချောက်ဝှမ့်ဝှမ့်၊ ကျွန်းလုံးနှမ့်သိ၊ သမုတ္တိဒေ၀၊ သားတော်လှကို၊ ရမ္မ၀တီ၊ ပီးနှင်းလီ၏။ သိင်ဂီရောင်လျှပ်၊ ဗြဟ္မဒတ်အား၊ မည်မှတ်အောင်ချာ၊ ပြည်သာယာမူ၊ ဗာရာဏသီ၊ ပီးတုံလီ၏။ ခေါ်ညီတွင်ဘိ၊ သမာဓိအား၊ နှမ့်သိကျော်ငြာ၊ ထင်ရှားစွာသည်၊ ကုသ၀တီ၊ ပြည်ပူရီတည်း။ နောင်ညီထွန်းလှာ၊ မင်းသားမှာကား၊ သမ၀တ္တ၊ ပြည်ပူရမူ၊ သာလှနဂိုရ်၊ ရာဇဂြိုဟ်တည်း။ ဘုန်းပျိုထွန်းပ၊ သမ္ဘ၀ကား၊ ပြည်မိတ္ထိလာ။ သာဓနာကား၊ အယုဇ္ဇပူရ၊ စိုးပိုင်သ၏။ သုဝဏ္ဏတွင်ဘိ၊ သားဘုန်းဟိကား၊ ဟတ္ထိဗလ။ သုဒ္ဓိယမူ၊ အဇ္ဇရ၀တီ၊ ပြည်ပူရီကို၊ စိုးပြီးအုပ်ထ၊ သူဘာဝမူ၊ ဧကစက္ခု၊ မှတ်ကြပြုလော့။ ပျိုနုရွယ်လှ၊ သုဂန္ဓလည်း၊ စိုးရအညီ၊ ကောသမ္ဘီတည်း။ ထိုပြီးမှန်စွာ၊ ဖလ္လ၀ါကား၊ ဂန္ဓာကောစ္ဆ။ အဋ္ဌရမူ၊ ခေါ်ကြဗိုလ်လူ၊ သိနှမ့်ဟူသည်၊ ရာဇူပြည်သာ။ သဉ္စဘာကား၊ စမ္ပာနဂရ။ သူဘာဝမူ၊ တက္ကသီလာ။ မန္ဒပ္ပါလည်း၊ ကုသန္နာရ။ သူရန္ဒကား၊ သတ္တိလတည်း။ ရွီထတုံမြောက်၊ တကျိတ်ခြောက်ကို၊ တယောက်တပြည်၊ ပီးအပ်သည်တည်း။ ပတ်လည်ဝန်းလှည့်၊ ရွီတွက်ခယ့်သော်၊ သျှစ်ဆယ့်ငါးသွယ်၊ မြို့ရို့ဝယ်နှင့်၊ ပေါင်းလွယ်ဇေဌ၊ ရောနှောကြသော်၊ တရာ့တမြို့၊ အင်မချို့သည်၊ မင်းရို့ပြည်ရွာတည်မြောက်တည်း။ ။

(၈) တည်မြောက်ထိုသို့၊ သားများရို့တွင်၊ ပြည်မြို့အရာ၊ ပျော်ဖွယ်သာသည်၊ ရမ္မာဝတီ၊ ပြည်သိင်ဂီကို၊ ခေါ်ညီတွင်ဘိ၊ အမည်ဟိသား၊ သမုတ္တိဒေ၀၊ ရာဇညဟု၊ မင်းလှသားကြီး၊ ဆောင်းရွှီထီးနှင့်၊ စိုးပြီးထိုခါ၊ဘုမ္မိပါလ၊ ကျော်လျှက်ပြသော်၊ ၀ရဘုမ္မိပါလ၊ နရိန္ဒတည်း။ ၀ရနရိန္ဒ၊ စိုးပြီးမှလျှင်၊ မဟိန္ဒပတိ၊ ရာဇတိဟု၊ ဘုန်းဟိလွန်မှ၊ ရွှီနန်းမ၌၊ ၀ရမဟိန္ဒပတိ၊ စောသီရိသည်၊ ဘုန်းဟိရသေ့၊ ကျင့်ချမ်းမြေ့ဘိ၊ နတ်ကိုတွိသော်၊ မရွှိရအောင်၊ ပင့်ချီဆောင်မှ၊ နောက်နောင်လူများ၊ မျိုးလေးပါးရို့၊ မှတ်သားဝီခြမ်း၊ ဆံခြည်နှမ်းက၊ တနှမ်းမုယော၊ အင်္ဂုလောတိ၊ မုဒ္ဓေါအထွာ၊ အတောင်သာနှင့်၊ ရှည်စွာအလျား၊ နွားလားဥဿဘ၊ တွန်သံခသား၊ ဂေါသယူဇနာ၊ ဤသင်္ချာကို၊ ရွီကာများမြောင်၊ ချင့်တွက်ဆောင်၍၊ မင်းခေါင်နရိန္ဒ၊ ကျင့်ရိုးပြသား၊ ရှိကဖြစ်ငြား၊ မင်းအများလျှင်၊ ပုဏ္ဏားအကျင့်၊ ထိုကိုချင့်၍၊ မသင့်အပ်စွာ၊ ယှေင်ပယ်ခွာလျှက်၊ ဆယ်ဖြာတရား၊ စောင့်တုံငြားမှ၊ လေးပါးဂတိ၊ ဖြောင့်မတ်သိ၏။ ရဘိယာဉ်ရှင်၊ ငါးပါးပင်တည်း၊ စိုးကျင်လီရ၊ ထိုမင်းကသည်၊ စ၍ရွီလျှင်၊ အစိုင်ပင်တည်း၊ ကျင့်အင်မြဲမြဲ၊ မချွတ်လွဲဘဲ၊ ဆကဲတထွေ၊ အသင်္ချေလျှင်၊ ကုဋေချင့်မှန်း၊ ကိုးသိန်းထွန်းကာ၊ ထီးနန်းစိုးမှန်၊ မင်းများလွန်သည်၊ ဆယ်ပြန်အစိုင်ရိုး၏တည်း။ ။

(၉) ရိုး၏အစိုင်၊ နန်းသက်ယှဉ်၍၊ ကောင်းယိုင်အမှန်၊ မင်းများလွန်မှ၊ ပြည်မွန်ပူရ၊ ဗာရဏ၌၊ ရာဇ၀ံသာ၊ အနွယ်လာသည်၊ မဟာသာဝနာ၊ မင်းရာဇာလျှင်၊ ဒိပ္ပတောင်ငူ၊ ကျွန်းဇမ္ဗူနှင့်၊ ချင့်ယူမှတ်ဖွယ်၊ တွက်ကျုံးသွယ်သော်၊ ကျွန်းငယ်ငါးရာ၊ အရံပါသား၊ များစွာရပ်ရွာ၊ ဘဏ္ဍာသိမ်းယူ၊ စိုးတော်မူ၏။ ဘုန်းထူးမင်းမြတ်၊ သားသည်းပွတ်ကား၊ မည်မှတ်တွင်ထ၊ ခေါ်ဝေါ်ကြသည်၊ ဥတ္တမသာဓန၊ ဖြစ်ပြီးမှလျှင်၊ ၀ရသာဓနာ၊ ဆက်ပြန်လာသည်။ ၀ရဗြဟ္မတ၊ သုသိလာတည်း။ ၀ရသုသိလာ၊ မင်းမြတ်ခါ၌၊ မြတ်စွာဘုန်းဝှန်၊ ကကဿန်ဟု၊ လုထံကျော်ချောက်၊ ဘုရားပေါက်၍၊ မင်းမြောက်အပေါင်း၊ ရွီတွက်လျှောင်းသော်၊ သျှစ်သောင်းလေးထောင်၊ ပြန့်ပွားဆောင်၏။ ထို့နောင်ပြီးမှ၊ ကျွန်းဒီပ၀ယ်၊ သမန္တစက္ခု၊ နီလတုသို့၊ ပြိုင်တုမရ၊ သုဝဏ္ဏတည်း။ ၀ရသုဝဏ္ဏ၊ သြရသကား၊ ဘူပါလရာဇ၊ ဖြစ်ပြန်မှတည်း၊ ၀ရဘူပါလရာဇာ၊ မင်းမြတ်စွာကို၊ ဆက်ကာစိုးဘိ၊ ဘူပတိတည်း။ ထွန်းညီးတေဇ၊ လက်ရုံးပသား၊ မဟိန္ဒရာဇာ၊ စိုးစံပါမှ၊ ၀ရမိန္ဒလ၊ ဖြစ်ထွန်းပ၏။ ၀ရဘူပတိ၊ သားဘုန်းဟိကား၊ ခေါ်ဘိဂန္ဓဗ္ဗ၊ ၀လျှာဏနှင့်၊ ၀ရ၀လျှာ၊ မန္ဓတ်သာလျှင်၊ စက္ကြာလေးကျွန်းစိုး၏တည်း။ ။

(၁၀) စိုး၏လေးကျွန်း၊ နီလထွန်းသို့၊ စက်ဝန်းဒေသ၊ အုပ်ချုပ်ရသည်၊ ရန်မျိုးသွယ်သား၊ ဘုန်းစည်မန္ဓတ်၊ စောမင်းမြတ်ကား၊ ကြည်ညွတ်သဒ္ဓါ၊ သံသရာက၊ လှူဒါစိမျိူး၊ ရှိကောင်းကျိူးကြောင့်၊ ပြည့်ဖြိုးများစွာ၊ ရတနာသည်၊ လိုရာမတ၊ ပြည့်စုံလှ၏။ ဓနသဒ္ဓိ၊ ပြီးစီးဘိလျှက်၊ စက်တိရတနာ၊ ရထားသာနှင့်၊ ဝေလာဟက၊ သိန္ဓ၀ဖြင့်၊ သာလှညက်ညော၊ ဖြူစင်ချောသည်၊ ဥပေါသထ၊ သတ္တိစသား၊ ခဂ္ဂမည်သာ၊ ဖြစ်တုံပါလျှက်၊ အာကာကောင်းခင်၊ ပျံနိုင်ကျင်သား၊ ဆင်မြင်းလှံဓါး၊ ဤငါးပါးကို၊ နတ်များဒေ၀ါ၊ ဆက်သလာသော်၊ ထက်မှာဒေ၀ိန်၊ တာဝတိမ်နှင့်၊ နှိုင်းယှဉ်မှန်စွာ၊ အသူရာက၊ အောက်မှတလည်၊ နဂါးပြည်ကို၊ ဘုန်းစည်မင်းမြတ်၊ အာဏာလွှတ်သား၊ မန္ဓတ်ရာဇာ၊ မင်းမြတ်စွာလျှင်၊ လုရွာကပ်ဆက်၊ နှစ်ကိုတွက်မူ၊ အသက်သင်္ချေ၊ နီတုံပေ၏။ များထွေကျေးဇူး၊ ဆိုသော်မူအံ့၊ အထူးမြင့်ရှည်၊ ကျယ်မြင့်တည်ကာ၊ ငြိမ်ရည်စေသား၊ ထိုမင်းများ၌၊ မိဖုရားလှစွာ၊ ဂုရုသာ၏၊ ပုတ္တာဖြစ်ထ၊ သြရသမူ၊ သူရိယသောတ၊ သားမင်းလှကို၊ မြန်စွမြင်းကောင်း၊ ပီးတုံလျှောင်းမှ၊ တသောင်းယူဇနာ၊ ကျွန်းဒီပါဝယ်၊ (အဌာဓိပဓိ)၊ ခေါ်ဘိမှန်စွာ၊ မိစ္ဆိမာ၌၊ ပဌမနဂိုရ်၊ ပြည်ဗဟိုရ်မူ၊ ပြောဆိုသင်္ချာ၊ ယူဇနာကား၊ ကိုးရာအ၀န်း၊ အကျယ်ထွန်း၏။ တခန်းထိုမှ၊ ဖော်ထုတ်ပြမူ၊ စန္ဒသောတာ၊ သားတော်မှာကို၊ များစွာဆင်ကောင်း၊ ပီးတုံလျှောင်းမှ၊ တသောင်းဒီပါ၊ ဇမ္ဗူချာဝယ်၊ ကြေငြာကျော်ထ၊ သမုတ်ကြသည့်၊ ဇေဌဓိပတိ၊ မင်းဘုန်းဟိကား၊ ခေါ်ဘိနာမ၊ မှည့်ပြီးမှလျှင်၊ ပဉ္စပူရာ၊ ပြည်အောင်ချာလည်း၊ ကိုးရာအ၀န်း၊ ဖြစ်တုံထွန်း၏။ ထွန်းသည်ဖိတ်ဖိတ်၊ အောင်နမိတ်ဖြင့်၊ အာဒိစ္စ၀င်၊ တပြည်လျှင်တည်း၊ ထိုတွင်ကျော်သိ၊ အမည်ဟိသား၊ မဏိသုဘာဝ၊ ရာဇလှကို၊ များကြလူပေါင်း၊ ပီးတုံလျှောင်းမှ၊ တသောင်းဒီပ၊ နှမ့်သိကြသား၊ နရဓိပတိ၊ သမုတ်ဟိလျှင်၊ ခေါ်ဘိတခန်း၊ ရွီတွက်ညွှန်းကာ၊ အ၀န်းကိုးရာ၊ ဖြစ်တုံပါလျှက်၊ ရမ္မာပူရ၊ ကျော်ဇောကြသည့်၊ ပြည်မဌာနီ၊ ကျွန်းသပြီ၌၊ သုံးလီသုံးပါး၊ သားတော်များလျှင်၊ ပိုင်းခြားယူဇနာ၊ ခြောက်ထောင်တာကို၊ အာဏာမိုးလီစိုး၏တည်း။ ။

(၁၁) စိုး၍မိုးလီ၊ ကျွန်းသပြီကို၊ ရစ်ခွီပတ်ကြိုး၊ အာဏာဖြိုး၍၊ တန်ခိုးထန်ပြင်း၊ မန္ဓတ်မင်း၏၊ နွယ်ရင်းဝံသ၊ ဖြစ်ကုမ်ကြသား၊ သုဝဏ္ဏပဘာ၊ သားတော်မှာကို၊ ရာဇာကံမြင်၊ မည်ပီးကျင်မှ၊ အလျှင်ဦးစ၊ ပထမမူ၊ ခေါ်ထတွင်ဘိ၊ အမည်ဟိသည်၊ သမုတ္တိဒေ၀၊ ထီးနန်းချ၍၊ ရမ္မာဝတီ၊ မြို့ဌာနီဟု၊ ခေါ်ညီပြီးမှ၊ စိုးပိုင်သသည်၊ ၀ရရာဇညာ၊ မင်း၌သာလျှင်၊ သည်းချာစီတရ၊ သမီးလှမူ၊ သုဝဏ္ဏကလျာ၊ ဆင်းရုပ်ဝါနှင့်၊ မကွာစီချင့်၊ အိမ်ထောင်သင့်၍၊ ရှည်မြင့်ကာလ၊ စိုးအုပ်ရအောင်၊ ဥပရာဇာ၊ အိမ်ရှိရာကို၊ များစွာနီထ၊ တည်ပြီးမှတည်း၊ ၀ရရာဇညာ၊ ထိုမင်းမှာကား၊ မဟာရာဇညာ၊ သားတော်မှာကို၊ ဒွါရာဝတီ၊ မြို့သိင်ဂီနှင့်၊ စုံညီပြည့်ဝ၊ ဓည၀တီ၊ ဝေသာလီဟု၊ ဌာနီရဌိ၊ သုံးမြို့ခြိ၍၊ တည်ဘိအမှန်၊ မင်းမြတ်လွန်မှ၊ ဘုန်းလျံထွန်းဖြာ၊ ဥပရာဟု၊ မည်သာခေါ်ဘိ၊ ကျော်နှမ့်သိသား၊ ဘုမ္မိပါလ၊ မဟိသျှသည်၊ သာလှပြောစည်၊ ကံမြင့်ပြည်ကို၊ သက်ရှည်ဖြစ်လို၊ မင်းမြောက်ဆို၏။ ဘကိုရိုပွတ်၊ တောင်းပန်လတ်သော်၊ သားမြတ်သုံးပါး၊ အခြားခြားဖြင့်၊ ပိုင်းခြားသည်မှာ၊ ဤပြည်သာလည်း၊ မှန်စွာစင်စစ်၊ လက်ဝင်ဖြစ်ဟု၊ တထစ်တရံ၊ မှတ်သားကြံမှ၊ ကျိုးနွံခယ၊ လျှောက်ပေကမူ၊ အဿကရာဇာ၊ မင်းနရာရို့၊ သင်္ချာခြားပြီ၊ တသောင်းစီကို၊ အညီယူမျှ၊ ၀ီကုန်ကြသော်၊ ဖြစ်ထမှန်စွာ၊ ယူဇနာမူ၊ ကိုးရာအ၀န်း၊ အဖြောင့်သန်း၏။ ခြင်မှန်းအခင်း၊ သုံးရာတွင်းလျှင်၊ မယွင်းမှန်ညီ၊ ဖို့ဝီအမျှ၊ ပီးပြီးမှတည်း၊ မိုးဝတိမ်ယံ၊ ဈာန်နှင့်ပျံသည်၊ ဂ၀မ္ပတိ၊ ထေရ်မဏိနှင့်၊ ပါရမီသွာ၊ နတ်ဝိဇ္ဇာက၊ ဒေ၀ါသိကြား၊ ဟူးရားများကို၊ ပိုင်းခြားတုန့်ပြိုင်၊ တုရင်းတိုင်နှင့်၊ နမိတ်တိုင်မြောက်၊ ကျောက်တိုင်ဆောက်၍၊ အံ့လောက်ကျီးကျွန်၊ ရှိထက်လွန်သည်၊ ပြည်မွန်ဆက်တတိုး၏တည်း။ ။

(၁၂) တိုး၏ဆတက်၊ ထိုမင်းထက်ဝယ်၊ သက်နှင့်ချင်းမြို၊ မစောင်းဆို၏။ သာချိုမြရိပ်၊ ချောနှင့်ကျိတ်တည်း။ မဖိတ်မှန်ပင်၊ သျှမ်းတူးလျှင်တည်း။ ဆိုလျှင်းလည်းပြု၊ မူဒူရှုလော့၊ ပြူဟုခံပြီ၊ မည်ခလီနှင့်၊ စုံစီမှတ်ဖွယ်၊ ဆက်ကာသွယ်လျှင်၊ ဇင်းမယ်ခေါ်တွင်၊ လင်းဟုကျင်သား၊ တန်းတင်သရေ၊ ဖြစ်ကျင်ပေ၏။ အမည်တွင်ပြီ၊ ဘင်္ဂလီဟု၊ အညီသည်နောင်း၊ လင်းကဲစောင်း၍၊ တကြောင်းတတန်၊ ကသည်းခံ၏၊ ကမ်းယံတမူ၊ သထုံဟူသား၊ တမူတနှိုင်း၊ မြန်တလိုင်းနှင့်၊ ပည်လှိုင်းသိပ်သည်း၊ စုရုံးစည်းလျှက်၊ ကံတည်းမှန်းကြုံ၊ သည်နောက်မူက၊ ကမ်းမြုံကမ်းတူး၊ စုံဖက်ပူး၏။ တခုတန်းတိုက်၊ မည်သမိုက်သည်၊ လ၀ိုက်လကွန်း၊ ခေါ်ကြမှန်း၏၊ စည်ထွန်းရပ်ရွာ၊ ရွီတွက်ပါသော်၊ ဘာသာကွဲပြား၊ နှစ်ဆယ့်ငါးလျှင်၊ မင်းဖျားညီနောင်၊ သည်နည်းအောင်၏။ လေးမြှောင်လေးမင်း၊ ပေါင်းလတ်လျှင်းက၊ တွင်ခြင်းမှန်ထ၊ မည်နာမမူ၊ တရာ့တဘာသာ၊ ဖြစ်တုံပါ၏။ အဿကစ၊ နကရမြင်း၊ ရွာရိုးတွင်း၌၊ စည်ပင်ပြန့်ပွား၊ အခြားခြားဖြင့်၊ မင်းသားတသီး၊ မင်းသမီးကို၊ တွက်ပြီးတသိန်း၊ အိမ်ထောင်ငြိ်မ်း၍၊ မြို့သိမ်ဇေယျာ၊ ကျွန်းနှံ့ပါသည်၊ ထိုခါပြည့်ထမျိုးရိုးတည်း။ ။

(၁၃) မျိုးရိုးပြည့်လျှင်း၊ မြို့ခပင်းအား၊ မကြွင်းစိမ့်ငှာ၊ ဖော်ပြမှာအံ့။ ဂန္ဓလရာဇ်၊ ဂုရုရဇ်ပေ၊ ၀ိဒေဟရဇ်၊ တလှစ်ပဉ္စာ၊ ကာသိန်ကာနှင့်၊ စေတာကတာ၊ သိသာတွင်စွာ၊ အာသာမေရ၊ ကုတ္တာကမ္မာ၊ သီလာမဇူရ၊ မတ္တရင်္ဂါ၊ ဘာသတာနှင့်၊ ဘာလာမြို့ဖြစ်၊ ကရာဇ်ထိုထို၊ တည်၏ဆိုက၊ ပေါင်းလိုနှောလှစ်၊ ဆယ်ခုနှစ်ဟု၊ ဖြစ်သည်မှန်ငြား၊ သားတော်စား၏။ မင်းဖျားထိုထက်၊ နှောစိုင်ဆက်မူ၊ တိုးတက်ပြန့်ပွား၊ ကျော်ထင်ရှားသည်၊ သားဇောကံမြင်၊ မင်းမြတ်တွင်လျှင်၊ စည်ပင်ဆကဲ၊ တသဲသဲတည်း၊ ၀ဲဝဲလားလား၊ ပြန့်နှံ့ပြားလျှက်၊ ဂေါဏဂုဏ်ဘုရား၊ ဖြစ်ထွန်းငြား၍၊ ရှည်လျှားစိုင်ဆက်၊ နွယ်မပျက်တည်း၊ ကျော်ချက်ဇမ္ဗုဒိ၊ တကျွန်းခြိ၏။ လောကိစည်းစိမ်၊ အကြိမ်ကြိမ်လျှင်၊ ရိပ်ငြိမ်စိုးဆောင်၊ ရန်မျိုးအောင်၏။ မင်းခေါင်ကံမြင်၊ ဇမ္ဗူပြင်၌၊ စိုးကျင်မြို့ဝယ်၊ တွက်ကျုံးသွယ်သော်၊ တွင်ကျယ်ရမ္မာ၊ ၀တီသာတည်း။ ပွင့်လာပွက်ဘုန်း၊ ဖြန့်ကြုံးဖြစ်ဖြစ်၊ နှစ်ကိုစစ်သော်၊ သက္ကရာဇ်ကောဇာ၊ ဖြိုကာကာဖြင့်၊ သင်္ချာသင်္ချေ၊ ကုဋေသျှစ်သိန်း၊ မင်းများငြိမ်းမှ၊ မုနိသကျ၊ ကဿပ၏၊ တည်ထသာသနာ၊ ထွန်းသောခါ၌၊ ဥတ္တရမည်၊ ထိုသည်ပြည်ကို၊ အရှည်ဝံသ၊ စိုးအုပ်ထသည်၊ ဒေ၀သာဂရ၊ လွန်ပြီးမှတည့်၊ နန်းမဘုံသာ၊ ဆက်ပြန်လာသည်၊ မဟာသာရ၊ သည်နောက်မှမူ၊ သာဂရနှင့်၊ ဥပသာဂရ၊ ဖြစ်ကုန်ကြ၏။ ခေါ်ထမှန်ဘိ၊ ရပ်သီရိမူ၊ အသိတဉ္စန၊ ထိုပြည်မ၌၊ ဒေ၀င်္ကသ၊ လွန်ပြီးမှတုံ၊ ပုတ္တမှန်စွာ၊ ဆက်ပြန်လာသည်၊ မဟာကင်္သ၊ ရွှီနန်းရ၏။ ကင်္သတွင်ထ၊ သားတော်လှနှင့်၊ ဥပကင်္သ၊ ဖြစ်ကုန်ကြချင့်။ ရင်းစသဲချာ၊ နှမမှာမူ၊ ဒီပါကျော်ဟိုး၊ သိနှမ့်ကြိုး၍၊ နွယ်မျိုးမည်ရ၊ ဒေ၀ကမ္ဘာ၊ ခေါ်တွင်ပါသည်၊ ကလျှာယောင်းလှမိမြတ်တည်း။ ။

(၁၄) မိမြတ်ယောင်းလှ၊ နန်းသိင်္ဂ၀ယ်၊ များလှရံကာ၊ စံသောခါ၌၊ ပုတ္တရမဓူရ၊ ရွှီပြည်မကို၊ သာဂရမင်း၊ စိုးအုပ်လျှင်း၏၊ ညီရင်းဥပ္ပ၊ သာဂရလည်း၊ ကြောက်လှသော်အား၊ ပြီးထွက်လားသော်၊ ရပ်ခြားဘုမ္မိ၊ သာယာဘိသား၊ အသိတိဉ္စန၊ ထိုပြည်မကို၊ စိုးထနှိပ်နှင်း၊ ကင်္သမင်း၏၊ ထံရင်းတော်ပါး၊ ၀င်လီငြား၏။ ခစားခိုကိုး၊ နွံရိုကျိုးကာ၊ နွမ်းညှိုးပူဆာ၊ ဟိသောခါ၌၊ ကြမ္မာဆော်ပန်၊ ရောက်လတ်ပြန်က၊ ကျော်ဝှန်သတင်း၊ တန်းခိုးပြင်းသည့်၊ ထိုမင်းနှမ၊ ဒေ၀ဂမ္ဘာ၊ မည်သာခေါ်ညီ၊ မဟေသီနှင့်၊ ကြုံလီထိုတွင်၊ အိမ်ထောင်ကျင်သော်၊ အလျှင်ဦးစ၊ ပထမမူ၊ ဘုမ္မရဒေ၀ီ၊ ဆင်းရွှီစံသီး၊ ချစ်းသမီးကို၊ အပြီးထိုခါ၊ ဖွားမြင်ပါ၏။ သို့ပါသို့ငြား၊ သမီးအားလျှင်၊ ဖွားပြီးတုံမြောက်၊ ကံမထောက်ဘဲ၊ သီပျောက်လားသော်၊ သားတော်မျက်ရှု၊ ဘုန်းပေါင်းစုသား၊ ၀ါသုဒေ၀၊ ဖွားတုံထ၏။ ဗလဒေ၀၊ သူရိယဒေ၀၊ စန္ဒာဒေ၀၊ ဆက်ကြစိုင်ဘိ၊ အဂ္ဂိဒေ၀၊ အဇ္ဇုနနှင့်၊ ဂရုဏပေ၊ ရောဟနေယျ၊ ဃဋပဏ္ဍိတ၊ အင်္ဂုရဟု၊ နာမတွင်ငြား၊ တကျိတ်သားကို၊ မခြားထိုတွင်၊ ဖွားမြင်ပြီးမှ၊ မာဂဓဖြင့်၊ ဒသဘာတိက၊ ခေါ်ကုမ်ကြ၏။ တေဇထွန်းပြောင်၊ လက်ရုံးထောင်သား၊ ညီနောင်တကျိတ်၊ ဇမ္ဗူဒိတ်မှာ၊ ဟိုးဟိုးငြာ၍၊ နောင်မှာဖွားထ၊ သမီးလှဟု၊ အဉ္စနဒေ၀ီ၊ ဆင်းသိင်ဂီကို၊ ထိမ်းချီစုပြုံ၊ သောသောအုံသည်၊ ရွှီဘုံနန်းသူခ၀ပ်တည်း။ ။

(၁၅) ခ၀ပ်နန်းသူ၊ သောသောဆူပြီး၊ ရွှီတူတမျ၊ ရောင်ထွန်းပသည်၊ အဉ္စနဒေ၀ီ၊ ဆင်းသိင်ဂီကို၊ ချီချမြွက်ခေါ်၊ ရံဘော်ခြောက်ကျိတ်၊ ၀န်းရံပိတ်လျှက်၊ ကျူးဆိတ်မညံ၊ တကြံကြံလျှင်၊ အသံပြိုင်ပြု၊ နန်းရတုနှင့်၊ ပျော်မှုအမြဲ၊ ဧယင်လွှဲ၏။ သဲသဲရုံးစု၊ ခြံရံပြုလျှက်၊ ၀ါသုဒေ၀၊ အင်္ဂုရကို၊ ဗလစွမ်းရောက်၊ အားကြီးမြောက်က၊ ပြိုင်ထောက်မမြင်၊ မိုးရပ်ခွင်ကို၊ စိုးကျင်တုံငြား၊ နတ်သိကြားလည်း၊ ဘုန်းအားလက်နက်၊ ပို့၍ဆက်၏။ ယူလျှက်ဆောင်နှင်း၊ ပီးအပ်လျှင်းသော်၊ ရန်ခင်းဟိရာ၊ ရအောင်ရှာ၍၊ မကြာကုန်အောင်၊ သတ်ပြီးနှောင်မှ၊ ပြည်ဘောင်အတွင်း၊ အမင်းမင်းကို၊ နှိပ်နှင်းပိုင်မူ၊ အခွန်ယူ၍၊ ဇမ္ဗူသောင်းပတ်၊ လားလာလတ်သော်၊ တွင်မှတ်သညာ၊ ဟိုးဟိုးငြာသည်၊ ဒွါရာဝတီ၊ လေးအင်ညီသား၊ သိင်ဂီရောင်လျှံ၊ မြို့ရှင်ပျံကို၊ လုပ်ကြံကြိုးစား၊ တိုက်လတ်ငြားသည်၊ သျှစ်ပါးဒိသာရံပတ်တည်း။ ။

(၁၆) ရံပတ်ဒိသာ၊ သျှစ်မျက်နှာ၌၊ တပ်တာတည်ထ၊ နီကုမ်ကြပြီး၊ များလှဗိုလ်ပါ၊ တိုက်ကြရာဝယ်၊ ပြည်သာစိုးထ၊ ဘီလူးမလည်း၊ ခနမကြာ၊ မှန်ရောင်ဝါဖြင့်၊ ကောင်းခင်လမ်းသို့၊ ပျံသန်းလားလျှင်၊ လွန်ဘိကျင်မှ၊ ထက်ခွင်ပျံဝဲ၊ ပန်းဆိုင်ဆွဲသို့၊ မလွဲတူစွာ၊ နီလီပါသော်၊ ထိုခါပြိုင်ဆိုင်၊ တုမနိုင်ဘဲ၊ ၀ိုင်းရိုင်ရုံးလှည့်၊ ဆုတ်ခွာခယ့်မှ၊ မြို့၏ရှိဘက်၊ နတ်မျက်စိမြော်၊ ဈာန်ယာဉ်ပျော်သား၊ မည်တော်နာမ၊ ခေါ်ဝေါ်ကြသည်၊ ဂဏ္ဍဒီပါယန၊ မြတ်ဓမ္မနှင့်၊ သီလသည်းခံ၊ ရသေ့ပျံကို၊ ဘုန်းလျှံတေဇ၊ တန်ခိုးပသည်၊ ဒသဘာတက၊ ညီနောင်လှရို့၊ ညွန့်ခကြောင်းရီး၊ ဖော်ပြီးမီးက၊ ပျံ့မွှီးသီလ၊ ပြည့်စုံလှသည်၊ ဂဏ္ဍဒီပါယန၊ ရသေ့ကလည်း၊ မုသာဝါဒါ၊ ဝေရာမဏိ၊ ယှောင်ကြည်ဘိ၍၊ မသိသူအား၊ သိအောင်ကြားအံ့၊ မှတ်သားစီလို့၊ ဟုတ်တိုင်းဆို၏။ ရွယ်ပျိုကျိုင်းထွား၊ မင်းသားများရို့၊ ကြိုးစားစောင့်ထ၊ ဘီလူးမကို၊ ချိုမြရသာ၊ ပျားသကာနှင့်၊ သြဇာချိုအီး၊ ကျွေးမွီးပြုစု၊ ဦးချကော်ရော်၊ တောင်းပန်သော်က၊ စည်ထသာမို့၊ ကျော်သည့်မြို့ကို၊ နှစ်လိုရွှင်ပ၊ ဖော်၍ပြလိမ့်၊ များလှလူသျှင်၊ မြင်လီကျင်မူ၊ ခုပင်အပြီး၊ ထိုမြို့ကြီးကို၊ ခြားဆီးလှီးဖြတ်၊ သံမှိုခတ်၍၊ မချွတ်ကူးလျှက်၊ မြို့ပေါင်ဖျက်မှ၊ မြို့ချက်အမြဲ၊ သံနှင့်တွဲသော်၊ ပျံဝဲပြုကျင်၊ ထက်ကောင်းခင်သို့၊ ခုံပင်ကြွ၍၊ မပျံဝဲတည်း။ ကျန်းမြဲခိုင်ထ၊ မြို့ကိုရအံ့၊ ထွန်းပတန်းခိုး၊ လူထိပ်မိုးသား၊ ဟိုးဟိုးကျော်ကြား၊ ထိုမင်းအားလျှင်၊ မထားလျှင်စီ၊ ပြောပါလီဟု၊ မိန့်ချီသံမြ၊ ဆိုမြွက်ဟသည်၊ စောင့်ထသစ္စာမချွတ်တည်း။ ။

(၁၇) မချွတ်သစ္စာ၊ စောင့်နီပါက၊ ဂဏ္ဍဒီပါယန၊ တာပတလျှင်၊ မိန့်ဟစကား၊ အကြောင်းများကို၊ မထားထိုခါ၊ လျှောက်လီပါသော်၊ နာနာရူပ၊ ဘီလူးမအား၊ ချိုလှရသာ၊ ပျားသကာကို၊ အစာသိုထဲ၊ ၀စွာကျွေးက၊ ပြည်ရေးစောင့်ရ၊ ဘီလူးမလည်း၊ လောဘဆိုးလျှင်၊ စားလီကျင်သော်၊ များဖျင်ဗိုလ်ပါ၊ လူတကာရို့၊ ဒွါရာဝတီ၊ မြို့သိင်ဂီကို၊ အသိများမြောင်၊ အားကြိုးထောင်၍။ အတောင်လိုင်ပင်း၊ တပြိုင်ချင်းဖြင့်၊ ပေါင်ရင်းကိုဖြတ်၊ တူးဖြိုလတ်သော်၊ မြို့မြတ်နယ်ကွက်၊ အလယ်ချက်ကို၊ ရိုက်နှက်ဆတ်ဆတ်၊ သံမှိုခတ်မှ၊ မချွတ်မလွဲ၊ သံဖြင့်တွဲလျှက်၊ အမြဲစောင့်မှတ်၊ ရံဝန်းပတ်၍၊ ထားလတ်သောခါ၊ မြို့ဒွါရာလည်း၊ အာကာတိမ်ယံ၊ မပျံနိုင်ဘဲ၊ နီတိုင်းမြဲ၏။ မလွဲမှန်ထ၊ မြို့ကိုရလျှင်၊ နာမသညာ၊ သံတွယ်ရာကို၊ သိသာမည်ထင်၊ သံတွဲတွင်၏။ ဘုရင်မင်းဖျား၊ ဘုန်းတော်အားလျှင်၊ သိကြားရီနတ်၊ ဒေ၀ါမြတ်ရို့၊ ရိုက်ခတ်ထားကျင်၊ သံမြို့ရှင်ကို၊ မြီပြင်ကိုခွဲ၊ တောင်ကမ်းကွဲမျှ၊ မိုးထဲတိမ်ဖျား၊ လွှင့်လိုက်ငြားမူ၊ သံသားလွှင့်သံ၊ တော်လဲဟန်သို့၊ တဖန်ပျံလိုက်၊ ဂေါ်တူမြစ်တွင်၊ စင်စစ်ရောက်မှ၊ သံကြိုးကျမူ၊ မြစ်ဝကျိုက်ဆူ၊ ရီလုံးပူ၏။ ရီသူအများ၊ နီရာယှား၏၊ လိပ်ငါးငမန်း၊ ရီလုံးပြွန်းမျှ၊ ပြီးသန်းကူးရ၊ ဖြစ်ပြီးမှလျှင်၊ သိကြထိုခါ၊ ကြီးအာဏာနှင့်၊ ရာဇာဒသ၊ ဘာတကရို့၊ မုချတန်းတိုက်၊ မင်းပြုရစ်သည်၊ ရန်စစ်ခပ်သိမ်းရိုညွတ်တည်း။ ။

(၁၈) ရိုညွတ်ခပ်သိမ်း၊ ရန်စစ်ငြိမ်း၍၊ မုဒိမ်းဓမြ၊ ခိုးသူစသည်၊ လန့်ထကြောက်ကျင်၊ ရန်မျိုးစင်မှ၊ သောင်းခွင်ကျော်ငြား၊ ထိုမင်းများရို့၊ ပျော်ပါးမြူးစံ၊ မြို့ရှင်ပျံ၌၊ ခြွီရံများဖျင်၊ များလူသျှင်နှင့်၊ နီကျင်ပေါင်းရုံး၊ ဇမ္ဗူလုံးကို၊ သိမ်းကျူံးဆယ်စု၊ အဖို့ပြု၏။ တခုမကြွင်း၊ တုတ်ခွန်သွင်းလျှက်၊ စံခြင်းများစွာ၊ ထိုအခါ၌၊ မည်သာခေါ်ထ၊ ကုဏလဟု၊ အိုင်မ၌၀ယ်၊ ကြောက်မက်ဖွယ်သား၊ ကြီးကျယ်သာလှ၊ ကက္ကဋကို၊ ပွပွသမ္ဘာ၊ ဖူးငုံပါ၍၊ ပွင့်သာဘုန်းဟိ၊ ဆင်ဟတ္တိလျှင်၊ နင်းဘိအင်ကိုး၊ ရွတ်ရွတ်ချိုးက၊ စည်ကျိုးဘိန္ဓ၊ မြစ်သို့ကျသော်၊ လက်မအစုံ၊ မျောလီတုံက၊ ကြိုက်ကြုံထိုခါ၊ အသူရာရို့၊ မဟာသမုဒ်၊ လှိုင်းခတ်ပုတ်၍၊ နစ်မြုတ်ရီကြောင်း၊ ၀င်လီလျှောင်းသော်၊ တချောင်းအကယ်၊ ဆည်ရပေ၏။ မြဲထွေသာလှ၊ ၀ှမ်ပေါပြသား၊ စည်မစည်ကြီး၊ စည်ဘေရီးဟု၊ ပြုပြီးတုံမှ၊ ၀ါသ၀နှင့်၊ တွိကြရန်မွှီ၊ နတ်စစ်မြီ၌၊ ယှုံးလီရကား၊ စွန့်ပစ်ငြားသော်၊ သိကြားတမူ၊ ရလီယူ၏။ ထိမ့်ဆူကျော်ကြ၊ အမ္မလဟု၊ တွင်ထအမည်၊ သိနားလည်လော့။ ထိုစည်အမျိုး၊ အတူကျိုး၍၊ ရီရိုးဖလာ၊ မျိုးကြရာတွင်၊ ဂင်္ဂါမြစ်ကြောင်း၊ ပါလီလျှောင်း၏။ တချောင်းတမူ၊ ကျွန်းဇမ္ဗူဝယ်၊ ရိပ်ဖြူဆောင်းဆောင်း၊ တကျိတ်ပေါင်းသား၊ မင်းကောင်းဒသ၊ ဘာတကရို့၊ ဒွါရာဝတီ၊ မြို့တောင်ဆီဝယ်၊ နဒီမြစ်ယိုင်၊ ကမြူးစိုင်၌၊ ၀ှဲရိုင်ချမ်းမြစ်၊ ဆည်ဘိလိုက်ကာ၊ ထိမ့်ရစ်မြည်လျှက်၊ မြောက်စည်ကြက်၍၊ မပျက်တီးကာ၊ သံဝှမ့်ဖြာသည်၊ ဒီပါဇမ္ဗူလွန်ပတ်တည်း။ ။

(၁၉) လွန်ပတ်ဇမ္ဗူ၊ ထိမ့်ရစ်ဆူ၍၊ ခွန်ယူသိမ်းကျုံး၊ လက်ရုံးရွှင်ပ၊ ပျော်ပါးကြသော်၊ ကာလလွှဲဖောက်၊ ကိန်းခန်းရောက်မှ၊ မွှီနှောက်ချောက်ချား၊ ဟိတုံငြား၍၊ တိုင်းကားပြည်ရွာ၊ ပျက်ကိန်းသာလျှင်၊ ဖြစ်ခါနီးလတ်၊ ကပ်ဥပါဒ်ကြောင့်၊ ယွင်းချွတ်မူခါ၊ အဓမ္မာကို၊ ကျင့်ပါတခြား၊ မင်းသားများရို့၊ တရားသိမှတ်၊ ရသေ့မြတ်ကို၊ ယွင်းချွတ်စိတ်တွင်၊ ပြစ်မှားကျင်၍၊ အကြင်ယောက်ကျား၊ သူတပါးကို၊ ဟိငြားကိုယ်ဝန်၊ ပဋိသန်လျှင်၊ အဟန်ပြုထွေ၊ ဆောင်ယူလေပြီး၊ သန္ဓေတည်ငြား၊ ထိုယောက်ျားမူ၊ လများအကယ်၊ မည်သည်နိတွင်၊ ဖွားမြင်မည်နည်း။ မီးလှည့်ထိုခါ၊ ပညာမြင်မြော်၊ ရသေ့ကျော်လည်း၊ လူဝယ်ဒသ၊ ဘာတကရို့၊ ကာလမရှည်၊ ပျက်လတ်မည်ကို၊ အခြေသိထင်၊ ထို့နှယ်မြင်၍၊ ဆင်ခြင်ညာဏ်ဖြာ၊ ကြည့်ရှုရာသော်၊ ကိုယ့်မှာတုံလည်း၊ ကြိုက်ကြုံပြန်ရာ၊ ဤနှေသာဟု၊ မှန်စွာတပ်တပ်၊ စိတ်ဝယ်မှတ်၍၊ မချွတ်မမှား၊ ဤယောက်ျားလျှင်၊ ဆန့်ထားရွီတွက်၊ ခုနှစ်ရက်၌၊ တချက်မမှား၊ ရှားတုံးဖွားအံ့။ ထိုရှားပျက်က၊ သာဂရဟု၊ ရာဇမင်းနွယ်၊ ဇမ္ဗူလယ်၌၊ အကယ်ကျင်းကျင်း၊ ပျက်လတ်လျှင်းအံ့။ သံညှင်းမြွက်ဟ၊ ဆိုပေကလျှင်၊ ခနမကြာ၊ လူများစွာရို့၊ ထိုခါလက်ထောက်၊ ဒုတ်အုတ်ကျောက်ဖြင့်၊ တယောက်တချက်၊ ရိုက်ခတ်နှက်သော်၊ ညက်ညက်ကြီကြီ၊ ရသေ့သီ၏။ တလီမင်းပေါင်း၊ ကြားလတ်လျှောင်းသော်၊ လျှင်ကြောင်းထိုခါ၊ သင်းဂြိုလ်လာပြီး၊ မှာရေစကား၊ မီးလတ်ငြားမူ၊ မမှားထိုထို၊ ရသေ့ဆိုဟန်၊ လျှောက်ကြားပန်က၊ လျှင်မြန်ဖမ်းငြား၊ ထိုယောက်ျားကို၊ မထားမလွှတ်၊ ခြီချင်းခတ်၍၊ ရံပတ်ဝန်းလျား၊ လူအများနှင့်၊ ထံပါးမြဲပေ၊ စောင့်ယှောက်စေသည်၊ ကြည်ထွေညီနောင်မင်းမြတ်တည်း။ ။

(၂၀) မင်းမြတ်ညီနောင်၊ ကြိုးစားဆောင်၍။ များမြောင်ခြံရံ၊ စောင့်ယှောက်ပြန်သော်၊ အမှန်ကွက်ကွက်၊ ခုနှစ်ရက်သည်၊ ရွီတွက်ကြုံခါ၊ ဤလူ့ရွာ၌၊ တခါရံထူး၊ မကြားဖူးတည်း၊ အထူးဆန်းပြား၊ လူယောက်ျားလျှင်၊ ခေါ်ငြားမရ၊ လူမိမ္မသို့၊ ဖြစ်ထလီငြား၊ ရှားတုံးဖွား၏။ လူများတကာ၊ ကြောက်လန့်ပါ၍၊ လျှင်စွာပစ်ခါ၊ လှိုင်းသာလွတ်ချောက်၊ ကမ်းသို့ရောက်၍၊ မထောက်တင်ရစ်၊ ရှားပင်ဖြစ်၏။ အနှစ်များစွာ၊ မြင့်ရှည်ကြာ၍၊ ရာဇာဒသ၊ ဘာတကရို့၊ ငြိမ်းမျှသံသာ၊ ပဉ္စင်္ဂါနှင့်၊ မဟာသမဇ္ဇံ၊ သဘင်ခံကာ၊ တင့်စံသာလှ၊ တပေါင်းလ၀ယ်၊ ရွှင်ပပျော်ပါး၊ ရီကစားသော်၊ တက်ငြားထိုခါ၊ ဖြားရောက်ရာ၌၊ သီစာသောက်ထ၊ မိပျော်ကြလျှက်၊ ယစ်ဝကိုင်ငင်၊ လုံးထွီးကျင်၏။ မြူးရွှင်ကြီစား၊ စိုက်ရန်ပွားသော်၊ ယူငြားထစ်ထစ်၊ မျှားနှင့်ပစ်က၊ စင်စစ်ဧကန်၊ မျှားလင်းကန်လျှင်၊ အမှန်ထိုတွင်၊ ဖြစ်လတ်ကျင်၏။ နာကြင်မိထ၊ မာန်မာနဖြင့်၊ ရန်စခြုတ်ခြေ၊ ဒေါသသွယ်လျှက်၊ မတွယ်မညှာ၊ ထိုးခွတ်ပါသော်၊ များစွာမိုက်လူ၊ ကျက်ကျက်ဆူ၍၊ ကွပ်မူမနိုင်၊ တိမ်းယိမ်းယိုင်၏။ တပြိုင်နက်ပင်၊ ပြုလတ်ကျင်က၊ ယူငင်မသာ၊ သူ့ထက်ငါလျှင်၊ ရေရာမရ၊ ထိုးသတ်ကြသော်၊ မင်းကမလွတ်၊ ဒေ၀ီထွတ်နှင့်၊ မူးမတ်အနွယ်၊ မျိုးကိုးသွယ်ရို့၊ ထိုဝယ်ကျင်းကျင်း၊ သီတုံလျှင်းသည်၊ ပြည်တွင်းပြည်မမလွတ်တည်း။ ။

(၂၁) မလွတ်ပြည်မ၊ ပြည်တွင်းစသား၊ များလှရုံးစု၊ ထိုးခွတ်ပြုသော်၊ ၀ါသုဒေ၀၊ စောမင်းကလည်း၊ ဗလဒေ၀၊ ညီမင်းလှနှင့်၊ အဉ္စနဒေ၀ီ၊ သိင်ဂီရွှီဘော်၊ နှမတော်ကို၊ ခေါ်တော်မူပြီး၊ ပရောဟိလည်း၊ ပါဘိကိုယ်ကြပ်၊ လက်ချင်းစပ်၍၊ မြောက်ရပ်တူရူ၊ လားတော်မူ၏။ နှမ့်ဆူကျော်ကြား၊ မင်းနှစ်ပါးရို့၊ ရှည်လျှားရှိခါ၊ သံသရာက၊ ကြမ္မာစိုင်ဆိုက်၊ ၀ိပါက်လိုက်၍၊ ရန်ခိုက်နှင့်တွိ၊ ခန္ဓာရွှိ့လျှက်၊ စုတိဘ၀င်၊ ချုပ်လီကျင်မူ၊ ဆင်းအင်ပြည့်လှ၊ အဉ္စနနှင့်၊ ဗြဟ္မဏတွင်ဘိ၊ ပရောဟိရို့၊ ပေါင်းမိမသွယ်၊ လားကြပေသော်၊ ကျော်ဝယ်နှမ့်သိ၊ ဝေသာလိဟု၊ ခေါ်ဘိတင်မြောက်၊ ပြည်သို့ရောက်၏။ ဘုန်းတောက်သနင်း၊ ထိုပြည်မင်းလည်း၊ ဖြစ်ခြင်းရောဂါ၊ ဝေဒနာကြောင့်၊ မကြာလျှင်လျှား၊ စုတိငြားသော်၊ သားနှင့်မြီးမြစ်၊ မကျန်ရစ်၍၊ ပြည်၌များစွာ၊ မူးမတ်ရာရို့၊ ညီညာကြိုးစား၊ ပြုသောအားဖြင့်၊ ပုဏ္ဏားသာလှ၊ ဗြဟ္မဏနှင့်၊ အဉ္စနဒေ၀ီ၊ ဆင်းလှရွှီကို၊ သိင်ဂီဥကင်၊ ထီးနန်းတင်၏။ သာရွှင်ဝမ်းမြောက်၊ ဘိသိက်မြှောက်၍၊ ငြိမ်းလှောက်သာယာ၊ စံပြီးခါမှ၊ ပုတ္တာသားလှ၊ ဗြဟ္မသုန္ဒရာ၊ စောသတ္တာသည်၊ ဝေသာလီက၊ ပြောင်းပြီးမှလျှင်၊ များဖျင်အလေး၊ ဗိုလ်စည်းဝေးနှင့်၊ ငခွေးသင်းတောင်၊ မြို့တည်ထောင်၏။ ထို့နောင်စိုးထွေ၊ ခြောက်နှစ်ပေတည်း။ ရှည်ရှည်လျားလျား၊ မြို့စိုင်များနှင့်၊ ပုဏ္ဏားမျိုးနွယ်၊ မိုးထက်ကြယ်သို့၊ ဆက်သွယ်များစွာ၊ စိုးငြားပါသော်၊ ရီသာစိမ်းမြ၊ ဂစ္ဆပ၏၊ ဒက္ခိဏဂါမာ၊ ကမ်းပါးသာ၌၊ န၀ါန၀၊ နာမဘွဲ့မည်၊ ကိုးဆယ်ကိုးမြို့၊ မချို့အင်္ဂါ၊ ကိန်းသင်္ချာမူ၊ နှစ်ရာပြည့်လုတ်၊ နှစ်ပါးယုဂ်၏။ အဟုတ်မင်းပေါင်း၊ စိုးအုပ်လျှောင်း၍၊ ပြန်ပြောင်းတည်ထ၊ ပြုကုမ်ကြလျှက်၊ နာမသမိုက်၊ ထီးနန်းစိုက်သည်၊ မှတ်ပိုက်တံဆိပ်ခတ်လတ်တည်း။ ။

(၂၂) ခတ်လတ်တံဆိပ်၊ ရန်မျိုးနှိပ်၍၊ ဘုန်းရိပ်ထွန်းပ၊ ရာဇညရို့၊ ဂစ္ဆပနဒီ၊ မြစ်ဆီလက်ယာ၊ ရှိပြုဗ္ဗာက၊ တည်လာအစ၊ ပထမမူ၊ ဒွါရ၀တီ၊ ဌာနီသမိုက်၊ ထီးနန်းစိုက်မှ၊ ပဏ္ဏ၀တီ၊ သဗ္ဗလီတည်း။ မင်းသမီးပြင်၊ မင်းသားပြင်နှင့်၊ သက်တင်ဝန်းချုံး၊ ဆင်ကုန်းတကြောင်း၊ ပေါင်းလောင်းပင်တိုင်၊ တိုင်ချိုင်မည်ဆောင်၊ ကာဝန်းတောင်ပြိုင်၊ စိမ်းညှင်းအိုင်ပြင်၊ ရထိန်တွင်လျှောင်း၊ ကျွန်းပေါင်းလောင်းက၊ အင်းချောင်းတည်ထောင်၊ နနွင်းတောင်လျှင်၊ သောက်ရှုးပြင်ခေါင်၊ စည်ဘောင်တောင်ရဲ၊ ပုလဲတောင်လျှင်၊ ဂင်္ဂါပြင်ဟူ၊ တောင်ဖြူတောင်ပင်၊ ထီးဝန်းတင်ပေ၊ မုစ္စရေဟု၊ ဝေလုပဗ္ဗတ၊ နာမခေါ်ထူး၊ ထင်းရူးတောင်ခန်း၊ ငန်းတောင်ဝန်းနှင့်၊ ရီချမ်းအိုင်ကောင်း၊ ရွှီပန်းတောင်းသာ၊ ပဉ္စာမည်လျှောင်း၊ ကျောက်ပန်းတောင်းဟုတ်၊ သီရိဂုတ်က၊ ဓည၀တီ၊ သိင်ဂီမျိုးမြင့်၊ ကံသုံးဆင့်နှင့်၊ အဇ္ဇရ၀တီ၊ သီရိမာဝတီ၊ ခေါ်ညီတွင်ဆို၊ ရာဇဂြိုဟ်က၊ ရဏ္ဏ၀တီ၊ ဝေသာလီမှ၊ တလီမုက္ချ၊ ကုမ္ဘ၀တီ၊ တချီတွင်ထ၊ ဘရ၀ဏ၊ သုဝဏ္ဏဂီရိ၊ ဆိုဘိမယွင်း၊ လီညှင်းတောင်က၊ စန္ဒနနှင့်၊ ပါသိဝဆိုင်း၊ သ၀င်ကိုင်းက၊ ပြိုင်းတိုင်မည်နှင်း၊ ငခွေးသင်းတောင်၊ ငါးရီတောင်မှန်၊ ငဆဒ္ဒါန်ပေ၊ ကျက်သရေတောင်လျှင်၊ စည်သဘင်တောင်ကောင်း၊ ငရံချောင်းထက်၊ စမ္ပ၀က်တောင်၊ မောင်ပုံတောင်ကိုင်း၊ ပြိုင်းတိုင်တောင်ဖြူ၊ ကိန်းသာဟူပြန်၊ သလွန်တောင်ကောင်း၊ ပိန္နဲချောင်းဟူ၊ ဆင်ဖြူကျွန်းသာ၊ တခါအမှန်၊ ကာတန်တောင်ဆက်၊ ပုသင်တက်ပါ၊ သေလာတွင်ဘိ၊ ရင်ကတိသာ၊ သမ္မာဝတီ၊ စုံညီသာမို့၊ ပရိန်မြို့ထောင်၊ မာန်အောင်တဖြာ၊ ကျွန်းနံသာနှင့်၊ ပန်းနံသာက၊ ကက္ခရပဗ္ဗတ၊ နာမဂဏန်းတောင်၊ ထို့နောင်တသုံး၊ လှံရုံးသဖွယ်၊ တောင်သုံးဆယ်မှန်၊ သရဘန်ဆိုင်၊ နဂါးအိုင်နှင့်၊ တပင်တိုင်ဟူ၊ တောင်ဖြူတောင်သာ၊ နီလာတောင်မျိုး၊ လွန်ရိုးတောင်ဟုတ်၊ ဂုတ်မြို့ခေါ်ထို၊ လင်းဟုဆိုထ၊ ကမ္ဗလ၀က်၊ သရက်တောင်ပြီး၊ မနီးမယွင်း၊ စစ်တလင်းထား၊ ကျောက်လှေကားဟူ၊ မှန်ကူတချို့၊ လင်းမြို့မှန်ထ၊ မြေမြို့သချည်း၊ နေရဉ္စရာ၊ ကုသ၀ဒီ၊ ခေါ်ညီသာယာ၊ စမ္ပာဝတီ၊ စုံညီသာစွာ၊ လက်ယာဘက်မှာ၊ ဆက်ကာစိုင်၍၊ ရွီတွက်ခယ့်သော်၊ ကိုးဆယ့်ကိုးမြို့၊ အစို့စို့ကို၊ မင်းရို့ထီးနန်းတည်လတ်တည်း။ ။

(၂၃) တည်လတ်ထီးနန်း၊ တစိုင်ထွန်း၍၊ ဆိပ်ကမ်းသာလှ၊ ဂစ္ဆပ၏၊ ပစ္ဆေမဒေသာ၊ နောက်မျက်နှာ၌၊ တည်လာအစ၊ ပထမမူ၊ ကျီးမသရေ၊ ခေါ်ပေထင်ရှား၊ ကုလားပန်းဇင်း၊ မယွင်းပြုပ္ပာ၊ ဂန္ဓာမစ္ဆိမ၊ ပဘင်္ဂလျှင်၊ ဂဇင်ကလ၊ သန္တလရာဇ်၊ ဖြစ်သည်တဖြာ၊ စေကာကရာဇ်၊ သေတာရာဇ်မှ၊ ပပ္ပတရာဇ်၊ စုလရာဇ်သာ၊ ကာလကရာဇ်၊ တလှစ်မှန်စွာ၊ ပဋိကာလ၊ တည်ထနဒီ၊ အညီမှတ်ကြ၊ ပဉ္စကာမ၀တီ၊ တလီထိုမှ၊ တဉ္စရဉ္စရာ၊ တခါဆိုဟူ၊ အစ္စန္တုဘ၊ သုဝဏ္ဏဂီရိ၊ မည်ဟိခေါ်ပြု၊ ဝေဠုရတ၊ နာမတွင်ဘိ၊ ပဋိကရာနာဂရ၊ လောရမ္မနှင့်၊ ပဌမနဂိုရ်၊ ထိုထိုသာယာ၊ ရမ္မာပူရ၊ လောက္ကရက၊ သမ္မာပူရ၊ လောက္ခရတ၊ စက္က၀ဏ္ဏ၊ သမ္မာဝါရာ၊ ဝေသာပန်းတောင်း၊ တကြောင်းထိုမှ၊ တက္ကရမှန်၊ ငတန်သူရဲ၊ မလွဲတဆစ်၊ မလ္လရာဇ်က၊ ယက္ခဂန္ဓ၊ သမ္မဂီရိ၊ ခေါ်ဘိမှန်စွာ၊ ဂန္ဓဂီရိ၊ စတုရိနှင့်၊ ပုလိန္နရာဇ်၊ စိုင်ဆိုက်မှတ်ကြ၊ အ၀ိန္ဒတ၊ ကေကကရာဇ်၊ ဖြစ်သည်မယွင်း၊ ဆားတလင်းကြုန်း၊ ခမောင်းတုန်းဆိုင်၊ သရက်အိုင်ဆောင်၊ ငကြေးတောင်လျှင်၊ ဘုန်းပြင်ခေါ်ဆောင်၊ သပိတ်တောင်နှင့်၊ ယင်ပေါင်တောင်မင်း၊ အင်ကြင်းတောင်မွန်၊ ရွှီစင်္ကြန်ပေ၊ ဆင်သေတဖန်၊ ဆဒ္ဒန်အိုင်မှန်း၊ သ၀င်ကျွန်းနှင့်၊ စစ်တန်းတင်ဘက်၊ သမက်ခေါ်ထ၊ ယောက္ခမတည်း။ ဆံထုံးဖွေးဟူ၊ သလူတောင်စပ်၊ တပ်မြို့မည်မှန်း၊ တောင်ကျွန်းခေါ်ဆောင်၊ ကျက်တောတောင်မှ၊ ကာသုရတုံ၊ ထောက်ဆုံမလွဲ၊ တဲလမုချောင်း၊ တကြောင်းသည်နောက်၊ ပီတကောက်မှန်း၊ ပီကျွန်းသမန္ဒရာဇ်၊ စစ်စစ်မှန်သော၊ ပတကောလျှင်၊ တင်တိုင်းသင်တောင်၊ ခြင်္သေ့တောင်နှင့်၊ မြင်းသီတောင်ဖြစ်၊ ဘန္တရာဇ်ဆိုင်၊ ကင်းမိအိုင်ဆုံ၊ မထုံခေါ်မြို့၊ ရဲရို့ပင်တိုင်၊ ကျန်းခိုင်မောက်မောက်၊ သီမသောက်ဆို၊ သားပျိုငိုငြား၊ ကျောက်တန်းခါးဟုတ်၊ တရုပ်ကာညီ၊ ခွီးသီမှန်လတ်၊ ဥဒေါင်းဝတ်လျှင်၊ သက်ကျမ်းပြင်က၊ ခေါ်တွင်မှန်စွာ၊ မြို့သာယာနှင့်၊ မလ္လာမည်ဝင်၊ မြင်းသီပြင်လျှင်၊ အောင်သာပြင်က၊ နီလာပြင်မြောက်၊ ငကျိုင်တောက်ဟူ၊ ဆင်ဖြူတောင်ကျော်၊ ကံ့ကော်တောင်ကောင်း၊ ညောင်ချောင်းတွင်ငြား၊ စိမ်းညှင်းပြားဟူ၊ ပျားသားယူက၊ သြရမဟု၊ စည်ကြများပေ၊ ရွီတွက်ချေသော်၊ ကိုးဆယ်ကိုးမြို့၊ အစို့စို့ကို၊ မင်းရို့တည်ထ၊ ထီးနန်းချသည်၊ နာမသမိုက်မည်လတ်တည်း။ ။

(၂၄) မည်လတ်သမိုက်၊ ထီးနန်းစိုက်၍၊ ဘုန်းမြို့ထွန်းပ၊ ဗြဟ္မဏ၏၊ စိုးထတိုးစည်၊ ဆက်ကာသွယ်လျှက်၊ အနွယ်များစွာ၊ ဖြစ်ခြင်းရာကို၊ ရွီးကာဖော်ညွှန်း၊ ပိုကျယ်ဝန်း၍၊ စိစေ့ဆိုထ၊ ရုံး၍ပြအံ့၊ တရာ့ကိုးဆယ်၊ သျှစ်မြို့ဝယ်တွင်၊ အနွယ်ပုဏ္ဏား၊ နောင်ဖျားဆုံးစွန်၊ သရဘန်ဟု၊ ကျော်လွန်သတင်း၊ ထိုသည်မင်းလျှင်၊ ဆင်မြင်းရထား၊ ခြီသည်များနှင့်၊ တည်ထားပြောင်းရွှိ၊ ဝေသာလိဟု၊ ဘုမ္မိနက်သန်၊ မြီကြန်ညီညွတ်၊ မြို့မြတ်တည်လျှက်၊ ဆယ့်ခြောက်ဆက်တွင်၊ မြောက်ဖက်ရပ်မှာ၊ ဟေ၀န္ဒာ၏၊ ရီသာညိုမြ၊ ဂစ္ဆပတွင်၊ ပစ္စုံသျှင်မိုး၊ ရွာသွန်းဖြိုးက၊ ဟိုးဟိုးများစွာ၊ စီးကျလာလျှင်၊ ထိုတွင်နီထ၊ ဆတ်မကမူ၊ ကြောက်လှကြီးကျင်၊ ညောင်ကြပ်ပင်ကို၊ ခုံမင်ကြွကြွ၊ အရကိုးလျှက်၊ ခိုမှီတက်၏။ တချက်ထိုထို၊ မျောက်ဖိုကလည်း၊ စိမ်းမြညွှန့်ရှင်၊ သဖန်းပင်ဝယ်၊ ခုံမင်တက်မှု၊ နီကုန်ပြု၏။ ရီထုများလှ၊ ပြည့်လတ်ကလျှင်၊ ဆတ်မမျောက်ထီး၊ အပြီးထိုခါ၊ မျောလီပါသော်၊ သေလာဂီရိ၊ အမည်ဟိသား၊ များသိနှမ့်ဆောင်၊ ကျောက်တော်တောင်သို့၊ ရီကြောင်းပို့ကျင်၊ ရောက်လီလျှင်သော်၊ တူပင်မပြား၊ နီတုံငြားက၊ နှစ်ပါးဆုံထ၊ ပေါင်းဖော်ကြသည်၊ နှစ်လရက်ကြာနီလတ်တည်း။ ။

(၂၅) နှစ်လရက်ကြာ၊ နီသောခါ၌၊ တိရိစ္ဆာန၊ ထိုဆတ်မသည်၊ ပုပ္ပနမိတ်၊ အကြောင်းဟိတ်ကြောင့်၊ သုံးကျိတ်နှစ်ယောက်၊ တွက်ရွီမြောက်သား၊ အံ့လှောက်ထွေပြား၊ သားကိုဖွား၏။ ထိုသားရို့တွင်၊ တချို့သားကား၊ ငှက်ဖြစ်ငြား၍၊ ပျံလားတုံမြောက်၊ ဥပွားပေါက်၏။ တချို့သားကား၊ မှန်ငြားစင်စစ်၊ လူလျှင်ဖြစ်က၊ လူ၌၀င်ပြီး၊ ပေါင်းဖော်မှီး၏။ သားကြီးဖြစ်ထ၊ အားဗလနှင့်၊ နာမတွင်ပြန်၊ ငဆဒ္ဒါန်လျှင်၊ တဖန်ခေါ်ဘိ၊ ပက္ခမိနှင့်၊ ထိုပြီးတလှစ်၊ ငရဲခိုက်တည်း၊ စင်စစ်မှန်ညီ၊ ရက္ခနီဟူ၊ တူပြီးယှဉ်ထ၊ ဘီလူးမနှင့်၊ သင့်တင့်ပေါင်းမှု၊ ငရဟုတည်း၊ ဆွီစုမျိုးချည်း၊ ငပါးသဲလျှင်၊ နက်မဲအရုပ်၊ ငလကုတ်ရို့၊ ကြမ်းကြုတ်မိုက်မူး၊ စွယ်ပြူးပြူးနှင့်၊ ဘီလူးမသား၊ ဖြစ်ငြားတုံမြောက်၊ ခုနစ်ယောက်တည်း။ မွှီနောက်တုံထ၊ မောင်နှမရို့၊ ဖိုမကာမေ၊ နီကုန်ပေ၏။ ဖွေဖွေရှာရှာ၊ ရပ်ဒီသာကို၊ လှည့်ကာပတ်လျှက်၊ မိုးထက်ဆိုင်းဆာ၊ ညဆိုင်းဆာကို၊ ဝေသာလိမည်၊ ထိုသည်ပြည်၌၊ နီသည်မချား၊ လူအများကို၊ ဖမ်းငြား၍သာ၊ စားကြပါသော်၊ ပြည်သာစိုးခြင်း၊ ထိုသည်မင်းလည်း၊ ဆင်မြင်းရထား၊ ခြီသည်များနှင့်၊ လူသားစားကြူး၊ တောဘီလူးနှင့်၊ နှစ်ဦးပူးဆိုင်၊ စစ်ရေးပြိုင်သော်၊ ကြီးခိုင်အားအန်၊ ငဆဒ္ဒါန်လျှင်၊ ဆင်ဟန်ဖန်ဆင်း၊ လိုက်လီလျှင်း၍၊ အတင်းဖမ်းငြား၊ မင်းကိုစားက၊ ပုဏ္ဏားမျိုးနွယ်၊ ပျက်ကိန်းသွယ်သည်၊ ပြီးဖယ်လူများကြောက်ရွံ့တည်း။ ။

(၂၆) ကြောက်ရွံ့လူများ၊ ပြီးယှောင်လား၍၊ ထင်ရှားခေါ်ဘိ၊ ဝေသာလိဟု၊ တွင်ဘိအမည်၊ ထိုရွှီပြည်ကို၊ ပတ်လည်ရံငြား၊ ဘီလူးစားက၊ တိုင်းကားပြည်ရွာ၊ ချောက်ချားခါ၌၊ မဟာနာဂရ၊ ကပ္ပိလကို၊ အဇ္ဇုနမင်း၊ ဖယ်ခွာလျှင်း၍၊ သီတင်းသုံးရာ၊ ရှိကြမ္မာကြောင့်၊ တောအောင်းနီထ၊ ထိုဆတ်မနှင့်၊ သံဝါကိစ္စ၊ တွိဆုံကြခါ၊ ဣန္ဒမာယု၊ ခေါ်ကြပြုငြား၊ သားကိုဖွား၏။ လူလားမြောက်ခါ၊ တေဇာကြီးထု၊ မာရယုကား၊ စစ်ပြုဆိုင်တိုက်၊ ငရက္ခိုက်ဟု၊ ၀န်းဝိုက်နီငြား၊ ဘီလူးများကို၊ ထွားထွားညက်ညက်၊ အကုန်ဖျက်မှ၊ အောင်ချဌာန၊ ထိုကစ၍၊ တွင်သနွယ်ရိုး၊ ရခိုင်မျိုးဟု၊ ပတ်ဟိုးနှမ့်သိ၊ ကျော်ဇောဘိ၏။ မှတ်သိခေါ်ပြု၊ မာရယုဟု၊ ကြီးထုတေဇာ၊ မင်းမဟာလျှင်၊ တည်လာအစ၊ ပထမသည်၊ ဓည၀တီ၊ မြို့ဌာနီ၌၊ လောကီဈာန်ဖြစ်၊ ဆယ့်ခြောက်နှစ်တည်း။ သားချစ်သားငယ်၊ မာရဇေကား၊ ရွှီပြည်စိုးလှစ်၊ သုံးဆယ့်နှစ်တည်း။ တရစ်စိုးတုံ၊ မာရအုံကား၊ ရွှီဘုံနန်းမှာ၊ တိပဉ္စာတည်း။ မာရရွယ်လျှင်၊ စိုးသည်မှန်ဖြစ်၊ လေးဆယ့်သျှစ်တည်း။ သားချစ်ခေါ်တွင်၊ မာရကင်ကား၊ စံရွှင်ပျော်ပါး၊ ငါးဆယ့်ငါးတည်း။ နွယ်များမတိမ်၊ မာရဇိန်မူ၊ ရွီယူတွက်ကျုံး၊ သုံးဆယ့်သုံးတည်း။ ပြိုင်နှုန်းမမြင်၊ မာရတင်ကား၊ နန်းခွင်စံငြိမ်း၊ ဒွေးတရိန်းတည်း။ စိုးသိမ်းပျော်လျှက်၊ ခုနှစ်ဆက်တွင်၊ ကျက်ကျက်ရန်ငြို၊ ငဆတ်အိုသည်၊ ကြည်ညိုမဟိ၊ ပုန်ကန်ဘိ၍၊ ဧက၀ိသာ၊ နှစ်သင်္ချာတွင်၊ ခန္ဓာငါးတန်၊ ပြတ်လီပြန်မှ၊ နန်းရံမင်းစစ်၊ သျှစ်ဆက်ဖြစ်၏။ နှစ်ကိုပေါင်းကာ၊ တွက်ရွီပါက၊ သုံးရာသုံးဆယ်၊ ခြောက်နှစ်ဝယ်လျှင်၊ အကယ်မှန်စွာ၊ ဖြစ်လီပါသည်၊ တခါနန်းရိုးဆက်ပြန်တည်း။ ။

(၂၇) ဆက်ပြန်နန်းရိုး၊ ရွှီထီးမိုး၍၊ နွယ်မျိုးသန့်စင်၊ မာရတင်ဟု၊ မည်ပင်တွင်ခြင်း၊ ထိုသည်မင်း၏၊ သားကြီးဖြစ်ထ၊ ကြီးတေဇနှင့်၊ ဒွါလစန္ဒရား၊ နန်းတက်ငြားခါ၊ နှစ်မှာလေးဆယ်၊ ချမ်းသာပေစွ၊ ဆိုကုန်ကြ၏။ သောလစန္ဒရား၊ ထိုမင်းဖျားမူ၊ တွက်ငြားရွီကျုံး၊ သုံးဆယ့်သုံးတည်း။ လက်ရုံးကြီးထ၊ နီနှင့်လသို့၊ သူရိယစန္ဒရား၊ မင်းမြတ်ကားမူ၊ စံစားသုံးဆယ်၊ ခုနှစ်ဝယ်တည်း။ ဘုန်းကြွယ်ထွန်းပ၊ တုမမျှသည်၊ ကာလစန္ဒရား၊ လေးဆယ်စား၏။ သားတဉ္စစန္ဒရား၊ ခြွီရံများနှင့်၊ စံငြားတုံဖြစ်၊ သုံးဆယ့်တစ်တည်း။ တန်းထစ်ရွီမှု၊ မှတ်တော်ပြုလော့၊ မဓုစန္ဒရား၊ နှစ်ဆယ်အားဖြင့်၊ စံစားပြီးမှ၊ ရန်မျိုးခ၏။ ဇေယစန္ဒရား၊ အောင်ဆုပွား၍၊ စိုးငြားအုပ်ခါ၊ လေးဆယ်သာတည်း။ မောက္ခစန္ဒရား၊ မူးမတ်များနှင့်၊ ထင်ရှားကျော်ချောက်၊ နှစ်ဆယ့်ခြောက်တည်း။ တယောက်မှန်ထ၊ သားပုတ္တမူ၊ ဂုဏစန္ဒရား၊ ရွှီနန်းအားကို၊ သိမ်းငြားစိုးထ၊ ဒွါဒသတည်း၊ ဒိပ္ပကျော်ကြား၊ စန္ဒရားကို၊ မြိုမတ်သုံးယောက်၊ ပုန်ကန်မြောက်၍၊ လွဲဖောက်လီငြား၊ မတ်သုံးပါးတွင်၊ ရှိဖျားအမတ်၊ စိုးအုပ်ကွပ်သော်၊ ရက်မှတ်သတ္တာ၊ တယောက်မှာကား၊ မှန်စွာသုံးလ၊ တယောက်ကမူ၊ သျှစ်လဟူ၏။ စိုးယူသိမ်းမြန်း၊ အောင်ခန်းထိန်လင်း၊ ကိုးဆက်မင်းရို့၊ စိုးလျှင်းသောခါ၊ နှစ်ပေါင်းမှာမူ၊ နှစ်ရာ့သျှစ်ဆယ်၊ မှန်ပေထစ်ထစ်၊ စိုင်ဆက်ဖြစ်သည်၊ ထောင်လှစ်ထီးနန်းထပ်မံတည်း။ ။

(၂၈) ထပ်မံထီးနန်း၊ တည်လတ်ထွန်း၍၊ တန်ခိုးကြီးလှ၊ နီနှယ်ပသည်၊ ဂုဏစန္ဒရား၊ ထိုမင်းဖျား၏၊ ဖွားထပုတ္တာ၊ ကံရာဇာကြီး၊ စိုးပြီးအုပ်ကာ၊ လေးဆယ်မှာဝယ်၊ စွန်းပါတနှစ်၊ ဖြစ်တုံရစ်၏။ ညီချစ်ကနိဌာ၊ လောင်းပွင့်လျာမူ၊ ကံရာဇာငယ်၊ တင့်တယ်ထွန်းပ၊ ဆတ္တိသတည်း။ ဣန္ဒသူရိယာ၊ ပံတိသာနှင့်၊ ဆက်ကာရိပ်ငြိမ်၊ အသူရိန္ဒ၊ သူရိယလျှင်၊ စိုးထသက္က၊ သုံးဆယ်ပြ၏။ သာရမိတ္တ၊ စိုးအုပ်ပသည်၊ အဋ္ဌ၀ီသ၊ သူရိယမူ၊ ဧကတရိန်း၊ ဖြစ်တုံပြီးမှ၊ မင်းထီးမင်းပါ၊ နှစ်ပါးမှာကား၊ ဓမ္မ၀ီသ၊ အညီမျှ၏။ သည်ပထိုနောင်၊ မင်းစည်ပေါင်ကား၊ တွက်ငြားရွီစစ်၊ နှစ်ဆယ့်သျှစ်တည်း။ ညီချစ်အရင်း၊ တံတိုင်းသင်းနှင့်၊ ပွင့်လင်းစည်ပင်၊ ကျော်ခေါင်စင်ဟု၊ ဖြစ်ကျင်တုံငြား၊ မင်းနှစ်ပါးရို့၊ မခြားစိုးရစ်၊ သုံးဆယ့်တစ်စီ၊ ခတ်လစ်တံဆိတ်၊ စန္ဒမိတ်ကား၊ စိုးငြားတုံရစ်၊ နှစ်ဆယ့်တစ်တည်း။ ဖြစ်သည်စိုင်လျှက်၊ ဆယ့်နှစ်ဆက်လျှင်၊ ရွီတွက်စစ်ခါ၊ နှစ်ဝါသာကား၊ သုံးရာ့ငါးဆယ်၊ ခြောက်နှစ်သွယ်သည်၊ စံပယ်ရွှင်ပနတ်ဟန်တည်း။ ။

(၂၉) နတ်ဟန်ရွှင်ပ၊ အနန္ဒဟု၊ အဘယရာဇာ၊ အတ္တိသာတည်း၊ လက်ယာစည်သူ၊ ဒွတ္တိဟူ၏။ မြင့်မူစိုးရ၊သီဟကလည်း၊ ရွှီထမှန်ကျုံး၊ လေးဆယ့်သုံးတည်း။ ပတ်ကုန်းဝန်းရံ၊ မင်းဘုန်းသန်ကား၊ ပျော်စံတုံရစ်၊ သုံးဆယ့်တစ်တည်း။ တထစ်စံသီး၊ သက္ကမွှီးက၊ န၀စတ္တာ၊ အုပ်ချုပ်ပါ၏။ ဇေယျနန္ဒသူ၊ ဘုန်းညွန့်လူသည်၊ ရိပ်ဖြူဖြန့်လှစ်၊ ငါးဆယ့်တစ်တည်း။ တလှစ်တုံမူ၊ တက္ကသူကား၊ ရွီယူချီမြောက်၊ လေးဆယ့်ခြောက်တည်း။ ကျော်ချောက်ကြေငြာ၊ လက္ခဏာကား၊ သတ္တာတရိ၊ စိုးစံဘိ၏။ မှတ်သိတုံလှစ်၊ ဂုဏရာဇ်ကား၊ သျှစ်နှစ်လေးဆယ်၊ အသိလွယ်တည်း။ နီနှယ်ထွန်းသစ်၊ သီဝရာဇ်ကား၊ အက်နှစ်တရိ၊ စိုးစံဘိ၏။ မည်ဟိကျော်ဟီး၊ မင်းလှမွှီးကား၊ စံစားတုံဖြစ်၊ သုံးဆယ့်တစ်တည်း။ တလှစ်ထိုမှ၊ ပူရိန္ဒလျှင်၊ ဓမ္မဆဋ္ဌ၊ စိုးပိုင်သ၏။ သိဒ္ဓတကုမ္မာ၊ ဒွေးဝိသာနှင့်၊ စိုင်ကာဆက်ပြီး၊ မင်းလှကြီးကား၊ ရွှီထီးဖြန့်ထ၊ သတ္တစာလိ၊ ဖြစ်တုံဘိ၏။ ဘုန်းဟိသာစည်၊ မင်းလှငယ်ကား၊ နှစ်ဆယ့်လေးနှစ်၊ စည်းစိမ်ဖြစ်၏။ ရွီစစ်နှစ်မှာ၊ တွက်ခြစ်ပါမူ၊ ပဉ္စာန၀၊ ပညာသတည်း။ ရာဇဘုန်းမိုး၊ ရွှီနန်းစိုးသား၊ နွယ်ရိုးဝံသ၊ စိုင်၍ပြသော်၊ ဖြစ်ထတုံငြား၊ တဆယ့်ငါးသည်၊ ထင်ရှားမင်းဆက်အမှန်တည်း။ ။

(၃၀) အမှန်မင်းဆက်၊ စိုင်မပျက်သည်၊ ထီးချက်ဖြန့်လှစ်၊ စေတရာဇ်ကား၊ အနှစ်သုံးဆယ်၊ ပျော်စံပေ၏။ ဘုန်းကြွယ်လျှံထွန်း၊ မျက်နှာဝန်းမူ၊ ရွှင်လန်းစံဖြစ်၊ သုံးဆယ့်တစ်တည်း။ နှစ်ရှည်ကြာပြီး၊ လက်ရုံးကြီးကား၊ သတ်ဒွီးယူဘိ၊ မှတ်ကုန်ဘိလော့။ သီရိကမ္မသုန္ဒ၊ အတ္တိသတည်း။ နန္ဒကောဘယ၊ စောမင်းလှမူ၊ စိုးထစံလှစ်၊ သတ်ဒွေးဖြစ်၏။ သားချစ်တမူ၊ မင်းနံဖြူကား၊ နှစ်ဆယ်ဟူ၏။ မင်းနံလှမူ၊ အဋ္ဌ၀ီသ၊ စံထဖြစ်ပေ၊ မင်းခေါင်ငယ်ကား၊ တဆယ့်ကိုးနှစ်။ တက်သစ်ဘုန်းရောင်၊ လက်ရုံးထောင်သား၊ လောက်ခေါင်ရာဇာ၊ လေးဆယ်သာလျှင်။ ရာဇာမင်းငယ်၊ ပျော်လှစည်ကား၊ စိုးသည်မှန်မြောက်၊ ခြောက်နှစ်ရောက်၏။ ထွန်းတောက်ဘုန်းသမ္ဘာ၊ သာယာလှသား၊ ဓည၀တီ၊ မြို့သိင်ဂီသည်၊ တလီကျိန်းခန်း၊ မကောင်းထွန်း၍၊ ထီးနန်းသိမ်းထ၊ ပြောင်းပြီးမှလျှင်၊ ရန္န၀န္ဒာ၊ မြစ်ညာဆီ၏၊ မြနီလာစက်၊ လက်ယာဘက်၌၊ အောင်ချဌာန၊ ထီးနန်းချသော်၊ နှစ်လရက်လျှင်၊ မမြင့်ခင်၌၊ တိုင်ပင်ညီငြား၊ မတ်သုံးပါးရို့၊ ပုန်စားပြီးလျှင်၊ မင်းပြုကျင်၏။ သိထင်ကျော်ချောက်၊ နှစ်နှစ်မြောက်၏။ နောက်မင်းလေးနှစ်၊ ဆက်ကာဖြစ်၏။ မကောင်းခိုက်ရန်၊ ဒေါသမာန်ဖြင့်၊ ပုန်ကန်ပြုလျှက်၊ ကျွန်သုံးဆက်ရို့၊ နှိပ်စက်လှုပ်လျှား၊ မင်းပြုငြားသော်၊ စကားနှုတ်ပွင့်၊ အစိုင်သင့်ဖြင့်၊ ကံသုံးဆင့်မြို့၊ သမိုက်စို့လျှက်၊ လူရို့များဖျင်၊ ခေါ်ကြကျင်သည်။ နှစ်လျှင်တွက်စစ်၊ နှစ်ရာဖြစ်လျှက်၊ စွန်းရက်ခုနှစ်ဆယ်၊ အနွယ်ရောယှက်၊ ဆယ့်သုံးဆက်လျှင်၊ အပျက်အကျပ်၊ ရောထွီးလတ်သည်၊ မှတ်လော့မကြွင်းမကျန်တည်း။ ။

(၃၁) မကျန်မကြွင်း၊ ပြည်ခပင်းကို၊ ရုန်းရင်းပြုမြောက်၊ မတ်သုံးယောက်ရို့၊ ရှိနောက်ဘယ်ညာ၊ ဖျက်ဆီးခါမှ၊ ပဉ္စာလရာဇ်၊ တိုင်းသနစ်ဟု၊ ဖြစ်သည်သာစည်၊ သင်းတွဲပြည်ကို၊ ဆက်ရှည်စိုးဘိ၊ နာမဟိသား၊ အဘိရာဇာ၊ သားသဲချာမူ၊ ကံရာဇာကြီး၊ ချီလာပြီးမှ၊ တိမ်နီမိုးဆောင်း၊ ကျောက်ပန်းတောင်း၌၊ မြို့ကောင်းတည်ခယ့်၊ ရန်မျိုးဖယ့်လျှက်၊ နှစ်ဆယ့်လေးနှစ်၊ စိုးသည်ဖြစ်မှ၊ တလှစ်ဖော်ထုတ်၊ သီရိဂုတ်၌၊ အဟုတ်မှန်စွာ၊ မြို့တည်ပါသော်၊ မြင့်ကြာမရ၊ လေးလမျှလျှင်၊ ခွါရတုံငြား၊ ပြောင်း၍လားသော်၊ သိကြားမာဃ၊ ညွှန်လာပြသား၊ ဓည၀တီ၊ မြို့ဌာနီကို၊ တလီတွက်စစ်၊ သက္ကရာဇ်ကောဇာ၊ ရူပကာတွင်၊ တည်လာပြုလှစ်၊ ထီးနန်းစိုက်၍၊ ဟိုးရိုက်ကျော်ထ၊ ပုတ္တိသတည်း။ ဥပရာဇ၊ အိမ်ရှိရသား၊ သီလရာဇာ၊ ဆက်ပြန်လာ၍၊ အဋ္ဌာပေတ၊ နှစ်ပေါင်းရ၏။ ၀ါသုရရာဇာ၊ နန်းဘုံသာ၌၊ ဧကာရာမ၊ စိုးအုပ်သချင့်။ နန္ဒ၀ိဘူရ၊ စာလိသဖြင့်၊ ပုဏ္ဏသူရိယာ၊ ထိုမင်းမှာကား၊ ဓမ္မတရိ၊ ဖြစ်တုံဘိ၏။ သိရိနန္ဒာ၊ သင်္ချာနှစ်တိ၊ သိလိုဘိမူ၊ တရိဝီသာ၊ စန္ဒိမာကား၊ ဆက်လာပြန်ခယ့်၊ သုံးဆယ့်ခုနှစ်၊ စိုးသည်ဖြစ်၏။ သားချစ်မည်ဟိ၊ သီရိနန္ဒာ၊ နှစ်စာလီသ၊ စံစားရ၏။ မင်းလှဘုန်းသန်၊ သီဟရံကား၊ နိုင်ငံကျော်ချောက်၊ လေးဆယ့်ခြောက်တည်း။ ထွန်းတောက်နီတု၊ သီဟနုကား၊ စိုးဉပမှန်ထ၊ နှစ်ဆယ်ပြှု။ ပရတရာဇ၊ စိုးရတုံလစ်၊ သုံးဆယ့်တစ်လျှင်၊ ဘုန်းသစ်ပွင့်ကြုံ၊ နီလဂုဏ်ကား၊ ရောင်ဟုန်ထွန်းပ၊ ပါဒသ၌၊ ဧကတိသုံ၊ သီရိဂုဏ်ကား၊ ရွှီဘုံစိုးရ၊ ဇောဗီသတည်း။ နှစ်ရအစု၊ ရွီတွက်ဉပသော်၊ စတုအဋ္ဌ၊ ဧကပြ၏။ ရာဇ၀င်ရေး၊ တဆယ့်လေးသည်၊ စည်းဝေးဗိုလ်ထုများစွာတည်း။ ။

(၃၂) များစွာဗိုလ်ထု၊ စည်းဝေးပြု၍၊ နှိုင်းတုမဲ့စွာ၊ သမံဇာမူ၊ ပဉ္စာတိသ၊ စိုးအုပ်ပ၏။ သုဝဏ္ဏကုမ္မာ၊ မင်းမြတ်စွာကား၊ ဘုံသာဥကင်၊ ဆယ်နှစ်ရွှင်၏။ သက်တင်ဖြူမှာ၊ လေးဆယ်လာ၏။ တေဇာဘုန်းထူး၊ သက်တင်ဦးကား၊ ရွှင်မြူးစံပ၊ ဒွေးပေတတည်း။ ဇေတ၀န်မင်း၊ ဆတ္တိရင်းတည်း။ မယွင်းမှန်စွာ၊ မုဉ္စယာကား၊ ပေတာရာမ၊ ရွှင်စံပ၏။ ကုမ္မာရ၀ိသုဒ္ဓိ၊ မင်းဘုန်းဟိကား၊ ရှည်ဘိအာယု၊ သျှစ်ဆယ်ပြု၍၊ စွန်းမှုခုနှစ်၊ စိုးတုံရစ်၏။ သားချစ်သားစု၊ ပျိုရွယ်နုသည်၊ ၀ါသုမ္ဂလ၊ မင်းမတ်လှမူ၊ ရွှင်ပနန်းထဲ၊ သုံးဆယ့်လေးတည်း။ ရွှီသဲယောင်းလှ၊ သုရိန္ဒကား၊ ဧကတိသာ၊ စိုးအုပ်ပါ၏။ ရာလမာယု၊ ပျော်မှုစံကာ၊ ဒွတ္တိသာတည်း။ နာလမာယု၊ အတ္တိပြု၏။ ပြိုင်တုကင်းကုန်၊ ၀ိရတဂုဏ်ကား၊ ရွှီဘုံနန်းစိုက်၊ နှစ်ဆယ့်နှစ်တည်း။ သားချစ်မျက်ရှု၊ ၀ိသုရာဇာ၊ အတ္တိသာတည်း။ သီရိရာဇာ၊ စောမင်းလျာကား၊ ပဉ္စတိသံ၊ နန်းဘုံစံ၏။ ကုလံဝံသ၊ နရိန္ဒရို့၊ စိုးထနန်းထက်၊ ဆယ့်လေးဆက်တည်း၊ တွက်ချလီခါ၊ နှစ်ဝါသာမူ၊ လေးရာကျော်လှစ်၊ ကိုးဆယ်ဖြစ် တထစ်မယွန်း၊ အစိုင်ထွန်းသည်၊ ရွှီနန်းသိင်္ဂါအောင်ချာတည်း။ ။

(၃၃) အောင်ချာသိင်္ဂ၊ စိုးစံပသည်၊ သူရိယစန္ဒာ၊ မင်းမြတ်စွာကား၊ မဟာမုနိ၊ ဆရံသိဖြင့်၊ ထွန်းညီးရောင်တော်၊ ရုပ်ရှင်တော်ကို၊ သုံးဘော်သနင်း၊ တရားမင်းအား၊ ၀ပ်စင်းပြုထ၊ တောင်းပန်ခ၍၊ ဓည၀တီ၊ မြို့ဌာနီတွင်၊ သိင်ဂီမောက်မောက်၊ ကျောင်းတော်ဆောက်ကာ၊ ၀မ်းမြောက်စိတ်ဖြူ၊ လှူတော်မူ၏။ ဘုန်းထူးမြတ်စွာ၊ သာသနာလည်း၊ ရောင်ဝါတောက်ထွန်း၊ နိညထွန်း၏။ ပွင့်လန်းသာယာ၊ ထိုရာဇာကား၊ စိုးငြားမှန်ပေ၊ နှစ်ငါးဆယ်နှင့်၊ စွန်းဝယ်နှစ်နှစ်၊ အမှန်ဖြစ်၏။ သားချစ်ရာဇာ၊ ဥပရာမူ၊ သူရိယဓိပတိ၊ စောဘုန်းဟိကား၊ မှန်ဘိစိုးထ၊ တိပဉ္စတည်း။ သူရိယရူပ၊ ပန္နရဖြင့်၊ သူရိယာစန္ဒလ၊ ဒွေးဆတ္တနှင့်၊ သူရိယာစက္က၊ စိုးထမနှေး၊ လေးဆယ့်လေးတည်း။ သူရိယာနာထ၊ သိင်္ဂနန်းရံ၊ လေးဆယ်စံ၏။ ပုတ္တံသားလှ၊ နာမမည်ဟိ၊ သူရိယ၀ံသာ၊ ကိုးနှစ်ကြာ၍၊ သူရိယာဝန္ဒ၊ ခြောက်နှစ်ပြ၏။ သူရိယကလျာ၊ ဘုန်းသမ္ဘာနှင့်၊ အဋ္ဌာရသ၊ စိုးပြီးမှလျှင်၊ သူရိယမုခ၊ ဆဗ္ဗီသတည်း။ သူရိယဇေတ၊ စိုးထတုံလှစ်၊ သုံးဆယ့်တစ်တည်း။ ဖြစ်သည်စိုင်လျှက်၊ ဆယ့်နှစ်ဆက်ရို့၊ နန်းထက်စိုးကာ၊ နှစ်ပေါင်းမှာမူ၊ သုံးရာကျော်လစ်၊ ကိုးဆယ်ဖြစ်၏။ ကြွင်းရစ်စွန်းလွန်၊ သျှစ်နှစ်မှန်သည်၊ ဧကန်မှတ်ကြသင့်စွာတည်း။ ။

(၃၄) သင့်စွာမှတ်ကြ၊ ထီးဖြူလှနှင့်၊ သူရိယပုညာ၊ သျှစ်နှစ်သာတည်း။ သူရိယာကုလ၊ တိဝီသဟု၊ သူရိယပဘာ၊ ပဉ္စမ္မာဖြင့်၊ သူရိယာစိတြ၊ ဆယ့်သျှစ်မျှလျှင်၊ သူရိယဇေဌ၊ ဒွေးဝီသတည်း။ သူရိယာဝိမလ၊ သျှစ်နှစ်ပြ၏။ သူရိယယေနု၊ ဒွေးဒွေးပြု၏။ သူရိယကံသ၊ ဆယ့်ခြောက်ရ၏။ သူရိယသကျာ၊ သျှစ်နှစ်ကြာ၏။ သူရိယသီရိ၊ ၀ီသတိတည်း။ သူရိယကေသိ၊ ကိုးနှစ်ဟိ၏။ သူရိယကုမ္မ၊ တိဓမ္မတည်း။ သူရိယကေတု၊ စိုးပြုစံပ၊ ဒွေးပေတတည်း။ ရာဇ၀ံသာ၊ မင်းဆက်မှာကား၊ ရွီကာတွက်ကျုံး၊ တဆယ့်သုံးတည်း။ စုရုံးနှစ်မှာ၊ ပေါင်းနှောပါသော်၊ နှစ်ရာ့လေးဆယ်၊ လေးနှစ်ပေတည်း။ အနွယ်စိုင်ထ၊ သူရိယဟု၊ ခေါ်ကြသချည်း၊ ဆက်ကာတည်းလျှင်၊ ကမ္ပည်းသိထင်၊ မော်ကွန်းတင်သည်၊ ၀န်းကျင်သျှစ်ရပ်ဒီသာတည်း။ ။

(၃၅) ဒိသာသျှစ်ရပ်၊ ကြားနှမ့်စပ်သား၊ နတ်မျိုးနွယ်လာ၊ မဟာတဉ္စစန္ဒရား၊ မည်ထင်ရှားသား၊ ကျော်ကြားဘုန်းထူး၊ အောင်စည်ကျူး၍၊ ရောင်မြူးတောက်ထွန်း၊ ရွှီဘုံနန်းကို၊ စိုးမြန်းတနှစ်၊ ပြီးတုံရစ်မှ၊ ခုနှစ်အင်္ဂါ၊ ပြည့်စုံပါသား၊ မဟာဗလ၊ နဂရဟု၊ ဓည၀တီ၊ မြို့ဌာနီသည်၊ တလီကျိန်းခန်း၊ မကောင်းထွန်း၍၊ ထီးနန်းစိုက်သင့်၊ ကံသုံးဆင့်ကို၊ ရှည်မြင့်စိမ့်ငှာ၊ တည်လီပါလည်း၊ မကြာမတင်၊ တနှစ်တွင်ဝယ်၊ ပျက်ကျင်ပေမှ၊ ထိုမြို့ကသည်၊ ခွာထပြောင်းဘိ၊ ဝေသာလိဟု၊ တွင်သိနှိုင်းဆ၊ မြို့သာလှကို၊ ရွီတွက်သင်္ချာ၊ နှစ်ကောဇာမူ၊ တရာ့ငါးဆယ်၊ နှစ်နှစ်ဝယ်တွင်၊ ဘုန်းကြွယ်မင်းမွန်၊ တည်လာပြန်၍၊ တဖန်စိုးရစ်၊ နှစ်ဆယ့်နှစ်တည်း။ တက်သစ်နီလ၊ ကောင်းခြင်းပသည်၊ သူရိယစန္ဒရား၊ မင်းဖျားကမူ၊ ဆန်းပြားအံ့ဖွယ်၊ နန်းဘုံလယ်၌၊ စံပေဧကန်၊ နှစ်ဆယ်မှန်၏။ နိုင်ငံကျယ်ပြော၊ ဇမ္မူကြောဝယ်၊ မောလစန္ဒရား၊ လက်ရုံးအားနှင့်၊ စံစားအုပ်စိုး၊ တဆယ့်ကိုးတည်း။ ပြည့်ဖြိုးပည၊ ကုသလကြောင့်၊ ပေါလစန္ဒရား၊ ခေါင်ထွတ်ဖျားကား၊ ၀န်းလျှားခြံရံ၊ တင့်စိုးစံပ၊ ဆဗ္ဗီသတည်း။ ကာလစန္ဒရား၊ ကိုးနှစ်စား၏။ မခြားဝံသ၊ စိုင်ဖြစ်ကြသည့်၊ ထူလစန္ဒရား၊ ကျော်နှမ့်ကြားသား၊ မင်းဖျားပရမေ၊ စောဘုန်းကြွယ်လည်း၊ ခြွီရွေရံကာ၊ နန်းဘုံသာ၌၊ န၀ါအတ္တိ၊ စံစားဘိ၏။ သီရိစန္ဒရား၊ ဥကင်ဖျားဝယ်၊ ကြယ်များရံကာ၊ လပမာသို့၊ ချမ်းသာစံရ၊ ဒွတ္တိသတည်း။ သိင်္ဂစန္ဒရား၊ မင်းဖျားထွတ်ခေါင်၊ နန်းတောင်ညာထက်၊ သောဠဿတည်း။ စူဠစန္ဒရား၊ ထိုမင်းဖျားကား၊ စိုးငြားအုပ်ကာ၊ ခြောက်နှစ်ကြာ၏။ စိုင်လာမပျက်၊ အဆက်ဆက်လျှင်၊ သောင်းကျက်ကျော်ကြား၊ စန္ဒရားရို့၊ သိကြားပီးဆက်၊ လှံလက်နက်ဖြင့်၊ အုပ်ကြက်လွှမ်းမိုး၊ ထိန်ဟိန့်ကြိုးသည်၊ လူမျိုးရိုခညွတ်လာတည်း။ ။

(၃၆) ညွတ်လာရိုခ၊ ဘုန်းတေဇကြောင့်၊ န၀ရတနာ၊ ပြည့်စုံပါသား၊ ပြည်သာပူရိ၊ ဝေသာလိ၌၊ ဆန္ဒြရူပ၊ တရိန္ဒဟု၊ ရွီထအစစ်၊ သက္ကရာဇ်သည်၊ ရောက်လစ်မှန်စွာ၊ နှစ်ကောဇာတွင်၊ စိုင်ကာခြားပြု၊ မိလက္ခဟု၊ ခေါ်မူသိတုံ၊ အမြတုံမူ၊ နန်းဘုံသတ္တ၊ စံပြီးမှတည်း၊ သားငလှပ်ပျူ၊ မြောက်ဦးထူ၍၊ သိမ်းယူစိုးရစ်၊ တဆယ့်နှစ်မှ၊ တလှစ်ထိုနောင်၊ သပိတ်တောင်ကို၊ တည်ထောင်ပြန်ဖြစ်၊ တဆယ့်သျှစ်တည်း။ သက္ကရာဇ်မှာ၊ တွက်ရွီပါသော်၊ သုံးရာငါးဆယ်၊ ခြောက်ခုဝယ်၌၊ စင်စစ်ထင်ရှား၊ စန္ဒရား၏၊ သားရင်းမှန်ပင်၊ သက်မည်တွင်သား၊ ငမင်းငတုံး၊ တေဇာဘုန်းနှင့်၊ လက်ရုံးမြန်းကြက်၊ စမ္ပ၀က်ကို၊ တည်လျှက်စိုးလာ၊ ဇောဗီသာတည်း။ ရွီကာပေါင်းထ၊ နှစ်အရကား၊ ဧကဆဋ္ဌာ၊ မင်းစိုင်မှာမူ၊ အောင်ချာနဂိုရ်၊ သုံးဆက်ဆိုသည်၊ ဗဟိုရွှီစည်ရစ်မွန်းတည်း။ ။

(၃၇) ရစ်မွှန်းရွှီစည်၊ ဗဟိုလယ်၌၊ ငါးမည်အင်္ဂါ၊ ပြည့်စုံပါ၍၊ ပဉ္စာခေါ်ထ၊ မြို့သိင်္ဂကို၊ သက္ကရာဇ်မှာ၊ ခတ်အတ္တာနှင့်၊ တိသာရောက်လျှင်၊ ခေတ္တသင်သည်၊ မှန်ပင်ဆယ်နှစ်၊ စိုးသည်ဖြစ်မှ၊ ညီချစ်အရင်း၊ စန္ဒသင်းသည်၊ ပွင့်လင်းဘုံသာ၊ နန်းအောင်ချာဝယ်၊ ဧကာဒသ၊ စံရွှင်ပ၏။ ထိုမှတမူ၊ မင်းရင်ဖြူကား၊ ခွန်ယူသိမ်းမိုး၊ ဆယ်နှစ်စိုး၏။ နွယ်ရိုးမှန်ထ၊ နာဂသူရိယ၊ သုံးနှစ်ပြ၏။ သူရိယရာဇာ၊ နှစ်နှစ်သာတည်း။ ဆက်ကာထိုမှ၊ ပုဏ္ဏကလည်း၊ စိုးထကြည်ဖြူ၊ လေးနှစ်ဟူ၏။ မင်းဖြူကြီးလျှင်၊ နှစ်နှစ်ရွှင်မှ၊ စည်သဘင်အမတ်၊ တနှစ်မှတ်လော့။ မင်းမြတ်တမူ၊ မင်းနန်းသူလျှင်၊ ရိပ်ဖြူဖြန့်ကာ၊ ငါးနှစ်ကြာ၏။ မင်းလာတော်ကား၊ ခြောက်နှစ်စား၏။ မင်းကုလားနှင့်၊ မင်းဘီလူးရို့၊ နှစ်ဦးညီကာ၊ သုံးနှစ်လာ၏။ သင်္ခယာရေး၊ တဆယ့်လေးတည်း။ ပုတ္တေးမင်းသန်၊ သျှစ်နှစ်စံ၏။ တဖန်မင်းပတိ၊ တရိသုံးနှစ်၊ စိုးစံဖြစ်၏။ စင်စစ်မှန်စွာ၊ နှစ်ပေါင်းမှာကား၊ ပဉ္စာအဋ္ဌ၊ သိကုန်ကြလော့။ ၀ံသစိုင်လာ၊ မင်းဆက်မှာမူ၊ ပန္နရသာ၊ ဖြစ်ကုန်ပါသည်၊ သိင်္ဂါစံဘုံရွှီနန်းတည်း။ ။

(၃၈) ရွှီနန်းစံဘုံ၊ စိုးအုပ်တုံ၍၊ ပြည့်စုံအင်္ဂါ၊ မင်းလက်ယာမူ၊ ပဉ္စအဋ္ဌ၊ စတုကဟု၊ သက္ကရာဇ်ကောဇာ၊ ရောက်သောခါ၌၊ တည်လာအဆက်၊ မြို့လောင်းကြက်ကို၊ ဖြူရွက်ဖြန့်မိုး၊ သုံးနှစ်စိုး၏။ ကောင်းကျိုးမဟိ၊ ဖြစ်တုံဘိ၍၊ အဋ္ဌိအဋ္ဌာ၊ စတုရာဟု၊ ကောဇာရောက်ချိန်၊ ပရိန်မြို့သစ်၊ တည်ထောင်လှစ်၏။ သုံးနှစ်စံကာ၊ လွန်ပြီးခါမှ၊ သီဟဗမင်း၊ တနှစ်လျှင်းတည်း။ တွင်ခြင်းကျော်ဟီး၊ ရာဇာကြီးလျှင်၊ စံပြီးဒွယာ၊ သည်နောက်မှာကား၊ သာကီဝင်ကြီး၊ တရိခါတွင်၊ သုံးနှစ်လျှင်တည်း။ သာကီဝင်ငယ်၊ ဘုံနန်းလယ်တွင်၊ တဆယ်သျှစ်နှစ်၊ စည်းစိမ်ဖြစ်၏။ တထစ်မှတ်ကြ၊ ဂေါရိလနှင့်၊ ကောလိယမူ၊ ၀ီသဟူ၏။ တမူစိုးလာ၊ ဒဿရာဇာကား၊ ဒွါသစိုးစံ၊ လွန်ခယ့်ပြန်သော်၊ အနန္တသီရိ၊ စိုးဘိနှစ်နှစ်၊ တလှစ်တွက်ပြု၊ နှစ်ပေါင်းစုကား၊ စတုဆတိ၊ ဖြစ်တုံဘိ၏။ မှတ်သိတုံထ၊ နွယ်ဝံသမူ၊ အဋ္ဌမှန်စွာ၊ သျှစ်ဆက်လာသည်၊ အောင်သာမြို့မကြငှန်းတည်း။ ။

(၃၉) ကြငှန်းအောင်ချာ၊ ခြိတ်မြို့သာကို၊ ကောဇာနှစ်ရေ၊ ဖော်ပြပေအံ့၊ နောဒွေပဉ္စာ၊ ရောက်သောခါ၌၊ တေဇာတက်ဖျား၊ မင်းဘုန်းစားသည်၊ တည်ထားပြီးမှ၊ မြို့နန်းချ၍၊ စိုးထအုပ်လစ်၊ ခုနှစ်နှစ်တွင်၊ စွန့်လစ်ခန္ဓာ၊ လွန်ပြီးသော်က၊ ပဉ္စကာလ၊ သံဝစ္ဆမူ၊ ဓမ္မဖြစ်ထ၊ သိကုန်ကြလော့။ ဂန္ဓရူပေါ်၊ သုံးနှစ်ကျော်မူ၊ မြို့တော်ကျိန်းခန်း၊ မကောင်းထွန်း၍၊ ထီးနန်းကနက်၊ အသစ်ဆက်လျှက်၊ စမ္ပ၀က်မှာ၊ တည်တုံလာသော်၊ မြင့်ကြာမမြောက်၊ ခြောက်လရောက်တွင်၊ ခြိမ်းခြောက်ပြုလတ်၊ ဒေါသမှတ်၍၊ အမတ်စလင်ဗိုလ်၊ လူဝန်တိုလျှင်၊ ငြိုငြင်ထဲမှတ်၊ ပုန်ကန်လတ်၍၊ အကျပ်ပျက်ကို၊ ခြောက်လဆို၏။ နှစ်ကိုပေါင်းက၊ တေရသလျှင်၊ ရာဇ၀င်မှာ၊ လေးဆယ်သာတည့်၊ စိုင်လာဖြစ်ကြ၊ ဆိုမြွက်ဟသည်၊ ဗြဟ္မာထိပ်ခေါင်ဦးစွန်းတည်း။ ။

(၄၀) ဦးစွန်းဗြဟ္မာ၊ ဘုန်းညွန့်ဖြာသား၊ တေဇာထွန်းလင်း၊ မဉ္စူသင်းသည်၊ ကောင်းခြင်းသာစွာ၊ မြို့ပဉ္စာကို၊ ငါးရာကျော်လစ်၊ လေးဆယ့်နှစ်ဟု၊ သက္ကရာဇ်မှာ၊ တည်တုံပါ၍၊ ဧကာဧက၊ စံပြီးမှလျှင်၊ သားလှရေမွန်၊ ငပုဂ္ဂံရို့၊ စိုးစံအညီ၊ နှစ်နှစ်စီတည်း။ သည်ပြီးရက္ခိုင်၊ ငကြုံဆိုင်ရို့၊ နန်းထိုင်သုံးနှစ်၊ အညီဖြစ်၏။ တလှစ်ငဆူ၊ လေးနှစ်ဟူ၏။ သိမ်းယူခွန်ဖျင်း၊ ငစွေသင်းနှင့်၊ ခေါ်ခြင်းမည်သီး၊ မင်းခေါင်ကြီးဟု၊ တွင်ပြီးတသွယ်၊ မင်းခေါင်ငယ်နှင့်၊ ဆက်နွယ်စိုင်လာ၊ ကမ္ဘာလောင်ကြီး၊ မည်သီးတဖြာ၊ ကမ္ဘာလောင်ငယ်၊ ငါးဆက်ဝယ်ကား၊ စံပယ်အညီ၊ တနှစ်စီတည်း။ တလီတွင်သီး၊ လက်ယာကြီးမူ၊ စိုးပြီးအုပ်ကာ၊ သျှစ်နှစ်ကြာ၏။ လက်ယာဝင်ငယ်၊ စိုးသည်ဆယ့်တစ်၊ တလှစ်မယွင်း၊ သနပင်းကား၊ စိုးခြင်းအကယ်၊ သုံးနှစ်ပေတည်း၊ ငနယ်သိမ်မူ၊ ဒွေးချိန်မှတ်ထုံး၊ ငနှလုံးကား၊ သုံးနှစ်စား၏။ မှတ်သားတဖြာ၊ နှစ်ပေါင်းမှာကား၊ သတ်ပဉ္စတာ၊ သောဠဿာစစ်၊ မင်းမျိုးဖြစ်သည်၊ အသစ်မြို့ရွာကျိန်းဝပ်တည်း။ ။

(၄၁) ကျိန်းခန်းအသစ်၊ ရှာဖွေလစ်၍၊ မင်းစစ်မှန်စွာ၊ အလောမာသည်၊ ပဉ္စာတွင်ထ၊ မြို့ပူရကို၊ တေဇတက်ဖြိုး၊ နှစ်နှစ်စိုးမှ၊ ရန်မျိုးမပွက်၊ မြို့လောင်းကြက်ကို၊ ရွီတွက်သက္ကရာဇ်၊ ခြောက်ရာနှစ်တွင်၊ အသစ်တည်ထ၊ ထီးနန်းချလျှက်၊ စိုးထခြောက်နှစ်၊ လွန်ပြီးရစ်မှ၊ သားချစ်ရွှီတူ၊ ရာဇသူနှင့်၊ ရွီယူနှစ်ဦး၊ မင်းစောလူးမူ၊ ရွှင်မြူးပဉ္စာ၊ ဥစ္စနာသည်၊ န၀ါဧကံ၊ ကိုးနှစ်မှန်၏။ စောမွန်အဋ္ဌ၊ မင်းနန်းကျမူ၊ နာမတထူး၊ မင်းဘီလူးရို့၊ မကျူးအညီ၊ လေးနှစ်စီတည်း။ ဘုန်းရွှီနန်းရပ်၊ အပျက်ကျပ်သည်၊ မတ်စည်သဘင်၊ သုံးနှစ်ပင်တည်း။ ခေါ်တွင်အံ့ချီး၊ တန်ခိုးကြီးသား၊ မင်းထီးရာဇာ၊ မြင့်ရှည်ကြာသည်၊ တရာခြောက်နှစ်၊ နန်းစံဖြစ်၏။ သားချစ်ဥစ္စနာ၊ နှစ်နှစ်သာတည်း။ ဆက်ကာသီဝရာဇ်၊ သုံးနှစ်ဖြစ်၏။ တလှစ်သိဉ္စည်း၊ လေးနှစ်မြဲ၏။ ကျော်သဲရာဇသူ၊ တနှစ်ဟူသား။ နွယ်မူခြားကျင်၊ စည်သဘင်ကား၊ နန်းခွင်တက်ပိုင်၊ နှစ်နှစ်ဆိုင်လျှက်၊ မြင့်စိုင်ငါးလ၊ ချော၍ကျသော်၊ မင်းလှဘုန်းတူ၊ ရာဇသူလည်း၊ ထီးဖြူဆောင်းမိုး၊ လေးနှစ်စိုး၏။ နန်းရိုးဆက်ယူ၊ သိင်္ဂသူသည်၊ ရိပ်ဖြူသုံးတန်၊ မင်းစောမွန်ကား၊ အမှန်ဒွယာ၊ နှစ်ပေါင်းမှာမူ၊ တရာ့ခြောက်ဆယ်၊ ကိုးနှစ်ပေတည်း၊ အနွယ်မျိုးစပ်၊ စိုင်မလပ်ဘဲ၊ အကျပ်အပျက်၊ ဆယ့်သျှစ်ဆက်တွင်၊ ရက္ခအောင်မြီ၊ ပျက်ကိန်းမွှီသည်၊ အနီမလှတိမ်းယွန်းတည်း။ ။

(၄၂) တိမ်းယွန်းမလှ၊ ဖြစ်လီရမူ၊ သာစွမို့မို့၊ လောင်းကြက်မြို့ကို၊ မချို့ရန်ပွား၊ တိုင်းကားနိုင်ငံ၊ ပြည်ပုဂ္ဂံက၊ နန်းစံစိုးပေ၊ မြန်မင်းဆွေလျှင်၊ ဗိုလ်ခြေများစွာ၊ ချီ၍လာလျှက်၊ ဘယ်ညာဝန်းလစ်၊ တိုက်လှန်ဖြစ်မှ၊ သက္ကရာဇ်အဋ္ဌ၊ ဆသတ္တတွင်၊ မည်သာတွင်ငြား၊ မြင်စိုင်းစားနှင့်၊ စောင့်စားနီမူ၊ တနှစ်ဟူ၏။ အယူရိုင်းစိုင်း၊ တလိုင်းမောင်ခွင်၊ တနှစ်ပင်တည်း။ ရှိခွင်အောက်သား၊ ဖောင်းကစားမှာ၊ သုံးနှစ်သာတည်း။ ကျော်စွာစောင့်ထား၊ နှစ်နှစ်စား၏။ နောင်ကားငခွေး၊ ကလေးကျေးတောင်ညို၊ တလဆို၏။ နှစ်ကိုပေါင်းထ၊ ရွီတွက်ဆသော်၊ ၀ီသာပြည့်ယုဂ်၊ ငါးလဆုတ်၏။ အယုတ်မုက္ချ၊ ဖြစ်ကုမ်ကြ၏။ ဆူပွချောက်ချောက်၊ ဤခြောက်ယောက်ပေ၊ အောက်သားတလိုင်း၊ အယူရိုင်းရို့၊ ပြိုင်ခိုင်းတိုက်ခါ၊ ဟိသောခါ၌၊ ရာဇာစောမွန်၊ ရောက်လာပြန်သော်၊ တဖန်လောင်းကြက်၊ တည်လာဆက်သည်၊ နီထွက်လနှယ်တောက်ထွန်းတည်း။ ။

(၄၃) ထွန်းတောက်လနှယ်၊ ရန်မျိုးပယ်၍၊ ဘုန်းကြွယ်ညွန့်သန်၊ မင်းစောမွန်ကား၊ အမှန်မပျက်၊ မြို့လောင်းကြက်ကို၊ ကနက်စိုက်ဆောက်၊ စိုးအုပ်မြောက်သော်၊ ထွန်းတောက်နန်းမ၊ ဥကင်သကို၊ မိုထပ်နှစ်နှစ်၊ စိုးသည်ဖြစ်မှ၊ တလှစ်ယင်းက၊ သိကြားပြသား၊ မိုးဝရောင်ရှုး၊ သော်တာမြူးသို့၊ မြောက်ဦးမည်သာ၊ မြို့အောင်ချာကို၊ တည်လာပြုလစ်၊ စိုးစံဖြစ်သည်၊ သက္ကရာဇ်မှာ၊ ဒွေးဖြစ်န၀ါ၊ သတ္တသာတည်း။ စံကာလေးနှစ်၊ စိုးသည်ဖြစ်မှ၊ စင်စစ်မှန်ညီ၊ မင်းခရီကား၊ သိင်ဂီရွှီနန်း၊ စိုးစံမြန်းသည်၊ မယွန်းနှစ်မှာ၊ ပဉ္စာဝီသ၊ ဖြစ်ကြရချင့်။ တေဇဘုန်းတူ၊ ဘစောဖြူကား၊ ရွီယူတွက်ကျုံး၊ နှစ်ဆယ့်သုံးတည်း။ လက်ရုံးဖြန့်ကာ၊ မင်းဒေါလျာမူ၊ စိုးလာဆယ်နှစ်၊ အမှန်ဖြစ်၏။ ကျစ်လစ်ရွယ်ပျို၊ ဘစောညိုကား၊ ပြည်ကိုစိုးချုပ်၊ နှစ်နှစ်ဟုတ်၏။ မယုဂ်ဘုန်းခေါင်၊ မင်းရန်အောင်မူ၊ စိုးဆောင်နီထ၊ ခြောက်လမျှတည်း။ စလင်္ကာသူ၊ သတ္တဟူ၏။ ထိန့်ဆူကျော်ငြာ၊ မင်းရာဇာမူ၊ ဓမ္မ၀ီသ၊ မှတ်ကုန်ကြလော့။ ဂဇာပတိ၊ နှစ်နှစ်ဟိ၏။ ဘုန်းတိမပို၊ မင်းစောအိုမှာ၊ ခြောက်လသာတည်း။ သဇာတမင်း၊ ခြောက်နှစ်လျှင်းနှင့်၊ ရွီခြင်းအမှန်၊ မင်းဆက်စံဖြစ်၊ တဆယ့်တစ်တည်း။ နှစ်ကိုတွက်ဆ၊ ရွီပေကသော်၊ ဧကသတ္တာ၊ ဖြစ်လီပါသည်၊ စိုင်လာမင်းဆက်အနွယ်တည်း။ ။

(၄၄) အနွယ်မင်းဆက်၊ စိုင်မပျက်လျှင်၊ ရွှီစက်ဖြန့်ကာ၊ နန်းအောင်ချာဝယ်၊ ရာဇာမင်းပင်၊ ထွန်းလင်းကျင်သော်၊ ခေါ်တွင်မည်သာ၊ နှစ်ကောဇာမူ၊ ရာမာန၀၊ ဘသျူးစသာ၊ သိင်္ဂါရောင်ဝင်း၊ စောမင်းစံမြဲ၊ ဒွေးဒွေးမှတ်ပါ၊ မင်းတိက္ခာလျှင်၊ ဓမ္မာဟူပြီး၊ မင်းစောကြီးမူ၊ တလူထီးနန်း၊ သုံးနှစ်မြန်း၏။ ထွန်းတောက်ရောင်ဝါ၊ မင်းစကြာမူ၊ သတ္တာလည်ကောင်း။ မင်းဖလောင်းကား၊ မစောင်းမလှစ်၊ ဆယ့်နှစ်နှစ်တည်း။ သားချစ်မှန်စွာ၊ မင်းရာဇာမူ၊ န၀ါဒသ၊ စိုးစံပ၏။ တေဇကျော်သောင်း၊ မင်းခမောင်းကား၊ ထီးဆောင်းဖြန့်လှစ်၊ ဆယ့်နှစ်နှစ်တည်း။ တရစ်မှတ်လီ၊ ဟရီရာဇ၊ သောဠဿနှင့်၊ စိုးထဘုန်းရွှီ၊ မင်းစနီကား၊ သပြီအောင်ချာ၊ နန်းဘုံသာဝယ်၊ အဋ္ဌာဝီသ၊ ရက်ဒိနနှင့်၊ ၀ံသစိုင်လာ၊ ကိုးဆက်သာတည်း။ သံဝစ္ဆရ၊ နှစ်အရမူ၊ သတ္တသတ္တာ၊ မှတ်ကြပါလော့၊ ဆိုရာတခန်းတသွယ်တည်း။ ။

(၄၅) တသွယ်တခန်း၊ ဆိုပြညွှန်းအံ့၊ ရွှီနန်းဘုံသာ၊ မြို့သိင်္ဂါ၌၊ ကောဇာထောင်ပြည့်၊ ရောက်တုံလှည့်မူ၊ မည်ဘွဲ့ကုသ၊ နရပတိကြီး၊ ရွှီထီးဆောင်းမိုး၊ သုံးနှစ်စိုး၏။ သတိုးဓမ္မ၊ သတ္တသာတည်း။ ဆက်ကာစိုးပြု၊ စန္ဒသုကား၊ အတုမဲ့စွာ၊ ဗာဝီသာနှင့်။ ဥက္ကာဗလ၊ သားပုတ္တမူ၊ နာမတွင်ဘိ၊ သီရိသူရိယ၊ ဧကတ္တတည်း။ ၀ရဓမ္မရာဇာ၊ သတ္တကြာမှ၊ ဗိုလ်ပါစုံညီ၊ နန်းချလီ၏။ တချီရုံးစု၊ မဏိသုကို၊ မင်းပြုတင်ကြ၊ တခဏတည်း။ ၀ရဓမ္မာ၊ မင်းကိုသာလျှင်၊ ထပ်ကာမယွင်း၊ ထီးနန်းနှင်းမူ၊ ချက်ချင်းမကြာ၊ နန်းဘုံသာက၊ ချပြီးမှတည့်၊ တေဇထွန်းရှု၊ မဏိသုကို၊ လု၍တဖန်၊ နန်းတင်ပြန်၏။ အမှန်မှတ်သိ၊ တနှစ်ဟိမူ၊ မဏိသုအား၊ နန်းချထားမှ၊ ၀ရဓမ္မာ၊ မင်းရာဇာသည်၊ ဘုံချာနန်းယံ၊ စိုးအုပ်စံ၏။ နိုင်ငံပြည်သူ၊ မကြိုက်မူက၊ မင်းဝရကို၊ နန်းမှချပြု၊ မဏိသုအား၊ နန်းတင်ထားပြီး၊ ဘွဲ့ဆောင်နာမ၊ သူရိယကို၊ တင်ကြထိုခါ၊ သုံးနှစ်သာတည်း။ ချကာနန်းမှ၊ မင်းဝရကို၊ တင်ကြတဖန်၊ သုံးနှစ်မှန်၏။ တဖန်ထိုမှ၊ သူရိယသည်၊ ဒွယမှန်စွာ၊ စိုးတုံပါ၏။ ငတုံးမှာကား၊ နော်ရထာစောဟု၊ ခံပြီးသောမူ၊ ထီးဖြူနန်းထက်၊ ဆယ့်ငါးရက်တည်း။ ဖြန့်ကြက်စိုးအုပ်၊ မာရုပ္ပီယ၊ တနှစ်ပြ၏။ ကာလမန္ဓာတ်၊ တနှစ်မှတ်လော့။ မချွတ်ဗိုလ်လူ၊ မင်းစောဖြူကို၊ ဘွဲ့မူနရာဓိပတိ၊ တင်ဘိသုံးနှစ်၊ မကြာရစ်ခင်၊ အားအင်လည်းပြု၊ ထီးနန်းလု၍၊ စန္ဒသုဓမ္မာ၊ မင်းကိုသာလျှင်၊ တင်ပါနန်းထက်၊ ဆယ့်လေးရက်တည်း။ တချက်မကြာ၊ နရာဒိပ္ပ၊ ထိုမင်းလှအား၊ ပင့်ငြားတင်ကြ၊ နှစ်ဒွယနှင့်။ ထိုကတခါ၊ ကျော်သိင်္ဂါလျှင်၊ စန္ဒာဝိမလ၊ ဘွဲ့နာမဖြင့်၊ စိုးထခြောက်နှစ်၊ အမှန်ဖြစ်၏။ တလှစ်သတိုးလှ၊ စန္ဒသူရိယာ၊ လေးနှစ်သာချင့်။ ဓမ္မာသတ္တ၊ နှစ်ဝဿနှင့်၊ စွန်းပအကယ်၊ တဆယ်လေးရက်၊ ရွီတွက်သင်္ချာ၊ ချိန်အခါတည်း၊ အာဏာစက္က၊ တည်မကျဘဲ၊ လောကထွတ်တင်၊ ပြည်သခင်ဟု၊ အသျှင်ရာဇ၊ မင်းကိုမျှလျှင်၊ နန်းချနန်းတင်၊ ပြုလတ်ကျင်သည်၊ များဖျင်သူပုန်ထိုဝယ်တည်း။ ။

(၄၆) ထိုဝယ်သူပုန်၊ ပြည်ကိုချုံ၍၊ မွှီတုံလှုပ်လျှား၊ ပြုသည်များကို၊ ယောက်ျားမှန်ထ၊ ဘုန်းတေဇနှင့်၊ တန္တဗိုလ်မင်း၊ အကုန်ခွင်းမှ၊ တွင်ခြင်းနာမ၊ ၀ိဇယနှင့်၊ စိုးထအုပ်လစ်၊ သက္ကရာဇ်သည်၊ ဒွေးသတ်အာဇံ၊ နန်းစံနှစ်ကား၊ အက်နှင့်ဝီသ၊ သူရိယမူ၊ သိင်္ဂဘုံမှာ၊ သုံးနှစ်သာတည်း။ နရာဓိပတိ၊ တနှစ်ဟိက၊ နရပ၀ရ၊ နှစ်နှစ်ပြ၏။ ၀ိဇယမင်း၊ သျှစ်နှစ်တွင်းဝယ်၊ ခေါ်ခြင်းနွယ်ပြား၊ ဘာသာခြားသည်၊ ကုလားကုကျာ၊ ပုန်ကန်လာ၍၊ ကာလသူရတန်း၊ အမည်ဆန်းဖြင့်၊ သိမ်းမြန်းယူကာ၊ သုံးရက်သာတွင်၊ ယှောင်ခွာပယ်ပစ်၊ မဒရာဇ်ကား၊ ငါးနှစ်စိုးမှ၊ နရအဘယ၊ န၀ဧကု၊ သီရိသုမူ၊ မင်းပြုသုံးလ၊ ပရမကား၊ စံစားတိရိ၊ ဖြစ်ပြီးမှလျှင်၊ အဘယရာဇာ၊ ကိုးနှစ်လာ၏။ စန္ဓသုမန၊ လေးနှစ်ပြ၏။ ၀ိမလသည်၊ ရက်လေးဆယ်တည်း။ စမ္ပယ်ထွန်းပ၊ သတိဿကား၊ နောင်မှဓမ္မရာဇ်၊ ငါးနှစ်ဖြစ်ကာ၊ မဟာသမတ၊ နာမသဘော၊ ဘွဲ့သညောမူ၊ အဂ္ဂေါပုည၊ ခေါ်ကြတမူ၊ နှစ်နှစ်ဟူ၏။ ဆက်ယူစံလျှက်၊ အပျက်အကျပ်၊ ပေါင်းယှဉ်အပ်ကာ၊ မျိုးစပ်နွယ်ခြား၊ မင်းအများကို၊ တွက်ငြားလီသော်၊ တကျိတ်ကျော်၍၊ စွန်းပေါ်ငါးယောက်၊ ဖြစ်တုံမြောက်ပြီး၊ နောက်ဆုံးနှစ်မှတ်၊ စတုသတ်တွင်၊ ပြည်မြတ်ရခိုင်၊ ထီးနန်းယိုင်သည်၊ ပယ်လှိုင်ဆိုရေးအံ့ဖွယ်တည်း။ ။

(၄၇) အံ့ဖွယ်ဆိုလိမ့်၊ ဟိတုံသိမ့်၏။ ကောင်းချိမ့်ဗိုလ်ပုံ၊ များဥဿုံရို့၊ ရွှီဘုံနဂရ၊ ပျက်ကိန်းကျ၍၊ သက္ကရာဇ်မှာ၊ ဆပေတာနှင့်၊ ဧကာဧက၊ ထိုကာလ၌၊ အင်းဝခေါ်ထ၊ ပြည်ဌာနက၊ ဒေါသရန်ပွား၊ ပြူအောက်သားရို့၊ ခိုက်ပွားရန်ရှာ၊ တိုက်ဖျက်လာ၍၊ ဗိုလ်ပါအားထု၊ ပြည်ကိုလုကာ၊ မင်းပြုအစ၊ ပထမမူ၊ နန္ဒပကျန်၊ လေးနှစ်မှန်၏။ တိုက်ဝန်မလွဲ၊ နှစ်နှစ်မြဲချင့်။ မင်းရဲသီဟသု၊ တနှစ်ပြု၍၊ အာယုဆန်ထ၊ သည်နောက်မှမူ၊ အာကာကျော်ထင်၊ နှစ်နှစ်ပင်တည်း။ လှည့်ကျင်လီက၊ မောင်ကျော်လှကို၊ မင်းလှရာဇာ၊ ခေါ်မည်သာနှင့်၊ ဆက်ကာစောင့်ပြီး၊ နှစ်ရေဒွီးမှ၊ မင်းကြီးကျော်ထင်၊ သျှစ်နှစ်လျှင်တည်း။ နီကျင်မြင့်ကြာ၊ နော်ရထာမူ၊ ထပ်ကာအုပ်မိုး၊ ခြောက်နှစ်စိုးမှ၊ ကြာရိုးမင်းလုပ်၊ နှစ်နှစ်ဟုတ်၏။ တရုတ်ဝန်ခေါ်၊ မောင်စံပျော်ကို၊ ထိုရော်တွင်ပြီး၊ မင်းကြီးကျော်စွာ၊ သုံးနှစ်သာနှင့်။ ရက္ခပူရ၊ ရွှီပြည်မတွင်၊ ဌာနကွဲပြား၊ အမျိုးခြားသည့်၊ အောက်သားကိုးဆက်၊ စိုင်မပျက်ဘဲ၊ ရောယှက်ပေါင်းကာ၊ နှစ်သင်္ချာမူ၊ စတ္တာလီသ၊ ဖြစ်လီရ၍၊ နီထတုံငြား၊ ပြည်သူများကို၊ အောက်သားရို့က၊ နှိပ်စက်ကြလျှက်၊ ဒေါသပြုကာ၊ အမှုရှာသည်၊ နောင်လာမတာမတွယ်တည်း။ ။

(31/5/99) နိတွင် အကြမ်းတည်းဖြတ်သုတ်သင်ပြီးစီးသည်။

အပိုဒ် (၄၇) မှ နောက်ထပ် ရာဇ၀င်လင်္ကာအပိုဒ်များစွာ ကျန်ပါသိမ့်သည်။ ဆက်လက်၍ ပုံနှိပ်ကြပါကုန်။

အဆင်မပြေရေခါ တခါတရီ အင်းကျီက ဘောင်းဖီဖြစ်ရ

အဆင်မပြေရေခါ တခါတရီ အင်းကျီက ဘောင်းဖီဖြစ်ရ
--------------------------------------------------------
ထွန်းသာတယောက် မိသားစုစားဝတ်နီရေးအဆင်မပြေရေအတွက်နှင့် တရက်ရှာမှ တနပ်စားရရေဘဝ။ ဝတ်ဖို့ အင်းကျီတလုံးနှင့် ဒယောတထည်ရာဟိရေဘဝ။ တမိသားလုံးကို ဒိုင်ခံပနာလုပ်ကျွေးနီရရေထွန်းသာအလုပ်က ချောင်းကိုဆင်းလို့ နိတိုင်းမျိုင်ခံရေအလုပ်။ မျှိုင်ခံရေဆိုစွာက ချောင်မှာစင်ချေတခုထိုးပနာ မျှိုင်ပိုက် (ခေါ်) ရင်းဒွန်းဖြင့် မျိုင်ချေတိကို ရီပြင်းရေနီရာက ခံထားရပါရေ။ ယင်းပိုင်လုပ်လို့ရရေ မျိုင်ချေတိကိုရောင်းပနာ တထပ်ထမင်း၊ တထပ်ဟင်း စားနီရပါရေ။

တရက်နိမှာ သူငယ်ချင်းကျော်စိန်ဆိုရေလူတယောက်နှင့် မျိုင်ခံဖို့ချောင်းကိုဆင်းရေခါ ချောင်းရီက ကကောင်းကြီးရေအတွက် မျိုင်စင်ကျိုးပနာ မျိုင်ခံလို့မရလိုက်ပျာ။ ထွန်းသာတယောက် စိတ်ကျပ်ပနာ ဇာလုပ်လို့ ဇာကိုင်ရမှန်းမသိ ဖြစ်လားခယင့်။ ယေခါ မကြံအပ်မကြံထိုက် အကြံတခု ထွန်းသာစိတ်ကူးထဲမှာပေါ်လာပျာ။ ပေါ်လာအကြံ တသိန်းတန်။ ဒေချောင်းကိုဖြတ်တေလူတိုင်းကို ဓမြတိုက်ဖို့ ဆုံးဖြတ်ချက်ပါ။ တချို့ရွာများက ခရီးလားသောခါ ရီကြောင်းအဖြစ် ယင်းချောင်းကိုဖြတ်ရသည်နှင့် ယင်းနီရာသည် အချက်ချာကျသော နီရာတခုလည်းဖြစ်သည်။

"အဝေးကျော်စိန် ထိုမှာဘုတ်တစီးလာနီစွာမြင်မလား၊ ယင်းဘုတ်ကို ဓမြတိုက်ကတ်မည်ဝေး"

ထွန်းသာကပြောလိုက်တေခါ ကျော်စိန်ကလည်း သဘောတူရေ။ ကျော်စိန်နှင့်ထွန်းသာ ဘုတ်လာရေခါ အသင့်အနီအထား ချောင်းအလယ်မှာ လောင်းချေတစီးနှင့် စောင့်နီပျာ။ အချိန်ကလည်း မိုးမသောက်ခင် ရောင်ဖြူလာစဖြစ်လို့ လူကိုမှန်းလို့မကျရေအချိန်။ ဘုတ်အပါးချေကိုကပ်စွာနှင့် လူတယောက်လိုက်ဖို့ပုံပြလို့ ဘုတ်ကိုတားလိုက်တေ။ ဘုတ်တန့်စွာနှင့်ချက်ချင်း (၂) ယောက်စလုံး ဘုတ်ထက်ကိုတက်လိုက်တေ။

“ပါစွာပီး လုံးဝမလှုပ်ကဲ့ သီဖို့ဒေ”

ယေမှာ ကံဆိုးစွာက ယင်းနယ်မှာပြိုင်ဘက်ကင်း နယ်လကျယ်ကြီးမောင်ထွန်းလှ ဘုတ်ထက်မှာပါလာရေ။ ရာဇသံပီးစွာကိုကြားစွာနှင့် မောင်ထွန်းလှက

“ဒေနယ်မှာ ဒေပိုင်လည်းမိုက်တေအကောင် ဟိသိမ့်လားဝေ၊ ဒါးပီးဝေ ဒါးပီး၊ အားလုံးကို ခွတ်ပစ်လိုက်မည်”

ဆိုခါ ထွန်းသာနှင့်ကျော်စိန် ဘုက်ထက်က ချက်ချင်းဆင်းပြီးဖို့ကျရေ။ ဆင်းပြီးခါ ထွန်းသာမှာ ဘုတ်ဦးမှာငြိမ့်လို့ ဒယောကျွတ်ကျန်ခရေ။ ရွာသို့ဝင်ခါ ထွန်းသာခါးမှာဒယောမပါ။ မိုးကလည်းလင်းလားခပျာ။ ဇာပိုင်းလုပ်ဖို့လဲဂု အင်းကျီတလုံးနှင့် ဒယောတထည်ဟိစွာမှာ ဒယောတထည်ကျန်ခပျာ။ ယေကေဖြစ်သိမ့်လာ အင်းကျီကို ဘောင်းဖီလုပ်ပနာ ဝတ်ရလီရေ။

အဆင်မပြေရေဘ၀မှာ တခါတရီ “အင်းကျီ” က ”ဘောင်းဖီ” ဖြစ်ရပါရေ။

အသျှင် (Ashun)

မိမ္မမာယာ ယောက်ျားလေ့လာ၍ မနိုင်

မိမ္မမာယာ ယောက်ကျားလေ့လာ၍မနိုင်
---------------------------------------
လေ့လာ၍မရသောပညာဟူသည်မဟိဟု အများကလက်ခံယူထား၏။ ယေတာလည်းအမှန်ပင် ယောက်ကျားများလေ့လာ၍မရသောပညာမှာ မိမ္မာယာကျမ်းပင်ဖြစ်သည်။ ပဇာကြောင့်ဆိုသော် ယင်းပညာသည် မိမ္မရို့၏ကိုယ်ပိုင်ဖြစ်သည့်အတွက် သူရို့တိရာပိုင်ပြီး ယောက်ကျားတိအမှန်ပင် လေ့လာ၍မရနိုင်ပါ။

ဥပမာအားဖြင့် ပုံပြင်ချေတပုဒ်ပြောပြပါမည်။ုအယင်ကခါ လူပျိုချေတယောက် ဒိသာပါမောက္ခဆရာပါးမှာ ပညာသင်ပြီးလို့ပြန်ရေခါ ကန်ဘောင်နား ရီခတ်ဖို့လာရေ အပျိုမချေတယောက်နှင့်တွိပါရေ။

ယေခါ ယင်းအပျိုမချေက မီးပါရေ “အမောင် အဇာကလာလို့ အဇာတို့လားဖို့ရောင်”

လူပျိုချေက “အကျွန်တော် ဒိသာပါမောက္ခဆရာပါးမှာ သုံးနှစ်သုံးမိုး အသာတမန္တလို့ခေါ်ရေ မိမ္မမာယာကျမ်းကိုသင်ပြီးလို့ ပြန်လာပါရေ” ဖြေရေ။

ယေခါ မိမ္မပျိုချေက “အမောင် သုံးနှစ်သုံးမိုး လေ့လာခပြီးယာဆိုကေ ကောင်းကောင်းမိမ္မပညာကို တတ်ကျွမ်းဖို့မလားယေ”

လူပျိုချေက “ဟုတ်ပါယင့်၊ တတ်သင့်သလောက်တတ်တေ”

ယေခါ အပျိုမချေက “ ယင်းပိုင်ဆို အကျွန်နှင့်ပြိုင်ဖို့လား”

ယေခါ လူပျိုချေကလည်း သုံးနှစ်သုံးမိုးသင်ထားရေပညာ၊ ဇာနားထားဖို့လဲဆိုပျာ “ပြိုင်ကေပြိုင်“ သဘောတူလိုက်တေ။

အပျိုမချေက မီးရေ “မောင်းမောင် အယင်ပြိုင်ဖို့လား၊ အကျွန်အယင်ပြိုင်ရဖို့လား”

လူပျိုချေက “နင်အယင်ပြိုင်” ဖြေရေ။

ယင်းပိုင်ပြောပြီးစွာနှင့် အပျိုမချေက “စပျာမောင်းမောင်” ဆိုပျာ ရွာကိုလှည့်လို့ “ကူပါကယ်ပါ” ဇကုန်အော်လိုက်တေ။ ယေခါ မိမ္မချေတယောက် ဒုက္ခရောက်နီပျာအထင်နှင့် ရွာသားတိ ဒုတ်ဆွဲဒါးဆွဲ ထွက်ပါလတ်ကတ်တေ။ ယင်းကိုမြင်ခါ လူပျိုချေက မျက်စိပြူးမျက်ဆံပြူး ကြောက်ကြီးသံဖက် ဒူးတုန်နီပျာ။

ယေခါ အပျိုမချေက ပြောရေ “အမောင် မတတ်ပျာမလား၊ အကျွန်ပြောစွာကိုရာလုပ်ဖိ” ဆိုပနာ လူပျိုချေကို ကန်ထဲသို့ ခုန်ဆင်းခိုင်းလိုက်တေ။ ဘသားကြီးမှာ မိမ္မချေပြောရေအတိုင်း ကန်ထဲသို့ ခုန်ဆင်းလိုက်ရရေ။

ရွာသားတိက “ဇာဖြစ်လဲ..ဇာဖြစ်လဲ” မီးရေခါ အပျိုမချေက “ဇာဖြစ်ဖို့လဲ ကန်ထဲမှာ ရီကူးမတက် ယောက်ကျားချေတယောက်ပြုတ်ကျလို့။ တချက်ကယ်ကတ်” ပြောလိုက်တေ။

ယေခါ ရွာသားတိ လူပျိုချေကို ဆင်းကယ်ကတ်တေ။ ယင်းနိကပင် “မိမ္မမာယာ မိမ္မရာပိုင်၊ ယောက်ကျားမနိုင်ကြောင်း” လူပျိုမောင်းမောင် ကောင်းကောင်းသဘောပေါက်လားလီပါသည်။

အသျှင် (Ashun)

လုံးဝမဖြစ်နိုင်

လုံးဝမဖြစ်နိုင်
-----------------
အကျွန်ုပ်ရို့ ရခိုင်ပြည်တခွင်မှာ လွန်လားခရေ (၂၀) ရာစုအစောပိုင်း ဝန်းကျင်လောက်အထိ Technology ပိုင်းဆိုင်ရာနှင့်ပတ်သက်လို့ တစွန်းတစချေတောင် မသိကတ်တေလူတိအများကြီးပါ။ အမှန်ပြောရဖို့ဆိုကေ ယင်းအချိန်လောက်က မဖွံ့ဖြိုးရေနယ်မြီ
ချေတခုဖြစ်တေအတွက်နှင့် ဓာတုဗေဒဆီးတိအားနည်းပြီးကေ ဗိန္ဓောဆီးလို့ခေါ်ရေ နယ်ဆီးသမားတိက အရွက်အခက်၊ အမြစ်အဥတိနှင့် ရောစပ်လုပ်ထားရေဆီးတိကို အမှီပြုကတ်ရပါရေ။ ယင်းဆီးနှင့် ယင်းဆီးသမားတိစွာ အကျွန်ုပ်ရို့အတွက် တန်ဖိုးဖြတ်မရလောက်အောင် ကျေးဇူးတရားလည်းများခပါရေ။

(၂၀) ရာစုနောက်ပိုင်းမှာ ဓာတုဗေဒဆီးတိဝင်ရောက်လာရေအတွက်တာနှင့် လူအများစုက ဓာတုဗေဒဖက်ကို အမှီပြုလာကတ်ပါရေ။ အကျွန်ရို့ရွာနားနောက်တရွာက အဖိုးချေသာဘန်းမှာ ထိပ်ဥက္ခောင်းမှာ အနာပေါက်တေခါ မြို့ကိုလားပျာယ် ဓာတုဘေဒဆီးနှင့်ကုဖို့ ဆုံးဖြတ်ကတ်ပါရေ။ မြို့ကိုရောက်တေခါ ဆီးရုံမှာဆရာဝန်က အဖိုးချေသာဘန်းကို တင်ကနီပြီး အကြောဆီးတလုံး ထိုးပီးလိုက်ပါရေ။ ယေခေါ အဖိုးချေသာဘန်း ကကောင်းမာန်ပါပြီးကေ ချက်ချင်းထပါရေ။ ထစွာနှင့်တပြိုင်နက်ပြောစွာက "အဝေး....မင်းရို့ ကကောင်းရူးရေကား။ ထိပ်မှာအနာပေါက်စွာကို တင်ကဆီးထိုးလို့ ဇာပိုင်ကောင်းဖို့လဲဝေ။ အနာနှင့်ဆီး ဝီးလိုက်တေပင်။ ငါ့ရို့ရွာက ဆီးသမားကျော်စိန် အနာကိုတည့်တည့်ကုစွာတောင်က မကောင်း။ လုံးဝ...... လုံးဝ.....မဖြစ်နိုင်။ လာပြန်ကတ်မည်ဝေး။ ဒေ အရည်ဆီးသမားတိနှင့် ငါဆက်မကုချင်ပျာယ်" ပြောပြလို့မရ ချက်ချင်းပြန်လာကတ်ရပါရေ။

အသျှင် (Ashun)

ရခိုင်ရိုးရာ ကုန်းပြိုင်လောင်းပြိုင်ပွဲ

ရခိုင်ကုန်းပြိုင်လောင်းပွဲအကြောင်း
..............................................
ပြိုင်လောင်းဟုပြောလျှင် အကျွန်ုပ်ရို့ရခိုင်သားများ ရီကိုပြီးမြင်ကတ်လိမ့်မည်။ အခု အကျွန်ရွီးမည့်ပြိုင်လောင်းအကြောင်းသည် ရီတွင်ပြိုင်ခြင်းမဟုတ်၊ ကုန်ထက်တွင် ထူးထူးဆန်းဆန်း ပြိုင်ခြင်းဖြစ်ပါသည်။ အကျွန်ဘ၀တသက်တွင် တခါရာ မြင်ဖူးပါသည်။ အကျွန်အသက် (၁၂) အရွယ်ခန့်တွင်ဖြစ်ပါသည်။ ပေါက်တောတွင် လိုင်ရိုးတော်ဓာတ်စေတီပွဲ ကျင့်ပသည်။ ထိုဘုရားပွဲကို နှစ်စဉ်နှစ်တိုင်းကျင့်ပ၍ စည်လည်းကကောင်းစည်ပါသည်။

လူပေါင်းထောင်သောင်းများစွာ ပါဝင်ဆင်နွဲကတ်ပါသည်။ ထိုပွဲတွင် ရခိုင်ရိုးရာယဉ်ကျေးမှုအဖုံဖုံ၊ အက၊ အားကစပ်၊ ခရမ်းသီးဇာတ် ယင်းပိုင်အစုံပါသည်။ အကျွန် ယင်းပြိုင်လောင်းအကြာင်း အသက် (၁၂) အရွယ်ခန့်ဖြစ်၍ လုံးစိပတ်စိမမှတ်မိပါ။ ယေကေလည်း မှတ်မိသလောက်တင်ပြလားပါမည်။

ယင်းကုန်းပြိုင်လောင်းကို ပုံဖော်ရာတွင် ပုတ်၊ ဖျာ (၀ါ) ရိုင်လိပ်များကို လောင်းပုံပိုင် ဓားနှင့်ပိုင်းဖြတ်ပုံဖော်ရသည်။ အားကောင်းမောင်းသန်၊ ဖျတ်လတ်သော လောင်းလှော်သားများက ဘေးတဖတ်တချက်တွင် ထိုလောင်းပုံဖော်ထားသော ပုတ်၊ ဖျာ (၀ါ) ရိုင်လိပ်များကို ၀ါး (သို့မဟုတ်) သစ်သားဒဂုံများနှင့် ပူးချိုင်ရသည်။ ဒဂုံကွင်များမှာ တခုနှင့်တခု အကွာအ၀ီး (၁) ပေ (၇) လက်မလောက် အကွာဟိသည်။ လောင်းလှော်သားများသည် ဒဂုံကွင်းများအလယ်တွင် ရပ်လျှက်အနီထားဖြင့် ကုန်းပြိုင်လောင်းအား ခိုင်မာသောကြိုးများဖြင့် ပက်ခုံးထက်တွင် ထမ်းတင်ထားရပါသည်။

လောင်းတလောင်းတွင်ဦးရေ (၁၅) ယောက်မှ (၁၇) ယောက်ထိပါဝင်သည်။ အ၀ီးကကြည့်မည်ဆိုပါ အလွန်လှပခန့်ငြားသော ကုန်းပြိုင်လောင်းကြီးကိုမြင်နိုင်သည်။ ပြိုင်လောင်း၏ပြင်ဘက်နံများကိုလည်း ပန်းချီအလှများဖြင့် ပုံဖော်ထားပါသည်။ လောင်းလှောင်းသားများအနီထားမှာ ရီပြိုင်လောင်းပိုင် အတူတူဖြစ်သည်။

လောင်းလှော်သားများသည် သူရို့၏လှော်တက်များကို အားမာန်အပြည့်ဖြင့် ကိုင်ထားကတ်ရသည်။ ပြိူင်ပွဲဝင်အသင်းများသည် တာမထွက်မှီ တစင်းနှင့်တစင်းပြိုင်တူရပ်လျှက် ဒိုင်လူကြီးအချက်ပီး ပုလီသံကို စောင့်နီကတ်ရသည်။ ရီပြိုင်လောင်းနှင့် စည်ကမ်းချက်များအတူတူဖြစ်သည်။ ပုလီအချက်ပီးသံကြားလျှင်ကြားချင်း ပန်းတိုင်သို့ အယင်ဆုံးရောက်ရန် လှော်တက်များကိုလှော်၍ ပြိုင်တူပြီးကတ်ရပါသည်။ အေကုန်းပြိုင်လောင်းပွဲကြည့်ရသည်မှာ ရယ်ဖို့ပျော်ဖို့ကောင်းရေပိုင် အားပါဖို့လည်း ကကောင်းကောင်းပါသည်။ ကုန်းပြိုင်လောင်းသည် ရီပြိုင်လောင်းထက် အဆတရာခက်ခဲသိမ်မွိမည်ဟု အကျွန်ထင်သည်။ ကုန်းပြိုင်လောင်းတွင် အတိုင်ဖောက် ကကောင်းညီရန်လိုပြီး လောင်းလှော်သားအချင်းချင်း အဟုန်အတူတူပြီးရန် ကကောင်းအရေးကြီးပါသည်။ မဟုတ်ပါက တစင်းလုံး ဂြမ်းဂြမ်းပြို လဲကျမည်ဖြစ်သည်။

ပန်းတိုင်သို့ စပြီးရာတွင် လှော်တက်များကိုလည်း တပါတည်းလှော်ရသဖြင့် Balanced ဖြစ်ဖို့ ကကောင်းခက်ခဲသောအလုပ်ဖြစ်သည်။ အကျွန့်ရှိတွင်ပင် တချို့သောလောင်းများ ဂြမ်းဂြမ်းပြို လဲကျကတ်ပါသည်။ အကျွန်သည် အချေဘာသာဘာဝအလျှောက် အူပိန်အောင်ရယ်မိပါသည်။ အသင်း တသင်းနှင့်တသင်းလည်း မနာနာအောင် သံကျပ်ထိုးပါသည်။ ရခိုင်ရိုးရာ ကုန်ပြိုင်းလောင်းပြိုင်ပွဲမျိုးသည် ကမ္ဘာ့မည်သည့်နီရာတွင်လည်း ရှာတွိနိုင်မည်မဟုတ်ပါ။ ရခိုင်ပြည်တွင်လည်း ပျောက်ကွယ်လားယာဟုထင်ပါသည်။

ယင်းပိုင်ချစ်ဖို့ကောင်းသော၊ သိမ်မွိနက်နဲသော ရခိုင်ရိုးရာယဉ်ကျေးမှုအမွီနှစ်များအား ထိမ်းသိမ်းဖော်ထုတ်ကတ်ပါရန် ရခိုင်တမျိုးသားလုံး ကြိုးပမ်းကတ်စီချင်ပါသည်။

(ရခိုင်ကုန်းပြိုင်လောင်းပွဲအကြောင်းသည် အေစာတိုချေတပိုဒ်ဖြင့် မလုံလောက်နိုင်ပါ။ အကျွန်မှတ်မိသလောက်တင်ပြခြင်းဖြစ်ပါသည်။ သိရေလူများ ဆက်ရွီးကတ်စီချင်ပါသည်။)

အေးမောင်( ရင်အုံတော်ဓာတ်)

နွီအလွမ်း (၀တ္ထုတို)

နွီအလွမ်း (၀တ္ထုတို)
-------------------------
နွီရာသီကိုရောက်လာပျာယ်။ အပူသျှိန်က အာကာကို အငွေ့ပျံတက်နီသည်။ မောင်နီတယောက် အိမ်ရှိ သရက်ပင်အောက် ကြိမ်ကုလားထိုင်မှာ ထိုင်နီသည်။ အာကာမှာ တိမ်မဟိ။ အယင်ကနွီရက်တိနှင့်မခြား အလှပလှ။ ကျောင်းပိတ်ချိန်ဖြစ်လို့ ကလေချေတိ စွန်တင်နီကတ်သည်။ စွန်အချင်းချင်းသိမ်းနီကတ်စွာကို မောင်နီမြင်ရရေအခါ သူအချေက ဖြစ်ခရရေဘ၀ကို အောက်မိမိသည်။ ယင်းအချိန်မှာ အိမ်နောက်ဖေးအုန်းပင်က ဥသြတွန်သံကိုလည်း ကြားနီရသည်။ အေပိုင်နွီရာသီတိ ကန်ကမကန် မောင်နီဘ၀မှာ ကျော်ဖြတ်ဖူးသည်။ အခုအချိန်မှာ မောင်နီသည် စွန်တင်ခရေမောင်နီမဟုတ်ပျာယ်။ အဖိုးသျှင်မောင်နီဖြစ်နီပျာယ်။

တချို့သောနွီရက်များကဆိုလျှင် မောင်နီသည် လူငယ်ဘ၀ကို ပိုင်ဆိုင်ဖူးသည်။ လူငယ်ပီပီ တက်တက်ကြွကြွ။ စိတ်ယင်လက်ယင်ဟိသည်။ အပင်တက်၊ ရီကူး၊ သူငယ်ချင်းတိနှင့် ပျော်ခသည်။ မောင်နီမှာ ကော့နီရေမျက်တောင်၊ ကျော့နီရေဆံပင်၊ ခိုင်ရေသွား ဟိခဖူးသည်။ တခါတရီ သူငယ်ချင်းတိဆုံလို့ သရက်သီးငါးပိဆားရည်စားချင်ကေ ရှိဆုံးက အပင်တက်စွာ မောင်နီ။

ယင်းချင့်တိကို စိုင်းစားကေ မောင်နီသည် အခုအချိန်မှာ ယိုင်တိယိုင်တိုင်လားနီရရေသူ့ဘ၀ကို သနားမိသည်။ အခုအချိန်မှာ ဖြူနီရေသူ့ဆံပင်၊ မှုန်နီရေသူ့မျက်စိကို ပွတ်ကြည့်နီမိသည်။ တခါတရီ ကိုယ့်စွာကိုတောင် မယုံချင်။ ဟုတ်ပါရေ အေချင့်စွာ မောင်နီမှမောင်နီအစစ်။ အက်ဒီဆန်ကိုအားကျဖူးရေ မောင်နီ၊ ဟိုချီမိန်းကို လေးစားဖူးရေမောင်နီ။ အေပိုင် သြတွန်ရေနွီရက်တိမှာ ခရီးရှည်လားခဖူးသည်။ ဘုရားလည်းဖူး၊ လိပ်ဥလည်းတူးယင်းလေ။ မြစ်ကမ်းယောင်ဘုတ်စီးယင်းပျံနီကတ်တေ ဆိုက်ဘေးရီးယားငှက်တိကိုကြည့်ပျာယ် လွတ်လပ်မှုကိုခံစားဖူးခသည်။ ငှက်တိပိုင် အာကာမှာအတောင်ပေါက်လို့ ပျံပစ်လိုက်ချင်သည်။ လက်ဟိဘ၀နှင့် မရောင့်ရဲနိုင်ခ။ မောင်နီချုပ်ချယ်မှုတိ၊ ဘောင်တိ၊ အကွပ်တိကို ရွံပါလတ်သည်။ ယင်းချင့်စွာ မောင်နီလူပျိုပေါက်စဘ၀ကလေ။

မောင်နီအသက်နှစ်ဆယ်လောက်မှာ မိသားစုနှင့် ကွဲလားခရသည်။ လုံးချင်းကျန်မှုရသကို ခံစားခရသည်။ အေချင့်ကို ဝေဒနာတခုလို့ သူသတ်မှတ်တေအချိန်ကပင် အရက်နှင့်ဆီးလိပ်ကို စသောက်တတ်လာသည်။ မောင်နီခန္ဓာကိုယ်ထဲကသွီးတိရေ သူ့ကို စကားလုံးမဟိရေ ဘာသာတမျိုးနှင့် မိတ်ဆက်လာသည်။ မောင်နီမှာ ပြောစရာစကားမဟိ။ အရက်နှင့်ဆီးလိပ်ကို ဖိလို့သောက်ကြည့်မိသည်။ သာယာရေသံစိုင်ကြားမှာ လက်ပိုက်ကူးကြည့်မိသည်။ သူရို့ကမဟုတ်၊ မဟုတ်ဟုငြင်းသည်။ ယကေ သူရို့ ပဇာကို အလိုဟိပါရေလဲ။ မောင်နီပြန်မိန်းကေလည်း မကြားကွန်ဆောင်နီကတ်သည်။ နောက်ဆုံး မောင်နီသဘောပေါက်လာသည်။ သူရို့တိ တောင်းဆိုနီစွာက မောင်နီအတွက် ဘ၀အဖော်။ ယင်းပိုင်နှင့် အသက်နှစ်ဆယ့်ငါးမှာ မောင်နီမယားရသည်။

မောင်နီမယားရရေအချိန်မှာလည်း အေပိုင်နွီခါလေ။ အိမ်ရှိက ရွက်ကြွီပင်ကိုကြည့်ယင်း လင်မယားနှစ်ယောက် ရှိဖြစ်နောက်ကြောင်းပြောပျာယ် ပျော်ရသည်။ အိမ်သျှင်မမျက်နှာကိုကြည့်ပျာယ် တေးခြင်းဆိုလို့ ပျော်ခသည်။ ယင်းအချိန်မှာ လွတ်လပ်မှုအရသာကို ပြောင်းပြန်ခံစားလာမိသည်။ အယင်က ဥသြတွန်စွာကို ဇာနှင့်လည်းနှိုင်းမရဆိုရေမောင်နီ အခု သူ့မယားအသံက ငှက်မြည်သံထက် သာယာနီပြန်သည်။ မောင်နီအသက်ကြီးပါလတ်ပျာယ်မနားယေ။

သူရို့လင်မယားနှစ်ယောက် ပထမဆုံးသားကိုရရေအခါ ဘဇောင်ပျော်လဲမသိ။ သူ့ကို ဘာဘာလို့စခေါ်ရေအချိန်စွာ နွီရာသီလေ။ ယင်းအချိန်မှာ ရာသီလေးလလုံး ဥသြအသံကို သူနားမစိုက်ခ။ ငှက်ကတော့ အိမ်နောက်ဖေးအုန်းပင်ထက်မှာ မြည်မြဲမြည်လီဖို့ရာ။ မောင်နီ လူပျိုခရီးထွက်ခါက အိမ်ကိုပြန်မလာချင်ခ။ ရက်တိကို သဘောက်ဖျာပိုင် ဖြန့်ထားချင်ခသည်။ အခု သားမယားနှင့်ခွဲနီရကေ အိမ်ပြန်ဖို့ကျည်းတွက်နီမိသည်။ မောင်နီမှာ နောက်ထပ်သားတယောက်၊ သမီးတယောက်ရသည်။ သူရို့တိမကြီးခင် လင်မယားနှစ်ယောက် အယင်ကပိုင် သစ်ရွက်လှုပ်စွာကိုကြည့်လို့ ကဗျာမဆန်နိုင်ပျာယ်။ လယ်ပြင်မှာ စွန်တင်ဖို့လားခရေသားအတွက် စိတ်ပူရ၊ သားနှစ်ယောက်နောင်ရီးအတွက် စိုင်းစားရ၊ ဘ၀ကာလတခုကို ဖြတ်သန်းရပြန်သည်။ ခရီးထွက်လားခရေသားကြီး အချိန်တန်လို့ အိမ်ပြန်ရောက်မလာကေ မမပီပီစိတ်ပူတတ်တေ အိမ်ကမယားကို ချော့ရသည်။ အဲလေ သူလည်း မောင်နီအချေခါပိုင် အိမ်ပြန်ဖို့ကို ကြိုးအရှည်ကြီးမသန်နှင့် လံထားလီဖို့။ လွတ်လပ်မှုကိုရှာပြီး သွီးကတောင်းဆိုချက်ကို ငြင်းနိုင်လီဖို့မဟုတ်။ ယင်းပိုင် သိတတ်တေအချိန်မှာ မောင်နီအသက် သင့်အောင်ချေကြီးနီပျာယ်။

သူ့ဘ၀ကို ခွန်အားနှင့် ရုန်းခသည်။ နိုင်ဖို့ကျည်း မျှော်လင့်ခသည်။ အခုအသက် ခုနစ်ဆယ်ကျော်ရေအထိ သူ့ဘ၀မှာ အောင်မြင်မှုတိ ဟိခရေပိုင်၊ မအောင်စွာတိလည်း တပုံ။ နောက်မှ ဘ၀ဆိုစွာ အေချင့်ပါကားလို့ နားလည်လာပြီး အဟိကိုအဟိအတိုင်း ပကတိကို ပကတိအတိုင်းမြင်လာသည်။ သားသမီးတိလည်း အတောင်စုံလို့ လီဟုန်စီးပျာယ် ပျံလားခကတ်သည်။ သူရို့လည်း မောင်နီဖြတ်ခရေနွီရက်တိကို အသိုက်အအုံဆောက်ပြီး ပျံသန်းနီကတ်ပျာယ်။ တနိနိတချိန်ချိန်မှာ သူရို့ဘ၀ကိုသူရို့ စိုင်းစားလာကတ်လိမ့်မည်။ ယင်းအချိန်မှာ သူရို့တိ ပဇာလုပ်ကတ်ဖို့လဲ မောင်နီမသိ။

လုပ်စရာမဟိရေ အေပိုင်ဝါကြီးတလုံးအတွက် နွီတရက်မကုန်နိုင်ပါ။ မှန်သားရောင်အာကာပြင်မှာ မိုးရိပ်တိကင်းစင်လို့ ရင်ထဲမှာတမျိုးကြီး။ အချိန်တန်လို့ အိမ်ပြန်ကတ်တေ ငှက်တိလည်း အာကာထဲမှာတ၀ဲဝဲ။ ကုလားထိုင်ဘေးက ၀ါးရင်းတုတ်ကိုကောက်ပြီး ရပ်စောက်ရပ်လိုက်သည်။ အစအဆုံးမဟိရေ သံသရာဘော်လုံးထဲမှာ အဆုံးသတ်တေ တိုက်တလုံးကို မောင်နီဆောက်ရခန့်သိမ့်။ ။

မောင်မောင် (စစ်တွေ)

ရွှီခိုင်ပြည်အလွမ်း

ရွှီခိုင်ပြည်အလွမ်း
-----------------
နွီရာသီ ဂိမ္မာန်ရာလည်းပြောင်းလို့
တပေါင်းရာလေချိန်ကူး
ရွက်ဟောင်းညှာကြွီ
ရွက်သစ်ဝီကေ နွီရတုမှာ
ပျိုနုလည်းသာယာ
ဟေမ၀ါမှာ ၀ဲကာရာလည်းကျီးငှက်
သီးချက်ပွင့်ချက် တကြိုင်ကြိုင်နှင့်
ဂနိုင်ရာစုံစမ်း
နီညိုညိုကေ ညနီချမ်းမှာ ပျံသန်းကျီးငှက်
တကြော်ကြော် ခေါ်နှုတ်ဆက်လို့
ဇရွက်ကေလေတမာန်
တညံညံကေ ခေါ်သံရာလည်းမစဲ
ဒိုးဒိုးလေ ဒုန်ဒုန် နိုးနိုးနုန်ကေ
ဖိုးခေါင်ရာလည်း ကျူးကျော်
မောင်ရို့ပျော်ကေ ရွှီခိုင်နန်းကို
လွမ်းမစဲဖွယ် ပုယေ --။

(ရမ်းဗြဲကျွန်းမှာ ဇမ်းကဗျာ)

(ပုယေ) ဆိုသည်မှာ အင်္ဂလိပ်ခေါ်အားဖြင့် (Baby) ဟု အဓိပ္ပါယ်ရပါသည်။ ရည်းစားကို ချစ်၍တော့ခေါ်သော ဝေါဟာရဖြစ်သည်။ အင်္ဂလိပ်များလည်း ထိုနည်းလည်းကောင်းပင်သုံးသည်။ များသောအားဖြင့် သခြင်းများတွင်တွိရသည်။

မောင်ပြန်ဖို့ယာ

မောင်ပြန်ဖို့ယာ
---------------
မိုးလင်းကြယ်ကြီး
ရောင်ဖြူလာ ထွက်ခါနီး
ကြက်ကြီးလည်းတွန်
မိုးသောက်ယံ
မောင်ပြန်ဖို့ယာ --။

မောင်လားရေခါ
ဆံကေသာ ဖြီကာလျော့
ကန်တော့လိုက်ပါ --။

ကတိုးတိမ် စိုးရိမ်နှောင်းလို့
မကြောင်းကြကဲ့ --။

ဂြိုးချေကြူ
မပူလီကဲ့ --။

ငှက်တော်ထိုး
မညှိုးလီကဲ့ --။

ကျီးကန်အာ
မရှာလီကဲ့ --။

ဥသြမောင်
ဖိုးခေါင်တယောင် မတလီကဲ့ --။

ချစ်တေဆို ပျိုနှမကို
မှာခရေနှောင်း --။

နှစ်ချောင်းချီ ဗွီချေယှက်
ရက်သပေါ့မှာ
ရွှီမျက်တောင် အသာမှိတ်
အိပ်ဟိလိုက်ပါ --။

အိမ်နောက်ဆို မောင်းကာအောက်က
မေအိပ်ရာကို မျှော်ကာကြည့်
ပြန်လှည့်လားယာ --။

နှစ်ချောင်းချီ ဗွီလီယှက်
ရက်သပေါ့မှာ
ရွှီမျက်တောင် အသာမှိတ်
မအိပ်နိုင်ပါ --။

မတွိလီရ မမြင်ရလို့
ကားရုပ်ပုံ ဆယ်စုံချ
ရူပဒေ၀ါ နတ်ထံထံလေ
တူပြန်ခကေ
ငယ်ကချစ်တေ ချစ်မောင်မောင်ကို
ကြိုက်မ၀ပါ --။

(ရမ်းဗြဲကျွန်းမှ ဇမ်းကဗျာ)

ကြောင်းကျိုးပြ ကြိယာများ (ရခိုင်ဝေါဟာရအဘိဓါန်အတွက်)

ကြောင်းကျိုးပြ ကြိယာများ (ရခိုင်ဝေါဟာရအဘိဓါန်အတွက်)
--------------------------------------------------------------
ရခိုင်ဝေါဟာရအဘိဓါန်အတွက် ကြောင်းကျိုးပြကြိယာ စုစုပေါင်း (၇၇) လုံးအား စုဆောင်းဖော်ပြအပ်သည်။

(ခ)

(ခွာ) ကေ (ကွာ) ရေ။ (အကာ)
(ခွဲ) ကေ (ကွဲ) ရေ။ (အုန်းသီး)
(ခေါက်) ကေ (ကောက်) တေ။ (သံ)
(ချ) ကေ (ကျ) ရေ။ (ကျင်)
(ချုံ့) ကေ (ကျုံ) ရေ။ (အရီ)
(ချိုး) ကေ (ကျိုး) ရေ။ (သွား)
(ချက်) ကေ (ကျက်) တေ။ (ထမင်း) ***
(ချန်) ကေ (ကျန်) ရေ။ (ဟင်း)
(ချယ်) ကေ (ကျယ်) ရေ။ (ဇကာ)
(ချွတ်) ကေ (ကျွတ်) တေ။ (အရောင်)
(ချွန်) ကေ (ချွန်း) ရေ။ (မြှား) (မြှားကို (ချွန်း) အောင် (ချွန်) ပစ်လိုက်)
(ခြား) ကေ (ကြား) ရေ။ (၀ါး)
(ခြီ) ကေ (ကြီ) ရေ။ (အခဲ)
(ခြွီ) ကေ (ကြွီ) ရေ။ (အသီး)
(ခြဲ) ကေ (ကြဲ) ရေ။ (အစွယ်) (အစွယ်ကို (ခြဲ) ပြကေ (ကြဲ) နီယင့်။)
(ခြစ်) ကေ (ပြစ်) တေ။ (မှန်)
(ခြစ်) ကေ (ကြစ်) တေ။ (အကြောင်း)
(ခြင်း) ကေ (ကြင်း) ရေ။ (ငါးခြောက်)
(ခြောက်) ကေ (ကြောက်) တေ။ (တဆီ)

(ဆ)

(ဆုတ်) ကေ (စုတ်) တေ။ (စာရွက်) ***
(ဆန့်) ကေ (စန့်) ရေ။ (အခြီ) ***
(ဆွတ်) ကေ (စွတ်) တေ။ (ရီ) ***

(ဖ)

(ဖိ) ကေ (ပိ) ရေ။ (ပိဿာ)
(ဖဲ့) ကေ (ပဲ့) ရေ။ (အနား)
(ဖုံး) ကေ (ပုံး) ရေ။ (ဣနြေ္ဒ)
(ဖော့) ကေ (ပေါ့) ရေ။ (ကုလားကောင်)
(ဖော်) ကေ (ပေါ်) ရေ။ (လောင်း)
(ဖောက်) ကေ (ပေါက်) တေ။ (၀ါးပြောက်)
(ဖွ) ကေ (ပွ) ရေ။ (အညှက်) ***
(ဖွင့်) ကေ (ပွင့်) ရေ။ (တန်းခါး)
(ဖွတ်) ကေ (ပွတ်) တေ။ (၀ါးလုံး)
(ဖျက်) ကေ (ပျက်) တေ။ (လူ)
(ဖျောင်) ကေ (ပျောင်) ရေ။ (ဗူး) ^^^
(ဖျစ်) ကေ (ပျစ်) တေ။ (ကြမ်းပိုး)
(ဖျို) ကေ (ပျို) ရေ။ (သံ)
(ဖျော့) ကေ (ပျော့) ရေ။ (ဖယောင်း) (ဖယောင်း မီးနှင့်ဖျော့ ပျော့နီယင့်။)
(ဖျော်) ကေ (ပျော်) ရေ။ (သကြား)
(ဖျောက်) ကေ (ပျောက်) တေ။ (ကိုယ်ရောင်)
(ဖျောင်း) ကေ (ပျောင်း) ရေ။ (ကျမန်း)

(ဖြီ) ကေ (ပြီ) ရေ။ (ကြိုး)
(ဖြဲ) ကေ (ပြဲ) ရေ။ (အနာ)
(ဖြို) ကေ (ပြို) ရေ။ (တောင်)
(ဖြန့်) ကေ (ပြန့်) ရေ။ (အတောင်) ***
(ဖြုတ်) ကေ (ပြုတ်) တေ။ (ရာထူး)
(ဖြုန်း) ကေ (ပြုန်း) ရေ။ (အစိုင်)
(ဖြောင့်) ကေ (ပြောင့်) ရေ။ (ကြိမ်)
(ဖြည့်) ကေ (ပြည့်) ရေ။ (ရီ) (ရီကို (ဖြည့်) ကေ (ပြည့်) ရေ။) (မဖွတ်ဘဲဖြူ မဖြည့်ဘဲပြည့်) (အုန်းသီး)။
(ဖြတ်) ကေ (ပြတ်) တေ။ (ဓါး)

(မ)

( မွှိ ) ကေ ( မွိ ) ရေ။ (ဂျင်)
(မျှိုး) ကေ (မျိုး) ရေ။ (၀ါးဖောင်)
(မြှင့်) ကေ (မြင့်) ရေ။ (အဆင့်)
(မြှုတ်) ကေ (မြုတ်) တေ။ (သမ္ပာန်)
(မြှောက်) ကေ (မြောက်) တေ။ (လူဗိန်း)

(န)

(နှဲ့) ကေ (နဲ့) ရေ။ (ခါး) *** (ကစွာမှာ ခါးကို (နှဲ့) ထားစွာချေ (နဲ့) နီယင့်။)
(နှုး) ကေ (နူး) ရေ။ (ထမင်းခြောက်) (ထမင်းခြောက်ကို ရီနန့် (နှုး) ကေ (နူး) ရေ။)
( နွှာ ) ကေ ( နွာ ) ရေ။ (အခွံ) (အခွံ (နွာ) အောင် ( နွှာ ) ပစ်လိုက်။)
(နှိုး) ကေ (နိုး) ရေ။ (အချေ)
(နှုတ်) ကေ (နုတ်) တေ။ (အမွှီး) (ငှက်မွှီး (နှုတ်) ပစ်လိုက်၊ (နုတ်) လီပါတ်စီ။)
(နှစ်) ကေ (နစ်) တေ။ (ခဲ)
(နှပ်) ကေ (နပ်) တေ။ (ထမင်း)
(နှိပ်) ကေ (နိပ်) တေ။ (နံ)
(နှိမ့်) ကေ (နိမ့်) ရေ။ (ကြမ်း) ***
( နွှီး ) ကေ ( နွီး ) ရေ။ (ရီအိုး) *** (ရီအိုးကို (နွီး) အောင် ( နွှီး ) ထား။)
(နှောက်) ကေ (နောက်) တေ။ (သောက်ရီ) (သောက်ရီကို (နောက်) အောင် (မနှောက်) ကဲ့။)

(ယ)

(ယှင်း) ကေ (ကျင်း) ရေ။ (အမှိုက်)

(ရ)

(ရွှင့်) ကေ (လွင့်) ရေ။ (စပါး) *** (လီထလို့ စပါး ( ရွှင့်) ကေ စပါးဖျင်းတိ (လွင့်) လားလိမ့်မေ။)

(လ)

(လှူး) ကေ (လူး) ရေ။ (လောင်း)
(လှဲ) ကေ (လဲ) ရေ။ (အပင်)
(လွှဲ) ကေ (လွဲ) ရေ။ (ယိုင်း)
(လွှတ်) ကေ (လွတ်) တေ။ (ခွီး) ***
(လွှင့်) ကေ (ရွင့်) ရေ။ (ရွက်) *** (ရွက် (လွှင့်) ကေ (ရွင့်) ရေ။)
(လှည့်) ကေ (လည့်) ရေ။ (အဂေါင်း)
(လှပ်) ကေ (လပ်) တေ။ (တောင်း)
(လှန်) ကေ (လန်) ရေ။ (ဖျာ)
(လှန့်) ကေ (လန့်) ရေ။ (ငကြောက်)
(လှောက်) ကေ (လောက်) တေ။ (အပို) (ဆန်စကေ အပို (လှောက်) ထည့်လိုက်။ မဟုတ်ကေ (လောက်) ဖို့မဟုတ်။)

(စုစုပေါင်း ရခိုင် (ကြောင်းကျိုးပြကြိယာ) ဝေါဟာရစကားလုံး (၇၇) လုံးရထားပြီးဖြစ်ပါသည်။ ထပ်မံ လှောက်ထည့်ဖြည့်စွက်ရန်လည်း တောင်းပန်အပ်သည်။)

*** ပြထားသည်များမှာ ကိုကျော်ဖြိုးဝေဖြည့်စွက်ချက်များဖြစ်သည်။
^^^ ကိုယ်တော် Eindaobatha ပို့တင်ထားခြင်းဖြစ်သည်။

ညီညွတ်ရေးသာဘန်း

ညီညွတ်ရေးသာဘန်း
------------------------
အကျွန်ုပ်ရို့ရွာတွင် အလွန်သဘောကောင်းသော ၀ါကြီးတလုံးဟိသည်။ သူသည် ဘုရားတရားအလွန်ရိုသေကိုင်းညွတ်သည်။ စိတ်ကောင်းစေတနာကောင်းဟိသည်။ ရပ်ရေးရွာရေး၊ သာရေးနာရေးအစစအရာရာ ကူညီတတ်သည်။ ရပ်ရွာစည်ပင်သာယာရေးအတွက်အစဉ်မမြဲ ဦးထိပ်ရွက်ပန်ထားသူဖြစ်သည်။ ရပ်ရွာအတွင်း လင်မယားရန်ဖြစ်သည်ကအစ သင့်မြတ်အောင် စိစပ်ဆောင်ရွက်ပီးသည်။ အချေသူငယ်များရန်ဖြစ်လျှင်လည်း (အဝေး အစိတ်ကေချေတိ၊ ပုတ်ကြားကေ နွားချီးဝင်ရေ။ နွားကွဲကေ ကျားကိုက်တေဝေး၊) စသည်ဖြင့် ထိရောက်သောစကားပုံများဖြင့် ဆိုဆုံးမလေ့ဟိသည်။

သူ့အိမ်သည် ပျိုင်စီပျိုင်ဆောင်အိမ်ကြီးဖြစ်သည်။ သူ၏မိဘများမှာ လယ်ပိုင်သျှင်သူဌေးကြီးများဖြစ်သဖြင့် ပြိုင်းသားတိုင်နောင်းနောင်းဖြင့် အင်္ဂလိပ်လက်ထက်တတည်းကပင် ဆောက်လုပ်ခပြီး မသီခင် တဦးတည်းသောသားကြီးမောင်သာဘန်းအား အမွီပီးထားခခြင်းဖြစ်သည်။ အိမ်မှာ နှစ်ပေါင်း (၁၀၀) ကျော်ကြာသည့်တိုင် အခုအထိ နောင်းနောင်းနင်းနင်း မယိုင်မယိမ်းဘဲ ရွာ၏အရှိဖက်တွင်တည်ဟိသည်။ ဘုန်းကြီးကျောင်းနှင့် မနီးမ၀ီးဖြစ်သည်။ မင်းကန်နှင့်လည်း နီးသည်။ နှစ်ထပ်အိမ်ဖြစ်ပြီး ကားလမ်းမကကြည့်လျှင် ဟိန်းလျှက်မြင်ရသည်။ ရွာ၏ကျက်သရေဆောင်အိမ်ကြီးတဆောင်ဖြစ်သည်။ ရွာသားများက သူ၏အိမ်ကိုလက်ညှိုးထိုးလျှက် မိမိရွာကိုဂုဏ်ယူတတ်ကြသည်။ အခြားရွာသားများအား ကြွားစရာဟူ၍ ဤအိမ်ကြီးတလုံးရာဟိသည်။ ရပ်ရေးရွာရေးအတိုင်ပင်ပြုသောအခါ ဘုန်းတော်ကြီးကျောင်းကိုပင် မအားထား၊ ဤအိမ်ကြီး၌စုရုံးလေ့ဟိသည်။ သို့ကြောင့် သက်တူရွယ်တူလူကြီးများက အဘိုးမောင်သာဘန်းအား (ညီညွတ်ရေးသာဘန်း) ဟုခေါ်သည်။

ဤသို့ခေါ်ရသည့်အကြောင်းမှာလည်း ရွာတွင် သောက်စားယစ်မူးတတ်သော နွားသူခိုးသာဘန်းနှင့် ကွဲလွဲစီချင်၍ဖြစ်သည်။ (သာဘန်း) ဟုပြောလျှင် (ဇာသာဘန်း) လဲဟု အတွန့်ရှည်သဖြင့် (ညီညွတ်ရေးသာဘန်း) ပြောလိုက်လျှင် လူတိုင်းသိသည်။ သူသည် ရွာသူရွာသားများစည်းလုံးညီညွတ်ရေးသာလျှင်မဟုတ် ရခိုင်တမျိုးသားလုံးစည်းလုံးညီညွတ်ရေးကို လိုလားသူတဦးဖြစ်သည်။ လေးဝတီညီညွတ်ရေးတရားကိုလည်း စကားထဲအမြဲထည့်ပြောလေ့ဟိသည်။ သူ့အိမ်တွင် အလွန်ကြီးမားသော ကပ်ဆပ်တလုံးဟိသည်။ သူ့ကိုယ်ပိုင် နွားမတန်းမ,သုံးကောင်ကိုရောင်းလျှက် ၀ယ်ထားသည်ကို ရှိမှီနောက်မှီများက သိသည်။ အဖိုးသာဘန်းသည် အသက်အရွယ်ကြီး၍ ၀ါကြီးဖြစ်သော်ငြားလည်း ဂျီမသုဉ်းသည့်အပြင် ခေတ်လူငယ်များနှင့် အပေါင်းအသင်းလုပ်နိုင်သော အလွန်ခေတ်မှီသော ခေတ်မှီဝါကြီးတလုံးဖြစ်သည်။

မြန်မာပြည်လွတ်လပ်ရေးရသောအခါ အဘိုးသာဘန်းမှာ အသက် (၁၅) နှစ်ဟိပြီးဖြစ်သည်။ ထို့ကြောင့် အင်္ဂလိပ်ပညာရေးကို (၈) တန်းအထိသင်ကြားဖူး၍ အဖိုးသည် အင်္ဂလိပ်စကားကိုလည်း အသင့်အတင့်ပြောဆိုနိုင်သည်။ မိဘများက ချမ်းသာသူများဖြစ်၍ မြို့တက်၍ ကျောင်းထားနိုင်သောကြောင့်လည်းဖြစ်သည်။ အဖိုးသည် အင်္ဂလိပ် သဒ္ဒါ (Grammar) ကို အလွန်ကျွမ်းကျင်ပိုင်နိုင်သည်။ ထို့ကြောင့် ပညာရေးကိုလိုက်စားသော ရွာလူငယ်များက အဖိုးထံ၌ တပည့်ခံ နည်းနာခံယူရသည်။ အဖိုးလည်း ပညာရေးနှင့်ပတ်သက်လာလျှင် အလွန်စိတ်ရှည်သည်။ တပည့်သားသမီးများမသိနားမလည်သည်များကို စိတ်ရှည်လက်ရှည်ယှင်းပြတတ်သည်။ လူငယ်များအား နွားနှင့်ရုန်း၍ ကျုပ်နွံထဲတွင် မနစ်မွမ်းစီချင်သော သူ၏စေတနာအရင်းခံကြောင့်ဖြစ်သည်။

သူ့၏အိမ်တွင် ဘို့အား (၁၂) လုံးဟိသော ဘယ်ထရီ (၃) လုံးနှင့် လူတရပ်ခန့်မြင့်သော (Sound Box) နှစ်လုံးဟိသည်။ ဘေထရီတလုံးကုန်လျှင် (၂) လုံး အရံအဆင့်သင့်ဟိသည်။ နှစ်စဉ်နှစ်တိုင်း တန်းဆောင်ဘုန်းလပြည့်နိရောက်၍ ထမင်းပေါင်းချက်စားတိုင်း ရွာလူငယ်များအဖိုးအိမ်၌စုရုံး၍ အဖိုးကပ်ဆပ်ဖြင့် (Sound Box)အသံကုန်ဖွင့်လေ့ဟိသည်။ ချောင်းတဖက်ကမ်း (၃) မိုင်ကွာဝီးသော ဇီးဇာရွာကပင်လျှင် အကျွန်ုပ်ရို့ဖွင့်သော တေးခြင်းသံများကို ညဥ့်လုံးပေါက်ကြားရသည်ဟုဆိုသည်။ အဖိုးသည် ရှိဟောင်းသခြင်းကြီးများသာလျှင်မဟုတ် အခုခေတ်ပေါ်ရခိုင်သခြင်းများကိုလည်း လက်ခံသည်။ အဖိုးအနှစ်သက်ဆုံးသခြင်းမှာ (၀တီလေးရပ်သားချင်း၊ ညီညွတ်ကတ်မေ) ဆိုသည့်သခြင်းဖြစ်သည်။ ပြီးလျှင် မြောက်ဦးသား သိန်းထိုက်ဇော်ဆိုသော (အပြောနှင့်မပြီးသိမ့်ပါ ရခိုင်) ဆိုသည့်သခြင်းကိုလည်း အလွန်နှစ်သက်သည်။ တခါတရီ အဖိုးသည် ဆောင်းတွင်းဝိုင်းမီးလှုံသောအခါ အသုံးပြုသော ကသောင်းဝါးခြမ်းထိုင်ခုံကို သူ၏ပန်းတူရိုးဖြင့် စည်းခေါက်လျှက် ထိုကာလပေါ်တေးခြင်းများကို အကျွန်ုပ်ရို့လူငယ်များအား ဆိုပြလေ့ဟိသည်။ ထို့ကြောင့် အကျွန်ုပ်ရို့လူငယ်များက အဖိုးအားအလွန်ချစ်သည်။

သို့သော် အဖိုးကားစိတ်ကောင်းဟိသလောက် ကံမကောင်းပါ။ အဖိုး၏ချစ်လှစွာသော အဘောင်မမသျှင်မှာ အဖိုးထက်စောစောစီစီး သီဆုံးလားသောကြောင့်ဖြစ်သည်။ အဖိုးမှာ အိမ်ထောင်ကျလည်းနောက်ကျသည်။ အဖိုးက ဘုန်းကြီးလုပ်ချင်သည်။ သို့သော် သူ၏မိဘများက အမွီခံမျိုးဆက်တုံးလားမည်စိုး၍ အဖိုးအသက် (၅၀) ရောက်ခါမှ ပန်းမော်ရွာက အပျိုကြီးမသျှင်နှင့် အိမ်ထောင်ချပီးသည်ဟုသိရပါသည်။ အဖိုးအိမ်ထောင်ကျချိန်တွင် အကျွန်ုပ်ရို့ မွီးတောင်မမွီးသိမ့်ပါ။ အိမ်ထောင်ကျပြီး (၂) နှစ်အကြာမှ သမီးချေတယောက်ထွန်းကားသည်။ (အထွီးမေ) ဟုခေါ်သည်။ အသက်ကြီးပြီးမှ အိမ်ထောင်ကျသောကြောင့် သမီးဦးကိုဖွားပြီး နောက်ထပ်သားသမီးမရလီပါယာ။ အဖိုးကို တရွာလုံးကချစ်သောကြောင့် သမီး (အထွီးမေ) ကိုလည်း တရွာလုံးက ၀ိုင်းချစ်သည်။

တချက်မိကျန်လိုက်သည်မှာ အဖိုးအိမ်တွင် ဒါးတချောင်းဟိသည်။ အသွားမှာ လက်နှစ်လုံးအရွယ်ဟိ၍ အရှည်မှာ တလံလောက်ဟိသည်။ အဆောက်ကို ကျွဲရိုးဖြင့်ဆောက်ထားသည်။ အဖိုး၏အိမ်ရှိခန်းတွင်အလှချိတ်ထားသည်။ သို့သော် ၄င်ဒါးအား မည်သူတဦးတယောက်ကိုလည်း အကိုင်မပီး။ သင်္ကြန်ရောက်တိုင်း အဖိုးမှာ တကြိမ်စီဒါးသွီးသည်။ သို့သော် မည်သည့်အရာကိုမျှ ခွတ်ထစ်ခြင်းမပြု။ ၄င်းဒါးမှာ မြန်မာယိမ်းနွဲ့ပါးဒါးကဲ့သို့ပျော့စိစိမဟုတ်။ အလွန်မာ၍ အလွန်ဖြောင့်သည်။ သံဆီးသုံးထပ်တင်ထားသဖြင့် အလွန်ထက်သည်ဟုဆိုသည်။ မယုံသဖြင့် တခါက ရွာသျှင်ပြုပွဲတွင် ပိဿာ (၁၅၀) ကျ ၀က်တကောင်းအားခွတ်ပြရာ တချိန်းတည်းနှင့် နှစ်ပိုင်းပြတ်လားမှ ရွာသားအားလုံးအံသြသင့်ရသည်ဟုဆိုသည်။ အင်္ဂလိပ်အဆုတ် ဂျပန်အတက် ကုလားရခိုင်အရေးအခင်းဖြစ်ရာတွင် အသုံးပြုခသဖြင့် သမိုင်းဝင်ဒါးအဖြစ် အဖိုးက တယုတယသိမ်းထားခြင်းဖြစ်သည်။ ဘူးသီးတောင်မောင်တော ရထားလမ်းဟောင်းသံဖြင့်ပြုလုပ်ထားခြင်းဖြစ်ပြီး အဖိုးအသက် (၁၃) နှစ်အရွယ် ဆံတော်ရှင်ဘုရားဖူးအပြန် ပူဆာသဖြင့် အမိအဘများက စစ်တွေကုန်တန်းပန်းဘဲဆိုင်တခုမှ ဈီးကြီးပီး၍ ၀ယ်ယူခသည်ဆို၏။ အကျွန်ုပ်ကား တကြိမ်တခါကိုင်ဖူးပါ၏။ မခွတ်မပြုဘဲ တနှစ်တကြိမ်သွီးထားသဖြင့် ဒါးသွားမှာ သျှင်ပြုဥက္ခောင်းဆံရိပ်သော သင်းထုန်းဒါးထက်ပင်ထက်၏။

ဇတ်လမ်းကိုဆက်ရသည်ဟိသော် အကျွန်ုပ်ရို့ရွာတွင် အပျိုလူပျိုရွာလည်သော ဓလေ့အစဉ်အလာဟိ၏။ သို့သော် စည်းမဲ့ကမ်းမဲ့ကားမဟုတ်။ လူပျိုတဦးတယောက်က အပျိုတယောက်အားရွာလည်လိုသည်ဟိသော် ပထမဦးစွာ လူပျိုဂေါင်းအားအသိပီးရ၏။ ထိုနောက် လူပျိုဂေါင်းက အပျိုဂေါင်းအားကြိုတင်အကြောင်းကြား၏။ ထိုညတွင် အပျိုဂေါင်းက အပျိုအိမ်သို့ ဆီးကွမ်းစားဟန်ပြု၍ အပျိုမအား တိတ်တိတ်ပုံးအသိပီးထား၏။ အပျိုသဘောတူမှ သမီးရည်းစားဖြစ်ခွင့်ရ၏။ သို့သော် ရမ်းဗြဲအရပ်မှာကဲ့သို့ ဇမ်းကဗျာဖြင့် အချစ်ကျူးသော ကဗျာအလင်္ကာ၊ စာအလင်္ကာများမှာ ကွယ်ပျောက်ပြီးဖြစ်သဖြင့် ရိုးရိုးစကားဖြင့်ပင် ချစ်ခွင့်ပန်ကြ၏။ သမီးရည်းစားဖြစ်သူများအဖို့ ကျူရိုးတံတွင် သင်္ကေတပြုလျှက် လူမမှားစီရန် အမှတ်အသားပြုရ၏။ ထိုကျူရိုးတံအား သူများမမြင် မခိုးရအောင် ပုန်းဝှက်ထားရသည်မှာ လူပျိုများအဖို့ အလွန်ဦးဏှောက်စားသောအလုပ်ဖြစ်၏။ တချို့ငမျောက်ငချောက်များက သူများကျူရိုးတံခိုး၍ အချောင်ရွာလည်တတ်သည့်အန္တရာယ်ကို သမီးရည်းစားချစ်ကြိုက်နီသူများအထူးဂရုပြုရ၏။

ရွာလည်ချင်သော လူပျိုများသည် ရွာလယ်တွင် လူပျိုများတကူးတကဆောက်လုပ်ထားသော ရွာလည်အိမ်၌ စုဝေးအိပ်ကြရ၏။ အရာရာကို စူးစမ်းချင်သောအသက်ဆယ့်သုံး၊ ဆယ့်လေးနှစ်အရွယ် လူပျိုပေါက်စများအဖို့ ထိုအိမ်၌ အိပ်ခွင့်ရရေးမှာ လွယ်ကူသောအလုပ်မဟုတ်။ လူပျိုကြီး၊ လူပျိုဂေါင်းများကို အထူးပူဇော်ပသရ၏။ လူပျိုဂေါင်း၏ခွင့်ပြုချက်မရဘဲ ထိုရွာလည်အိမ်၌အိပ်ခွင့်မဟိ။ ရွာလည်သောအခါတွင်လည်း ရွာလည်လာသော အာဂန္ဓုတခြားရွာသားများအား ဦးစားပီးရ၏။ အနီးပတ်ဝန်းကျင်ရွာအင်တန်များများ၌ ထိုဓလေ့မှာ ကွယ်ပျောက်ပြီးဖြစ်သဖြင့် ရွာလည်ရန် အကျွန်ုပ်ရို့ရွာသို့ စုပြုံရောက်လာတတ်၏။ အထူးသဖြင့် နွီခါသားတလင်းပွဲချိန်ဖြစ်၏။ ရွာလည်ခွင့်ဟိသော အကျွန်ုပ်ရို့ရွာ၏အားသာချက်မှာ လူပျိုများသည် တခြားရွာသို့ထွက်မလားလို။ ရွာ၌မြဲ၏။ ထို့ကြောင့် အကျွန်ုပ်ရို့ရွာ၏အိမ်ခေါင်ပေါ်ဦးရေမှာ အခြားရွာများထက် သုံးလေးဆပိုများ၏။ ရွာလည်ခွင့်ဓလေ့ကွယ်ပျောက်ပြီးဖြစ်သောရွာများ၌ လူပျိုလူရွယ်များမပျော်ပိုက်သဖြင့် အချိန်တန်လျှင် ကြက်ပျောက်ငှက်ပျောက်ကုန်၏။ အထူးသဖြင့် မြန်မာစစ်တပ်ထဲသို့ဝင်၍ မှိုင်းသင့်ပြီးမှ ရွာပြန်ရောက်လာတတ်၏။ သို့သော် အများစုမှာ ကရင်ပြည်နယ်ရှိတန်းတွင် လစန့်ကောင်သည်များ၏။

မှတ်မိသဘောက် အကျွန်ုပ်ပထမဆုံးအကြိမ် ရွာလည်အိမ်၌ အိပ်ခွင့်ရသည်မှာ အသက် (၁၅) နှစ်အရွယ်ရောက်ပြီးမှဖြစ်သည်။ ထို့အခွင့်အရေးရဖို့ လူပျို၊ လူပျိုဂေါင်းများအားကန်တော့လိုက်ရသည်မှာ အိမ်ကကြက်တုတ်တုတ်ပြောင်၏။ ထိုရွာလည်အိမ်၌ ပထမအိပ်ခွင့်ရသောနိသည်ပင်လျှင် အကျွန်ုပ်၏အပျော်ဆုံးရက်ထဲတွင်တရက်အပါအ၀င်ဖြစ်သည်။ မှတ်မိရရဟိသည်မှာ ထိုနိတွင် အကျွန်ုပ်ထက်အလွန်ဝါကြီးသော အစ်ကိုကြီး (၆) ယောက်နှင့်အတူဖြစ်သည်။ အကျွန်ုပ်အပါဝင် (၇) ယောက်ဖြစ်သည်။ ထိုအထဲတွင် အလွန်ရယ်စရာ ဟာသပြောတတ်သော အစ်ကိုကြီးသာအောင်လည်း တယောက်အပါအ၀င်ဖြစ်သည်။ အစ်ကိုကြီးသာအောင်သည် ထိုအချိန်တွင် အသက် (၂၆) နှစ်ခန့်ဟိပြီးဖြစ်၍ အကျွန်ုပ်ထက် (၁၀) နှစ်ခန့်အသက်ကြီးပါသည်။ (ပရမီကျင့်သကြားမင်း၊ ဒယွားမရထွက်ပြီးဖို့ကျ။ နှစ်ကားနှစ်အဖိုး ကျွန်တော်မပါစီကဲ့။) ဟာသများမှာ အစ်ကိုကြီးသာအောင်ပါးကရသော ရွာလည်ဝတ္ထုများဖြစ်ပါသည်။

ဇတ်လမ်းကိုပြန်ဆက်ရသော် ထိုနှစ်တပေါင်းလတွင်ဖြစ်သည် အဖိုးသာဘန်း၏သမီးနီမကောင်းဖြစ်သည်။ ဆရာဝန်မဟိ၍ ရွာက သားဖွားဆရာမနှင့်ပြသောအခါ ဇတ်လမ်းမှာ ကြိုးကြာဥပြဿနာဖြစ်သည်။ အကြောင်းစုံစမ်းသောအခါ တရားခံမှာ အစ်ကိုသာအောင်ဖြစ်နီသည်။ အများမကြာ တရက်နိမိုးထက်စောစော ဆွမ်းပို့ခတက်ခေါက်ပြီး မကြာခင်လောက်တွင် အဖိုးသာဘန်း ဒုတ်ကောက်ထောက်၍ အကျွန်ုပ်ရို့စံအိမ်ကြီးသို့ ပေါက်ချလာသည်။ (အဝေး သာအောင်ထထ) ဟု လှမ်းအော်ခေါ်သည်။ အကျွန်ုပ်ရို့လည်း အိမ်မွှမ်းစုံထ ထပါလတ်ကတ်သည်။ မိုးထက်စောစောဖြစ်သဖြင့် အရေးကြီးအကြောင်းကိစ္စပေါ်သည်ဟုထင်သည်။ စိတ်ထဲမှာ အစ်မ (အထွီးမေ) နီမကောင်း၍ ဆီးရုံသို့ပို့ချင်၍လားမသိထင်သည်။ ကိုသာအောင်က ဦးစွာဆင်းနှင့်သည်။

လှီကားထစ်တ၀ှက်အရောက်တွင် အဖိုးသာဘန်းက ဒုတ်ကောက်တွင် ပူးချိုင်ယူလာသော ကုလားနိုင်ဒါးဖြင့် အစ်ကိုသာအောင်၏ခါးနောက်ကုန်းကို နှစ်ပိုင်းပိုင်းချလိုက်သည်။ ကံကောင်းထောက်မသည်မှာ ဓါးမှာအလွန်ရှည်သဖြင့် နှုတ်ယူချိန်တွင် နည်းနည်းကြံ့ကြာနီသဖြင့် အကျွန်ုပ်ရို့က မြင်ပြီးလှမ်းအော်လိုက်သောကြောင့်ဖြစ်သည်။ အစ်ကိုသာအောင်မှာ နောက်လှည့်၍ဆင်းနီသဖြင့် သူအားခွတ်သည်ကိုလုံးဝမမြင်။ အကျွန်ုပ်ရို့လှမ်းအော်လိုက်မှ ကြောက်ကြောက်ဖြင့်လန်ချလိုက်ရာ အဖိုးသာဘန်းခြီထောက်အောက်တွင် ပက်လက်လန်ကျလားသည်။ ခွတ်သည့်ဒါးမှာ ပြတ်သည်ကကြောင်း ပြင်းသည်ကတကြောင်း လှီးကားထစ်လုပ်ထားသော ကန်းပိုင်သားတွင် လက်လေးဆစ်ခန့်နစ်ဝင်လားသည်။ နောက်ထပ်ခွတ်ရန် ဒါးကိုနှုတ်သောအခါ နှုတ်မရဖြစ်နီဆိုက် အစ်ကိုသာအောင်ထွက်ပြီးလား၍ အသက်ချမ်းသာရသည်။ သာအောင်ကိုမမှီလိုက်သောအခါ အဖိုးသာဘန်းမှာ ဒေါသဖြင့် အိမ်နောက်ဖေးတွင် စိုက်ထားသော နှပျိုးပင်အားလုံးကို ကုလားနိုင်ဒါးဖြင့်ပိုင်းဖြတ်လိုက်ပြီးမှ အိမ်ပြန်လားသည်။

သာအောင်ဆိုသူမှာလည်း အလွန် အရွှန်ဖြစ်သည်။ အဖိုးဖြတ်ပစ်သောနှပျိုးပိုင်းများကိုယူလျှက် မုန့်တီရောင်းသော အရီးအောင်ကြွဖြူကို တကူးတကမုန်းဟင်းခါးချက်ခိုင်းသည်။ အကျွန်ုပ်ရို့လည်း အစ်ကိုသာအောင်အားဓမ္မခေါ်ကျွေးသဖြင့် စိတ်မပါဘဲလိုက်စားလိုက်ရပါသည်။ နှပျိုးပင်မှာ လတ်လတ်ဆန်းဆန်းဖြစ်၍လားမသိ အလွန်စားကောင်းပါသည်။

ထိုသတင်းကိုကြားသဖြင့် ရွာကဆရာတော်ကြီးဥူးကောဝိဒ ကိုယ်တိုင်ကြွ၍ ထိုကုလားနိုင်ဒါးအား အဘိုးသာဘန်းဘားက အလှုခံလားသည်။ “ကိုယ့်အလှည့်ကျ ကုလားနိုင်ဒါးနှင့်ဆုံးမ။ မသင့်တော်ပါတကာကြီး၊ တရားနှင့်ဖြေပါ” ဟု ဆုံးမသည်။ အဖိုး “ညီညွတ်ရေးသာပန်း” က မှားပါသည်ဟု ၀န်ခံသည်။ ပြီးလျှင် ရှက်ရှက်ဖြင့် သုံးလလခန့် အိမ်တွင်းအိမ်ပြင်လုံးဝမထွက်။ သမီးအထွီးမေမှာ ၀မ်းတလုံးနှင့် အဖ “ညီညွတ်ရေးသာဘန်း” အိမ်တွင်းပုန်းနီဆိုက် အိမ်မှုကိစ္စ၊ စီးပွားရေးအ၀၀ကို ဦးစီးရသည်။ သုံးလလွန်ပြီးမှ အဖိုး “ညီညွတ်ရေးသာပန်း” ဥပုသ်ကထွက်သည်။၊ ဥပုသ်မှာ ရက်ရှည်ဥပုသ်ဖြစ်သဖြင့် ရွာသားတချို့က “သီရိသုဓမ္မရာဇာမင်းကြီး မဟာမုနိမှာ ဥပုသ်စောင့်ရေမနားယေ” ဟု မကြားတကြားပြောသည်။ အဖိုးမှာ အသက်အရွယ်ကြီးရင့်ပြီးဖြစ်သည်ကတကြောင်း၊ စိတ်ဓါတ်ကျသည်ကတကြောင်း စသောအကြောင်းများကြောင့် ယခင် ကန်းကျင်ပင်ကဲ့သို့မတ်စောက်သော သူ့ခန္ဓာကိုယ်ကြီးမှာ ဥပုသ်အထွက် သင်းခွီချပ်ဖြစ်လားသည်။ ရွာဘုန်းကြီးကျောင်းသို့လည်း အယင်ပိုင်ယှောင်မလားလိုက်ပျာ။ “နွားကွဲကျားဆွဲ၊ လေးဝတီညီညွတ်ရေး” တရားကိုလည်း ယောင်လို့တောင်မဟလီယာ။ စကားတိုက်ဆိုင်သောကြောင့် ငယ်ပေါင်းဝါကြီးမ, မအိုဇာအား “ကုလားနိုင်ဒါးကို နှမြှိုးရေ” ဟု ပြောသည်ဟူ၏။ ၄င်းကုလားနိုင်ဒါးမှာ သမိုင်းဝင်ဒါးတချောင်းဖြစ်သဖြင့် သူခိုးမခိုးရအောင် ဆရာတော်ကြီးက မိမိကုတင်အောက်၌ သိမ်းထား၏။ ယခုအခါ အစ်ကိုသာအောင်နှင့် အစ်မအထွီးမေလည်းအိမ်ထောင်ကျလျှက် သားတဦးနှင့် သမီးတဦးထွန်းကားလျှက်ဟိသည်။ အဖိုး “ညီညွတ်ရေးသာပန်း” နှင့် ဆရာတော်ကြီး “ဥူးကောဝိဒ” မှာ ကွယ်လွန်လားပြီးဖြစ်သည်။ သို့သော် “ကိုယ့်အလှည့်ကျ ကုလားနိုင်ဒါးနှင့်ဆုံးမ။” ဆိုသည့်စကားပုံမှာ အကျွန်ုပ်ရို့ရွာ၌ အဖိုး “ညီညွတ်ရေးသာဘန်း” ကိုအကြောင်းပြုပြီး ပြောစမှတ်တင်ကျန်ရစ်ခသည်။

(သာလှဦး)

အချင်းချင်းရာ

အချင်းချင်းရာ
---------------------
ရိုးမမြီကို စွန့်ခွာပြီးကေ
အမျိုးသားရီး ထွန်းပြောင်ညီးဖို့
ရက္ခစိတ်ဓာတ် ရင့်သန်လျှက်
စူးငြောင့်ခလုတ် ကြံ့ကြံ့ခံလို့
တောရောက်တောင်ရောက်
မကြောက်မလန့် ချီတက်ကတ်မည်
အချင်းချင်းရာဝေ --၊၊

ထီးကျိုးစည်ပေါက်
ထီးနန်းပျောက်ကာ
အဖရက္ခ လူမူဘ၀
ချွတ်ခြုံကျပျာ
ဖက်ခွက် မြန်မာ
နယ်ချဲ့လက်အောက်
ကျရောက်သည်မှာ
ရာစု (၂) စု ကျော်ခလီပျာ
အချင်းချင်းရာဝေ --၊၊

ခက်ခဲကြမ်းတမ်း ခရီးလမ်းကို
လျှေက်ချင်သူမှာ ဟိမည်မဟုတ်
ယေကေလည်းသော့
ဘ၀ပီးတူ ကံကျိုးတူ၍..
ဝဋ်ကြီးဝဋ်ငယ် အသွယ်သွယ်နှင့်
အမျိုးဂုဏ်ရောင် ထွန်းလင်းပြောင်ဖို့
နောင်ဘ၀မဟုတ် ဒေဘ၀မှာ
ဆုံးခန်းတိုင်အောင် ရက္ခမာန်နှင့်
လက်တွဲကတ်မည်
အချင်းချင်းရာဝေ --။

သန်းစိုး (စစ်တွေ)

သင်္ကြန်လ ရခိုင်ပြိုင်လောင်းပွဲ

သင်္ကြန်လ ရခိုင်ပြိုင်လောင်းပွဲ
--------------------------------
ရခိုင်ပြည်တွင် သင်္ကြန်လ၌ ရီလောင်းပွဲကိုလည်းကောင်း၊ ကျင်ပွဲ (ခေါ်) လက်ပန်းလုံးပွဲကိုလည်းကောင်း၊ လှီပြိုင်ပွဲ (ခေါ်) ပြိုင်လောင်းပြိုင်ပွဲကိုလည်းကောင်း ရာသီပွဲများအဖြစ်ကျင်းပလေ့ဟိသည်။ ဤဆောင်းပါး၌ ပြိုင်လောင်းပွဲသဘင် ဆင်ယင်ကျင်းပပုံကို တင်ပြလိုပါသည်။

ပြိုင်လောင်းပွဲကို သင်္ကြန်လတွင်ကျင်းပကြောင်း စာဆိုဥက္ကာပျံ ရွှန်းလိုက်ရတု၌

"ရက္ခမှန်ဖူး၊ မြောက်ဦးရွှီပြည်သာ၌
များစွာသည် ရွှီလှီပေါင်း
သိင်္ဂနဒီ နန်းတောင်ဆီဝယ်
ရွှီလှီမင်းဆိပ်ချောင်း၌
တသောင်းသောင်းပျော်စဉ်တွင်
တူစုံရှုကြည့်ချင်သည် သင်္ကြန်အခါတည်းလေ"

ဟု ရွီးဖွဲ့ထားသည်ကိုတွိရသည်သာမက တန်းခိုးဆရာထွန်းကြီးကလည်း -

"လှီပွဲသဘင်၊ ရီထဲတွင်၌ ၊ ပျော်ရွှင်မြူးထူး၊ မင်းလွင်ကျူးလျှက်၊ တန်ခူးခါမှီ၊ လရာသီဝယ်၊ လောကီဘာသာ၊ ဓမ္မတာဖြင့်၊ နာဝါချင်းယှဉ်၊ လောင်းချင်းပြိုင်လျှက်၊ ငါနိုင်သူယှုံး၊ တပြုံးပြုံးနှင့်၊ ဖက်နှုန်းလှီလှော်၊ ရီအပေါ်၌၊ ရွှင်ကာပျော်မွိ၊ လုပ်ကြံမိအောင်၊ လှီဖွဲ့သံချို၊ ဆိုသူတဖြာ၊ လှော်သူတဝ၊ ကသူအပေါင်း၊ တသောင်းသောင်းနှင့်၊ မောင်းတဟီးဟီး၊ ခတ်တီးမညံ၊ အောင်လံဝီဝီ၊ ပြိုင်လှီပြိုင်လောင်း၊ ရီချောင်းမလပ်၊ ပရိသတ်များ၊ ပွဲကြည့်သားရို့"

ဟူ၍ စပ်ဆိုထားခသည်။ ပြိုင်လောင်းပြိုင်ပွဲကို သင်္ကြန် (သို့မဟုတ်) သင်္ကြန်လွန်၍ ကဆုန်ညောင်ရီမသွန်းမှီကာလအတွင်း ကျင်းပရခြင်း၏အကြောင်းမှာ လူထုပွဲလမ်းသဘင်အားဖြင့် လူထုအားလပ်ချိန်ကို ရွီးချယ်ရခြင်းဖြစ်သည်။ လူထုဆိုသည်မှာလည်း တောင်သူလယ်သမားများသာလျှင်ဖြစ်သဖြင့် လယ်သမားအဖို့ တလင်းပွဲစပါးရောင်းပြီးချိန် အားလပ်ချိန်ဖြစ်သည်။ ဤပြိုင်လောင်းပြိုင်ပွဲသည် ဆင်းရဲသားများ၏ပွဲလမ်းသဘင်ဖြစ်ပြီး အများစုပေါင်း၍ အားကြိုးမာန်တက်လုပ်ဆောင်ရသည့် အားကစပ်ပျော်ပွဲရွှင်ပွဲတရပ်လည်းဖြစ်သည်။ စုပေါင်းညီညာ၊ အောင်ကြောင်းဖြာဆိုသည့်ဆောင်ပုဒ်အတိုင်း ညီညွတ်ရေးကိုရှိရှုသော ပွဲလမ်းသဘင်ဖြစ်ပေသည်။

ပြိုင်လောင်းလျာ

ပြိုင်လောင်းပြိုင်ပွဲ ကိုကျင်းပနိုင်ရန်အတွက် "ပြိုင်လှီ၊ ပြိုင်လောင်း" ခေါ်သည့် ပြိုင်ပွဲဝင်မည့် လောင်းကောင်းရဟိရေးမှာ ပထမအရေးအကြီးဆုံးဖြစ်သကဲ့သို့ လောင်းကောင်းရရေးကို ရှိရှု၍ သစ်ပင်ခွတ်လှဲရန် တရပ်လုံးတရွာလုံး အားပီးပါဝင်လေ့ဟိသည်။ သန်သန်မာဟိသော ယောက်ျားများကဦးဆောင်ပြီး တောသုံးတောင် ကုန်အောင်လားကာ သစ်ကောင်းရှာရသည်။ သစ်ရှာမထွက်မှီကပင် ဓလေ့အတိုင်း ဗေဒင်ဆရာနှင့် ရွာကျောင်းဆရာတော်ရို့ သြဝါဒကိုခံယူပြီး ရက်ကောင်းနိသာရွီးချယ်၍ သစ်ခွတ်ရသည်။

လိုက်ပါရသည့်သူများအထဲတွင် ကိုယ်အင်္ဂါချို့တဲ့သော၊ မသန်စွမ်းသူများ မပါဝင်ရ။ အများအားဖြင့် ဆယ့်ခြောက်လံဟိသည့် ပြိုင်လောင်းများကို ပြိုင်ပွဲ၌ အသုံးချလေ့ဟိသဖြင့် အဆမတန် အသက်ကြီးသည့်သစ်ပင်များကို တွိအောင်ရှာရသည်။ သစ်အကြောင်း ကောင်းစွာနားလည်သည့်ဆရာများနှင့်တိုင်ပင်ပြီး အနာအဆာမပါသော သစ်ကိုခွတ်ယူရသည်။ သစ်ပင်ခွတ်ကတည်းက သစ်ပင်လဲပုံကို နိမိတ်ကောင်းယူလေ့ဟိသည်။ သစ်ပင်သည် သစ်ငုတ်နှင့် အနီးကပ်ဆုံးလဲလျှင် လောင်းလှော်၍လားမည့် လောင်းမဖြစ်ဟုယူဆသည်။ သစ်ငုတ်နှင့် ဝီးရာသို့ကျသည့်သစ်ကိုမှ ပိုပြီးနှစ်သက်သည်။ တချို့ရွာများမှ ပြိုင်လောင်းများမှာဆိုလျှင် တောင်တလုံး၊ နှစ်လုံးကိုပင် ကျော်၍လှဲသည်ဟု အဆိုဟိသည်။ ထို့ကြောင့် ပြိုင်လောင်းရှာထွက်ကတည်းက -

"သုံးတောင်ကျော်လို့ လဲလတ်တေ
ထူးကဲလှရေ ထိုနိမိတ်ကြောင့်
မောင်ရို့ပြိုင်လောင်း လှော်ရေခါ
လျှင်မြန်ရာမှာအတုမဟိ
နီလရထားပုံပမာ
ယုဇနာတာ လွန်မြောက်အောင်
တမဟုတ်ချင်း ရောက်နိုင်ရေ
အမှန်ပြောမည် မြင်းသိန္ဓော
တိမ်ညွန့်စားနှင့်နှိုင်းစရာ
သုံးလူ့ဆရာ လောင်းသိဒ္ဓတ်က
လှေးတော်တင်လို့ ပစ်လွှတ်ရာ
မြှားတံပမာ အဟုန်ပြင်း
ဂဠုန်မင်းလည်း မတုနိုင်
ပြိုင်ဖို့လာရေ လှီတော်သားရို့
ဝီးကယှောင်ယှားပါကတ်လီ
ဇာမထီ ဇာနီပြိုင်လောင်း"

ဟူ၍ မိမိရို့ပြိုင်လောင်းသည် သစ်ခွတ်ကတည်းက တောင်သုံးလုံးကျော်၍လဲသည့် သစ်လောင်းလျာကို ပြုလုပ်ထားသောလောင်းဖြစ်သဖြင့် နီလရထားကဲ့သို့ လျှင်မြန်လှသည်ဟု ပြိုင်လောင်းဂုဏ်ပုဒ်ကိုဖော်ကျူးပြီး တဘက်သားမခံချင်အောင် သံကျပ်ကြီးထိုးထားခြင်းဖြစ်သည်။

ပြိုင်လောင်းပုံသဏ္ဍာန်

ရခိုင်ပြည်တွင် ရီလမ်းခရီးများလှသဖြင့် လောင်းလှီကိုအသုံများသကဲ့သို့ ရှိရခိုင်ဘုရင်များလက်ထက်က လှီအမျိုးမျိုးဟိခသည်။ ဘားမဲ့၊ သက္ကဒါန်၊ ဂျွတ်၊ ကရဝိတ်၊ ရိတော်စပ်တင်၊ လှော်ကား ၊ လွန်းကြင်၊ ပြာဿဒ်၊ ဖောင်လှီ၊ ရွှီလောင်း၊ ရွှီမီးကျောင်း၊ ရွှီကြက်၊ ရွှီကျီ၊ ရွှီစာမရီ စသည်ဖြင့်ဖြစ်သည်။

ယခုအများသုံးလောင်းလှီရို့မှာ "ထွင်းလောင်း၊ စပ်လောင်း" ဟူ၍နှစ်မျိုးဟိသည်။ ယင်းရို့ကို အသုံးချသည့်အတိုင်း ပြိုင်လောင်း၊ စီလောင်း၊ လောင်းကြီးလှီကြီးဟူ၍ အမျိုးမျိုးခေါ်သည်။ ပြိုင်လောင်းမှာ ထွင်းလောင်းမျိုးဖြစ်သည်။ ပြိုင်လောင်းမှာ (၆) လံမှ (၁၆) လံထိ အရှည်ဟိသည်။ ဦး၊ ပဲ့၊ ရီစားဟူ၍ အစိတ်အပိုင်းများကို စနစ်ကျအောင်၊ အချိုးကျအောင် လုပ်ရသည်။ လောင်းထွင်းပြီးသောအခါ မီးပွတ်တိုက်၊ ဆီချောတိုက်၊ မိုဟင်းခေါင်းနှင့်တိုက် အစဟိသည့် တန်းဆာဆင်ခြင်းများပြုလုပ်ရသည်။ (၁၆) လံရှည် ပြိုင်လောင်းမှာ ဦးနှင့်ပဲ့ကို တလံလောက်စီ အရှည်ထားရသည်။ ဦးက သပြီအိုးအပြင် နဂါးရုပ်၊ ကိန္နရာရုပ်၊ နယားရုပ်၊ ဟင်္သာရုပ်၊ ပန်းကနုတ်များကို ထုဆစ်တပ်ဆင်ထားသည်။ ဆီးခြယ်သပ္ပါယ်ထားသည်မှာ ကြည့်၍အလွန်လှသည်။ ပဲ့ဆိုလျှင် "မြာဒင်" ခေါ် တက်မခုံကို ကျီး၊ ကျား၊ ငှက်ရုပ်၊ ကြာပန်းရုပ်များဖြင့် မွမ်းမံထားသည်။ တက်မဆိုလျှင် "မြာတံရှည်" ဟုခေါ်သော တက်မကို အသုံးပြုသည်။ လောင်းဝမ်းမှာဆိုလျှင် လောင်းလှော်သားများထိုင်ရန် "ဒဂုံ" တပ်ပြီး "ပင်းကန်'' များကို (၂) လံလောက်တွင် (၃) ခုလောက် တပ်ဆင်ထားရသည်။ လောင်းကို လူအများက ထမ်းချထမ်းတင်ပြုလုပ်ရသည်။ အမျိုးသမီးများကျော်မတက်ရန် စည်းကမ်းသတ်မှတ်ထားသည်။

လောင်းလှော်သားများ

ဆယ့်သျှစ်ယောက်စီးရသည့် (၆) လံ ပြိုင်းလောင်းမှာဆိုလျှင် နောက်ဆုံးက တက်မကိုတဦး၊ တက်မကိုင်ရှိက ပဲ့ထောင်နှစ်ဦး၊ ရှိတွင် ဦးစီဦးပေါက်ခေါ်သည့် ပန်းဆွဲတဦး၊ ဦးစီးနောက်က "လိုင်ဆစ်တောင်ဖျံ" ခေါ်သည့် ဦးထောင်စီးနှစ်ဦး၊ ကျန်ဆယ့်နှစ်ဦးမှာ တပင်းကန်နှစ်ယောက်တတွဲစီ အလှော်သမား (၆) ဆိုင်းထိုင်ရသည်။ (၁၆) လံ ပြိုင်လောင်မှာဆိုလျှင် လူလေးဆယ်ယောက် တက်စီးရသည်။ လောင်းလှော်သားများမှာ အဝတ်ဆင်တူ၊ ဂေါင်းပေါင်းစွန်ထောင်၊ ရင်စည်း၊ စလွယ်သိုင်း၊ ရင်သိုင်းအမျိုးမျိုး ဝတ်ဆင်ရသည်။ လောင်းလှော်သူများသည် ဦးစီးတက်ချသည်ကိုကြည့်၍ တက်ညီအောင်လိုက်လှော်ရသည်။ ဦးစီးလုပ်သူက တက်လှော်သည်ကို ကြီးကြပ်ရသကဲ့သို့ ပဲ့ကိုင်ကလည်း လောင်းတည့်တည့်လာားအောင် တာဝန်ယူရသည်။

ဦးစီးလုပ်သူမှာ အလွန်တော်ဖို့လိုသည်။ ကိုယ့်လောင်းအလားအလာကိုကြည့်ပြီး တက်ချရသည်။ ပြိုင်လောင်းတာအထွက် တက်ကိုရီမြှုပ်ပြီး အရှည်ဆွဲလှော်ခတ်ကာ ပန်းအဝင် တက်ကို သွက်သွက်ယင်ယင်လှော်ရသည်။ တနည်းဆိုလျှင် ပြိုင်လောင်းယင်ဖို့အင်အားမှာ ဦးစီး၏လှုပ်လျှားမှုအပေါ်၌ တည်သည်။ ပြိုင်လောင်းအသျှိန်ယူ၍ တာထွက်လာသည့်အခါ မတိမ်းမစောင်းရန် အရေကြီးသည်။ တာအထွက်တွင် လောင်းဦးစီးလုပ်သူက စောင်းလိုက်မည်ဆိုလျှင် ပြန်၍တည့်အောင်လုပ်ရသဖြင့် အချိန်ကြာတတ်ပြီး နောက်ကျကျန်ရစ်မည်ကို စိုးရိမ်ရသည်။

ပြိုင်လောင်းလှော်၍ အင်တန်အသျှိန်ရလာသည့်အခါ အပြီးမြန်၍မှန်လာသည့်အခါ တက်မကိုင်လုပ်သူက တက်မကို ရီထဲနစ်ရုံလောက်ရာ ချထားလေ့ဟိသည်။ တော်သည့်ကျွမ်းသည့် တက်မကိုင်များဆိုလျှင် တက်မကိုရီပေါ်ဖော်၍ ယူလာတတ်သည်။

ထို့ကြောင့်

"ကိုးစိပ်ကိုးလံ၊ ကိုးပင်းကန်
ကျင်သန်တိရာ တက်ပျာစီးလို့
မဟာလောင်းကြီးထွက်လို့လာ
ဇမ္ဗူဒီပါ လက်ယာကျွန်းမှာ
ထွန်းရေနီလ ပုံပမာ
သတင်းကြေညာ နာမည်ကြီး
ပြိုင်လောင်းဦးစီး "ဆရာအောင်"
သူကရှိဆောင် လမ်းညွှန်ပြလို့
ပြိုင်လောင်းဝမ်းမ ပင်းကန်မှာ
ရှိနောက်ဘယ်ညာ နီရာစိအောင်
လူစိတက်စိ ထိုင်ပြီးသကာ
ဦးစီးဆရာ ချရေတက်နှင့်
မပျက်မကွက် ညီညီညာ
ရီပန်းဖွားအောင် တက်ကိုစွဲလို့
တဟုန်တည်းနှင့် ထွက်လီခါ
ပြိုင်လောင်းပဲ့မှာ "ဆရာထွန်း"က
ရပ်စောက်ထလို့ ရှိကိုမျှော်
သူ့လက်စွဲတော် ထိုတက်မကို
မြာဒင်ထက်က နောင်းနောင်းကိုင်
မယိမ်းမယိုင် လှီမစောင်းအောင်
ဖြောင့်ဖြောင့်တန်းတန်း ကိုင်လို့လာ
ဇာသူတခါ ပြိုင်ဝံ့ဖို့လဲ
အပွဲပွဲ နွှဲလို့လာ ယှုံးရေဆိုစွာ သူရို့မသိ”

ဟူ၍ "ကျင်သန်" ခေါ်လူသန်များစီးသော မဟာလောင်းကြီးမှာ နာမည်ကြီးသည့် ဆရာအောင်က လောင်းဦးစီး၊ ပဲ့ကိုင်မှာ နာမည်ကျော်ဆရာထွန်းဖြစ်သည့်အကြောင်း၊ လူစိတက်စိလှော်လာသည့်ဤမဟာလောင်းကြီးကို ဇာသူပြိုင်ဝံ့ပါမည်နည်းဟု သံကျပ်ထိုးထားခြင်းဖြစ်သည်။

လောင်းပြိုင်ပွဲ ကျင်းပပုံ

ပြိုင်လောင်းပွဲကို ရပ်ရွာအချင်းချင်း (သို့မဟုတ်) မြို့နယ်ခရိုင်အလိုက် ကျင်းပလေ့ဟိသည်။ ရာသီပွဲအဖြစ်သာမက ဘုရားပွဲ၊ မင်းပွဲစိုးပွဲများနှင့်တွဲဖက်၍လည်း ကျင်းပသည်။ ပြိုင်ပွဲဝင်မည်ဆိုလျှင် မပြိုင်ခင်ကပင် ရွာသျှင်မ၊ ချောင်းသျှင်မများကို လောင်းဦးခိုက်ပြီး အတီးအမှုတ်၊ အဆိုအကများဖြင့် ပ,သပူဇော်လေ့ဟိသည်။ လောင်းပြိုင်ပွဲကို ချောင်းများ၌ ကျင်းပလေ့ဟိပြီး ဖျားရီကမ်းနဖူးပြည့်နီသော လဆန်းစ၊ လဆုတ်စအခါများ၌ ကျင်းပသည်။

လောင်းပြိုင်ပွဲကို ဖြားတလတ်ထောက်တက်သော မိုးထက်သား (၁၀) ချက်တီး၊ (၁၁) ချက်တီးလောက်ကအစပြုပြီး ဖြားကျချိန် ညဇာ (၃-၄) ချက်တီးခန့်လောက်တွင် အဆုံးသတ်သည်။ ပွဲကို (၃) ရက်အထိ ကျင်းပသည်။ နိုင်သူအား နောက်ဆုံးနိမှာ ရွှေလောင်းနှင့် အောင်ဆုအောင်လံကို ချီးမြှင့်သည်။ ရပ်ရွာလူကြီးများကို ဒိုင်လူကြီးများအဖြစ် ရွီးချယ်တင်မြှောက်လေ့ဟိသည်။ အငြင်းမပွားရအောင် အရပ်ရပ်ကပြိုင်လာသည့် လောင်းဦးစီးများစုပေါင်းဆွေးနွေးပြီး စီစဉ်ရသည်။ ဆုံးဖြတ်ရသည်။

ပြိုင်လောင်းပြိုင်ပွဲအတွက် တာအထွက်အစကကပင် အဆုံးပန်းဖူးတိုင်အကွာအဝီးကို သတ်မှတ်ထားရသည်။ ပြိုင်သည့်အခါ ရိုးရာဓလေ့အတိုင်းဆိုလျှင် တာအညီထွက်နိုင်ရန် သံတုံးကို စင်မြင့်က ကြိုးနှင့်ဆွဲပြီး ရီကိုချ၍ အချက်ပီးရသည်။ ယခုအခါ ခေတ်အလျှောက် သေနတ်ပစ်ဖောက်သည်။ ပန်းဖူးအဝင်မှာလည်း အနိုင်အယှုံးကို စက်ဖြတ်ပန်းဆွဲနည်းဖြင့် ဆုံးဖြတ်လေ့ဟိသည်။

စက်ဖြတ်နည်းမှာ လောင်းဦးကဓားကိုစိုက်ထားလျှက် ပန်းဖူးက တားထားသည့်ကြိုးကို အလိုအလျောက်ဖြတ်လားသည်နှင့်တပြိုင်နက် ပန်းဖူးမှာညွတ်ကျလာပါသည်။ ပန်းဆွဲမှာ ဝါးလုံးကိုဖောက်ပြီး ကြိမ်နွယ်တခုခုထိုးသွင်းထားသည်။ ယင်းကို ဦးစီးပန်းဆွဲအစ လောင်းသမားရို့အထိ ဆွဲယူရပါသည်။ ဤသို့ ပန်းဖူးကိုစီစဉ်ထားပြီး အနိုင်အယှုံးဆုံးဖြတ်သည်။

ပြိုင်လောင်းသံကျပ်ကြီး
-------------------------------
ပြိုင်လောင်းနိမှာ ချောင်းကမ်းပါးတဘက်တချက်တွင် ရပ်ရွာအလိုက် မဏ္ဍပ်များထိုးပြီး ဧည့်ခံကျွေးမွီးသည်။ ကမ်းထောင်းအပြည့် ပရိသတ် စည်ကားလှသည်။ မိမိရို့ရပ်ရွာ၌ ရှိသမျှလောင်းလှီများနှင့် ချောင်းရိုးတလျှောက် ပြည့်ကျပ်နီအောင် ပွဲကြည့်ပရိသတ် များပြားလှသည်။ တချို့မှာ နပျိုးပင်များကိုဖောင်လုပ်၍ ကြည့်တတ်သည်။

လောင်းပြိုင်ပွဲမစမှီ ကိုယ့်ရွာကိုယ့်လောင်းဂုဏ်ပုဒ်ကိုဖော်ထုတ်၍ သံကျပ်ကြီးများ ထိုးလေ့ဟိသည်။ အိုးစည်ဗုံမောင်းတီးမှုတ်ပြီး သံကျပ်ကြီးများထိုးသည်မှာ အလွန်သာယာနာပျော်ဖွယ်ကောင်းသည်။ သံကျပ်ကြီးများကို "ပြိုင်လောင်း သံကျပ်ကြီးများ" ဟု ခေါ်တွင်လာလတ်သည်။ ပြိုင်လောင်းပွဲများမှာ သံကျပ်ကြီးများပေါ်ပေါက်လာသည့် အောက်ခြီရီသောက်မြစ်များဖြစ်သည်ဟု ယူဆရသည်။

ပြိုင်လောင်းမပြိုင်မှီ "လှီစိုင်း" လည်းပြုသည်။ မြင်းစိုင်းသည့်သဘော ကမ်းထောင်းတလျှောက် သံကျပ်ကြီးများထိုးကာ အသာအညင် လူးလာခေါက်ပြန် ကခုန်တီးမှုတ် လှော်ခတ်လားကတ်သည်မှာ ပျော်စရာပကတိဖြစ်သည်။ နားထောင်၍ စိတ်ကြွစီသည်။ လောင်းသမားအချင်းချင်း မိမိဂုဏ်ပုဒ်ဖော်၍ သံကျပ်ထိုးသည်များကို အနည်းငယ်ဖော်ပြပြီးဖြစ်သည်။ သံကျပ်ကို ပြိုင်လောင်းသမားအချင်းချင်း ထိုးသည်သာမဟုတ်၊ ပွဲကြည့်ပရိသတ်ကိုပါ စောင်းချိတ်ထိုးလေ့ဟိသည်။

''ဂေါင်းပေါင်းထီထီး ဘကြီးလေ
ကျန်းခန့်သာ မာပါယင့်လား
မိတ္တာဟိလို့ မီးစွာရာ
စိတ်ဆိုးမာန်ပါ မဟိပါကဲ့။

နှခွမ်းဗက်လန် ကန်တော်ကြီးနှင့်
ပြိုင်လောင်းကြည့်ဖို့ လာလတ်တေ
မောင်ရို့လှော်မည် အားမငယ်ကဲ့။

ပြိုင်လောင်းလှော်လို့ လက်မောင်းနာ
တချက်ဖျစ်ပါ အိုမမရို့။

မက္ကလာကို ဂေါင်းမှာဆောင်း
ကမ်းထောင်းထက်က အရီးလေ
သမက်လောင်းချေ နိုင်စီကြောင်းကို
ဆုမွန်တောင်းဖို့ ကောင်းပါရေ။

ကညာပျိုချေ အိုမမရို့
ကမ်းထောင်းထက်က လူးကျမည်
စေတနာနှင့် ပြောခပါယင့်။ ” စသည်ဖြင့်ဖြစ်သည်။

လက်လံအလိုက် ယှဉ်ပြိုင်ရေးအစီအစဉ်များကို လူကြီးများက စီစဉ်ပီးရသည်။ အနိုင်ရသည့် ပြိုင်လောင်းများကို နောက်ဆုံးနိ၌ ရွှေမောင်းငွေမောင်းများနှင့် အောင်ဆုအောင်လံ ချီးမြှင့်သည်။ နောက်ဆုံး ဆုရသည့်ပြိုင်လောင်းဦးစီးက ရွှေမောင်းကိုဆွဲ၍ လှီတော်သားများက အောင်လံကိုင်ပြီး ချောင်းရိုးတလျှောက်စုံဆန်စိုင်းလျှက် ကခုန်တီးမှုတ်သီဆိုကာ ပရိသတ်အားနှုတ်ဆက်လေ့ဟိသည်။

လူထုပွဲလမ်းသဘင် လယ်သမားလုပ်သားများ၏ ပွဲလမ်းသဘင်၊ စုပေါင်းညီညွတ်လုပ်ဆောင်မှ အောင်သည့် ပွဲလမ်းသဘင်ဖြစ်သည်။ ရခိုင်ပြိုင်လောင်းပြိုင်ပွဲကို ရိုးရာမပျက် အစဉ်အမြဲကျင်းပနိုင်စီရန် တောင့်တမျှော်လင့်ကာဖြင့် နိဂုံးချုပ်လိုက်ပါသည်။

(အစံမောင်)

ရခိုင်စာလုံးပေါင်းတည်ငြိမ်ရေး

ရခိုင်စာလုံးပေါင်းတည်ငြိမ်ရေး၊ (ဖြစ်သင့်) (မဖြစ်သင့်) (ပြောင်းသင့်) (မပြောင်းသင့်) ရခိုင်စကားလုံးများ
-----------------------------------------------------------------------------------------

အကျွန်ုပ်ရို့ ရခိုင်လူမျိုးတွင် ရခိုင်ဘာသာစကားသီးခြားဟိ၏။ စာပီတွင် ခေတ်အလျှောက် အမျိုးမျိုးပြောင်းလဲမှု အနည်းနှင့်အများ ဟိနိုင်သော်လည်း၊ ရခိုင်ဘာသာစကားမှာ အေနိထိ အခိုင်အမာဟိသိမ့်၏။ မိမိ၏ဘာသာစကားကို ထိန်းသိမ်းရကောင်းမှန်းမသိဘဲ ဘာသာစကားစည်းဖောက်နီကတ်သော ရခိုင်တချို့ဟိစီကာမူ ကိုယ့်ရခိုင်ဘာသာစကားမပျက်ရအောင် ထိန်းသိမ်းစောင့်ယှောက်နီသော ရခိုင်အများအပြားလည်းဟိ၏။ ထိန်းသိမ်းစောင့်ယှောက်ရာတွင် နည်းလမ်း (နှစ်မျိုးနှစ်စား) ဟိ၏။ (ပြောဆိုမှု) နည်းလမ်းနှင့် (ရွီးသားမှု) နည်းလမ်းဖြစ်၏။

စာရွီးသားမှုအလေ့အလာမဟိသူများအဖို့  ပြောဆိုမှုနည်းလမ်းကို သုံးနိုင်၏။ စကားပြောဆိုရာတွင် မိမိရို့ရခိုင်လူမျိုးအချင်းချင်းပြောဆိုရာ၌ ကိုယ့်ရခိုင်စကားကိုရာ ပြောဆိုသုံးနှုန်းခြင်းဖြင့်လည်းကောင်း၊ မိသားစုအတွင်း သားသမီး မြီးမြစ်များ မိမိရို့အိမ်အသီးသီးတွင် ကိုယ့်ရခိုင်ဘာသာစကားကိုရာ ပြောဆိုသုံးနှုန်းစီပြီး မျိုးရိုးစိုင်ဆက် လက်ဆင့်ကမ်းခြင်းဖြင့်လည်းကောင်း ထိန်းသိမ်းအပ်ပေ၏။

အင်္ဂလိပ်နှင့်တွိလျှင် အင်္ဂလိပ်စကား၊ မြန်မာနှင့်တွိလျှင် မြန်မာစကားပြောသည်မှာ အရေးမဟုတ်သော်လည်း မိမိရို့ရခိုင်အချင်းချင်းတွိလျှင် ရခိုင်စကားကိုရာ ပြောဆိုရန်ကား အရေးဟုတ်လှချေ၏။ ယင်းကြောင့် အထူးသဖြင့် မြန်မာပြည်ရောက် ရခိုင်လူမျိုးများအဖို့ ဆောင်ပုဒ်တစ်ခုပင် ဖြစ်လာနီချေပြီ။ ယင်းဆောင်ပုဒ်ကား " ရခိုင်လူမျိုးအချင်းချင်း ရခိုင်စကားပြောခြင်းဖြင့် ဂုဏ်ယူပါ " ဟူ၍ဖြစ်၏။

ဤပြောဆိုမှုနည်းလမ်းဖြင့် ထိန်းသိမ်းသည့်အပြင် ရခိုင်အမျိုးသားစာရွီးဆရာများက မိမိရို့ ရခိုင်ဘာသာစကား မပျောက်ကွယ်ရေးအတွက် ဒေနိ ရခိုင်စကားပြောကိုအခြီခံသည့် ရခိုင်စာပီသစ်ကိုရွီးသားယင်း ထိန်းသိမ်းနီကတ်၏။ ရွီးသားမှုနည်းလမ်းဖြင့် ထိန်းသိမ်းနီကတ်ခြင်းဖြစ်၏။ ရခိုင်ဘာသာစကားနှင့် ရခိုင်စာပီအတွက် အရေးပါလှ၏။
သို့ရာတွင် ယင်းသို့ ရခိုင်စကားပြောကိုအခြီပြုပြီး ရခိုင်စာပီသစ်ကိုရွီးသားရာ၌ စာလုံးပေါင်းများမတည်ငြိမ်၊ မညီညွတ်ဖြစ်နီသည်ကတော့ အများအပြားဖြစ်ပေါ်လျှက်ဟိ၏။ တယောက်တည်းရွီးသောဆောင်းပါးတပုဒ်နှင့်ပင် စာလုံးပေါင်းများ ရှိနောက်ကွဲလွဲနီသိမ့်၏။ မမှားသင့်သောစာလုံးပေါင်းများပင် မှားယွင်းနီ၏။ အယ်ဒီတာများအဖို့ အယ်ဒီတာပီသစွာ တာဝန်ယူတည်းဖြတ်ရန် လိုအပ်နီပေ၏။ (အမုန်းမခံလို၊ ပဋိပက္ခမပွားလို) ၍ အမှန်အကန်မတည်းဖြတ်လျှင် အယ်ဒီတာမဟုတ်တော့ချေ။ မဂ္ဂဇင်းအယ်ဒီတာစာရင်းတွင်ပါဝင်ပြီး (ငါအယ်ဒီတာ) ဟု နာမည်ခံကောင်းရုံမျှဖြစ်ပြီး၊ ရခိုင်စာလုံးပေါင်းနှင့် ရခိုင်စာပီတည်ငြိမ်တိုးတက်ရေးကို ဖြစ်ပေါ်စီနိုင်မည်မဟုတ်ပေ။

လောလောဆယ် ရခိုင်စာပီသစ်ပဏာမကာလတွင် စာလုံးပေါင်းမတည်မငြိမ်ဖြစ်နီသိမ့်သည်မှာ သဘာဝတော့ကျ၏။ သို့သော် ဤပဏာမကာလသည် နှစ်ပေါင်းများစွာ ကြန့်ကြာနီသင့်သည်တော့မဟုတ်။ ဤပဏာမကာလ၌ အချင်းချင်းလုံးထွီးပတ်လည်လိုက်နီရန်လည်း မသင့်။ ဤပဏာမကာလကို ကျော်လွန်ပြီး မတည်ငြိမ်မှုကို တည်ငြိမ်မှုဖြင့် အစားထိုးနိုင်ရပေမည်။ အမှန်စင်စစ် စာလုံးပေါင်းသတ်ပုံတည်ငြိမ်ညီညွတ်လာကြပြီးမှ ရခိုင်စာပီ ခန့်ငြားလာပေမည်။
သို့ဖြစ်ရာ ရခိုင်စာလုံးပေါင်းတည်ငြိမ်ပြီး၊ ရခိုင်စာပီတိုးတက်ရေးအတွက် ရခိုင်စာရွီးဆရာများနှင့် အယ်ဒီတာများသည် တက်ညီလက်ညီလှော်ခတ်လားသင့်၏။ ရခိုင်စာလုံးပေါင်းတည်ငြိမ်ရေး၊ ရခိုင်စာပီတိုးတက်ခန့်ငြားလာစီရေးအတွက် ပုဂ္ဂိုလ်ရေးမဖက်ဘဲ ရိုးသားသောစေတနာဖြင့် အကျွန်ုပ် ဤသို့ အကြံပြုလိုပါ၏။ တယူသန်မာနမထားဘဲ တွေးဆ၊ လက်ခံကျင့်သုံးနိုင်ရန်လည်း မျှော်လင့်ပါ၏။


၁။ တည်ငြိမ်ပြီးသား စာလုံးပေါင်းနှင့် အများလက်ခံပြီးသား စာလုံးပေါင်းကို ယင်းအတိုင်းပင် စာလုံးပေါင်းပါ။

ဥပမာ -
ငါကား ( ငါဂါး ) မဖြစ်သင့်။
သူက ( သူဂ ) မဖြစ်သင့်။
သူ့ကို (သူ့ဂို) မဖြစ်သင့်။
လာကတ် ( လာဂတ်၊ လာကပ် ) မဖြစ်သင့်။
ကဗျာ ( ကပျာ ) မဖြစ်သင့်။
မြင်လာရေ ( မြင်လှာရေ ) မဖြစ်သင့်။
ငါ့မှာ ( ငါ့မာ ) မဖြစ်သင့်။

မှတ်ချက်။ ။ (မှာ) သည် တည်ငြိမ်ပြီးသားဖြစ်၏။

သိရေလတ် ( သိရေလပ်၊ သိရေလှပ်၊ သိရေဟတ် ) မဖြစ်သင့်။

နန့် ( နင့်၊ နာင့်၊ န) မဖြစ်သင့်။
***ဤနီရာတွင် စာလုံးပေါင်းသတ်ပုံတည်ငြိမ်ရေးအတွက် (နန့်) သည် အသင့်တော်ဆုံးဟု ယူဆရသည်။ (နှင့်) ကို စာကြီးပီကြီးနှင့် စကားပြင်အရွီးအသားတွင်သုံး၍ (နန့်) ကို စကားပြောအရွီးအသားတွင် သုံးသင့်သည်။ (နာင့်) မှာ (နှင့်) နှင့်အသံထွက်အတူတူဖြစ်၍ (နာင့်) အစား (နှင့်) ဆိုလျှင် ပြီးပြည့်စုံသည်ဟူယူဆရသည်။ အဆိုးရွားဆုံးမှာ (နှင့်၊ နန့်) အစား မြန်မာ (နဲ့) ကို သုံးစွဲမှုများပြားလာခြင်းဖြစ်သည်။ ရခိုင်မှာ အငြင်းပွားစရာဖြစ်၍ မတည်ငြိမ်သည်ကို တည်ငြိမ်လာအောင် ကြိုးစားအားထုတ်မှုမပြုလုပ်ဘဲ (မြန်မာကို စံထားသုံးမည်) ဟူသောအယူအဆမှာ တောင်ကျော်အတွေးအခေါ်ဖြစ်သည်။ ပိုဆိုးသည်တခုမှာ အချေသူငယ်များအတွက် ရခိုင်သင်ပုန်ကြီးဖတ်စာပြုစုနီသော ရခိုင်ပညာသျှင်တဦးက (န) ကို စံထားသုံးလာသည်ကိုတွိရသည်။ ဥပမာ။ ။ မောင်လှ န မောင်ဖြူ။ ခွီးချေ န ကြောင်ချေ။ ကျားချေ န နွားချေ။ အချေသူငယ်များ စကားမပီကလာ ပီကလာပြောနီသည်နှင့်တူသည်။။ (န) ကို မူရင်း၌မပါ။ သို့သော် အဓိပ္ပါယ်ကွဲလွဲမှုမဟိ၍ ဖြည့်စွက်ထည့်သွင်းထားခြင်းဖြစ်သည်။ မူရင်းစာရွီးသူ ဤဆောင်းပါးအားရွီးသားချိန်၌ ထိုကျောင်းသုံးစာအုပ်မပြုစုရသိမ့်ဟု ယူဆရသည်။ ထို့ကြောင့် ဆောင်းပါးထဲ၌ ထည့်သွင်းမဖော်ပြခြင်းဖြစ်လိမ့်မည်။ (အယ်ဒီတာမှတ်ချက်)

လာလတ်နန်း ( လာလတ်နမ်း၊) မဖြစ်သင့်။

(လာလတ်နန်း ၊ လာလတ်နှောင်း)
***ဤနီရာတွင် (လာလတ်နှောင်း) သုံးလျှင်လည်း ပြဿာနာမဟိဟု ယူဆရသည်။ ပဇာကြောင့်ဆိုသော် တချို့အရပ်တွင် (နှောင်း) အသုံးဟိသောကြောင့်ဖြစ်သည်။ (မဖြစ်သင့်) ဟု တိုက်ရိုက်မဆိုသင့်။ မူရင်းတွင် လာလတ်နန်း ( လာလတ်နမ်း ၊ လာလတ်နှောင်း) မဖြစ်သင့်ဟုဆိုသည်။ (အယ်ဒီတာမှတ်ချက်)

အေချင့် ( ဧယှင့်၊ ဧသျှင့် ) မဖြစ်သင့်။

(ဒေချင့်၊ ဒေဟင့် )
***ဤနီရာတွင် (ဒေချင့်၊ ဒေဟင့်) နှစ်ခုစလုံးသုံးလျှင်သင့်တော်သည်ဟု ယူဆရသည်။ တချို့အရပ်တွင် (ဟင့်) ဟု သုံးသောကြောင့်ဖြစ်သည်။ မူရင်းတွင် (ဒေဟင့်) မဖြစ်သင့်ဟုဆိုသည်။ (အယ်ဒီတာမှတ်ချက်)

ရွှီလောင်ပွန်း ( သျွေလောင်ပွန်း ) မဖြစ်သင့်။
ရွှီ ( သတ်ပုံမှန် ) ကို အသံမှန်ထွက်ရန်သာ ကြိုးစားသင့်၏။
ငါ့စွာ ( ငါ့စော် ) မဖြစ်သင့်။

စားပျာယ် ( စားဗျလ်၊ စားဗျယ် ) မဖြစ်သင့်။
***ဤနီရာတွင် (စားပျာယ်) ရာဖြစ်သင့်သည်။ ပဇာကြောင့်ဆိုသော် (ပ) သည် ပင်ရင်းသံဖြစ်သောကြောင့်ဖြစ်သည်။ (ပ) ပင်ရင်းသံမှ (ဗ) သံပြောင်းထွက်နိုင်သည်။ (က၊ စ၊ တ၊ ပ) သံတိုသပြတ်အသတ်နောက်ကပါလာသော (ကြိယာနောက်ဆက်တွဲ) အားလုံးသည် (ပျာ၊ ပျာယ်) ဟူ၍ ပင်ရင်းသံ အသံထွက်သည်။ (င၊ ည၊ န၊ မ၊ ယ) သံရှည်သံပွားအသတ်နောက်မှပါလာသော (ကြိယာ) များ၊ (အ၊ အိ၊ အု၊ အေ၊ အဲ၊ အော၊ အံ၊ အို) သရများနှင့် ယင်း၏ဆင့်ပွားများနောက်က ပါလာသော (ကြိယာနောက်ဆက်တွဲ) အားလုံးသည် (ဗျာ) သို့မဟုတ် (ဗျာယ်) ဟူ၍ အသံထွက်သောကြောင့်ဖြစ်သည်။ နှစ်နီရာ နှစ်သံထွက်သဖြင့် မည်သည့်စကားလုံးကို စံထားသင့်သည်ဆိုသော် ပင်ရင်းသံဖြစ်သော (ပ) အက္ခရာကိုရာ စံထားရမည်ဖြစ်သည်။ ပဇာကြောင့်ဆိုသော် (သောက်ဗျာ၊ အိပ်ဗျာ) ဟု ရွီးလျှင် (သောက်ပျာ၊ အိပ်ပျာ) ဟု အသံပြောင်းလဲမဖတ်နိုင်သောကြောင့်ဖြစ်သည်။ မူရင်းတွင် စားဗျယ် ( စားဗျလ်၊ စားပျယ် ) မဖြစ်သင့်ဟု ဆိုသည်။ (အယ်ဒီတာမှတ်ချက်)


အိပ်ပနာ ( အိပ်ဗနာ၊ အိပ်ပဏာ ) မဖြစ်သင့်။
ငါ၏ ( ငါအဲ့၊ ငါယဲ့၊ ငါအယ့် ) မဖြစ်သင့်။

၂။ ရခိုင်စကားကို အမှန်အကန်ကိုယ်စားပြုပြီး စာလုံးပေါင်းပါ။

ဥပမာ -

စာရွီးရေ ( စာရီးရေ ) မဖြစ်သင့်။ (စာရီးရေ) လို့ မပြောပါ။
ရွီတွက်၊ ရွီရေ ( ရီတွက်၊ ရီရေ ) မဖြစ်သင့်။ ဤသို့ မပြောပါ။

မသီးသိမ့် ( မသီးသီး၊ မသီးသိ ) မဖြစ်သင့်။
***ဤနီရာတွင် (သိမ့်) ၀ိဘတ်နှင့် (သိ) ကြိယာကို ခွဲခြားထားသင့်သည်။ မူရင်းတွင် မသီးသိ ( မသီးသီး၊ မသီးသိမ့်) မဖြစ်သင့်ဟု ဆိုသည်။ (အယ်ဒီတာမှတ်ချက်)

မြင်လာရေ ( မြင်လှာရေ ) မဖြစ်သင့်။ (မြင်လှာရေ) လို့ မပြောပါ။
ကြပ်ကြပ်မတ်မတ် ( ကျပ်ကျပ်မတ်မတ် ) မဖြစ်သင့်။

၃။ ရခိုင်စကားကို အမှန်အကန်ကိုယ်စားပြုနိုင်အောင် တချို့စာလုံးပေါင်းများကို သင့်တော်သလိုပြောင်းလဲပါ။

ဥပမာ -
ကျည်တောက် ( ကျိုင်တောက် ) ( ပြောင်းသင့် )
ကျည်ပွေ့  ( ကျမွိ ) (ပြောင်းသင့် )
ကျဉ်းမြောင်း ( ကျိုင်းမြောင်း ) ( ပြောင်းသင့် )
ကျွမ်းစိုက် ( ဂျွမ်းစိုက် ) ( ပြောင်းသင့် )
ခေါင်းခဲရေ ( ဂေါင်းခဲရေ ) ( ပြောင်းသင့် )
ခေါင်းဆောင် ( ဂေါင်းဆောင် ) ( ပြောင်းသင့် )
အဘ ( အဖ ) ( ပြောင်းသင့် )
အဘိုး ( အဖိုး ) ( ပြောင်းသင့် )
ရင်ဘတ် ( ရင်ဖတ် ) ( ပြောင်းသင့် )
စနီထောင့်( စနီဒေါင့် ) ( ပြောင်းသင့် )
တုတ်( ဒုတ် ) ( ပြောင်းသင့် )
အာရှ ( အာသျှ ) ( ပြောင်းသင့် )
ရှစ်သောင်း ( သျှစ်သောင်း ) ( ပြောင်းသင့် )
မောင်ရှင် ( မောင်သျှင် ) ( ပြောင်းသင့် )
အရှင်ဘုရား ( အသျှင်ဘုရား ) ( ပြောင်းသင့် )
မောင်ရှင် ( မောင်သျှင် ) ( ပြောင်းသင့် )
ကျေးဇူးရှင် ( ကျေးဇူးသျှင် ) ( ပြောင်းသင့် )
ဆုံးရှုံး၊ ရှင်းလင်း ( ဆုံးယှုံး၊ ယှင်းလင်း ) ( ပြောင်းသင့် )
သန့် ရှင်း၊ ရှောင်ကြဉ် ( သန့် ယှင်း၊ ယှောင်ကြည် ) ( ပြောင်းသင့် )
ရှမ်းပြည် ( သျှမ်းပြည် ) ( ပြောင်းသင့် )

မီးရှိန် ( မီးသျှိန် ) ( ပြောင်းသင့် )
***ဤနီရာတွင် (မီးသျှိန်) က ပိုသင့်တော်သည်ဟု ယူဆသည်။ မူရင်းတွင် (မီးယှိန်) ဖြစ်သည်။ (အယ်ဒီတာမှတ်ချက်)

လှုပ်ရှား ( လှုပ်လျှား ) (ပြောင်းသင့်)
***ဤနီရာတွင် (လှုပ်လျှား) က ပိုသင့်တော်သည်ဟု ယူဆရသည်။ မူရင်းတွင် (လှုပ်ရှား) ဖြစ်သည်။ (အယ်ဒီတာမှတ်ချက်)


သို့ သော် (ထင်ရှား) တွင် (ရှား) မှာ ရခိုင်သံသီးခြားဟိ၍ ပြောင်းရန်မလိုပါ။

ရှူရှိုက် ( လျှူလျှိုက် ) ( ပြောင်းသင့် )
***ဤနီရာတွင် (လျှူလျှိုက်) က ပိုသင့်တော်သည်ဟု ယူဆသည်။ မူရင်းတွင် ( ယှူယှိုက် ) ဖြစ်သည်။ (အယ်ဒီတာမှတ်ချက်)


သို့ သော် (ကြည့်ရှု) ဆိုရာတွင် (ရှု) မှာ ရခိုင်သံသီးခြားဟိ၍ ပြောင်းရန်မလိုပါ။


၎။ ရခိုင်စကားကို ကိုယ်စားပြုသင့်သည်ဆိုသော်လည်း စကားသံအစွန်းရောက်မှုကို ယှောင်ကြည်ပါ။

သူက ( သူဂ ) မဖြစ်သင့်။
သိကေ ( သိဂေ ) မဖြစ်သင့်။

မလာကဲ့ ( မလာဂေ့ ) မဖြစ်သင့်။
***ဤနီရာတွင် (မလာကဲ့၊ မလာကဲ့) နှစ်ခုစလုံးသုံးလျှင်ဖြစ်သည်။ (အယ်ဒီတာမှတ်ချက်)

လာကတ် ( လာဂတ် ) မဖြစ်သင့်။
လားလီကတ်ဖိ ( လလိဂတ်ဖိ ) မဖြစ်သင့်။
စားပြန်ရေ၊ ကျိုင်ပြတ် ( စားဗြန်ရေ၊ ကျိုင်ဗြတ် ) မဖြစ်သင့်။
ကောင်းကောင်း ( ကကောင်း ) မဖြစ်သင့်။
နောင်းနောင်း ( နနောင်း ) မဖြစ်သင့်။
သင့်သင့်တင့်တင့် ( သသင့်တတင့် ) မဖြစ်သင့်။
ပြုံးပြုံးချေ ( ပပြုံးချေ ) မဖြစ်သင့်။
တက်လားခရေ ( တက်လခရေ ) မဖြစ်သင့်။
လုပ်ပစ်လိုက်တေ ( လုပ်ပလိုက်တေ ) မဖြစ်သင့်။
ယေကေ၊ ယေဇူးနန့်  ( ယကေ၊ ယဇူးနန့်  ) မဖြစ်သင့်။
ယင်းချင့်၊ ယင်းပိုင် ( ယချင့်၊ ယပိုင် ) မဖြစ်သင့်။
ငါ့ပါးကို ( ငါ့ဗားကို၊ ငါ့ဘားကို၊ ငါ့ဘက်ကို ) မဖြစ်သင့်။
အဂေါင့် ( အဂင့် ) မဖြစ်သင့်။
ခေတ်သစ် ( ခိုက်သစ် ) မဖြစ်သင့်။

တေတ္တာ ( တစ်တာ၊ သိုက်တာ ) မဖြစ်သင့်။
***ဤနီရာတွင် (တေတ္တာ) ဟုသုံးလျှင် ပိုသင့်တော်မည်ဟု ယူဆရသည်။ မူရင်းတွင် (သေတ္တာ) ဖြစ်သည်။ ရခိုင်က (တေတ္တာ) ဟုပြော၍ မြန်မာက (သေတ္တာ) ဟု သုံးသောကြောင့်ဖြစ်သည်။ (အယ်ဒီတာမှတ်ချက်)

ခါးတောင်းကျိုက် ( ခဒေါင်းကျိတ် ) မဖြစ်သင့်။
ခါးကြိုး ( ခကြိုး ) မဖြစ်သင့်။
ခါးစောင်း ( ခဇောင်း ) မဖြစ်သင့်။
နီရာ၊ နားရွက် ( နရာ၊ နရွက် ) မဖြစ်သင့်။
နှာခေါင်း၊ နားတောင်း ( နခေါင်း၊ နတောင်း ) မဖြစ်သင့်။
ငါရို့ ၊ အတူတူ ( ငရို့ ၊ အတူဒူ ) မဖြစ်သင့်။
စိကေ၊ ပါးစ ( စကေ၊ ပစ၊ ပါးစပ် ) မဖြစ်သင့်။
ကစပ် (ကဇပ်) (မဖြစ်သင့်)။
စားခီ၊ ဇီးယို ( စစီ၊ ဇယို ) မဖြစ်သင့်။
ပုစွန်၊ ပုဝါ ( ပဇွန်၊ ပဝါ ) မဖြစ်သင့်။

(ဇာတီ၊ စာတီ)
***ဤနီရာတွင် (ဇာတီ၊ စာတီ) နှစ်မျိုးလုံးလျှင်ဖြစ်သည်ဟု ယူဆရသည်။ မူရင်းတွင် စာတီ (ဇာတီ) မဖြစ်သင့်ဟူ၍ဖြစ်သည်။ (အယ်ဒီတာမှတ်ချက်)

အားရပါးရ ( အားရဗရ ) မဖြစ်သင့်။
မင်းကိုတော့ခါ ( မင်းကိုဒေါ့ခါ ) မဖြစ်သင့်။
ဇာနှစ်နှစ်လဲ ( ဇာနှနှစ်လဲ ) မဖြစ်သင့်။
ဇာမဟုတ်စွာ ( ဇာမဟောက်စွာ ) မဖြစ်သင့်။
ဖားပြုတ် ( ဖပြုတ် ) မဖြစ်သင့်။
ပြောင်းပြန် ( ဗြောင်းဗြန် ) မဖြစ်သင့်။
မသိကာ ( မသိဂါ ) မဖြစ်သင့်။
စွဲစွဲမြဲမြဲ ( စဇွဲမမြဲ ) မဖြစ်သင့်။

၅။ နာသိကသံ၌ သတ်ပုံမှန်ကြပါ။

စနီနိ ( စနိန်နိန့်  ) မဖြစ်သင့်။
ရွီးနီရေ ( ရွီးနိန်ရေ ) မဖြစ်သင့်။
နီရာ ( နိန်ရာ ) မဖြစ်သင့်။
နိဒါန်း ( နိန့် ဒါန်း ) မဖြစ်သင့်။
ညီညွတ် ( ညိန်ညွတ် ) မဖြစ်သင့်။
အောက်မိရေ ( အောက်မိမ့်ရေ ) မဖြစ်သင့်။
အနီအထား ( အနိန်အထား ) မဖြစ်သင့်။
မီးမြန်း ( မိန်းမြန်း ) မဖြစ်သင့်။
အမိ၊ အမှီ ( အမိန့် ၊ အမှိန် ) မဖြစ်သင့်။

ခေတ်မှီ (ခေတ်မီ) မဖြစ်သင့်။
***ဤနီရာတွင် အပိုလှောက်ထည့်ထားခြင်းဖြစ်သည်။ (အယ်ဒီတာမှတ်ချက်)

မွီးရာပါ၊ မြီပြင် ( မွိန်းရာပါ၊ မြိန်ပြင် ) မဖြစ်သင့်။

မလာသိမ့် ( မလာသိန့် ၊ မလာသိ ) မဖြစ်သင့်။
***ဤနီရာတွင် (မလာသိမ့်) ဟုသုံးလျှင် ပိုသင့်တော်မည်ဟု ယူဆရသည်။ (သိမ့်) ၀ိဘတ်ကို (သိ) ကြိယာနှင့် ခွဲခြားထားသင့်သည်ဟု ယူဆသည်။ မူရင်းတွင် မလာသိ ( မလာသိန့်၊ မလာသိမ့် ) မဖြစ်သင့်ဟု ဆိုသည်။ (အယ်ဒီတာမှတ်ချက်)

ကြက်သီးထ ( ကြက်သိန်းထ ) မဖြစ်သင့်။
ဟိရေ၊ လက်ဟိ ( ဟိန့် ရေ၊ လက်ဟိန့်  ) မဖြစ်သင့်။
ငြိရေ ( ငြိန့် ရေ ) မဖြစ်သင့်။
ညီးရေ ( ညိန်းရေ ) မဖြစ်သင့်။

၆။ အစွန်းရောက်သတ်ပုံကို ယှောင်ပါ။

ငါရို့  ( ငြို့  ) မဖြစ်သင့်။
အေချင့် ( ဧယှင့်၊ ဧသျှင့် ) မဖြစ်သင့်။
အားလုံး ( အားနုံး၊ အားနူး ) မဖြစ်သင့်။

( ဟောရေ ၊ ဝှေါရေ )
***ဤနီရာတွင် (ဟောရေ၊ ဝှေါရေ) နှစ်ခုစလုံးသုံးလျှင်လည်း သင့်တော်သည်ဟုယူဆရသည်။ မူရင်းတွင် ဟောရေ ( ဝှေါရေ ) မဖြစ်သင့်ဟုဆိုသည်။ (အယ်ဒီတာမှတ်ချက်)

ရှောက်သီး ( ပြောက်သီး ) မဖြစ်သင့်။ ( ရခိုင်မှာ ' ရှ ' သံပီပြီးသားဖြစ်၏။ )
ရှင်သန် ( ဟြင်သန် ) မဖြစ်သင့်။ ( ရခိုင်မှာ ' ရှ ' သံပီပြီးသားဖြစ်၏။ )
ထင်ရှား ( ထင်ဟြား ) မဖြစ်သင့်။ ( ရခိုင်မှာ ' ရှ ' သံပီပြီးသားဖြစ်၏။ )
ကြည့်ရှု ( ကြေ့ရှု၊ ကြည့်ဟြု ) မဖြစ်သင့်။ ( ရခိုင်မှာ ' ရှ ' သံပီပြီးသားဖြစ်၏။ )
ရှားဂြို ( ဟြားဂြို ) မဖြစ်သင့်။ ( ရခိုင်မှာ ' ရှ ' သံပီပြီးသားဖြစ်၏။ )
ရှားစီး ( ဟြားစီး ) မဖြစ်သင့်။ ( ရခိုင်မှာ ' ရှ ' သံပီပြီးသားဖြစ်၏။ )

(သိရေမလား ၊ သိရေမနား )
***ဤနီရာတွင် (နှစ်ခုစလုံး) သုံးလျှင် သင့်တော်မည်ဟု ယူဆရသည်။ တချို့အရပ်တွင် (မနား) ဟု သုံးသောကြောင့်ဖြစ်သည်။ မူရင်းတွင် သိရေမလား ( သိရေမနား ) မဖြစ်သင့်ဟုဆိုသည်။ (အယ်ဒီတာမှတ်ချက်)

ဖြစ်ထွန်း၊ ဖြစ်သည် ( ဗြိုက်ထွန်း၊ ဖြိုက်သည် ) မဖြစ်သင့်။
စစ်တွေ ( စိုက်တွယ် ) မဖြစ်သင့်။

ချစ်တေ ( ချိုက်တေ ) မဖြစ်သင့်။
*** (အယ်ဒီတာမှတ်ချက်) အဓိပ္ပါယ်ကွဲလွဲစရာမဟိ၍ အပိုလှောက်ထည့်ထားခြင်းဖြစ်သည်။

ကိုင်တွယ်၊ လူငယ် ( ကိုင်တွေ၊ လူငေ ) မဖြစ်သင့်။
ဆက်သွယ်၊ သွယ်တန်း ( ဆက်သွေ၊ သွေတန်း ) မဖြစ်သင့်။
တည်ဟိ၊ အကြပ်အတည်း ( တေဟိ၊ အကြပ်အတေး ) မဖြစ်သင့်။
အဖွဲ့ အစည်း၊ အစည်းအဝေး ( အဖွဲ့ အစေး၊ အစေးအဝေး ) မဖြစ်သင့်။
ပစ္စည်း၊ အရည်အခြင်း ( ပစ္စေး၊ အရေအခြင်း၊ အရည်အချင်း ) မဖြစ်သင့်။
လူတန်းစား၊ ကျန်းမာပါစီ ( လူတန်းဇား၊ ကျန်းမာပါဇီ ) မဖြစ်သင့်။
တိုင်ပင်၊ မသိဘဲ ( တိုင်ဗင်၊ မသိဗဲ ) မဖြစ်သင့်။
ဘူးသီး၊ ကျောက်လှီကား ( ဘသီး၊ ကျောက်လှဂါး ) မဖြစ်သင့်။
လာပြန်ရေ၊ လယ်ပြင် ( လာဗြန်ရေ၊ လယ်ဗြင် ) မဖြစ်သင့်။

၇။ လောင်းရိပ်မိသတ်ပုံကို ရှောင်ပါ။

ကိုင် ( ကဲ ) မဖြစ်သင့်။
အေး ( အဲ ) မဖြစ်သင့်။

(အခု ၊ အဂု)
***ဤနီရာတွင် (အခု) ဟုသုံးလျှင်လည်းရသည်ဟု ယူဆရသည်။ ပဇာကြောင့်ဆိုသော် (ခု) သည် ဒုတိယပင်ရင်းသံဖြစ်သဖြင့် (ဂု) ဟု ဆင့်ပွားသံပြောင်းနိုင်သည်။ (အယ်ဒီတာမှတ်ချက်)

အင်း ( အိင်၊ အိင်း ) မဖြစ်သင့်။
လုံးရွီ ( လုံးရီ ) မဖြစ်သင့်။
ငါလည်းဝမ်းနည်း ( ငါလဲဝမ်းနဲ ) မဖြစ်သင့်။
ဇာလိုချင်လဲ ( ဇာလိုချင်လည်း ) မဖြစ်သင့်။
တည်ထွင်၊ ကြိတ်မှန်ရွက် ( တီထွင်၊ ကျိတ်မှန်ရွက် ) မဖြစ်သင့်။

အယင်က ( အရင်က ) မဖြစ်သင့်။

(နက်ဖန် ၊ နက်ဖြန်)
***ဤနီရာတွင် (နက်ဖန်) ရာ ပိုသင့်တော်မည်ဟု ယူဆရသည်။ (နက်ဖန်) ဟု ရခိုင်များက ပြော၍ (မနက်ဖြန်) ဟု မြန်မာများက ပြောသောကြောင့်ဖြစ်သည်။ မူရင်းတွင် နက်ဖြန် (နက်ဖန်) မဖြစ်သင့်ဟုဆိုသည်။ (အယ်ဒီတာမှတ်ချက်)

ကြပ်ခိုး၊ ကြောရိုး ( ကျပ်ခိုး၊ ကျောရိုး ) မဖြစ်သင့်။

ကြက်သရေ၊ မျက်နှာကြက် ( ကျက်သရေ၊ မျက်နှာကျက် ) မဖြစ်သင့်။
***ဤနီရာတွင် (ကြက်သရေ) လား (ကျက်သရေ) လား သုတေသနပြုလုပ်ရန်လိုအပ်သည်။ ရှိဟောင်းပီစောင်တခုတွင် (ကျက်သရေ) ဟုတွိရသည်။ (အယ်ဒီတာမှတ်ချက်)

ခြောင်းဆိုး၊ လိုင်ခြောင်း ( ချောင်းဆိုး၊ လည်ချောင်း ) မဖြစ်သင့်။
အိမ်မျှောင်၊ အင်တန် ( အိမ်မြှောင်၊ အင်မတန် ) မဖြစ်သင့်။
ဟိရေ၊ အရှိဖက် ( ယှိရေ၊ အယှိဖက် ) မဖြစ်သင့်။
အပျင်းခို ( အပယင်းခို ) မဖြစ်သင့်။
အရည်အခြင်း ( အရည်အချင်း ) မဖြစ်သင့်။
ရုပ်ထု ( ရုပ်တု ) မဖြစ်သင့်။
သူ့ ခမာ ( သူ့ ခမျာ ) မဖြစ်သင့်။
သက်ဆိုးရှည် ( သက်ဇိုးရှည် ) မဖြစ်သင့်။

(လားယူခီ ၊ လားယူခြီ)
***ဤနီရာတွင် (လားယူခီ) သာလျှင် ပိုသင့်တော်မည်ဟု ယူဆရသည်။ မူရင်းတွင် လားယူခြီ၊ (လားယူခီ) မဖြစ်သင့်ဟုဆိုသည်။ (အယ်ဒီတာမှတ်ချက်)

ခွဲပီးပါမေ ( ခွဲပီးပါ့မယ် ) မဖြစ်သင့်။

၈။ တရားသီအယူအဆကို ယှောင်ပါ။

အဖြေ၊ သေချာ၊ ရေရာ ( အဖြီ၊ သီချာ၊ ရီရာ ) မဖြစ်သင့်။

ရိုသေ၊ ပြေပြစ် ( ရိုသီ၊ ပြီပြစ် ) မဖြစ်သင့်။
*** ဤနီရာတွင် (ရိုရိုသီသီ) သုံးလျှင်လည်းရသည်ဟု ယူဆရသည်။ (အယ်ဒီတာမှတ်ချက်)

တွေးတော၊ ကွေ့ကောက် ( တွီးတော၊ ကွိကောက် ) မဖြစ်သင့်။
ဇောချွေး (ဇောချွီး) မဖြစ်သင့်။

ပြည်ပန်းညို ( ပြီပန်းညို) မဖြစ်သင့်။
*** တချို့အရပ်တွင် (ပီပန်းညို) ဟုပြောသည်ကို တွိရသည်။ (အယ်ဒီတာမှတ်ချက်)

အရေးကြီးရေ ( အရီးကြီးရေ ) မဖြစ်သင့်။

အထွေထွေ ( အထွီထွီ ) မဖြစ်သင့်။

ဖွေးဖွေးဖြူ ( ဖွီးဖွီးဖြူ )
***ဤနီရာတွင် (ဖွီးဖွီးဖြူ) ဟုသုံးလျှင်လည်းရသည်ဟု ယူဆရသည်။ ပဇာကြောင့် ဆိုသော် ရခိုင်စကားတွင် (ဆံပင်၊ မုဆိတ် ဖွီးဖွီးဖြူလားပျာ) ဟု အသုံးဟိသောကြောင့်ဖြစ်သည်။ (အယ်ဒီတာမှတ်ချက်)

အေနိ၊ ပျော်မွိ၊ တွိကြုံ ( ဧနိ့ ၊ ပျော်မွိ့ ၊ တွိ့ ကြုံ ) မဖြစ်သင့်။
ရသေ့၊ ခြင်္သေ့ ( ရသိ၊ ခြင်္သိ ) မဖြစ်သင့်။
ဗရဗရေ ( ဗရဗရီ ) မဖြစ်သင့်။

၉။ ခေတ်နောက်ပြန်ဆွဲသတ်ပုံကို ယှောင်ပါ။

ဆရာ ( ဆြာ ) မဖြစ်သင့်။
လားကတ်တေ၊ လတ်တလော ( လားကတ္တေ၊ လတ္တလော ) မဖြစ်သင့်။
ငါ့ပါးက ( ငါ့ဗက္က ) မဖြစ်သင့်။
ဆုံးမ ( ဆုမ္မ ) မဖြစ်သင့်။
ဦးဝါယမ ( ဥူးဝါယမ ) မဖြစ်သင့်။
ရခိုင်မြီ၌ ( ရခိုင်မြီနှိုက် ) မဖြစ်သင့်။

မိမ္မ (မိမ) မဖြစ်သင့်။
***ဤနီရာတွင် (မိမ) ထက် ( မိမ္မ) က ပိုသင့်တော်သည်ဟု ယူဆသည်။ မူရင်းတွင် မိမ (မိမ္မ) မဖြစ်သင့်ဟူ၍ဖြစ်သည်။ (အယ်ဒီတာမှတ်ချက်)

၁၀။ မမှားသင့်သောသတ်ပုံကို မမှားပါစီနှင့်။

ကတိပီး ( ဂတိပီး ) မဖြစ်သင့်။
သာကီဝင် ( သာဂီဝင် ) မဖြစ်သင့်။
ကန္တာရ ( ဂန္တာရ ) မဖြစ်သင့်။
ကန်ဘောင် ( ကံဘောင် ) မဖြစ်သင့်။
ကျပ်တည်း ( ကျတ်တည်း ) မဖြစ်သင့်။
ကမ်းထောင့် ( ကမ်းထောင်း ) မဖြစ်သင့်။
ကျင်းပ ( ကျင့်ပ ) မဖြစ်သင့်။
လျှို့ ဝှက် ( ချို့ ဝှက် ) မဖြစ်သင့်။
လျှော့ပေါ့ ( ချော့ပေါ့ ) မဖြစ်သင့်။
နာမည် ( နာမေ ) မဖြစ်သင့်။
ဘယ်ခြီဘယ်လက် ( ဘေခြီဘေလက် ) မဖြစ်သင့်။
ဟရေ ( ဟှရေ ) မဖြစ်သင့်။
အနာထပိဏ် ( အနာထာပိဏ် ) မဖြစ်သင့်။
ဥပုသ် ( ဥပုဒ် ) မဖြစ်သင့်။
ငုပ်လျှိုး ( ငုတ်လျှိုး ) မဖြစ်သင့်။
ဈီးသည် ( ဈီးသယ် ) မဖြစ်သင့်။
ပိုက်သည်ရပ် ( ပိုက်သယ်ရပ် ) မဖြစ်သင့်။
ဗျည်း ( ဗျဉ်း ) မဖြစ်သင့်။
မြောက်ဦး ( မြောက်ဥ ) မဖြစ်သင့်။

(မြင်သရွိ ၊ မြင်သရိ )
***ဤနီရာတွင် အနည်းငယ်သုတေသနလုပ်သင့်သည်။ ပဇာကြောင့်ဆိုသော (လုပ်သရိ၊ ကိုင်သရိ) စသည်ဖြင့် စကားပြောသောအခါ သုံးသောကြောင့်ဖြစ်သည်။ (ရွိ) ဆိုသည်မှာ ဥပမာ၊ ။ မြန်မာ (လုပ်သရွေ့၊ ကိုင်သရွေ့) မှ (ရွေ့) ကို တိုက်ရိုက်ဘာသာပြန်သည်ဟု ယူဆရသည်။

ယေဘုယျ ( ယေဘူယ ) မဖြစ်သင့်။
လှိုင်းဂယက် ( လှိုင်းကယက် ) မဖြစ်သင့်။
လိုဏ်ဂူ ( လှိုင်ဂူ ) မဖြစ်သင့်။
ဝေးပစ် ( ဝဲပစ် ) မဖြစ်သင့်။
သဘော ( သဗော ) မဖြစ်သင့်။
သင်္ဘော ( သင်းဘော ) မဖြစ်သင့်။

သင်္ကြန် ( သင်းကြန် ) မဖြစ်သင့်။
***ဤနီရာတွင် Font စာလုံးအခက်အခဲကြောင့် (သင်းကြန်၊ အင်းကျီ၊ င်္အဂါ၊ င်္ဒဂါး) စသဖြင့်ရွီးလျှင်လည်း လက်ခံသင့်သည်ဟု ယူဆသည်။

သန်မာ ( သံမာ ) မဖြစ်သင့်။
သည်းခံ (သဲခံ ) မဖြစ်သင့်။

(အသဲ၊ အသည်း)
***ဤနီရာတွင် (အသဲ) က ပိုသင့်တော်သည်ဟု ယူဆရသည်။ (အသည်း) ဟု မြန်မာက ပြောင်းသုံးသဖြင့် ရခိုင်ကလည်း (အသည်း) ဟု လိုက်ပြောင်းစရာမလိုဟု ယူဆရသည်။ မူရင်းတွင် အသည်း (အသဲ) မဖြစ်သင့်ဟု ဆိုသည်။ (အယ်ဒီတာမှတ်ချက်)

လောင်းမြှပ်တေ ( လောင်းမြုတ်တေ ) မဖြစ်သင့်။
ဦးသျှောင် ( ဥသျှောင် ) မဖြစ်သင့်။

၁၁။ အခက်ထက် အလွယ်ကို ရနိုင်သမျှ ဦးစားပီးပါ။

ကလေချေ ( ကလေသျှေ ) မဖြစ်သင့်။
***ဤနီရာတွင် (ကုလေချေ၊ ကုလိမ္မေချေ) ဟုသုံးလျှင်လည်းရသည်ဟု ယူဆရသည်။ (အယ်ဒီတာမှတ်ချက်)

မောင်ချေ ( မောင်သျှေ ) မဖြစ်သင့်။
အခင်ချေ ( အခင်သျှေ ) မဖြစ်သင့်။
အချေ ( အသျှေ ) မဖြစ်သင့်။
ယင်းချင့် ( ယင်းသျှင့် ) မဖြစ်သင့်။
ချောင်ရေ ( သျှောင်ရေ ) မဖြစ်သင့်။

ချချားသီး ( သျှသျှားသီး၊ သျှစ်သျှားသီး ) မဖြစ်သင့်။
***ဤနီရာတွင် (ချချားသီး၊ သျှသျှားသီး) ပြဿနာမဟိဟု ယူဆရသည်။ (အယ်ဒီတာမှတ်ချက်)

ပန်းချားပွင့် ( ပန်းသျှားပွင့် ) မဖြစ်သင့်။
***ဤနီရာတွင် (ပန်းချားပွင့်၊ ပန်းသျှားပွင့်၊ ပန်းသျှရှားပွင့်၊ ပန်းချရှားပွင့်) ပြဿနာမဟိဟု ယူဆရသည်။ (အယ်ဒီတာမှတ်ချက်)

သျှရေ (ချရေ၊ ခရေ) မဖြစ်သင့်။
(အယ်ဒီတာမှတ်ချက်) အပိုလှောက်ထည့်ထားခြင်းဖြစ်သည်။ မူရင်း၌မပါ။ (ချရေ) ဟု သုံးလျှင် မကောင်းသော အဓိပ္ပါယ်တလွဲယူနိုင်သည်။ စာလင်္ကတွင် ထိုကဲ့သို့ (ဒွိဟ) ဖြစ်စီသောအသုံးကို (ဒေါသသင့်) ဟုဆိုသည်။ ထိုကဲ့သို့ ဒေါသသင့်စီသောစကားလုံးများကို ယှောင်ကြည်သင့်သည်။

တိုးချိတိုးချို ( တိုးသျှိတိုးသျှို ) မဖြစ်သင့်။
ငပိချာ ( ငပိသျှာ ) မဖြစ်သင့်။
မယားချာ ( မယားသျှာ) မဖြစ်သင့်။

၁၂။ အဆန်းထွင်မှု မလွန်ကဲပါစီနှင့်။

ဂျင်လိပ် ( ဇင်လိပ် ) မဖြစ်သင့်။
ငါ၏ ( ငါအဲ့၊ ငါအယ့်၊ ငါဧဲ့ ) မဖြစ်သင့်။
ထင်ရှား ( ထင်သျှား ) မဖြစ်သင့်။

(လာဖို့မလား ၊ လာဖို့မနား )
***ဤနီရာတွင် (လာဖို့မလား၊ လာဖို့မနား) နှစ်ခုစလုံးသုံး၍ရသည်ဟု ယူဆရသည်။ ပဇာကြောင့်ဆိုသော် တချို့အရပ်တွင် (လုပ်ဖို့မနား၊ စားဖို့မနား) ဟုပြောဆိုသောကြောင့်ဖြစ်သည်။ မူရင်းတွင် လာဖို့မလား ( လာဖို့မနား ) မဖြစ်သင့်ဟု ဆိုသည်။ (အယ်ဒီတာမှတ်ချက်)

ထိုနိက ( ဟွေနိက ) မဖြစ်သင့်။
သိရေလတ် ( သိရေဟတ်၊ သိရေလှပ် ) မဖြစ်သင့်။
တခါလောက် ( တစ်ခါလှောက် ) မဖြစ်သင့်။

တခါတရီ၊ တဟုန်တည်း၊ တရံရောအခါ၊ တဒင်္ဂ တခဏ (တစ်ခါတစ်ရီ၊ တစ်ဟုန်တည်း၊ တစ်ရံရောအခါ၊ တစ်ဒင်္ဂ တစ်ခဏ) မဖြစ်သင့်။

မှတ်ချက်။ ။ အပိုလှောက်ထည့်ထားခြင်းဖြစ်သည်။ မူရင်း၌မပါ။ (တစ်ခါတစ်ရီ၊ တစ်ဟုန်တည်း၊ တစ်ရံရောအခါ၊ တစ်ဒင်္ဂ၊ တစ်ခဏ) ဆိုလျှင် ဖတ်ရမကောင်း၊ ထင့်သည်။ စာရိုက်ရသောအခါတွင်လည်း အပိုရိုက်ထည့်ရသဖြင့်မသင့်တော်။ မြန်မာက (တစ်ခါတစ်ရီ၊ တစ်ဟုန်တည်း၊ တစ်ရံရောအခါ၊ တစ်ဒင်္ဂ တစ်ခဏ) ဟုပြောင်းသဖြင့် ရခိုင်ကလည်း (တစ်ခါတစ်ရီ၊ တစ်ဟုန်တည်း၊ တစ်ရံရောအခါ၊ တစ်ဒင်္ဂ တစ်ခဏ) ပြောင်းလျှင် မသင့်တော်ဟု ယူဆရသည်။ နောက်လိုက်အစွဲဟု သတ်မှတ်နိုင်သည်။ (အယ်ဒီတာမှတ်ချက်)

နှစ်သက် ( နှိပ်သက် ) မဖြစ်သင့်။
ပြည့်မှရာ ( ပြည့်မာ့ရာ ) မဖြစ်သင့်။
နပျိုးဖက် ( နတ်ပျိုးဖက် ) မဖြစ်သင့်။

( ဒေချင့် ၊ ဒေဟင့် )
***ဤနီရာတွင် ( ဒေချင့်၊ အေဟင့်) နှစ်ခုစလုံးလက်ခံနိုင်သည်ဟု ယူဆရသည်။ ပဇာကြောင့်ဆိုသော တချို့အရပ်တွင် (ဟင့်) ဟု သုံးသောကြောင့်ဖြစ်သည်။ မူရင်းတွင် ဒေချင့် (ဒေဟင့်) မဖြစ်သင့်ဟုဆိုသည်။ (အယ်ဒီတာမှတ်ချက်)

(တန်ခါး ၊ တံခါး)
***ဤနီရာတွင် (တန်းခါး) သာလျှင် ပိုသင့်တော်သည်ဟု ယူဆရသည်။ ပဇာကြောင့်ဆိုသော် (တန်းခါး) ဟု ရခိုင်ကပြော၍ (တံခါး) ဟု မြန်မာက ပြောသောကြောင့်ဖြစ်သည်။ တံခါး (တန်ခါး) မဖြစ်သင့်ဟု ဆိုသည်။ (အယ်ဒီတာမှတ်ချက်)

(တင်းခွန်၊ တံခွန်)
***ဤနီရာတွင် (တင်းခွန်၊ တံခွန်) နှစ်မျိုးစလုံးသုံးနိုင်သည်ဟုယူဆရသည်။ ပဇာကြောင့်ဆိုသော် ရခိုင်စကားတွင် (တင်းခွန်) ဟုသုံးသောကြောင့်ဖြစ်သည်။ အပိုလှောက်ထည့်ထားခြင်းဖြစ်သည်။ မူရင်း၌မပါ။ (အယ်ဒီတာမှတ်ချက်)


ယှဉ်ပြိုင် ( ယှိဉ်ပြိုင် ) မဖြစ်သင့်။
မအ,အောင် ( မအာ့အောင် ) မဖြစ်သင့်။
မိမ ( မမာ့ ) မဖြစ်သင့်။
ဝီးရေ ( ဝွီးရေ ) မဖြစ်သင့်။

၁၃။ ပါဠိကို ပါဠိသဘောမပျက်ပါစီနှင့်။

ပညာ ( ပိုင်ညာ ) မဖြစ်သင့်။
အဓမ္မ ( အားဓမ ) မဖြစ်သင့်။

( စိုင်းစား၊ အစိုင်အလာ၊ ယိုင်ကျေး၊ ချိုင်ပေါင်၊ ကြိုးချိုင်ရေ ) မှာတော့ ပါဠိနှင့်မဆိုင်၍ သံမှန်ဖြစ်အောင် ဤသို့ပင် ပြောင်းရွီးသင့်ပါသည်။

(သန္တာမောင်မောင်)

ဤစာကို အောင်တံခွန်ဝံသရက္ခိတ မဂ္ဂဇင်းအတွဲ ( ၁ )၊ အမှတ် ( ၃ )၊ ၂၀၀၈၊ ဇန္နဝါရီလထုတ်မှ ကူးယူဖော်ပြသည်။ ရခိုင့်စာပီ တိုးတက်ထွန်းကားပါစီ။