စင်းပြွန်းသီး

စင်းပြွန်းသီး
---------

စင်းပြွန်းသီးဆိုသည်မှာ ဓပြုတ်သီးအငယ်စားမျိုးဖြစ်သည်။ အရွယ်အစားမှာ များစွာကွာခြားသော်ငြားလည်း ပုံသဏ္ဍန်မှာ အတူတူပင်ဖြစ်သည်။ အရသာမှာလည်း အတူတူပင်ဖြစ်သည်။ ဓပြုတ်သီးကို တချို့ရခိုင်များက သပြုသီးဟုခေါ်သည်။ ဓပြုတ်သီးကို များသောအားဖြင့် သျှင်ပြုပွဲအလှုပွဲများတွင် ဟင်းရည်အဖြစ်ချက်ပြုတ်လေ့ဟိသည်။ ဓပြုတ်သီးကို နှစ်ခြမ်းသုံးခြမ်းခြမ်းပြီး ၀က်သားနှင့်ဟင်းရည်ကြိုလျှင် အလွန်အရသာကောင်းမွန်သည်။ ဓပြုတ်သီးဟင်းရည်ကို မကြိုက်မနှစ်သက်သောရခိုင်သားများဟိမည်မထင်။ အရသာမှာ ချဉ်ပြီးရှားနီသဖြင့် တခွက်သောက်လျှင် နှစ်ခွက်သောက်ချင်စိတ်ပေါက်သည်။ ဓပြုတ်သီးဖတ်ကိုဝါးရသည်မှာလည်း အရသာတမျိုးဖြစ်သည်။ စင်းပြွန်းသီးကို အိမ်များတွင် ဟင်းရည်သောက်သော်၎င်းကောင်း ဟင်းအဖြစ်သော်၎င်း ငပိနိုင်နိုင်နှင့် သို့မဟုတ် ငပိကြူကြူနှင့် ချက်စားလေ့ဟိသည်။ စင်းပြွန်းသီးဟင်းရည်မှာ ဓပြုတ်သီးဟင်းရည်အရသာအတိုင်း အတူတူပင်ဖြစ်သည်။ သို့သော် စင်းပြွန်းသီးကို သျှင်ပြုပွဲများတွင် ဟင်းရည်သောက်ချက်လေ့မဟိ။ အရွယ်အစားငယ်သဖြင့် သျှင်ပြုပွဲတပွဲလောက်ငမှုမဟိသောကြောင့်လည်းဖြစ်နိုင်သည်။ ထို့ကြောင့် ဟင်းအဖြစ် ငပိကြူကြူနှင့် လိုက်ပွဲလောင်းပွဲ အရံဟင်းအဖြစ်ချက်ပြုတ်လေ့ဟိသည်။ ရခိုင်သျှင်ပြုပွဲများတွင် သင်္ဘောထိုးခြောက်နှင့် ခရမ်းသီးချက်၊ ငရုပ်သီးစပ်စပ် သျှင်ပြုပွဲသည် ၀က်သားသျှင်ပြုပွဲထက် မျက်နှာပန်းလှသည်။ အခုအခါ သင်္ဘောထိုးခြောက်မှာ ယှားပါးပစ္စည်းဖြစ်လားပြီးဖြစ်သည်။ ရခိုင်မှုန့်တီများမှာလည်း သင်္ဘောထိုးခြောက်နှင့်မချက်နိုင်ဘဲ ငါးရံ့ငါးခြောက်များနှင့် ချက်ပြုတ်ရသဖြင့် အရသာမှာ ရခိုင်မှုန့်တီစစ်စစ်အရသာကို မမှီပါ။ ပဒကောမပါသော ရခိုင်မှုန့်တီကိုသောက်ရရေပိုင် သင်္ဘောထိုးမပါသော ရခိုင်မှုန့်တီမှာလည်း စံမမှီသောရခိုင်မှုန့်တီရာဖြစ်ပါသည်။ ရခိုင်ပင်လယ်ပြင်၌ ငါးယှားပါးလာရခြင်းမှာ ဖက်ခွက်များက ရသလောက်ခြစ်ယူနီခြင်းကြောင့်ဖြစ်သည်။ ဆိုလိုသည်မှာ စင်းပြွန်းသီး၊ ဓပြုတ်သီးဟင်းရည်၊ ပဒကော၊ သင်္ဘောထိုးစသော ငါး၊ ဟင်းများမှာ ရခိုင်သားများ၏သျှာတွိအာတွိနာမည်ကြီးအစားအစာများဖြစ်ပါသည်။ တောတွင်းတွင် ပဒကောရှာလျှင် တို့စားစားသော ဖာလာဖူးအပင်နှင့်မှားတတ်ပါသည်။ ဖာလာပင်နှင့် ပဒကောပင်မှာ သဏ္ဍန်အားဖြင့်တူသော်လည်း ဖာလာပင်မှာ အရွက်အနည်းငယ်ကြမ်းပြီး ပဒကောပင်မှာ အရောင်အနည်းငယ်စိမ်းရင့်ပြီး ထူထူချောချောဖြစ်သည်။ ဖာလာဖူးသည်လည်း အလွန့်တို့စား၍ကောင်းသော တို့စားတမျိုးဖြစ်သည်။ ငရုပ်သီးငပိပေါက်ပေါက်ချေနှင့် တို့စားစားရလျှင် နဖူးက ချွေးပေါက်ပေါက်ကျအောင်အထိစား၍ ကောင်းပါသည်။

အကျွန်ုပ်ရို့နီသော စခန်းကို ၀ါးခတ်ချောင်း (၀ံလက်စခန်း) ဟုခေါ်ပါသည်။ ဗိုလ်ရာဇာပထမဆုံးကမ်းတက်သောစခန်းမှာ ၀ါးခတ်ချောင်း ၀ံလက်စခန်းမှဖြစ်ပါသည်။ ဗိုလ်ရာဇာနှင့်အတူ ဗိုလ်ကျော်နု၊ (ဗိုလ်စောဒက္ခ) နာမည်မိလားသည်မှ ပြန်အတွက်ပေါ်၍ ဖြည့်စွက်ထားခြင်းဖြစ်သည်။ နာမည်မှာ အထူးအဆန်းဖြစ်၍ မှတ်ရခက်သည်။ အခုအခါ နလန္ဒာ၌ဘုန်းကြီးဝတ်လားပြီးဖြစ်ပါသည်။ ဗိုလ်ရာဇာနှင့်အတူပါလာစဉ်၌ပင် အသက်အရွယ်မှာ ငါးဆယ်နီးပါးခန့်ဟိနီပြီးဖြစ်သည်။ ကရင်ရှိတန်းစစ်မျက်နှာ၌ တောက်လျှောက်တိုက်ပွဲဝင်လာသော ၀ါရင့်တော်လှန်ရေးသမားတဦးဖြစ်သည်။ ပိန်ပိန်ပါးပါး စကားများများမပြော၊ စကားပြောလျှင်လည်း ညင်ညင်သာသာပြောတတ်သည်။ ပထမဆုံး ဘင်္ဂလားကမ်းတက်စဉ်တွင် ဗိုလ်ရာဇာမပါ။ ဗိုလ်ရာဇာက နောက်မှ စပီးဘုတ်နှင့်ရောက်လာခြင်းဖြစ်သည်။ ဗိုလ်ရာဇာရို့ ပထမဆုံးကမ်းတက်သည်မှာ ဖရုံကာကျွန်းသုံးကျွန်းထဲက အင်္ဂရားချိုင်ကျွန်းဖြစ်သည်။ သူရို့ဦးတည်လာသည်မှာ ၀ါးခတ်ချောင်းစခန်းဖြစ်သည်။ သို့သော်လမ်းမသိသဖြင့် ဖရုံကာကျွန်းကို ၀ါးခတ်ချောင်းစခန်းချရာကျွန်းအထင်ဖြင့် ကမ်းတက်မိခြင်းဖြစ်သည်။ ဗိုလ်ရာဇာက ရဲဘော်များအားကမ်းတင်ထားခပြီး ထိုင်းဌာနချုပ်သို့ပြန်လားသည်။ ရဲဘော်အင်အား (၆၀) ခန့်မှာ ချောင်းအလီလီ မြောင်းအလီလီကိုကိုဖြတ်ပြီးမှ ဘင်္ဂလားနယ်စပ်သို့ခြီချမိခြင်းဖြစ်သည်။ ထိုအချိန်တွင် ဖက်ခွက်များရခိုင်ပြည်ထဲ၌ ယင်းလောက်ထိမဟိပါသိမ့်။ အနည်းအကျန်းရာဟိသိမ့်သောကြောင့်၎င်း၊ ဖက်ခွက်များမထင်မှတ်ဘဲ ရုတ်တရက်ဘွင်းဘွင်းကြီးပေါ်လာသဖြင့် ဖက်ခွက်များမှာ ခြီမကိုင်လက်မကိုင်မိဖြစ်သည်ကတကြောင်း၊ ဗိုလ်ရာဇာတပ်ကိုင်ဆောင်ထားသော်သနတ်များမှာလည်း နောက်ဆုံးပေါ်စက်သနတ်များဖြစ်သည်တကြောင်း ဖက်ခွက်များနောက်ယောင်ခံလိုက်သည်ကလွဲလို့ အနားသို့မကပ်ဝံ။ သို့သော် ဖက်ခွက်များမှာ လူအုပ်စုကောင်းသဖြင့် ဖက်ခွက်များဝိုင်းဝန်းခြင်းမခံရအောင် ဗိုလ်ရာဇာတပ်ကို အုပ်စုနှစ်အုပ်စုခွဲရန်ဆုံးဖြတ်လိုက်ကတ်သည်။ ဗိုလ်မှုးကြာဖြူအောင်ဦးဆောင်သောအုပ်စုမှာ ဖက်ခွက်များဝိုင်းဝန်းခံရခြင်းမှ လွတ်မြောက်လာသည်။ ကျန်အုပ်စုမှာ ဖက်ခွက်များဝိုင်းဝန်းခံရပြီး လက်နက်ချလားသည်။ ယင်းလောက် ကောင်းပေရ လက်နက်များဖြင့် လက်နက်ချသည်ဆိုသည်မှာ မယုံနိုင်စရာဖြစ်သည်။ ထိုအချိန်မှစ၍ ရခိုင်သားသတ္တိကို အနည်းငယ်သံသယဖြစ်မိသည်က အမှန်ဖြစ်ပါသည်။ ဗိုလ်မှုးကြာဖြူအောင်ဦးဆောင်သောအဖွဲ့ထဲက သက်ရှိထင်ရှားဟိနီသူများမှာ ခိုင်သန်းမောင် (ကနေဒါ)၊ အချေနှစ်ယောက်။ မမချေတယောက်၊ ယောက်ကျားချေတယောက်။ ဇနီးမယာသည်က လှနုဖြူ၊ ဆရာမဲမယား၏ညီမ၊ မြောက်ဦးဇာတိဖြစ်သည်။ နောက်တယောက်က အောင်ရွှေသိန်း (ခေါ်) မောင်စက်ဖြစ်သည်။ ဗိုလ်ရာဇာကမ်းတက်စဉ်က ဗိုလ်အောင်ရွှေသိန်းအဖြစ်နာမည်ကြီးသည်။ အခု နယူးဒေလီ၌ နိုင်ငံရေးအပူလှိုင်းကိုမခံနိုင်ဘဲ ရူးလားပြီးဖြစ်သည်။ နောက်တယောက်ရူးပြီးသီလားသူတဦးလည်းဟိသည်။ ဘုန်းကြီးလူထွက်ဖြစ်၍ အကျွန်ုပ်ရို့က ကိုယ်တော်ဟုခေါ်သည်။ ထိုသူက ဗိုလ်ရာဇာတပ်နှင့်မဆိုင် (၈၈) အရေးအခင်းတွင် ကျောက်တော်ဖက်မှ ထွက်ပြီးလာသူဖြစ်သည်။ အောင်ရွှေသိန်းမှာ ရမ်းဗြဲဇာတိဖြစ်သည်။ နောက်တယောက်က ကိုယ်တော်ရိုးလင်း။ ဘုန်းကြီးလူထွက်ဖြစ်ပြီး နာမည်မှာ ရိုးလင်းဖြစ်သည်။ အင်္ဂလိပ်စာအသင့်အတင့်ကောင်းမွန်သဖြင့် အိန္ဒိယသို့ ဗိုလ်ရာဇာစီစဉ်မှုဖြင့် (AA) ပထမဆုံးပညာတော်သင်အလွှတ်ခံရသော ပုဂ္ဂိုလ်ဖြစ်သည်။ ယခု အိန္ဒိယ အူရူနာချာ ကချင်ဗုဒ္ဓဘာသာပြည်နယ်မှ ဗုဒ္ဓဘာသာကချင်မတယောက်နှင့် အိမ်ထောင်ကျလားပြီးဖြစ်သည်။ ဗိုလ်မှုးကြာဖြူအောင်ကို ဗိုလ်ရာဇာက ဟာရဘင်းမှ အပျိုကြီးငွေစိန်နှင့်ပီးစပ်သည်။ လွန်ခရေ လေးငါးခြောက်နှစ်အယင်က သွီးတိုးဆီးချိုဖြင့် ကွယ်လွန်လားပြီးဖြစ်သည်။ (၈၈) အရေးအခင်းတွင် အင်းစိန်ထောင်ဖောက်သောအခါ တသက်တကျွန်းကျခံထားရာက ထွက်ပြီးလွတ်မြောက်လာသူဖြစ်သည်။ ကရင်စီမံကိန်းဖြင့် ရန်ကုန်လွှတ်တော်ကိုဖောက်ခွဲဖျက်ဆီးရန်အလာတွင် လက်နက်ခဲယမ်းများဖြင့်အဖမ်းခံထားရပြီး တသက်တကျွန်းကျခံထားရသူဖြစ်သည်။ အဆိုတော်ဖိုးချိုနှင့် အင်းစိန်ထောင်တွင် တခန်းတည်းနီခရသည်ဟုဆိုသည်။ (၈၈) အရေးအခင်းဖြစ်ပြီး ထိုင်းဖက်ကိုထွက်ပြီးယင်း ကရင်တပ်စခန်းတွင် ဗိုလ်ရာဇာနှင့်တွိဆုံပြီး (AA) ကို စတင်ထူထောင်သူဖြစ်သည်။ အရပ်ထောင်ထောင်မောင်းမောင်းဖြစ်သည်။ သူလည်းဘုန်းကြီးလူတွက်ဖြစ်သည်။ ဘုန်းကြီးဘ၀နှင့် သူအိမ်ထောင်ကျရာ ဟာရဘင်းရွာ၌လည်း တော်လှန်ရေးမလုပ်ခင် ကျောင်းထိုင်ဖူးသည်ဟုဆိုသည်။ မည်သည့်ကျောင်းဖြစ်သည်ကိုကား ပြောပြသည်ကို အတိအကျမမှတ်မိပါယာ။

မှတ်မိသည်မှာ ဗိုလ်ရာဇာရို့စခန်းချသည်မှာ ၀ါးခတ်ချောင်းဒိုင်းနက်ရွာ တောင်ဖက် တောင်ကုန်းမြင့်မြင့်တွင်ဖြစ်သည်။ ယခင် ခိုင်နီလင်း (ALP) ဒုဥက္ကဌ (ယခုထိုင်း) ခိုင်မိုးလင်းနှင့် ALP ကို စတင်ရာတွင်ပါဝင်သူ စခန်းချခရာ တောင်ကုန်းတွင်ဖြစ်သည်။ ထိုတောင်ကုန်းတွင် ခိုင်နီလင်းထိုင်းသို့မလားခင် ကိုမိုးသောက် ပုဏ္ဏားကျွန်း၊ စစ်တွေဇာတိနှင့် အတူနီခသည်။ ကုလားထိုင်လုပ်၍ ရပ်တည်ခသည်။ ထိုအချိန်တွင် တီဘီရောဂါခံစားနီခရသည်။ အကျွန်ုပ်ရို့ ဗိုလ်ရာဇာစခန်းသို့လားလည်သည်။ ထိုအချိန်တွင် အကျွန်ရို့လားလည်းသည့်စခန်းအောက် မြောင်ထဲက ဂျီဟောက်သံကိုကြားရသည်။ အဘိုးမောင်ဟန် (ယခင် ACP) ဥက္ကဌဟောင်းက ရဲဘော်တယောက်ဘားက သနတ်တလက်တောင်းပြီး မြောင်ထဲသို့ဆင်းလားသည်။ ငါးမိနိမကြာလိုက် ပေါက်သံတချက်ကြားရသည်။ ညဇာသား အကျွန်ုပ်ရို့ဝံလက်စခန်းအတွက် တ၀ီစာရသည်။ အကျွန်ုပ်စားဖူးသည်ထဲမှာ ၄င်းဂျီသားလောက်စား၍ကောင်းသောအသား တခါလည်းမစားဖူးပါ။ ဟင်းချိုမှုန့်မထည့်ဘဲ ဘဇောင်ချိုရေကားမသိ။ လတ်လတ်ဆတ်ဆတ်ဖြစ်၍လည်းဖြစ်နိုင်သည်။

အကျွန်ုပ်ပြောချင်သည်မှာ အကျွန်ုပ်ရို့စခန်းချသည့် ၀ံလက်စခန်းမှာ ဒိုင်းနက်ရွာအနောက်ဖက်တွင်ဖြစ်သည်။ ပင်လယ်ကမ်းစပ်ဖက်ဖြစ်သည်။ စခန်းချသည့်တောင်ကုန်းအနောက်ဖက်တွင် တောင်တန်းကြီးတခုဟိသည်။ စခန်းအောက်တွင် နွီခါသားဆိုလျှင် ရွာသားများကန်းဘိုင်ဆည်သဖြင့် ရီချိုးရသည်မှာ ကကောင်းပျော်ဖို့ကောင်းသည်။ အကျွန်ုပ်ရို့စခန်းကို ကျွန်းသစ်များဖြင့်ဆောက်လုပ်ပါသည်။ နှစ်နှစ်သား သုံးနှစ်သားကျွန်းပင်များဖြင့်ဆောက်လုပ်ထားခြင်းဖြစ်သည်။ သစ်လုံးများကိုနှစ်ခြမ်းစိတ်ပြီး ထရံကာသည်။ သို့သော် ထရံအားလုံးမပြီး တချို့တ၀က်ရာကာရံနိုင်သည်။ ဘင်္ဂလားတွင်အုန်းယှားသည်။ ထို့ကြောင့် စခန်းကိုအုံးမိုးရန်ခက်သဖြင့် ကန်းကျင်ရွက်ကို အုန်းပျစ်ပျစ်ပြီးမိုးရသည်။ တထွာလောက်ရာရှည်သဖြင့် မိုးရသည်မှာခက်သည်။ မိုးယိုရန်လွယ်သည်။ အကျွန်ုပ်ရို့လည်း ကန်းကျင်ရွက်မပျစ်တတ်၍ ရွာက၀ယ်မိုးရသည်ကများသည်။ BRC က Project ရသဖြင့် ကြက်နှင့်ဘဲမွီးဖြူရေးလုပ်သည်။ အစ်ကိုကြီးမောင်ချစ် (ဘင်္ဂလားဗုဒ္ဓဘာသာရခိုင်အသင်းကြီး) ကို စတင်တည်ထောင်သူဥက္ကဌ၊ အ၀ကျွန်းဇာတိ၊ ဆရာမမြရာဇာလင်း၏လင် (အိမ်သျှင်) ၏ညီဖြစ်သူ (နာမည်မိနီသည်) မွီးမြူရေးတက္ကသိုလ်ကျောင်းဆင်းက ကူညီသဖြင့် Project အောင်မြင်သည်။ ကြက်နှင့်ဘဲ၌ဖြစ်တတ်သော လိုင်လိမ်နှင့်ဆီးဖြူရောဂါကာကွယ်ဆီးကို အလွယ်တကူဝယ်ယူရနိုင်သဖြင့် မွီးမြူရေးအောင်မြင်ရခြင်းဖြစ်သည်။ တပါတ်တပါတ်လျှင် ဘဲနှင့်ကြက်ဥ ခရင်းလိုက်ရသည်။ ဖလောင်းချိတ်သို့တက်၍ရောင်းရသဖြင့် ၀င်ငွေကောင်းသည်။ စခန်းတွင်အယင်က ညိတိုင် ချဉ်ပေါင်နှင့် နပျိုးကြိုးနီရာက ဘဲနှင့်ကြက်ဥကြိုးလာရသဖြင့် တော်လှန်ရေးအဆင့်မြင့်လာသည်။ တချို့က ဘဲဥကို ကျမန့်အုံပြီးမီးဖုတ်စားသည်။ စား၍ကောင်းသည်။ စခန်းတွင်း၌အတူနီခသောရဲဘော်များမှာ ရဲဘော်မောင်ကျော်ယိုင် (မြောက်ဦး)၊ သိန်းမင်း (ပေါက်တော)၊ ထွန်းစံ (စစ်တွေ)၊ စိုင်းခမောက် (ယခုထိုင်း) (စစ်တွေ)။ စိုင်းထီးဆိုင်တေးခြင်းများကို ပိုင်နိုင်ကျွမ်းကျင်သောကြောင့် စိုင်းခမောက်ဟု (NUPA) နာမည်ပီးထားခြင်းဖြစ်သည်။ ကရာတေးသိန်းမောင်မှာ အဖွဲ့ဝင်စစ်စစ်မဟုတ်၊ မှီခိုကပ်ခိုဖြစ်သည်။ ယခု ဗိုလ်မင်းထောင်တွင် ကျောင်းထောင်လျှက် ဒေသခံများအကျိုးကို တဖက်တလမ်းက အထောက်အကူပြုနိုင်သူဖြစ်သည်။ အကျင့်စာရိတ္တကောင်းမွန်သည်။ အသောက်အစားကင်းသည်။ မိမ္မမလိုက်စား။ အားနည်းချက်မှာ မြန်မာရွှေယင်ကျော်မှိုင်းမိခံထားရသူဖြစ်သည်။ စစ်တွေက တယောက်နာမည်မိနီသည်။ အတွက်ပေါ်လျှင်ဖြည့်စွက်ပီးပါသည်။ မကြာခင်က အမေရိကန်သို့ရောက်ဟိလာပြီး အနာမကျန်းမှုကြောင့် ကွယ်လွန်လားသူ သန်းထွန်းဖြစ်သည်။ ရသေ့တောင်မှ ကိုရန်အောင်၊ ဥာဏ်ထွန်းချေ၊ ခိုင်ပြည်သိန်း (နာမည်ရင်း ထွန်းထွန်း) (မွီးမြူရေးတာဝန်ခံ) (မြောက်ဦး)၊ စံသာအောင် (မြောက်ဦး)၊ ခိုင်ဆန်းအောင် (ပေါက်တော)၊ ခိုင်မြတ်ကျော် (စေတီပြင်)၊ မုန်တိုင်း (စစ်တွေ)၊ မြတ်ကျော်က စခန်းမှုး၊ စံသာအောင်က ဒုစခန်းမှုး။ ခိုင်ဆန်းအောင်က ဥက္ကဌ၊ ထိုင်းနှင့်နိုင်ငံခြားသို့အလားများသည်။

ဗိုလ်ရာဇာတပ်များ ပြည်ထဲကဖြတ်၍ ဘင်္ဂလားသို့ရောက်လာသောအခါ ခိုင်မြတ်ကျော်နှင့် ထွန်းစံရို့က အယင်လားကြိုသည်။ ထိုအချိန်တွင် အကျွန်ုပ်ရို့အား ပါတီတခုကပီးသော ဒုတိယကမ္ဘာစစ်သုံးမီးကျိုးမောင်းပျက်သနတ် (၅) လက်ကို လားယူသည်နှင့်ကြုံကြိုက်သဖြင့် သူရို့ကလမ်းပြ၍ အကျွန်ုပ်ရို့စခန်း ၀ါးခတ်ချောင်းသို့တပ်ချရန် ခေါ်ဆောင်လာခခြင်းဖြစ်သည်။ အကျွန်ုပ်ရို့စခန်း တောင်ကုန်းနားတွင် ရွာက ဒိုင်းနက်ရွာသားများတောင်ယာလုပ်သည်။ သစ်ပင်ကြီးများကိုခုတ်လှဲ၍ စပါးစိုက်ခြင်းဖြစ်သည်။ နှမျိုးမိသည်ကအမှန်။ သို့သော် ၀မ်းရေးထက် ဇာအရေးလည်းမခက်။ တောင်ယာခွတ်ဖို့ လူဆယ်ယောက်ဖက် သစ်ပင်ကြီးများကိုခွတ်လှဲပြီး မီးလျှို့ပစ်သည်များကို ကိုယ်တိုင်မြင်ဖူးသည်။ မြိုတောင်သို့ခရီးလားစဉ်ကဖြစ်သည်။ ဆင်တကောင် ကောင်းကောင်းတက်အိပ်နိုင်လောက်အောင်ကြီးသည်။ အကျွန်ုပ်ရို့စခန်းတ၀ိုက်တွင် ကန်းကျင်ပင်များစွာဟိသည်။ အချေခါ ကန်းကျင်သားနှင့် ကန်းကျင်ပျိုင်ကိုကြားဖူးသည်။ မြောက်ဦးသျှစ်သောင်းဘုရားလှိုင်ဂူတွင် ကျောက်တွင်းခွက်ငယ်များမှာ ကန်းကျင်ဆီဖြင့် မီးထွန်းရန် ထွင်းထုထားဖြင်းဖြစ်သည်ဟု လူကြီးသူမများပြောသည် ကြားဖူးသည်။ သို့သော် ကန်းကျင်ပင်ကိုကားမမြင်ဖူး။ တောထဲရောက်မှ မြင်ဖူးသည်။ ပေ (၃၀၀) လောက်မြင့်သည်။ အမေရိကန်က Project Maje က Edit T. Marante လာလည်သောအခါ ရွာက ဒိုင်းနက်လူမျိုးများတောင်ယာစိုက်ထားသည်ကို မိမိရို့စိုက်ပျိုးထားဟန်ပြု၍ ဓါတ်ပုံရိုက်ခံခသည်ကို ပြန်စဉ်းစားလျှင် ရယ်ချင်သည်။ ထိုအချိန်က မိမိ၏အသက်မှာ (၂၃) (၂၄) နှစ်ခန့်ဖြစ်သည်။ ပြောချင်သည်မှာ မိမိရို့စခန်းတောင်ကုန်းအနောက်ဖက်ခြမ်း ချောဇောင်းတွင် စင်းပြွန်းပင်ကြီးတပင်ဟိသည်။ အဖိုးမောင်ဟန် ဂျီပစ်သည့်မြောင်တလျှောက်တွင် ဓပြုတ်ပင် သုံးလေးပင်ဟိသည်။ ဓပြုတ်ပင်နှင့် စင်းပြွန်းပင်မှာ ခွဲမရအောင်တူသည်။ အပင်ကိုမြင်၍ ခွဲခြမ်းရန်ခက်ခဲသည်။ အသီးကိုမြင်မှ သိသည်။ စခန်းဇောင်းနားက စင်းပြွန်းပင်မှာ လူသုံးယောက်ဖက်ခန့်ဟိသည်။ ရာသီကိုက မမှတ်မိလိုက်ပါယာ။ ဆောင်ဦးပေါက်လား နွီဦးပေါက်လားမသိ။ စင်းပြွန်းသီးတိ တပင်လုံး ပန်းပွင့်ရေပိုင် ပွင့်နီပါသည်။ အကျွန်ုပ်ရို့ စခန်းကလူများမှာ စပျစ်သီးကိုမျှော်စပ်သောခွီးပိုင်ဖြစ်နီသည်။ မစားရဘဲလျှာရည်ယိုလျှက်ဟိသည်။ ဇာပိုင်လုပ်ကေကောင်းဖို့လည်းဂု။ ဂေါင်းစားနီသည်။ အပင်မှာ လုံးဝိုင်းရပ်စောက် ပေ (၂၀) ခန့် အကိုင်းအခက်မဟိ။ လက်ခကျည်းတက်၍မရ။ ၀ါးနှင့်လှမ်းဆွတ်ဖို့လည်းမမှီ။ စားချင်သည်မှာလည်း လျှာရည်ယိုနီသည်။ ထို့ကြောင့် မတတ်သာကေ အားလုံးသဘောတူ ပေါက်ဆိန်နှင့်ပေါက်ရန်ဆုံးဖြတ်လိုက်သည်။ နှစ်ရက်နှင့် တမွန်းတည့် ပေါက်ဆိန်နှင့်ပေါက်ရသည်။ အဓိက အားလာကြီးများမှာ ကိုရန်အောင် (ဆီးမှုး) နှင့် သိန်းမင်းဖြစ်သည်။ နှစ်ရက်တမွန်းတည့် ညဇာသားရောက်မှ စင်းပြွန်းပင်ကြီးဘုန်းဘုန်းလဲသည်။ အကိုင်းအခက်များပြိုသံမှာ မိုးကြိုးပစ်သံ၊ တော်ငလျှင်ပြိုကွဲသည်ထက် ကျယ်သည်။ စင်းပြွန်းသီးများကြွီကျသည်မှာ အာကာထက်က မိုးကျောက်ခဲများကျသည်အတိုင်းဖြစ်သည်။ ကြွီကျသည့်အသီးများကို အယင်ကောက်သည်။ တောင်းခရင်းနှင့် လေးငါးတောင်းရသည်။ ကျန်အသီးများကို ဤအတိုင်းအပင်ထက်၌တွဲလောင်ဟိနီစီသည်။ အယင်ညှိုးခြောက်မလားရအောင်ဖြစ်သည်။ တပါတ်နှစ်ပတ်လောက်ညိတိုင်းချဉ်ရည်ကြိုသောက်ရသည်။ ပထမတရက်နှစ်ရက် သောက်၍ ကကောင်းခြီသည်။ ထမင်းစားပြီးတိုင်း မြန်းလားပိုင် လန်းလားပိုင်တွိသည်။ သို့သော် ရက်ထပ်လာသောအခါ ၀မ်းပြည့်ဝမ်းရောင်ဖြစ်လာသည်။ အကိုင်းထက်က တွဲလွဲကျနီသောစင်းပြွန်းသီးများမှာ ဤအတိုင်းမစားဘဲ ပိန်ခြောက်ကြွီကျလားသည်။ ပဇောင် နမျိုးဖို့ကောင်းလိုက်တေမသိ။ အသီးစားချင် အပင်ကိုခွတ်၊ အရိပ်ခို အကိုင်းချိုး၊ စပျစ်သီးချဉ်သော ခဲဝါဘ၀ကိုမြင်မိတိုင်း ရင်ကျိုးမိ၍၄င်း၊ မျက်စိထဲ၌ ၄င်းစင်းပြွန်းပင်ကြီးကို မြင်ယောင်နီသိမ့်၍၄င်း အတွက်ရသောကြောင့် ဤစာအကြောင်းကို ရွီးလိုက်ရခြင်းဖြစ်ပါသည်။ သြော် ရခိုင်ပြည်ကြီးလွတ်လပ်ရေးအတွက် တောအူခဲဝါချေတရွီ ကျေးဇူးကန်းလီစွတကားတည်း။

အကျွန်ုပ်ရို့ရခိုင်သားတိအဖြစ်မှာလည်း စင်းပြွန်းသီးနှင့်တူသည်။ ဘ၀ကငယ်သော်လည်း ဘ၀င်က ဓပြုတ်သီးလောက်ကြီးသည်။ ရခိုင်ဘ၀ အတိတ်က ဓပြုတ်သီးပိုင်ယှောင်ကြီးခသော်ငြားလည်း အခုက စင်းပြွန်းသီးချေလောက်ရာကျန်ပျာ။

(သာလှဦး)

အမှတ်တရကဗျာ
xxxxxxxxxxxxx

အတိတ်နှင့် ပစ္စုပ္ပန် (၂)
------------------------
အယင်ခါ ဓပြုတ်သီး
အခု စင်းပြွန်းသီး --။

xxxxxxxxxxxxxxxxxx

အတိတ်နှင့် ပစ္စုပ္ပန် (၁)
------------------
အယင်ခါ
ဆင်စီးလို့
ရွှီထီးဆောင်းခ --။

အခု လားစီးပျာ
တောက်ကျာဆောင်းရ --။

(သာလှဦး)

ဘ၀င်မမြင့်ကဲ့ ကျွန်ရာ

ဘ၀င်မမြင့်ကဲ့ ကျွန်ရာ
---------------
ချမ်းသာလိုက်ပါဘိ
သိန်းသန်းကုဋေ
ဘဝင်မြင့်ဖို့မပျင်ကဲ့
ရခိုင်မှန်ကေ ကျွန်ရာ..။

လှလိုက်ပါဘိ
ရုပ်ရည်ရူပကာ
အလှမာန်မဝင့်ကဲ့
သဇင်ချေ…
ရခိုင်မှန်ကေ ကျွန်ရာ..။

တတ်လိုက်ပါဘိပညာ
ဘွဲ့တသီတတန်းနန့်
ပညာဂုဏ်မမောက်ကဲ့
အမောင်..
ရခိုင်မှန်ကေ ကျွန်ရာ..။

ဝလုံးခေါင်းထဲကလ
ပရေလို့ဟိလာ
စစ်မှန်ရေဂုဏ်
ခံစားဝင့်ကြွားနိုင်ဖို့
ကျွန်ဘဝကလွတ်အောင်
လက်တွဲချိတ်ထား
ကြိုးစားပါ ညီနောင်အပေါင်းရို့..။

မျိုးမြတ်လင်း (Myo Mrat Lunn)

ပဂျင်းချေတကောင်ရာ

ပဂျင်းချေတကောင်ရာ
--------------
နခမ်းစူစူ
ဝမ်းပူပူနန့်
ထုံထိထုံထုံ
ပဂျင်းချေတကောင်ရာ...။

ဒေချောင်းဒေရီ
ဒေကမ်းတလျှောက်
ပြာတောပြူးတော
ကဘိုင်တောတိ
တတောဝင်တတောထွက်
ဆလီခြုံအောက်မှာ ကဇတ်
ဖြားရီအတက်
ကူးလို့လာလို့ မြူးဖူးယင့်...။

ငရို့ချစ်တေ ဒေကမ်းရိုးမှာ
ကံဆိုးမိုးမှောင် တရက်နိခါ
တငါသည်တရွီဝင်ပျာယ်လာ
ခြုံချချင်ချ ပိုက်တန်းချင်တန်း
မျှားချချင်ချနန့်
ဗလဗွီသတ်ပျာယ်
အဆီကိုယက်
အသားကိုဆို့
အရိုးတောင်မျို
ပြားတောပါဖျက်လို့
ချင်ဆီပျင်ကေ
ငရို့တိမှာ ဒုက္ခအတိ...။

ငါ့မှာက
ဖြားတက်ဖြားကျ
အီးလောက်အောင်
အဆိပ်စူးလည်းမဟိ
ငမန်းတိပိုင်
မြင်စွာနန့်ကြောက်လောက်တေ
အစွယ်လည်းမပိုင်
ပတုန်းနန့် ဘုန်းဘုန်းသတ်လို့
သီလောက်တေ
မီကျောင်းလည်း မဟုတ်...။

ယေကေလည်း
ငါချစ်တေ ဒေကမ်းက
ငါ့မျိုးတိရာ အီးချမ်းဖို့ဆို
မျိုးချစ်စိတ်နန့် သန္ဓေတည်
နာကျည်းမှုတိစီးဝင်နီရေ
ငါ့အသည်းအစွမ်းနန့်
ယင်းအမျိုးယုတ်တိ
တစင်လုံးပြို
တခြုံလုံးစင်
တစိုင်လုံးပြုန်း
တဇင်းလုံးမြုပ်နိုင်ရေဆိုစွာ
ချထားရေငါးစာ
မျှားပါမှန်းသိကေလည်း
ပြလိုက်ချင်ယင့် --။

(ကိုမင်း)

ချစ်လို့ပြောစွာပါ

ချစ်လို့ပြောစွာပါ
-----------
နွမ်းမလားခင်
အလှမာန်ကို
ချော့လိုက်ပါဝေ
မောင်ကြီးချစ်တေ
ပန်းပွင့်ချေ...။

ယင်းပိုင်မဟုတ်ကေ
င်္သခါရက ခပြားသတ်လို့
ဗြားစားလားဖို့ဒေ...။

နင့်နားမှာ ရစ်သီရစ်သတ်
ယင်ကောင်တိ လာဟပ်စွာ
အဂယင့်မထင်ကဲ့...။

ယင်းချင့်တိစွာ
ငါ့ရို့အမျိုးကို
ပြတိုက်ပို့ဖို့ ပျင်နီစွာ...။

အရွက်ချေလှုပ်စွာ
ကြည့်ပနာရယ်ချင်ရေ
ပန်းပွင့်ချေကို
စကားချေချိုချိုနန့် မပွင့်တပွင့်ပြော
ဗျင်းဘလိုက်သံကြားကေ
မျိုးချစ်မောင်ရခိုင်
ရင်နာလို့မဆုံးနိုင်...။

အမျိုးချစ်တေလို့
သက်သီပြုချင်ကေ
ရက္ခိတအားမာန်
ထာဝရရှင်သန်အောင်
စိတ်အလိုကိုလျော့
သာယာမှုကို
သမာဓိနန့် ဇမ္ဘတ်ကိုင်
တောင့်ခံနိုင်မှ
အတန်ကျဖို့ယေ...။

မဟုတ်ကေတော့ခါ
အမျိုးသီလကိုခြီနှုန့်သတ်
အမျိုးစပျောက် ပိုးစဖောက်ကေ
ငါ့ရို့အဖတယောက်
တသက်လုံးရင်ကျိုးလီဖို့ယာ...။

အေးမောင်(ရင်အုံတော်ဓာတ်)
၁၆၊၀၈၊၀၉

ဂုဏ်သတ္တိ

ဂုဏ်သတ္တိ
--------
အမွီမရလိုက်တေ
ပဉ္စလက်ခတ်ဆန်ဆန် အနာဂါတ်ဘ၀
အလှတရားတခုကိုပင်
ဖွဲ့နွဲ့သီကုံးလို့မရ --။

ရှိအဆက်ဆက်ကဟိခရေ
ယဉ်ကျေးမှုအသျှိန်အ၀ါတိလည်း
လက်ဆင့်ကမ်းမှုတိပျောက်ပနာ
တသီးတခြားဖြစ်စီခရေ --။

တွေးခေါ်ကြံဆမှုတိနန့် တည်ဆောက်ခကတ်တေ
မြင့်မြတ်သောအယူအဆတိလည်း
လမ်းပြမဟိရေပိုင်
ထွန်းလင်းတောက်ပြောင်ခွင့်မဟိ --။

ရဟိပိုင်ဆိုင်ခရေ တီထွင်မှုတိကို
ရယူအခြီခံဖို့ မှတ်တမ်းမှတ်ရာ
မဟိစွာက ခြီတလှမ်းနောက်ကျစီရေ --။

ရီမြီဒေသ ကျဉ်းကျဉ်းချေကိုကပင်
လိုက်လျောညီထွေ နားလည်နိုင်ဖို့
ခရီးလားမှတ်တမ်းချေ မတင်နိုင်ခ --။

ခံစားမှုတိ စီးဆင်းလာရေ
နှလုံးသားပုံရိပ်ကို ထုတ်ဖော်ပြဖို့
ဘာသာစကားအငှါး မသုံးချင်ဘဲ
လိုက်နာကျင့်သုံးနီရရေ --။

လက်ချောင်းတိမညီမျှမှုကိုဝန်ခံယင်း
လက်သီးတလုံး၏ပြင်းအားကို
ဝေဖန်ဖို့ အနုပညာဆန်ဆန်
ရှိအဆက်ဆက်က
အစိုင်အလာကို လေ့လာချင်မိရေ --။

ပြောင်းလဲမှုတိအောက်မှာ
ထိန်းသိမ်းမှုနန့် တီထွင်မှုကို
သဟဇာတကျကျ မှတ်တမ်းတင်နိုင်ဖို့
ဂုဏ်သတ္တိတခု လိုနီရေ --။

စတိုး (၉၊၈၊၂၀၀၉)

စည်းလုံးကတ်ဖို့ယာဆိုကေ

စည်းလုံးကတ်ဖို့ယာဆိုကေ
----------------
သဇင်ပန်းခိုင် တမြိုင်မြိုင်ကေ
ရခိုင်မှာဘုရား တည်ထားပနာ
အယင်ခါက သာသနာရောင်
ထွန်းလင်းပြောင်လို့ ရွှီရောင်ထီးနန်း
စံမြန်းလတ်တေ ရခိုင်ပြည်မှာ --။

အဂုခါဆို ဇာတီပုထိုး
နန်းမြို့ရိုးတိ ကျိုးပဲ့ပြိုပျက်
ခြုံနွယ်တက်လို့ ကျောက်ထက်အက္ခရာ
ငါရို့စာနန့် ရိုးရာအမွီ
ပျောက်ကွယ်နီရေ ဌာနီရခိုင်ပြည်မဏ္ဍိုင် --။

ဘဝဆိုရေ တချက်ချေမှာ
ငါစွဲအတ္တ မာန်မာနနန့်
ဒေါသတိကို ရှိတန်းကတင်
မဆင်ခြင်ပဲ ဘဝင်လီဟတ်
ရှိဆက်ကတ်ကေ စုတ်ပြတ်သတ်ပနာ
အဂုခါဆို အာဏာသျှင်အောက်
ဒုက္ခရောက်လို့ ချိုးဖောက်ခံရ
လူ့အခွင့်ရေး ပိုင်ညာရေးနန့်
စီးပွားရေးဆို ပိုဆိုးလာကာ
လုပ်စရာယှား ဆန်စပါးနန့်
အသားငါးတိ စားဖို့မဟိ
ကြုံကာတွိလို့ ဖိနှိပ်ခံနီ
ရခိုင်မြီစွာ ဇာခါလွတ်မြောက်လီဖို့လဲ --။

ချစ်လီညီလီ စည်းလုံးလီလို့
ဖိုးဖီးရို့က မှာဟိစကား
လက်ကိုင်ထားပနာ အမျိုးဘာသာ
သာသနာတွက် ဆောင်ရွက်ကြိုးပမ်း
နိုင်စွာထမ်းလို့ လျှေက်လှမ်းကတ်ကေ
ငါရို့ပြည်မှာ သာယာဝဖြိုးလာဖို့ယေ --။

Arakan Dolphin (ကျောက်တော်)

လက်သီးဆုပ်နီကတ်တုန်းလား

လက်သီးဆုပ်နီကတ်တုန်းလား
------------------
ရင်ဖတ်ကွဲမတတ်
ငိုကျွီးနီတုန်း
ရက်တိတအိအိ ဖြတ်လားပျာယ်...။

လွမ်းဆွတ်မှုဒီဂရီ
တိုးနီကတ်တုန်း
လတိတဒိဒိ ကျော်လားပျာယ်..။

မျက်ရည်တိ၏
ကောက်ကြောင်းကိုလိုက်ငေးနီတုန်း
နှစ်တိတရွိရွိ ကုန်လားပျာယ်...။

ဇာပင်ဆိုဆို
ငါရို့ရင်ထဲမှာ
အနာတခုက ဂုထိသွီးတစက်စက်
မုန်းတီးမှုတိ
ဆထပ်တိုးယင်း
အသက်လျှူလိုက်တိုင်း တဆစ်ဆစ်နာကြင်တုန်း
မကြားဝံ့ရေ
အော်ငိုသံတိ
အိမ်မက်ဆိုးပိုင် လာပနာခြောက်လှန့်တုန်း...။

ဖိစီးမှုတိအောက်က
အပြင်းထန်ဆုံး
ရုံးထွက်အားတခု ငါရို့မွီးဖွားယင်း
ရက္ခိတသွီးနန့်
တည်ဆောက်ခရေ
ကမ္ဘာ့မြီပုံထက်.. ခြီတဖက်စာချေတွက်
ဒေါသတကြီး
ဆုပ်ထားရေလက်သီးတိလည်း
သနတ်ကိုင်ဖို့ ဖြီကတ်ရဖို့ပျာယ်...။

DO_OR_DIE (သီကေသီ ရှင်ကေရှင်)

အသီးပဒေသာ

အသီးပဒေသာ
----------
နန္ဒြာသီးပိုင် အသီးထက်မှာအပင်ပေါက်
အမျိုးတူချင်း အထက်စီးက
တခါလည်းမဆက်ဆံလီကဲ့ --။

ဂြင့်ခါးသီးပိုင် ခါးခါးသီးသီး
တခါလည်း မပြောလီကဲ့ --။

ကောင်းခင်မျှော်သီး(ချောတောင့်သီး) ပိုင်
အာကာပြိုဖို့အချိန်ကို ထိုင်မစောင့်နီကဲ့ --။

ဂယိုင်သီးမှာ အစိများရေပိုင်
ပဇိပဇတ် မများလီကဲ့ --။

ပတကာသီးပိုင်
အထဲမှာ ဟောင်းလောင်းမဖြစ်စီကဲ့ --။

ပနဲသီးမှာ တမွှာနန့်တမွှာပူးပြီးကေ
ခွှာရခက်တေပိုင်
ရခိုင်အချင်းချင်း စည်းစည်းလုံးလုံး
သွီးခွဲလို့မရအောင် နီထိုင်သင့်ပျာယ် --။

(လပြည့်)

အံဖို့ကောင်းရေ

အံဖို့ကောင်းရေ
-------------
မတွိချင်ယာဆိုခါမှ
သတိရနီရေ
ငါ့စိတ်တိကို...။

လားဖို့ယာဆိုခါမှ
နှုတ်လို့မရရေ
ငါ့ခြီထောက်တိကို...။

နှုတ်ဆက်ပါရေဆိုခါမှ
ထောင်လို့မရရေ
ငါလက်ချောင်းတိကို...။

ငိုဖို့ကျခါမှရာ
ထွက်မလာရေ
ငါ့မျက်ရည်တိကို...။

အလကားလားရေခါ
ဝါးလုံးကိုထိုးပစ်စွာပိုင်
ပျံရေ ငါ့ခြီထောက်
ပြီးဖို့ကျခါမှ
မ,လို့တောင် မရစွာကို...။

ထမင်းဝ,နီရေခါ
လူများအိမ်မှာ စားလို့ရာ
ခြီခရေ လူတယောက်
စားစရာမဟိရေခါ
တောင်းစားရဖို့စွာကို
ရှက်တေအဖြစ်တိကို...။

မွီးဖွားလာရေခါ
ပြုံးစိစိနန့်
သီဖို့ကျရေခါမှရာ
မျက်ရည်ပါးရည်တိ
စီးရေအဖြစ်တိကို...။

ကိုယ့်လူမျိုးအတွက်
အကျိုးဆောင်ရေလူတိကို
လူ့ဘောင်အသိုင်းအဝိုင်းကဖယ်ထုတ်
အမျိုးယုတ်ကိုကျကေ
ဘုရားပိုင်ကိုးကွယ်နီရေလူတိကို...။

“ကိုယ့်စကား” ကိုပြောကေ
အောက်တေဆိုပနာ
“ယောက်ဖစကား” ကိုကျကေ
ကြွိနီအောင်မွှတ်နီကတ်တေလူတိကို...။

အမျိုးသားရေကို ဗန်းပြပနာ
ကိုယ့်ဝမ်းဝရေးအတွက်ရာ
လုံးနီကတ်တေလူတိကို...။

အမှန်တရားကိုထောက်ပြလို့
ငါ့ရို့အဖွဲ့ကို ထိရေဆိုပနာ
အဝီးသို့ဖယ်ထုတ်..
ဖားပြုတ်ကေပိုင်
Sexy (ဆိတ်ဆီ) ရုပ်ပေါက်နီရေ
ပိန်မချေတိကို
ပူဇော်ပသနီရေလူတိကို...။

ကိုယ့်အမျိုးအတွက်
လုပ်ဖို့စွာကိုမပြောကဲ့
ကိုယ့်ဝမ်းကိုတောင်က
မကျောင်းနိုင်ရေ
ငါ့ဘဝချေကိုလည်း...။

(ကျောက်ဖြူသားချေ)
၎-၇-၂၀၀၉

ရခိုင်ဆိုစွာ

ရခိုင်ဆိုစွာ
--------
ရခိုင်ဆိုစွာ..
တယောက်တည်းထိုင်
လဒမှိုင်လို့
ပျင်းရေဆိုပနာ
အဖော်ရှာရေ --။

ရခိုင်ဆိုစွာ..
တယောက်က နှစ်ယောက်
စုပြီးအဖော်
ရပြီးသော်ကား
ပျော်ရေဆိုပနာ
ပုလင်းကိုင်လို့
ဇာတိနာကို ထုတ်ပြရေ --။

ရခိုင်ဆိုစွာ..
အယစ်ရည်ဖတ်
ကိုယ့်ခြီထောက်ကို
ကိုယ့်မနိုင်ခါ
“ငါ့ဝေး…ရခိုင်”
ပုလင်းကိုင်းယင်း
အမျိုးချစ်ကြောင်း
ဖင်ဟောင်းလောင်းနန့်
ခတောင်းမပါ
လူတိရှိမှာ ရူးခြင်းပေါ်ရေ --။

ရခိုင်ဆိုစွာ..
ဝိုင်းကာသောက်ကာ
ဇာတိနာကို
ပုလင်းထောင်ယင်း
သောက်နီယင်းမှာ
မဆုံးပါသိမ့်
ရခိုင်အချင်းချင်း
ဓားဆွဲဒုတ်ဆွဲ
ကော်ပနာဆဲကေ
ထိုးကတ်သတ်ကတ်
ခွတ်ကတ်ပြန်ရေ --။

ရခိုင်ဆိုစွာ..
“အမျိုးသီလ နှစ်ဌာနကို
စောင့်နိုင်ခ” လို့
ပိုင်ဆိုင်ခရ
ဒေနာမကို
ဆက်ပြီးကေရာ
မထိမ်းပါကေ
နောင်လာနောက်သား
ရခိုင်များအတွက်
မှတ်တမ်းတင်ခါ
ရခိုင်ဆိုစွာ
ဟောင်ဖွာ ဟောင်ဖွာ --။

ကျောက်ဖြူသားချေ
(၃၀-၆-၂၀၀၉)

ပုသင်

ပုသင်
-------
ငါပြောမည်..ပုသင်..
သေချာနားထောင်ပလင်...
မင်းအတွေးတိ..လမ်းချော်စွာလေ
ငါဖမ်းပျာယ်ပြမည် ဒေ...။

လာလားမည်..ပုသင်ချေ
ဇာတွေးပျာယ် ငေးနီလေ
မင်းဂေါင်းညိတ်ဖို့..အကျင့်ပါနီစွာမှာ..
ဝမ်းလည်း..ဖူးဖူးလာယာ...။

ဇာလဲဝေ...ပုသင်
ငါက ယုံကြည်ချက်ကိုမပျင်
မင်းဝမ်းမြောက်ဖို့အတွက်နန့်တော့ခါ
ငါ့စကားတိ အရောင်မပြောင်းနိုင်ကာ...။

ယာ.. ဂွရာ..ပုသင်ချေ
ရခိုင့်လူ့ဘောင် ပျက်ပြိုရေဆိုပြန်ရေ
မင်းပြောရေ စံမှီလူ့ဘောင်ဆိုစွာကား
တုံ့ပြန်မှုမဟိရေ သင်းချိုင်းကုန်းလား...။

ငါပြမည်..ပုသင်
ငါက မင်းပိုင်မထင်
အဆန်းအသစ်တိနန့်..ပြောင်းလဲဖို့အားယူလို့
ယေမှ..မသီဆုံးရေလူ့ဘောင်ဖြစ်ဖို့...။

မှာထားမည်...ပုသင်ချေ
ငါလည်း ရခိုင်သားပါဝေ
ရခိုင်ပြည်ထူထောင်ရဖို့စွာ
မင်းမိမလားစီချင်ပါ...။

ကြာလားယာ.. ပုသင်
ငါရို့ ဖိုးဖီးတိခေတ်...အယင်
ဒေမြီမှာ ထီးနန်းစိုက်ပျာယ်
ပြည်တကာဦးညွတ်ခရေ...။

နာဖို့ဒေ..ပုသင်ချေ
မျန်မာကို ထိုင်ရှိခိုးရေ
လာသိမ့်ရေ..အမြင်ကျယ်ယောင်ယောင်
မင်းရို့တမျိုးလုံး..မျိုးဖျက်ကောင်...။

ဝါမနီကဲ့.. ပုသင်
ရရိုးချေ ပြောပလင်
မင်းပြောရေစကားတိ ထွီးယှုပ်တေ
မျန်မာစကားအတိုင်း ဆွီးယုတ်တေ...။

ငါညောင်းယာ.. ပုသင်ချေ
ရခိုင်မိဘက မွီးလာစွာမနားဝေ
ရောက်တေနီရာမှာ..၀င်ရောပျာယ်ယောင်
မင်း...ပုသင်ပိုင် အရောင်ပြောင်းရေ အကောင်....။

DO_OR_DIE (သီကေသီ ရှင်ကေရှင်)

(ပုသင်) ကို (ပသင်) ၊ (မည်) ကို (မေ) ၊ (ရှင်) ကို (Rhun) ဟု အသံထွက်ဖတ်ပါ။

ရင်ခုန်ခြင်းစာမျက်နှာ

ရင်ခုန်ခြင်းစာမျက်နှာ
----------------
နှာဖားထိုးရေပိုင်
ချိုင်နှောင်ရင်တွင်း
နာကြင်ကိုက်ခဲ တနိမှာ
လျပ်စီးလိုက်တေနန့်
ကောင်းခင်ထက်မော့ကြည့်
မိုးသောက်ကြယ်အတိ
ပကတိအတိုင်းရာ --။

ချစ်သူနာမည်ချိတ်ထားရေ
ရင်ဖတ်ဒဏ်ရာမလား
ဗုံးပိုင်ပေါက်ကွဲသံတိ
မိုးခြိမ်းညံလား --။

အမုန်းဂယက်ဆောင့်တွန်းခံ
လှိုင်းလီထဲ
ငါ...
စီးမျိုးနီခ
မလှပရေကံတရားလား
နဒီသောင်ယံ
ကမ်းခြီနား
ငါးစာဖြစ်ချင်စွာရာယေ --။

ငါ...မသိ
အသိနောင်တနန့်
ရှိဆက်မိုက်ရူးနီရေငါ့အဖြစ်
အပြစ်မဖုံးကတ်ပါကဲ့ --။

ဆယ်စုနှစ်တခုကျော်ပျာယ်
ငါ့...အချစ်
အမုန်းတွင်းနက်ထဲ
အဆိပ်သင့်ဒဏ်ရာကျိန်စာနန့်
အဟုတ်
ပလုပ်ကျင်းရေထိ
ခါးသက်နီရေ...အချစ်
ဒေအဖြစ်ကိုရာ
သာခြင်းချေနန့်လွမ်း
ဗလီချေတကောင်ပိုင် တဖက်စောင်း --။

လူတိပျော်နီကတ်တေအခိုက်
ငယ်သံပါအောင်ကျွီးအော်
အရူးပိုင် အယောင်ယောင်အမှားမှား
မျက်ရည်ကိုသုတ်ဖယ်
ဖိစီးဒဏ်ရာတိနန့်
ထွက်ပေါက်ချေတခုတောင်
ရှာမတွိနိုင်ရေအထဲ...
ဒုက္ခကိုတွယ်ဖက်
ကမ်းပါးအောက် ဇောက်ထိုးမကျအောင်
ဟန်ဆောင်...
ရပ်စောက်ရပ်နီရယင့် --။

ရင်တွင်းမှာ
နာကြင်နီကေလည်း
သူ့မျက်နှာကိုတွေးမြင်
သူ့စကားသံကိုကြားယောင်
အားအားအဖြစ် ငါ့ရင်တွင်းဟိနီသိမ့်ယင့် --။

တောင်းရင်းမှာစတွိခရေသူ
ဒဏ်ရာကိုပီး
သွီးတစက်ရာဇ၀င်
အမုန်းမြှားနန့်ပစ်ထည့်
ကျစ်ကျစ်ပါအောင်လှည့်ဖျား
မာယာကွင်းဆက်
ငါ...ကိုယ်တိုင်တိုးဝင်
ဂေါင်းမဟိရေလူသားပိုင်
ရုန်းမထွက်နိုင်ကေလည်း --။

အချစ်
ချစ်မိသူရာမှားလား
မှားပတ်စီထားဖိ --။

ခရုသင်းမုတ်လို့
အောင်ပွဲခံ
မာန်အဟုန်နန့်ချီတက်ဖို့ --။

စစ်မှန်ရေအချစ်
စွန့်လွှတ်နိုင်ခြင်းနန့်ရာ
အဆုံးသတ်ရဖို့လား
ငါ...မဆုံးဖြတ်ရသိမ့်
မင်းအတွက်ထာဝရ
ထီး...မဖြစ်ကေလည်း
စိတ်ကူးတိလမ်းပြပီးဖို့
မီးရှုးတိုင်ဝါး...
ဆောင်းနှင်းထဲ စောင်ချေတစောင်ပိုင်
နွီးထွီးလိမ့်မည် --။

အတ္တတိမ်တိုက်ကြား
အိမ်မက်တိလှလာဖို့
အဖြူရောင်လီညှင်း ပါးပြင်ကို
နမ်းလျှူပါဖို့လား --။

သက်ပြင်းတခုချ
ရီလှိုင်းက တောင်စိုင်မိုးပိုင်ပြင်းထန်
ပင်လယ်ဝကို ထွက်ကြည့်မိခါမှ
မုန်းတိုင်းလို့သိလိုက်ရရေ
မင်းရယ်သံက
ငါ့စမ်ချောင်းနားဘေး စီးမျိုး
ပဲ့တင်ဟပ်သံ
ရင်ကို နာကြင်ကိုတ်ခဲ
ချစ်ခြင်းတရားကို ပခုံးထက်ထမ်းပိုး
ခရီးဆက်နီ --။

လှော်ခတ်ယင်း
လမ်းပျောက်ရရေအဖြစ်
ကြယ်စင်ထူထပ်တေ ည
ဝိုးတ၀ါးခြောက်သွိ လွမ်းနီယင့်..ချစ်သူ --။

ဘ၀..ပြဌာန်းချက်တိလွဲချော်
ကြယ်ရောင်တိလင်းပါယင့်
အရောင်ကွဲကြိုးနှစ်ချောင်း၏နိယမ
သတ်မှတ်ချက်အောက်
မျက်တောင်မှိက်ထားရရေ
ဘ၀..
လွတ်ကင်းမှုမဟိခစွာအမှန်
အော်..ဘ၀
တစစီဝီးကွာ
ပြန်ဆုံလမ်းမဟိရေ ငါရို့ 
ဒေမြို့ ကိုတည်ဆောက်
အမုန်းတံတိုင်းကို ထိုးမဖောက်နိုင်ရေနောက်
ပြန်လမ်းမဲ့
သီရွာပြန် ငါ
သက္ကရာဇ်တိပြောင်း
အခါနှောင်းမိုးချေရွာကေတောင်
ခြောက်သွိသစ်ကိုင်း
ပိတောက်ပွင့်နိုင်ဖို့သိမ့်လား --။

နက်ဖန်ဆိုစွာမသေချာကေလည်း
မျှော်လင့်မိရေ
နောက်ဘ၀ကိုရာ
တမ်းတအားကိုးမိရေအခါခါ --။

ခိုင်မြတ်သျှင်(စနီချောင်း)
01.07.2009

ဝကန်

ဝကန်
----
စွတ်ကေထ
သွိကေထိုင် --။

AMP ကို နှုတ်ဆက်ခြင်း

AMP ကို နှုတ်ဆက်ခြင်း
----------------
လမ်းခွဲစွာ ဝမ်းနည်းစရာလား
ရခိုင်ပြည် ရခိုင်သမိုင်းနန့်
ရခိုင်ရွာချေမှာ မွီးဖွားရေငါ
ရခိုင်စာပီကို ဖော်ထုတ်ဖို့
လောကကြီးကို စတင်ဝင်လာရေ --။

ကမ်းမမြင် လမ်းမထင်ရေ
အစအနပျောက် လက်ဝါးကြီးအောက်က
ပျက်စီးနီရေ အမျိုးသားကို
မြတ်နိုးလာအောင် ရွီးပီးနီရေ
ကဗျာရွီးသူ ထာဝရသိရိနန့်
ရခိုင်သားတိုင် လက်ချင်းဆက်
စည်းရုံးမှုနန့် ဆက်သွယ်လာဖို့
ရခိုင်အမျိုးသားရေး ရှင်သန်လာဖို့
ဖြည့်စီးပီးနီရေ (AMP) နန့်
အမျိုးသားစိတ် ငါမှာဟိရေလို့
ဟန်ဆောင်မှုနန့် နူတ်ဆက်နီရေလူက
ကဗျာရွီးသူ ထာဝရသီရိကို
အကြောင်းပြချက်မပီးဘဲ Ban လိုက်ကတ်တေ --။

ပြန်မလာပျာယ်လို့ ငါသိလိုက်တေအချိန်
(AMP) ကို မြတ်နိုးကေလည်း
လမ်းခွဲနောက်လှည့် လားရဖို့ပျာယ်ကား
ဖြစ်နိုင်ဖို့ဆိုကေ ငါမင်းတွက်
ရခိုင်သားတိ ရခိုင်ဂုဏ်နန့်
ရခိုင်အမျိုးသားရေးကို အကောင်ထည်ဖော်
မျိုးချစ်စိတ်ဓါတ် ပြည့်ဝလာဖို့
အမျိုးသားစာပီနန့် မင်းရှင်သန်လာဖို့
ကဗျာဆက်လက် ရွီးချင်ခသိမ့်ရေ --။

ယေကေလည်း
ငါအမြင်နန့် ငါအတွေး
ငါခံစားချက်နန့် ငါကဗျာကို
မင်းနီရာထဲက အမျိုးပျက်လူအတွေးနန့်
တိုက်ဖျက်ပစ်လိုက်ကတ်တေ --။

အသက်လျှူမဝသိမ့်ရေ
လူတယောက်ငါဖြစ်ကေလည်း
ငါလမ်းခွဲရဖို့ပျာယ် (AMP)
လောကဓမ္မတာ သဘောအရ
လမ်းခွဲစွာ ဝမ်းနည်းစရာမဟုတ်ပါနန်း
အတ္တ္တမာန်မာန မထားဘဲ
ငါကိုခွင့်လွှတ်လိုက်ပါဖိ --။

(ထာဝရသီရိ)

မှတ်တိုင် ၁၇ မှ ၁၈...၁၉...၂၀...

မှတ်တိုင် ၁၇ မှ ၁၈...၁၉...၂၀...
-------------------------
သူငယ်ချင်း ...
အချိန်နှင့်ရင်းပြီးကေ
မင်းရင်ထဲ နှလုံးသားထဲက
ဖြစ်တည်လာရေ မှင်စက်နန့်
ရွီးထားရေ မင်းဒိုင်ယာရီ
ဒါးမြတိုက်ခံလိုက်ရလို့
စိတ်မညစ်ကဲ့ သူငယ်ချင်း --။

အပေါင်းသင်း.....
ရက္ခိတစိတ်ဓါတ်အရင်းခံလို့
ဥဏှောက်အသွီးသားက
စီးဆင်းလာရေ မှင်စက်နန့်
သက်သီပြ မင်းဒိုင်ယာရီ
အဓမ္မ အလုခံရလို့
စိတ်ဓါတ်မကျကဲ့ အပေါင်းသင်း --။

ရောင်းရင်း မင်းပိုင်ယှောင်
ရှိက အခိုးခံလိုက်ရရေ
ဒါးမြတိုက်ခံလိုက်ရရေ
စတည်းခံလိုက်ရရေ
ဘဝတူမိတ်ဆွေ သွီးသောက်
ဂန္ဓဝင်မြောက် (၁၆) ယောက်၏
အွင်လိုင်းက ရခိုင့်ဒိုင်ယာရီသမိုင်း
ငတက်ပြား သစ္စာတရားနန့်
လူအချင်းအချင်း မူရင်းကို
အဓမ္မသိမ်းပိုက် ပိုင်ဆိုင်ချင်ရေ
သူ့မှာတမ်းအရိုင်း ဘလိုင်းရာဇဝင်
ကမ္ဗည်းထိုး မှတ်တမ်းတင်စွာ....

ဒေဂု (၁ရ) ယောက်မြောက်
ကြေငြာခြိမ်းခြောက်
နောက်မှာ ၁၈ - ၁၉ - ၂၀ ……
တန်းစီးလို့ဟိနီလီရေ
မင်းနားလည်နိုင်ပါစီ ရောင်းရင်း --။

(မောင်ပန်းသီး)

သံမနိုင် ကျောက်မနိုင်

သံမနိုင် ကျောက်မနိုင်
--------------
ဘ၀ကမြက်
လေးဖက်တွား
မြီမှာလားကေလည်း
သံထက်မာ ကျောက်ထက်ခိုင်
သံမနိုင် ကျောက်မနိုင် --။

(သာလှဦး)

တပည့်မှဆရာသို့ ဆုံးမစာ

တပည့်မှဆရာသို့ ဆုံးမစာ
----------------
ဆရာဂျီဝိ မျက်စိပြာပြာ
ကိုယ့်ရခိုင်စာ
ငယ်ရွယ်စိုင်ခါ သင်ယူပါ --။

(တပည့်ကျော်)

လွမ်းရ ဓည၀တီ

လွမ်းရ ဓည၀တီ
---------------
ရွှီပင်လယ်ကြီး၊ ဇာပိုင်ဆီးလည်း
ခရီးမ၀ီး၊ အနီးချေပင်
ပြီးလမ်းမထွက်၊ လီယာဉ်တက်၍
မိုးထက်အာကာ၊ ကောင်းခင်ပြာဝယ်
ထိုမှာမျှော်ယင်း၊ ဤကြည့်ယင်းဖြင့်
မြင်ကွင်းစုံဆန်း၊ တောင်ညိုတန်းနှင့်
ကမ်းခြီအလှ၊ ကြည့်မ၀တည်း
ဓည၀တီ၊ ဆီးပန်းချီပိုင်
ရွှီပြည်ရခိုင် သာစွလေ --။

ဂစ္ဆပနဒီ၊ မြစ်ရီပြင်လွှာ
လပသာလျှင်၊ ပြီးလာဆုံဆိုက်
ထိုခိုက်ခဏ၊ လောကနန္ဒာ
စေတီသာကို၊ ကောင်းစွာဦးချ
ဖူးမျှော်ရ၍၊ ချမ်းမြမဆုံး
ပီတိဖုံး၏၊ သလုံးတော်ဓါတ်
စေတီမြတ်နှင့်၊ အထွဋ်ထင်ရှား
ဘုရားစုံညီ၊ လက်ဦးချီသော်
ဌာနီရခိုင် သာစွလေ --။

သြော် ရခိုင်ရခိုင်
ရခိုင်အလှ၊ ရှုမ၀တည်း၊
နှမချစ်ဖွယ်၊ အပုချေရို့
ရွှီသဇင်ခိုင်၊ အလှပြိုင်သော်
နိုင်မည်မှာက၊ ရခိုင်အလှပင်
မေဃ၀တီ၊ မာန်အောင်မြီနှင့်
ဒွါရာဝတီ၊ သံတွဲမြီနှင့်
ရမ္မာဝတီ၊ ရမ်းဗြဲမြီထိ
တလီခြီဆန့်၊ အနှမ့်လည်လား
ဘုရားစုံစွာ၊ ဖူးလိုပါလည်း
ကိုယ့်မှာအခွင့်၊ ခန့်မသင့်၍
ရင်နင့်ခံစား၊ လွမ်းစိတ်များဖြင့်
တရားသိမှတ်၊ ဦးညွတ်ပူဇော်
စိတ်ဖြင့်သာလျှင်၊ ဖူးမျှော်ပါ၏
မုနိရပ်မြီ၊ ဓည၀တီကို
အလီလီအခါခါ လွမ်းမိရေ --။

(မြင်းမှုး မောင်နိုင်မိုး)

ထုဆစ်လက်ရာ

ထုဆစ်လက်ရာ
----------
ခံစားမှုနန့် အားလုံးအောင်မြင်ဖို့
နိရက်သစ်ကို ဦးတည်ပြီးလားနီကတ်
မမြင်နိုင်ရေ ကံတရားကိုအပြစ်ဖို့
ယုံကြည်မှုတိ ယိမ်းထိုးလာရေနောက် --။

ငါ.... အကြောင်းမဲ့
လူသားတိကို မုန်းတီး
ရွံမိအံမိရေနောက်
သူရို့တိပြောနီကတ်တေ
အမှောင်လောက
ငါ....ဆက်လျှောက်မိုက်နီရေ --။

မှန်ကန်ရေထင်လို့ စကြာဝဠာထဲက
သဲတပွင့် ငါ... ခါးခါးချေမျိုချ
အရုပ်ကြိုးဆွဲပိုင် ကကွက်ကလွတ်မြောက်ဖို့
အသွီးသားတိ ကုန်ခမ်းခြောက်သွိလို့
စက်ရုပ်ဖြစ်ကေတောင်
အသုံးတော်ခံဖြစ်နီဖို့အစား --။

ငါလေ....တမ်းတမိရေ တခါတခါ
ချစ်သူလက်ဆွဲပြီး
အီးယောင်ဝမ်းထဲကို --။

မကောင်းဆိုးဝါးတကောင်ပိုင်
ပြုပျင်ဖို့ခက်ခဲရေစိတ်
ဇာသူဖန်တီးပီးခရေလဲမသိ
တမာပိုင်ခါးခါးချေ အလွမ်းသခြင်းတိဖွဲ့ဆိုလို့
ငါ့လက်ရာ ၀င်းသန္တာလည်းမကြိုက်
အဖြစ်သနင်းတိရာ
နွီဒဏ်သင့် ကျိုးကိုင်းပိုင်
ငါ....လေ
သတိရမိယင်း လွမ်းငိုယင်းနန့် --။

ခိုင်မြတ်သျှင်(စနီချောင်း)
၎.၈.၂၀၀၉

အမှန်တရား အမှားတခု

အမှန်တရား အမှားတခု
---------------
မြို့စွန်မြို့စမှာ ညီကိုယ်နှစ်ယောက် အိမ်ထောင်ကျပနာနီကတ်တေ။ ညီကဆင်းရဲရေ။ အစ်ကိုကချမ်းသာရေ။ တနိမှာ အစ်ကိုကပြောရေ အဝေညီ..မင်းဆင်းရဲရေ ငါ့ပါးကဖေသာယူပနာလုပ်စား...မင်းအဆင်ပြေခါ ငါ့ကိုပြန်ပီး။ ယေခါညီက ကောင်းကောင်းရေအစ်ကို ယင်းပိုင်ဆိုကေ ညီညီစီပွားရေးလုပ်လိုက်မည်။ အဆင်ပြေခါ အစ်ကိုပီးထားရေဖေသာကိုပြန်ပီးမည်။

နောက် (၂) နှစ် (၃) နှစ်ကြာခါ..အစ်ကိုကဆင်းရဲလားရေ။ ညီကအစ်ကိုပီးရေ ဖေသာတိနန့်ရင်းနှီးပျာယ်အလုပ်လုပ်လို့ ချမ်းသာလားခရေ။

ယေခါအစ်ကိုက သားချေတယောက်ကိုလက်မှာဆွဲပျာယ် ညီအိမ်ကိုအလည်လာရေ။
(ညီ)...... “ဇာကိစ္စဟိလို့လာပါလဲ အစ်ကိုကြီး”
(အစ်ကို)..... “အဝေ ငါကောင်းဆင်းရေလားခပျာလ်အဂု ယေဇုနန့်..မင်းငါ့ပါးကယူလားရေဖေသာတိကိုတချက်ပြန်ပီး”
(ညီ).... “အစ်ကိုပါးကငါ....တခါလည်းမယူကား ဖေသာ”
(အစ်ကို).... “အဝေညီ မင်ငါ့ပါးယူလားဖေသာတိနန့်လုပ်စားလို့ အဆင်ပြေနီရေမလားဂု..ငါမှာစားစရာမဟိပျာယ်အဂု တချက်ချေပြန်ပီးဝေ”
(ညီ)....... “အစ်ကိုမှာ ဇာမှာလဲအထောက်ထား၊ သစ်သီပြနိုင်ကေရလိမ့်မည်။ မဟုတ်ကေမပီးနိုင်”
(အစ်ကို).... “အဝေညီ..မင်းနန့်ငါနှစ်ယောက်သိစွာ ငါဇာသူ့ကိုသက်သီထားရဖို့လဲဝေ...အေးဝေကောင်းယင့် ငါမှာသက်သီပြစရာကားမဟိ ငါသစ္စာဆိုယင့်။ ဒေပတ်ဝန်းအတွင်းမှာဟိရေနတ်မင်းရို့ရာ အသိဆုံးပါ။ အမှန်ရာ ငါ့ညီရာ ငါ့ပါးကဖေ့သာချီးလားခစွာမှန်ကေ အကျွန်တော်ဖေသာပြန်ရပါစီ။ (သားချေကိုကောက်ပနာ) မမှန်ဘဲနန့် အကျွန်တော်မုသားစကားဆိုကေ ငါအချစ်ဆုံးသားချေစွာ ကျောက်ရုပ်ဖြစ်ပါစီ”

သူသစ္စာပြုပြီးလို့အဆုံးမှာ သူ့သားချေစွာ ကျောက်ရုပ်ဖြစ်လားခလီရေ။
(သူမှန်နီယင့်နန့် ငါ့သားချေဇာကြောင့်ကျောက်ရုပ်ဖြစ်လားခရလဲ စိတ်မှာတွေးပျာယ် ) “လောကကြီးမတရား..လောကကြီးမတရား”...အော်ပနာ...လူတိကိုရွံရွံနန့် သားချေကျောက်ရုပ်ကိုကိုင်ပျာယ် တောထွက်လီရေ။ စိတ်ညစ်ညစ်နန့် ညောင်ပင်ကြီးအောက်မှာထိုင်နီခါ
သစ်ပင်စောင့်နတ် အနားကပေါ်လာပျာယ်... “အသင်လူသားဇာဖြစ်လဲ..ကောင်းစိတ်ပျက်နီရေကား” လို့မီးရေ။
ယေခါ ယင်းလူက .....“အေး...ဒေပိုင်ဒေပိုင်...အမှန်တရား အမှားတခုဖြစ်လားရေ”..ဆိုပျာယ် အဖြစ်ပျက်စုံကိုပြောပြရေ။

ယေခါ ညောင်ပင်စောင့်နတ်က... လူဆိုးတိနီရေအရပ်မှာ... နတ်ကောင်းမနီနိုင်...နတ်ဆိုးရာနီရေ။ ယင်းပိုင်နီရာမျိုးမှာ သစ္စာဆိုကေ “အမှန်တရား အမှားတခု” ဖြစ်ဖို့စွာသေချာရေ အမောင်လူသား။

ကနိခါ...“အမှန်တရားဖုံးကွယ်မရ” ဆိုရေစကားးလုံးကိုသုံးနီကတ်ကေလည်း တခါတရံ “အမှန်သည်အမှား” .. “အမှားသည်အမှန်” ဖြစ်လားစွာတိကို သတိပြုမိကတ်ပါလိမ့်မည်။

အသျှင် (Ashun)

နှုတ်ဆက်ခရေ ချစ်သောအေအမ်ပီ

နှုတ်ဆက်ခရေ ချစ်သောအေအမ်ပီ
----------------------
ယောင်လို့တောင်က
မတွေးတောမိခ
မင်းကိုနှုတ်ဆက်စကားဆိုမည်လို့
တကြိမ်တခါမျှ
အိမ်မက်တောင်မမက်ခ
မင်းကိုဒေပိုင်ခွဲခွါဝံ့ဖို့လို့ --။

မင်းကို ချစ်လိုက်ရစွာ
အရာရာ ပုံအောလို့
အိပ်ချိန် အလုပ်ချိန်
ကျန်ရေအချိန်အားလုံး
မင်းအတွက်ငါပီးဆပ်ခစွာ
အခုအခါမှာတော့
သဘောထားတင်းမာ
အာဏာသျှင်ဆန်ဆန်
မင်းအဖအပြုအမူကြောင့်
အနစ်နာခံမှုကိုအရင်းခံ
ကြာမြင့်စွာတည်ဆောက်ခရေ
ငါရို့နှစ်ယောက်အချစ်
ပျက်သုဉ်းရဖို့ဗျာယ် --။

မင်းနာမည်ကခန့်ညားလို့
လူတိုင်းကမင်းအပါးမှာ
အခစားဝင်နီကတ်စွာ
မင်းအဖကိုကြိုက်လို့မဟုတ်။

ကမ္ဘာ့ထောင့်ပေါင်းစုံက
ကိုယ့်အမျိုးကိုဆုံဆည်းပီးနိုင်လို့
မင်းဘက်မှာ အနွံတာခံနီစွာ
မင်းအဖသဘောထားကို
ခွင့်လွှတ်လို့မဟုတ် --။

မင်းအဖရွာသူကြီးက
ယမ်းထောင့်သေနတ်ကိုကိုင်
ရွာစဉ်လှည့်ကေလည်း
ဒေလူတိကြောက်စွာမဟုတ်
အသည်းနှလုံးတိုင်းကို
လှုပ်ခါနိုင်စွမ်းဟိရေ
မင်းကို မစွန့်ခွါနိုင်လို့
လူတိုင်းက သည်းခံနီကတ်စွာ --။

မင်းအကူအညီနန့်
စုတ်ပြတ်သတ်နီရေ
ငါရို့ဆွီမျိုးဘဝတိ
အိပ်မောကျနီရေ
ရခိုင့်လူ့ဘောင်ကို
ငါ နှိုးထစီဖို့လို့
ရည်မှန်းချက် တသီတတန်းနန့်
အခုတော့
ညှာတာမှုကင်းမဲ့ရေမင်းအဖက
ငါရို့နှစ်ဦးကြား
ခိုင်မာရေသံယောဇဉ်ကို
ဘလိတ်ဓားပါးပါးချေနန့်
သွီးအီးစွာဖြတ်တောက်ပစ်လိုက်ပျာယ် --။

ငါသာလျှင် ငါသခင်
ငါလုပ်လျှင် အမှန်ထင်
သွီးနထင်ရောက်နီရေ
မုတ်ဆိုးဖို အဖမျိုးကိုမှ
ရတတ်တေ မင်းအတွက်
ငါ ရင်နာမဆုံးချစ်သူ--။

မက်ခသမျှ အိပ်မက်
လီထဲမှာပျောက်ကွယ်
ထားခသမျှရည်မှန်းချက်
စိတ်ကူးထဲမှာ ပျောက်ဆုံး
မင်းအဖအနိုင်ကျင့်မှုတိ
ငါ သည်းမခံနိုင်ပျာယ် ချစ်သူ --။

မင်းကိုရင်နင့်အောင်ချစ်ကေလည်း
မင်းအဖချုပ်ချယ်မှုအောက်မှာ
ရုးန်းမထွက်နိုင်ရေမင်းအတွက်
ငါ.. နှုတ်ဆက်စကားဆိုရေ
ချစ်သော.. ချစ်သော.. အေအမ်ပီ --။

(မျိုးမြတ်လင်း)

ဘာသာစကားတိ ပျောက်ကွယ်လားနီရခြင်း

ဘာသာစကားတိ ပျောက်ကွယ်လားနီရခြင်း
------------------------------
ကုလသမဂ္ဂဌါနခွဲတခုဖြစ်တေ ယိုင်ကျေးမှုထိန်းသိမ်းရေ အေဂျင်စီ ယူနက်စကို (UNESCO) အဖွဲ့က ကမ္ဘာမှာ ပြောဆိုသုံးစွဲနီကတ်တေ ဘာသာစကားပေါင်း ခြောက်ထောင်ထဲက သုံးပုံတပုံစွာ မျိုးတုံးဆိတ်သုဉ်း ပျောက်ကွယ်လားဖို့ အန္တရာယ်နန့် ရင်ဆိုင်နီကတ်ရရေလို့ ထုတ်ဖော်ပြောဆိုလိုက်ပါရေ။ ဒေပိုင် အခြိမ်းခြောက်ခံနီရရေ ဘာသာစကားနှစ်ထောင်ကို မပျောက်ပျက်လားအောင် ထိန်းသိမ်းစောင့်ယှောက်ဖို့ အစိုးရပိုင်းဆိုင်ရာ တာဝန်ယူလုပ်ဆောင်မှုတိ ဟိဖို့လိုအပ်တေပိုင် လူတိကလည်း သူရို့ဘာသာစကားတည်တံ့ကျန်နီစီဖို့ “ကိုယ့်ရို့စကားကို ကိုယ်ရို့ပြောကတ်ခြင်း” ကို တန်ဖိုးထားဂုဏ်ယူကတ်ဖို့ အေယူနက်စကိုအဖွဲ့ချူပ်က တိုက်တွန်းလိုက်ပါရေ။

ဘာသာစကားတခုနိဂုံးချူပ်သီဆုံးလားတိုင်း တန်ဖိုးမဖြတ်နိုင်ရေ ဓလေ့ထုံးတမ်းစိုင်လာယိုင်ကျေးမှုအမွီအနှစ်တိ မျိုးဆက်တိနန့်ရင်းပနာ စုဆောင်းထိန်းသိမ်းလာကတ်တေ အသိပညာ၊ ကဗျာစာပီဂီတ၊ သမိုင်းရိုးရာ၊ ဂန္ဓ၀င်အနုပညာ လက်ရာကောင်းတိအားလုံး ဆုံးယှုံးလားကတ်ရရေလို့ ဒေအဖွဲ့ကြီးက ထောက်ပြပြောဆိုပါသိမ့်ရေ။ ၂၀၀၈ ခုနှစ်မှာ အမေရိကန်နိုင်ငံ အလက်စကားပြည်နယ်၏မူရင်းဘာသာစကားကိုပြောတတ်တေ နောက်ဆုံးတယောက်တည်းရာကျန်ရေ အသက် ၈၉ နှစ် ၀ါကြီးမ အီးယာခ် (Eyak) ကွယ်လွန်လားရေခါ ဘာသာစကားလည်း ကပ်ပါလားခရပါရေ။

ဘာသာဗေဒပညာသျှင်အများစုက အခုလက်ဟိ ကမ္ဘာ့ရွာထဲက ဘာသာစကားခြောက်ထောင်မှာ အနည်းဆုံးတ၀က်လောက်က သက္ကရာဇ် ၂၀၅၀ မှာ ပျောက်ကွယ်သီဆုံးလားနိုင်ရေလို့ ခန့်မှန်းထားကတ်ပါရေ။ ဘာသာစကားတိ မျိုးတုံးပျောက်ကွယ်ခြင်းရေ အယင်ခါထက်နှစ်ဆမြင့်ပါလတ်ပနာ အေပုံစံအတိုင်းရှိဆက်ပြီးကေလားနီကေ အနာဂါတ်ကမ္ဘာမှာ တဒါဇင်နှစ်ဒါဇင်လောက်ဘာသာစကားတိကရာ လွှမ်းမိုးချူပ်ကိုင်ထားနီလီဖို့လို့ သုံးသပ်ကတ်ပါရေ။ အေချင့်ထက်ဆိုးရေ ပျက်စီးဆုံးယှုံးမှုနှုန်းမြင့်တက်လာခြင်းတိ ဖြစ်လာနိုင်ပနာ ၉၀ ရာခိုင်နှုန်းလောက် ဘာသာစကားတိ သက္ကရာဇ် ၂၁၀၀ မှာ မျိုးပြုန်းလားခြင်းတိ ဖြစ်လာနိုင်ရေလို့ အကြံပြုထောက်ပြရေ ဘာသာဗေဒပညာသျှင်တိလည်း ဟိပါသိမ့်ရေ။ ဒေပိုင် ကြုံတွိလာနိုင်ရေ ဘာသာစကားတိပျောက်ကွယ်လားနီခြင်း အခြီအနီဆိုးကို တမျိုးတဖုံဖြစ်လားအောင်ပြောင်းလဲလာစီဖို့ လိမ်မာပြီးကေ ဥာဏ်အမြော်အမြင်ကြီးရေ သူရို့ဘာသာစကားပျောက်ပျက်လားဖို့စွာကို စိုးရိမ်ရေ လူမျိုးတိက အခုအချိန်ကပင်စပနာ ကိုယ်ပိုင်ဘာသာစကားကို ကျယ်ကျယ်ပြန့်ပြန့် ပြောဆိုသုံးစွဲခြင်းတိ ထိန်းသိမ်းစောင့်ယှောက်ဖွံ့ဖြိုးတိုးတက်လာအောင်လုပ်ခြင်းတိကို ဆောင်ရွက်လားပြီးကေ အကောင်းဆုံးအဖြေရှာလားနိုင်ရေ ကိုယ်ရို့ဘာသာစကားအန္တရာယ်ကျရောက်နီခြင်းက ကာကွယ်လားသင့်ရေလို့ ပညာသျှင်တိက တိုက်တွန်းထားပါရေ။

ခိုင်မာသန်စွမ်းရေ ဘာသာစကားတခုကို အဓိပ္ပါယ်ဖွင့်ဆိုရဖို့ဆိုကေ စကားပြောရေလူသစ်တိ စိုင်ဆက်မပြတ်ဟိနီခြင်းပင်ဖြစ်ပါရေ။ လက်ဟိလူကြီးတိ ဇာလောက်ပင် ယင်းဘာသာစကားကို သုံးနီကတ်ပတ်စီ ဒေဘာသာစကားကို လက်ဆင့်ကမ်းပီးလားဖို့ မျိုးဆက်သစ်တိမဟိကေ ဒေဘာသာစကား၏ကံကြမ္မာစွာ မှေးမှိန်အရောင်နွမ်းလားဖို့စွာ ကျိန်းသီနီပါရေ။ နှစ်ပေါင်းထောင်နန့်ချီပြီးကေ ဘာသာစကားတခုတည်တံ့လာကေလည်း ဒေနိကာလမှာ အချေသူငယ်တိက ဒေဘာသာစကားသင်ယူခြင်းကို ရပ်ပစ်လိုက်စွာနန့် အေဘာသာစကား နိဂုံးချူပ်လားဖို့စွာပါပျာယ်။

လူမျိုးတမျိုးဖြစ်ခြင်း၏ဂုဏ်အင်္ဂါလက္ခဏာရပ်ဖွံ့ဖြိုးတိုးတက်လာခြင်းနန့် ယိုင်ကျေးမှုထွန်းကားလာခြင်းတိကို ဘာသာစကားကရာ ပုံဖော်ပီးနိုင်ပါရေ။ လူမျိုးတမျိုးအဆင့်ဟိခြင်းကို ဘာသာစကားနန့်ရာ တိုင်းတာနိုင်ပါရေ။ ဘာသာစကားပျောက်ကွယ်လားစွာနန့် လူမျိုးတမျိုးဖြစ်ခြင်း၏အနှစ်သာရ တည်တံ့ရှင်သန်ခြင်းတိလည်း နိဂုံးချူပ်လားနိုင်ပါရေ။

ဘာသာစကားတခု လူမျိုးတမျိုး၏ပင်မသုံး ယုံးသုံးအနီအထားက ပျောက်ကွယ်လားပြီးခါမှ ယင်းလူမျိုး၏ကိုယ်ထူကိုယ်ထ ထိန်းသိမ်းမှုနန့် ပြန်ပြီးကေ နိုင်ငံသုံးဘာသာစကားအဖြစ် အသက်ဝင်လာစွာတိလည်း ဟိပါသိမ့်ရေ။ ပြန်ရှင်ပါလတ်တေ ဘာသာစကားတခုက အခုအစ္စရေးနိုင်ငံသား ဂျူးလူမျိုးတိ ပြောဆိုသုံးစွဲနီကတ်တေ ခေတ်သစ် ဟီဘရူး (Hebrew) ဘာသာစကားပင်ဖြစ်ပါရေ။ ဒေဘာသာစကားက ရာစုနန့်ချီပနာ လူမျိုးသုံးနိုင်ငံသုံးဘာသာစကားအဆင့်က ပျောက်ကွယ်လားပြီးကေ ဘာသာရေးနန့် ပညာရပ်ဆိုင်ရာဘာသာစကားအဖြစ် ကျန်ဟိနီခပါရေ။ ယကေလည်း လားရေနီရာ ရောက်တေအရပ်နန့် နီရေတိုင်းပြည်နိုင်ငံတိုင်းမှာ ဂျူးလူမျိုးအသိုင်းအ၀ိုင်းတိက သူရို့ဘာသာစကားကို မပျောက်ပျက်အောင် ထိန်းသိမ်းစောင့်ယှောက်လားပြီးကေ ၁၉ ရာစုနှောင်းပိုင်းမှာ ဒေ ဟီဘရူးဘာသာကို အယ်လီဇာ ဘမ် ယေဟူဒါ (Eliezer Ben-Yehuda) ၏ ဦးဆောင်မှုနန့် ပါလက်စတိုင်းဒေသမှာ ပြန်ပနာ ဂျူးလူမျိုးတိပြောဆိုရေစကားအဖြစ် မိတ်ဆက်အသက်သွင်းလာနိုင်ပြီးကေ အစ္စရေးနိုင်ငံထူထောင်လာရေခါ ကျောင်းတိမှာသင်ကြားပို့ချပနာ အဓိကပင်မ ဘုံယုံးသုံးဘာသာစကားတခုအဖြစ် ပြဌါန်းနိုင်ခစွာ အေနိထက်ထိပင်ဖြစ်ပါရေ။

ရခိုင်ရို့ဘာသာစကားကလည်းသော့ ဒေနိကာလမှာ မျိုးတုံးပျောက်ကွယ်လားဖို့ စိုးရိမ်ရရေအဆင့်ကို ရောက်ပါလတ်ပါရေ။ နှစ်ပေါင်းထောင်နန့်ချီပနာတည်တံ့လာရေ ဒေရခိုင်ရို့ဘာသာစကား၊ စာပီနိဂုံးချူပ်လားစွာနန့် ရခိုင်လူမျိုးလည်း ကမ္ဘာ့မြီပြင်ထက်က ပျောက်ကွယ်လားဖို့စွာ ကျိန်းသီနီပါရေ။ ကိုယ်ရို့ဘာသာစကားစာပီ မပျောက်ပျက်လားအောင် ထိန်းသိမ်းစောင့်ယှောက်ရဖို့စွာက ရခိုင်သားတိုင်း၏ မွီးရာပါတာဝန်ဝတ္တရားတခု ဖြစ်ပါလတ်ပါရေ။ ရခိုင်စကားကိုပြော ရခိုင်စာကိုရွီးလို့ ရခိုင်ဖြစ်ခြင်းကိုဂုဏ်ယူကတ်ခါမှ အဖိုးအဖီးရို့လက်ဆင့်ကမ်းပီးခရေ အမွီအနှစ်ကို မြတ်မြတ်နိုးနိုးတန်ဖိုးထားရာရောက်ပါဖို့။ နောက်လာနောက်သား မျိုးဆက်သစ်တိကိုလည်း ရခိုင်ရို့ကိုယ်ပိုင်ယိုင်ကျေးမှု အစိုင်အလာကောင်းတိကို မျှဝီပီးလားနိုင်ဖို့ ကိုယ့်ရိုးရာစာပီကို မြှင့်တင်လားပနာ သမိုင်းပီးတာဝန်ကို ထမ်းဆောင်လားကတ်ပါမည်။

ခိုင်အောင်အောင်
(၀၄၊ ၀၇၊ ၂၀၀၉)

အမှန်တရားအတွက်

အမှန်တရားအတွက်
------------
မျောက်တိပိုင် လူတိက
ဖြုတ်ဦးနှောက်နန့်စိုင်းစားပြီး
နွားပိုင် ခိုင်းနီစွာကို
ဒေါင်းတိပိုင် မာန်တက်ပနာ
တဆုပ်ချေစားနီရစွာနန့်
မင်းရို့ ခွီးတိပိုင် ကြေနပ်မနီကဲ့ --။

ငါရို့တိ ကျီးကန်းပိုင်
အားအားတိုင်း အာနီစွာမဟုတ်
ခဲဝါပိုင် ကောက်ကျစ်ပြီး
ကျားပိုင် ကိုက်နီလို့
အမှန်တရားအတွက်
ယုန်တိပိုင် ဆုံးဖြတ်စီချင်လို့ရာ --။

ပုရွက်ဆိတ်ချေတိက
ဆင်တိကို အာခံစွာပိုင်ဖြစ်နီကေလည်း
အမှန်တရားတွက်ဆိုကေ
ပိုးဖလံတိပိုင် မီးဆိုကေလည်း တိုးဖို့သိမ့် --။

မင်းရို့တိ ခြသေ့င်္ပိုင်ခြောက်ကေလည်း
စာချေတိပိုင် ကြောက်လားဖို့မထင်ကဲ့
ကြွက်တိပိုင် လူများစွာကိုမတရားယူပနာ
သျှိုင့်တိပိုင် ဝှက်စားပြီး
ဝက်တ်ိပိုင် အဆီဖုံးနီရေစွာ
မပြောကေလည်း လူတိုင်းသိရေ --။

ခြင်တိပိုင် သူများသွီးကိုစုပ်ပြီး
ကြောင်တိပိုင် ဇိမ်ကျကျအိပ်ပနာ
မြွီတိပိုင် ခြွီနီကတ်လို့
ပုရွက်ဆိတ်တိပိုင် တနီကုန်လုပ်
လင်းဆွဲပိုင် အိပ်နီရရေ ဒေလူတိက
အမှန်တရားအတွက်
မိုးဦးကျဖားပူတိပိုင် အော်နီစွာကို
မင်းရို့တိက
ကြက်တိကိုသတ်စွာပိုင်
သတ်ဖို့ဆိုကေလည်း မတတ်နိုင်ဝေး --။

(အမှန်တရားအတွက်)

Arakan Dolphin (ကျောက်တော်)

တွင်းမှားကြွက်ချေ

်တွင်းမှားကြွက်ချေ
----------------------------
တွင်းမှားဝင်မိရေ ကြွက်တကောင်နန့်တူရေမင်းကို..
ငါစကားတခွန်းလောက်.. ပြောချင်မိရေ..
မင်း Sign Inလုပ်ခါ..Burmese Meeting Point ထင်လို့များ..
မမြင်မကန်းနန့်.. မှားဝင်မိစွာလာလို့..
ကြွက်ထဲမှာလည်း.. ကြွက်စုတ်ဆိုစွာမှ..
မျက်စိမှုန်ရေ..ကြွက်မျိုးလို့ ငါကြားဖူးရေဝေ..
မင်းအနီနန့်..နောက်တခါ..တွင်းမှားမ၀င်ဖို့..
ငါရို့၏မျက်စိတိကို.. အဆိပ်သင့်နီရေ မြန်မာစာသားတိနန့်...အဆိပ်မခတ်ဖို့...
မင်းအနီနန့်.. နောက်တခါ..အိမ်မှားမ၀င်ဖို့...
ငါရို့၏နှလုံးအိမ်ကို.. သွီးဆိုးသွီးပုတ်တိနန့်..မညစ်ပတ်စီဖို့...
မင်းအနီနန့်..ပုပ်ဟောင်နီရေ..မြန်မာတိ၏...ပေါ့ပျက်ပျက်စကားလုံးတိကို...
ငါရို့၏မိသားစုအသိုက်အမြုံ.. နွီးထွီးရေကမ္ဘာထဲကို..ဆောင်ယူမလာဖို့..
မင်းအနီနန့်...လောက်ကျနီရေ..မြန်မာငပိရည်တခွက်ကို မကိုင်ဆောင်လာဖို့...
ငါရို့၏မျိုးဆက်သစ်တိ..ရှင်သန်ရေနီရာကို...ငပိနံ့နန့်မပုတ်ဟောင်စီဖို့..
မင်းအနီနန့်..မျိုးမစစ်တေ...လက္ခဏာတိကိုထုတ်ပျာယ်မပြဖို့..
ငါရို့၏ရွီရောင်မျိုးဆက်ချေတိကို...ကျွန်ဇာတ်တခါထပ်မသွင်းဖို့..
မင်းအနီနန့်...မင်းယောက်ဖကို..နောက်တခါကြက်ဥမတိုက်ဖို့..
ငါရို့ဘိုးဘီးတိ၏...အစိုင်အလာမြင့်မားရေ..စာပီကိုမစော်ကားဖို့..
မင်းအနီနန့်..နောက်တခါ....ရက္ခိတရို့အလင်းအိမ်ထဲ...
မမြင်မစမ်းနန့်..တွင်းမှားဝင်မလာဖို့..
ငါတောင်းပန်ချင်ရေဝေ..ကြွက်ချေ....။

(ယောက်ဖကို ကြက်ဥတိုက်တေလူတိအတွက်)

(Do or Die) (သီကေသီ ရှင်ကေရှင်)

မမိနိုင်သူရို့၏ကြိမ်းဝါးသံ

မမိနိုင်သူရို့၏ကြိမ်းဝါးသံ
----------------
ကိုယ်မြီကိုယ်စိုး ၊ ဂုဏ်ရောင်မိုးထိ
တန်းခိုးသျှိန်ဝါ ၊ ထွန်းတောက်သာခါ
ငါရို့ပြည်မှာကား --၊၊

ဘားဘူဟိယင့် ဆန်ဟိယင့်
ဒိုင်းကျီဟိယင့် ရီဟိယင့်
စကားရှိလာ ၊ တွင်လီပါသည်
ငါရို့မြီမှာ ၊ ချောင်းမြောင်းတာရိုး
မြီလွှာဆီနှစ် ၊ လေးဖြာမြစ်ကမ်း
ဖြစ်ထွန်းသီးနှံ ၊ ပိုလျှံစပါး
စားမကုန်ထိ ၊ လှူပါဘိလည်း
ပြည့်လျှက်ရိုင်ကျီ ၊ မလျှော့လီခ
အီးချမ်းပျော်စံ ၊ ကျီးငှက်သံမြူး
သာယာကျုးယင့် ၊ အသျှင့်ပြည်ရွာ
ချမ်းမြသာစွ ၊ ဓညတွင်လီ
လခြမ်းမြီတည်း ၊ ဘုမ္မိနက်သံမြီ၊၊

ပျောက်ဆုံးနိုင်ငံ ၊ သူ့ထံလက်အောက်
ရောင်ဝါပျောက်လို့ ၊ ကျွန်ဖြစ်ရောက်ခါ
ငါရို့ပြည်မှာကား ---၊၊

အာဏာဓားမိုး ၊ ချင်တိုင်းဆိုးလျှက်
အုပ်စိုးပြည်ရွာ ၊ ဖိနှိပ်ကာလျှင်
ဝမ်းစာပြည်ထွက် ၊ ပြည့်သွီးသက်ကို
အဓမ္မယူငှင် ၊ ရပ်ခြားတင်ပို့
ကုန်စင်ကျီမှောက် ၊ ဒုက္ခရောက်လူ
ဖပြည်သူမှာ ၊ ဝမ်းစာမဖုံ
မလုံဝမ်းရီး ၊ အငတ်ဖီးဆိုက်
ကပ်ကြီးဖြစ်က ၊ လမ်းမထွက်ပျာယ်
အသက်မငဲ့ ၊ စိတ်ပေါက်ကွဲကေ
“ဆန်ခွဲမစား ရခိုင်သား” လို့
ကြားလီမိုးယံ ၊ ကြွေးကြော်သံလွှင့်
ဆန္ဒပြလူ ၊ ဖပြည်သူကို
စောဖြူရခိုင် ၊ မခိုင်မျိုးဖျက်
အာဏာမက်လျှက် ၊ လောက်ထွက်အသား
ဖောက်ပြားသစ္စာ ၊ ညှာတာမငဲ့
ပြောင်းဝထဲမှာ ၊ သူရဲကောင်းသွီး
မြီမှာစီးကျ ၊ များလှဝဇိန်
မြီခသီဆုံး ၊ (၁၃) သြဂုတ်
မျိုးပြုတ်သတ်ပွဲ ၊ လူစိတ်မဲ့လျှက်
နယ်ချဲ့ရို့ထုံး ၊ သူရို့သုံးခ
ထိုနိရက်ကို
ဇာတွင်မိနိုင်ပါမည်နည်း --၊၊

(သျှင်စိုး)
လာဖို့ (၁၃) သြဂုတ်အတွက်...။

မိုင်တိုင်အမှတ် ( ၂၃ )

မိုင်တိုင်အမှတ် ( ၂၃ )
----------------
တနှစ်ပြီးတနှစ်
ကုန်ဆုံးခပျာယ်
ရင့်ကျက်မှုသို့
ဦးတည်လျှက် --။

တစတစနန့်
ဘ၀ကို ရင်ဆိုင်ဖို့နီးလာပျာယ်
တခုကိုလည်း
မမှုမိပါလေ --။

တုန်လှုပ်မိကေတောင်
ဘ၀မှာ
သုံးပုံတပုံကို
ကျော်လွန်ခပါပျာယ် --။

လဲကျကေ
ပြန်ထလိုက်
ဝမ်းနည်းကေ
ငိုကျွီးလိုက်နန့်
စိန်ခေါ်မှုတိကလည်း
ဆီးကြိုနီလို့
မှားလားကေ
ကဲ့ရဲ့မှုတိက
စောင့်နီလို့ --။

လူငယ်အားမာန်တိက
ကူညီပါလိမ့်မည်
အောင်မြင်မှုက
လက်တကမ်းမှာ --။

ခရီးရှည်တိ ထွက်ရရေအခါ ကားလမ်းတဖက်တချက်မှာဟိရေ ... ရောက်နီရေ ခရီးအကွာအ၀ီးကို ပြနီရေ မိုင်တိုင်တိကို တွိရတတ်ပါရေ....... လူတိရှင်သန်နီရသမျှကာလပတ်လုံးကိုရာ ခရီးရှည်တခုနန့် တင်စားဖို့ဆိုကေ အခု အကျွန်ရောက်ဖို့ နီရာက မိုင်တိုင်အမှတ် (၂၃).....။

နှင်းပန်း (Nhun Pan)

မော်ဒန်တော်လှန်ရေး

မော်ဒန်တော်လှန်ရေး
-------------
မဲဆောက်မြို့ ဇိမ်ခန်းထဲက
ထွက်ကျလာရေ
ရခိုင်ပြည်တော်လှန်ရေး
ဘီယာပုလင်းထဲရောက်ပနာ
ပျောက်လားခရရေ --။

ကရင်မြီတောစခန်းမှာ
ရခိုင်ပြည်လွတ်လပ်ရေးအတွက်
နှစ်ပေါင်းနှစ်ဆယ် ၀ါးဒုတ်ချိုးစားလာရေ
ရခိုင်မျိုးချစ်တယောက်
ညဇာက ခြင်ကိုက်လို့
သီကျလားခရေ --။

“ဒိုနာတိလည်း
အယင်ပိုင်မဟုတ်ပျာယ်
ပြည်ထဲကိုရာ လားချင်နီကတ်တေ
တော်လှန်ရေးကို လုပ်စားရစွာ
ကကောင်းမလွယ်လိုက်ပျာယ်
ဒေလမှာ အမြတ်မကျန်ပါထော”
ထာဝရဥက္ကဌ ခိုင်ဆယ်ခိုင် ပြောရေ
ရင်ဖွင့်စကား
ကြားရစွာ
ထွက်လာရေ ချီးတိပါ
ဖင်ထဲကို ပြန်ဝင်လားခရေ --။၊

မကြားဝံ့ မမြင်သာ
မျက်စိပါလို့ရာ ဖတ်လိုက်ရရေ
ဖဲသာတမတ် လူသုံးယောက်နန့်
ရခိုင်စစ်တပ်က
နက်ဖန်ခါ ရခိုင်ပြည်ကို
ဝင်သိမ်းပါဖို့လတ် --။

ခိုင်မုန်တိုင်း (ငရဲပြည်)

ဒိုနာ (Donor) = အလှူသျှင်

ရခိုင်ဗီဒီယို အချစ်ဇာတ်လမ်း

ရခိုင်ဗီဒီယို အချစ်ဇာတ်လမ်း
------------------
မောင်သာဘန်း မောင်သာဘန်း
ပုလင်းတလုံးနန့် မောင်သာဘန်း
မောင်သာဘန်းက ကျောင်းဆရာ
ပုလင်းကိုင်လို့ ကျောင်းကိုလာ
ကျောင်းဆရာမ မသာလှ
မောင်သာဘန်းကို ချစ်မ၀
အမိအဖက သဘောမတူ
မသာလှကို ဆူ --။၊

မြန်မာစစ်ခွီး မောင်ဗချီး
ဒေကြားထဲမှာ ဒုက္ခပီး --။

ဖက်ခွက်စား မောင်လျှောက်သား
မသာလှကို ဆွဲလားယမ်းလား --။

မောင်သာဘန်းလည်း မနီနိုင်
သူငယ်ချင်းတိကို တိုင်
သူငယ်ချင်းတိ လူကိုစု
ခိုးပြီးကတ်ဖို့ အကြံပြု --။

စနီနိညဥ့် လပြည့်ည
ခိုးရာလိုက်တေ မသာလှ --။၊

သူကြိုက်ကိုယ်ချစ် လင်မယားဖြစ်
ဒေချင့်စွာ မိတ္တာစစ် --။

မောင်သာဘန်းနန့် မသာလှ
ဘ၀တခုကို ဒေမှာစ
အမျိုးသီလ နှစ်ဌါန
အေချင့်စွာ ရခိုင်ရို့ အလှ --။

မောင်သာဘန်း (ရခိုင်ပြည်)

ရခိုင်သမဖြူမချေ ရခိုင်စာကိုရွီးကတ်မည်

ရခိုင်သမဖြူမချေ ရခိုင်စာကိုရွီးကတ်မည်
-------------------------
(မချေ)
ရခိုင်သမဖြစ်ပြီးကေ
ရခိုင်ပိုင် မရွီးကေ
ကိုယ့်အမိအဖကို စော်ကား
ကိုယ့်စွာကိုယ်လည်း သိက္ခာချစွာနန့်
တူနီဖို့ယေ --။

ရခိုင်တေးခြင်းတိနားထောင်
ရခိုင်ကဗျာတိကိုဖတ်
ရခိုင်ဝတ္ထုတိကိုခံစား
ရခိုင်သမနှလုံးသားနန့်
ရခိုင်သားကို ချစ်တတ်ခါမှရာ
အမျိုးသီလနှစ်ဌါနကို
ပြည့်ဝမဏ္ဍိုင် စောင့်ထိန်းနိုင်ဖို့ယေ --။


ကိုယ့်စကားကို ကိုယ်မလေးစား
ကိုယ့်စာပီကို ကိုယ်မသိ
ကိုယ့်ဘ၀ကို ကိုယ်မမြင်
ကိုယ့်သိက္ခာကို ကိုယ်အသိအမှတ်မပြု
ကိုယ့်အတွင်းစိတ်ကို ကိုယ်မလေ့လာကေ
လူဖြစ်ခြင်းအရသာ
ဇာလျှာနန့်လားပနာ
မြည်းကြည့်ဖို့လဲ --။

(မြောက်ဦးမြို့စောင့် ဘီလူး)

အိုအမိသျှင်

အိုအမိသျှင်
---------
သတင်းတိမ်ဖျား ဘုံးဆင့်မြင့်အောက်
အမိစံရိပ် ဓညခေတ်နှင့်
ခေတ်လေးဆက်က ရွှေထီးဆောင်းချိန်
လူမဖြစ်တေ ငါ ရခိုင်သူ
အမိအပါး ကဗျာရတု
သာခြင်းတေးဖွဲ့ စာလောက်ဆောင်ကို
သီကုံးဖွဲ့လို ဆက်သရေသူ
ငါမဖြစ်ခ --။

တိမ်ညိုဖုံးလို့ လရောင်ကွယ်ပျောက်
ရာဟုမျိုကေ အမိငိုသံ
မြို့ရှိမြို့နောက် ရင်စည်တီးပျာယ်
လိုင်စင်းခံချိန် ဓါးရင်းကိုကိုင်
အမိရှိက ရပ်စောက်မတ်မတ်
ငါမဟိခ --။

ဂုဏ်သိမ်ညိုးနွမ်း မျက်နှာမွဲမ
အမိပါးမှာ အမှူးအကျွေး
ခြီဆုပ်လက်နှယ် ဦးခေါင်းကချွေး
ခြီမကျအောင် ငါမဆောင်ခ --။

သမိုင်းဆိုရေ ကျောက်ဖြစ်ရုပ်ကြွင်း
စာမျက်နှာထက် ကျွန်မအဖြစ်
အမိဘ၀ ဆံဖြူဖားလား
ရုပ်အိုကြွင်းက မာန်ကုန်ယွင်းလို့
လှဲပြိုကျချိန် အမိအပါး
ငါမဟိခ --။

ဖေးကူအမှီ ကျောက်တိုင်အဖြစ်
အစိုင်စစ်ကို တည့်ကူမတ်သူ
အမွီဆက်ဖို့ ငါရခိုင်ဟု
တော်လှန်ရဲသူ ငါမဖြစ်ခ --။

သမုဒ္ဒရာ ၀မ်းတထွာအောက်
လက်ပစ်ကူးလို့ ကျွန်စာတတ်ပြီး
ကြီးလာပြင်းလာ ဤရခိုင်သူ
အမိရုပ်ကြွင်း အုတ်ဂူဟောင်းတောင်
မရောက်ဖူးသူ အိမ်ပြိုအောက်က
အနင်းဖတ်ခံ သမီးမွဲမှာ
ပညာယုတ်လတ် နန်းသစ်မြန်းကို
အမိအတွက် အိမ်မက်နန့်ပင်
မဆောက်နိုင်ခ --။

ဒေသမီးချေ ဘုမေကြီးလေ
အမိဝတ်ဖို့ ကြိုးကြီးချိတ်ကို
ရက်လို့ထားမယ် အမိစားဖို့
ဖွယ်ရာမျိုးစုံ ချက်လို့ထားမည်
အမိအတွက် နန်းရင်ပြင်မှာ
ပန်းစုံပန်းလှ ပန်းဥယာဉ်ကို
ကိုယ်တိုင်စိုက်လို့ထားပါမည် --။

အိုအမိသျှင် အချိန်နှောင်းမှာ
လူဖြစ်လာရေ ဒေအမိုက်မ
ရခိုင်သူက ကျောက်ပုံကြားမှာ
မြစ်ဖျားချေမှာ အမိကိုတ
အမိပြန်လာ လွမ်းစာဖွဲ့လို့
ငိုခြင်းစီပျာယ် ငိုခြင်းရွီးကေ
အမိဝိညာဉ် နန်းရာဒေါင့်က
လိပ်ပြာပြန်ကပ် ကုန်းရုန်းထပျာယ်
အမိအသက် သွီးကြောတိုင်းမှာ
ပြန်းပြန်းကြီးတုန် နလုံးခုန်ကေ
အမိပြန်ထနိုင်ပါစီ --။

စောစစ် (ဒေ၀ီ)
၂၉.၇.၂၀၀၉

တိုးတက်သာယာ ပြည်ရက္ခာ

တိုးတက်သာယာ ပြည်ရက္ခာ
------------------
ရခိုင်ပြည်သာယာ
စားစရာမဟိ
တပူမှာ နှစ်ပူထပ်တေ
မီးရီလည်းမဟိ --။

ရခိုင်ပြည်သာယာ
ဝတ်စရာမဟိ
ချမ်းလိုက်တေ ခခိုက်တုန်ကေလည်း
ချုံဖို့ ပဆိုးမဟိ --။

ရခိုင်ပြည်သာယာ
နှိုင်းယှဉ်စရာမဟိ
ပြောရေခါ ရခိုင်စကား
ရွီးလိုက်ကေ ပထွီးဘားကအငှါး --။

ရခိုင်ပြည်သာယာ
လယ်ယာမြီပေါ
ထွန်စရာ မြီမဟိကေ
တိုင်းတပါးကိုလား --။

ရခိုင်ပြည်သာယာ
လမ်းတိကကောင်း
ဝမ်းပူမ ကားနှင့်လားကေ
လမ်းမှာထွက်ကျဖို့ --။

ရခိုင်ပြည်သာယာ
ကြည့်ကတ်ပါဖိ
နှစ်နှစ်ရာကျော် ကျွန်ဘဝမှာ
ခွီးထက်ညှက်တေ --။

ပန်းဇင်းဂေါင်းပျောင်(အနောက်ရိုးမ)
(၂၀-၇-၂၀၀၉)

ဥပပတ္တိ (သို့) စင်္ကာပူ ပါတိတ်

ဥပပတ္တိ (သို့) စင်္ကာပူ ပါတိတ်
--------------------
ကမ္ဘာကျော် Face book က
ငါ့စာမျက်နှာကို လာဆုတ်စွာ
တခါလည်း မကြားဖူးကာ
စာတမျက်နှာ အကျိုး
မင်း တန်ဖိုးဖြတ်နိုင်လို့လား --။

ငါ့အမျိုးနာမည်
ခေါင်းစဉ်မှာတတ်ထားလို့
ဒေနီရာမှာ လာစုစွာ
မင်းအပြုအမူကို
ကြိုက်လို့ လာစွာမဟုတ် --။

အမျိုးကိုချစ်တေလူတိနန့်
အဖရခိုင်ပြည်
ကျန်းမာချမ်းသာဖို့ရာ
ငါဆုတောင်းရေ --။

ကျီးအာသီးနန့်တူရေ
ဖန်တီးသျှင် ဘုရားသခင်လိုလို
ဘဝင်မြင့်နီလို့
ကျန်းမာပါစီ ငါတခါလည်း
ဆုတောင်းအမျှမဝီပျာယ် --။

ကိုယ့်စွာကိုယ်
ဖန်တီးသျှင် ကျေးဇူးသျှင်
ကျေးပင်ကြီးပေါက်ပိုင်တွိကေ
ကျေးဇူးသျှင်အသိနန့်
ကျေးစွပ်သျှင်မဖြစ်အောင်နီကတ် --။

အိမ်တဆောင်ဆောက်တတ်တိုင်း
တော်ရေလို့ မထင်ကဲ့
အခစားလက်သမား
အဆင့်လောက်ရာဟိရေ
အာဂန္ဓုလာမှ အိမ်သာယာရေ
လာလူကို ကြိုးချိုင်လို့သတ်ကေ
မင်းအိမ် ဇရပ်နန့်တူနီယာ --။

ဖုန်းကြီးကို စာချ
မီးကျောင်းကို ရီးကင်းပြ
ဗလ ဗလ ဗလ
ခဏ ခဏ ခဏ လာမပြောကဲ့
ဘာသာပြန် (plagiarism) အချေဝတ္ထုတပုဒ်နန့်
ဆရာကြီးလာမလုပ်ကဲ့ပလင် --။

မိတ္တာ ဂရုဏာ
မုဒိတာ ဥပေက္ခာ
ဗြဟ္မစိုရ်တရားလေးပါး
ပွါးများမနာယူလျှင်
စင်္ကာပူ ပါတိတ်တအုပ်
အမြဲဝဋ်လို့ ဥပပတ္တိဘဝနန့်
ဟန်လုပ်နီရလိမ့်မည် --။

(မောင်လှကျော်)

သောင်ရင်းမြစ် (သို့မဟုတ်) ရက္ခရိုးမ ငိုသံ

သောင်ရင်းမြစ် (သို့မဟုတ်) ရက္ခရိုးမ ငိုသံ
------------------------

သောင်းရင်းမြစ် တဖက်ကမ်း
အင်းဖက်နန့် တဲစခန်းချေမှာ
တခါက ရယ်သံချေတိညံလို့
ထမင်းလက်ဆုံစားခဖူးရေ --။

(AK) ကို မောင်းတင်ပနာ
မျက်လုံးကိုဖွင့် နားကိုစွင့်လို့
စခန်းနံဘေးမှာ ကင်းစောင့်နီရေ
ရဲဘော် မောင်ချေကို
ကမ္ဘာလောက် လေးစားမိခယင့် --။

ရခိုင်သမကို မမြင်ဖူးစွာကြာလို့
တချက်ချေလောက် ငေးကြည့်မိခကေ
ခွင့်လွတ်နိုင်ပါဖို့လား “မမ” လတ် --။

ယဉ်ကျေးရေ မောင်ချေစကား ကြားရစွာ
အမျိုးစောင့်ရေ ရခိုင်သားဂုဏ်ကို
တဆင့်တိုးလို့ မြင့်လားစီပါရေ --။

ရခိုင်ပြည်လွတ်လပ်ရေးရဖို့
အရေးကြီးနီရေ အချိန်မှာ
မတော်တဆ အကြောင်းမလှလို့
တချက် သီကျလားခကေ
မျက်ရည်ချောင်း မစီးစီချင်လို့
ရခိုင်သမကို ရည်းစားမထားချင်ပါလတ် --။

အော်...မျိုးချစ်ရဲဘော် မောင်ချေ
မင်းပြောရေ စကားတိက
အတိတ်နမိတ်နန့် ပြောခစွာလားယေ
အခုဆိုကေ မင်းအရိပ်နန့် မင်းအသံ
ပဲ့တင်သံတိ ညံလို့
တရုန်းရုန်းစီးနီရေ သောင်းရင်းမြစ်လည်း
မင်းကိုလွမ်းလို့ ငိုနီပျာယ်
ထို...အ၀ီးကြီးမှာ ကျန်ခရေ
ရက္ခရိုးမကြီးလည်း...ငိုနီပျာယ်..မောင်ချေ --။

ကျဆုံးလားခရေ ရဲဘော်ချေကို ဂုဏ်ပြုယင်းနန့်...။

(မမချေ)

လူ

လူ
----

နွားကို
သနားစွာလည်းလူ
စားစွာလည်းလူ --။

လူ
သူများကို တရားပြပျာယ်
ကိုယ်တိုင်ကျ
ဘုရားတသူ --။

လူ
အညမညတရားကို လက်ကိုင်ထားပျာယ်
ပဋိပက္ခနှင့် မိတ်ဖွဲ့သူ --။

လူ
တရားသူကြီးလုပ်ပျာယ်
လာဘ်စားသူ --။

လူ
ဘုရားတကာရာထူးနှင့်
မယားတဏှာရူးသူ --။

လူ
အေဆူ
အမှန်လူရာမနား --။

(သာလှဦး)

ခြံစည်းရိုးကြားက ရင်ကွဲနာ

ခြံစည်းရိုးကြားက ရင်ကွဲနာ (ဖြစ်ရပ်မှန် ၀တ္ထုတို)

ဆူဆူသည် ခမီးမချေတယောက်ဖြစ်သည်။ အသက် (၁၇) နှစ်အရွယ် တရွာလုံးတွင် အလှဆုံးကွမ်းတောင်ကိုင်ဖြစ်သည်။ အသက်ကလည်းငယ် အသားကလည်းဖွေး ချစ်ဖို့ကောင်းလွန်းလို့ သူမကို တရွာလုံးလူပျိုများက ၀ိုင်းပိုးကတ်သည်။ သူမရို့ရန်အောင်မြင်ရွာမှာ မောင်တောမြို့နယ်မြောက်ပိုင်း တိုက်နယ်ကျွန်းရွာဖြစ်သော ကြိမ်ချောင်းနှင့် မလှမ်းမကမ်းတွင်ဟိသည်။ ယင်းရွာတွင် ရခိုင်၊ ခမီး၊ ဒိုင်းနက်၊ သက်လူမျိုးအားလုံး ရောပြွမ်းနီထိုင်ပြီး အိမ်ခေါင်ပေါ် (၁၂၀) ကျော်ဟိသည်။ ရွာသားအားလုံး အဓိက လယ်လုပ်ကိုင်စားသောက်သည်။ ဆူဆူမိဖများလည်း တောင်ယာလုပ်သည်။ ဆူဆူတွင် သူ့အထက်က အေးမတယောက်၊ မောင်တယောက်ဟိသည်။ သူမ လေးတန်းအထိ စာသင်ခပြီး မူလတန်းပြီးသည်နှင့် စာဆက်မသင်နိုင်ဘဲ ကျောင်းထွက်လျှက် အိမ်မှုလုပ်ငန်းများကို ကူညီလုပ်ကိုင်နီသူဖြစ်သည်။

ဆူဆူရို့ရန်အောင်မြင်ရွာသည် အင်တန်လောက်ချောင်ကျလို့ ဖက်ခွက်စစ်သားတိ တခါတရီရောက်လာစွာကလွဲလို့ ရက်ကြာကြာ တည်းခိုနီထိုင်လေ့မဟိပါ။ ယင်းပိုင် ဖက်ခွက်တိ အရောက်အပေါက်နည်းလို့ တရွာလုံးမှာ အလှဆုံးဆူဆူစွာ အပျိုဖော်ဝင်စမှာ မြန်မာစက်ကွင်းထဲက လွတ်ကင်းနီခပါသည်။ သို့သော် နောက်ပိုင်းမှာ ရမ္မက်သားဖက်ခွက်စက်ကွင်းကို ကောင်းကောင်းကြာကြာ မယှောင်နိုင်လိုက်ပါ။

---------------
တနိ

၂၀၀၉ ခုနှစ် မတ်လ နောက်ဆုံးပါတ်ထဲက တနိဖြစ်သည်။ ယင်းနိမှာ ဘီအီးလို့ခေါ်သော စစ်မြီပြင်အင်ဂျင်နီယာတပ်ရင်းက တပ်စုတစု ခြံစည်းရိုးစီမံကိန်းအတွက် ဆူဆူရို့ရန်အောင်မြင်ရွာသို့ ရောက်ပါလတ်သည်။ မြန်မာစစ်သားများ၏ "အိမ်ကြီးကြီး၊ ရီတွင်းနီးနီး၊ ဖင်ကြီးကြီး" ဆိုသောဆောင်ပုဒ်အတိုင်း အချက်သုံးချက်နှင့်ပြည့်စုံသော ဆူဆူရို့အိမ်ဘေးနားက အိမ်ကြီးတဆောင်ကို သိမ်း၍စခန်းချသည်။ စခန်းချလို့ ကောင်းကောင်းမကြာလိုက် မြန်မာနည်းမြန်မာ့ဟန်အတိုင်း "အမေတို့
အဖေတို့ နေကောင်းကြပါသလား" ဆိုပြီးသနာ စစ်သားအုပ်စုတစု ဆူဆူရို့အိမ်သို့ ပေါက်ချလာလတ်သည်။ ဆူဆူကိုမြင်သည်နှင့် စစ်သားတိစွာ အကြောင်းမဟိအကြောင်းရှာပြီး ဆူဆူအမိနှင့်အဖကို ရရေနည်းဖြင့် ၀င်ရောသည်။ ဆူဆူအမိအဖများကလည်း တောသူတောင်သားတိဖြစ်လို့ စေတနာကောင်းစွာကတဖက်၊ ဖက်ခွက်တိကိုကြောက်သည်ကတဖက် အိမ်မှာဟိရေ ပြောင်းဖူးအစ နပျိုးသီးအဆုံး ဟိဟိသမျှကို ဖက်ခွက်တိကို ဧည့်ခံခွမ့်ကျွေးရသည်။ ဖက်ခွက်တိကလည်း ပြန်ဖို့မိပျာ ဆူဆူအိမ်မှာ နှာမွှမ်ပြီးသနာ တပျင်းတီးကတ်ပါသည်။ ကျွေးသမျှကို မြန်မာ့ပရိယာယ်ဖြင့် "အားနာစရာကြီး မလုပ်ပါနဲ့၊ မလုပ်ပါနဲ့" ဆိုပျာ မျိုဆို့ကတ်သည်မှာ အငတ်တိုင်းပြည်ကလာသောလူများ အတိုင်းဖြစ်သည်။ ဆူဆူတယောက် ထမင်းချက်ခန်းနှင့် အိမ်ရှိဒန်ခံ ၀င်လိုက်ထွက်လိုက် အစာခွမ့်ကျွေးနီရခါ တဏှာစိတ်ဖြင့် သူ့မနောက်ဖက်ကို ရှုစားတော်မူနီသော မြန်မာစစ်သားတယောက်နှင့် မျက်လုံးချင်းဆုံမိပါသည်။ ယင်းမြန်မာစစ်သား၏တဏှာအကြည့်ကို အတွိအကြုံမဟိသော ဆူဆူအဖို့ ဇာခံနိုင်ဖို့လဲ။ စစ်သားတိပြန်လားသောခါ လက်ယားရေပိုင် ခံစားရသည်။

----------------------
နောက်နိမိုးလင်းသောအခါ ရွာထဲက မင်းကျွန်ပျိုနှစ်ယောက် ဆူဆူဘက်သို့ပေါက်ချလာပြီး စာတစောင်လာပီးသည်။ "နင်ရို့အိမ်ကို ညကလာလည်ခရေ "တပ်ကြပ်ကျော်သက်" ဘားကစာ။ ညကလာခရေ စစ်သားတိထဲက ဆရာချေကျော်သက်ကို နင်မှတ်မိရေမလား" ဆိုပြီးလျှင် စာပီးပြီး ထွက်လားခကတ်သည်။ စာကိုဖတ်ကြည့်လိုက်သောအခါ "သိပ်ချစ်မိသွားပြီ ညီမလေးရယ်" ဆိုသည့်စကားနှင့် ဆူဆူကို မြင်မြင်ချင်း ချစ်မိရင်ခုန်မိကြောင်း၊ ဆူဆူပိုင်လှရေ မမချေမျိုး ရခိုင်မှာတာဝန်ထမ်းဆောင်နီရေ (၅) နှစ်တာကာလအတွင်းမှာ မတွိဖူး၊ မမြင်ဖူးကြောင်း၊ စာမျက်နာ (၂) မျက်နာကျော် ငါးသလောက်ချွဲ ချွဲထားသည်။ စာကိုဖတ်ပြီးသည်နှင့် ဆူဆူစိတ်တိ ငါးသလောက်မြှုံးမိလားခရပါသည်။

------------------
နောက်တနိ ဆူဆူရို့အိမ်ကို ကျော်သက်က သေနတ်ချေလွယ်ပြီးသနာ ရောက်လာသည်။ ဆူဆူကို ညကပီးခရေစာကိုရရေလားဟုမီးပြီး အဖြေတောင်းသည်။ ဆူဆူကလည်း မြင်မြင်ချင်း ရင်ခုန်ရသူဖြစ်လို့ ခေါင်းညိတ်ပြလိုက်သည်။ ယင်းနိကပင် ကျော်သက်စွာ လုပ်ငန်းခွင်ကပြန်လာတိုင်း သူ့အချစ်ကိုသက်သီပြဖို့ ဆူဆူဘားသို့ တန်းရောက်ပါလတ်သည်။

------------------------------
ကောင်းကောင်းမကြာလိုက် နယ်စပ်ခြံစည်းရိုးစီမံကိန်းအတွက် ရောက်လာသောစစ်သားများ ရွာထဲကနီ ခြံစည်းရိုးကာရံနီသောယာယီစခန်းသို့ ပြောင်းရွှိလားခကတ်သည်။ ယင်းအထဲမှာ တပ်ကြပ်ကျော်သက်လည်းပါသည်။ သို့သော် တပ်ကြပ်ကျော်သက်သည် အားလပ်ရက်တိုင်း ဆူဆူရို့ရွာသို့လာရောက်ပြီး ဆူဆူနှင့်ချိန်းတွိသည်။ ယင်းပိုင် ချိန်းတွိနီသည်ကို ဆူဆူ၏မောင်က တနိမြင်လားရေခါ ဆူဆူကို ဆူဆဲသည်။ ယင်းပိုင် ဆူဆဲစွာကို တရွာလုံးသားသိလားရေခါ ဆူဆူလည်းရှက်ပြီး ကျော်သက်ဘားသို့ ခိုးရွာလိုက်ပြီးသည်။ ဆူဆူ၏အပျိုစင်ညသည် မြန်မာစစ်သားတယောက်နှင့် နယ်စပ်တနီရာက ယာယီတဲချေတလုံး ကြယ်ရောင်မတောက်တေ ညဥ့်အမှောင်အောက်မှာ ပျောက်ကုန်ဆုံးလားခရပါသည်။

-----------------
နောက်နိ မိုးလင်းသည်နှင့် သူမဘေးနားတွင် ချစ်သူကျော်သက်မဟိသည်ကို ဆူဆူ သတိထားမိသည်။ ထထိုင်လိုက်သည်နှင့် ဆူဆူအဖသယ်နှင့် အမိသယ်အသံကို တဲအပြင်ဖက်က ကြားရသည်။

"သမီးချေ ထွက်လာလတ်။ အိမ်ပြန်ကတ်မည်"

ဆူဆူလည်း အသံကြားသည်နှင့် တဲအပြင်သို့ထွက်လာလတ်သည်။

"ဘာဘာ အခု အကျွန် ကိုကျော်သက်မယားဖြစ်နီပါယာ။ အပျိုလည်းပြန်မဖြစ်ပါယာ။ သမီးရို့ကို မခွဲပါကဲ့"

ဆူဆူသည် သူ့အဖခြီရင်းကို ဦးတိုက်တောင်းပန်သည်။

ဆူဆူအဖက ဆူဆူကို ရင်ကွဲပြီး "ဘုချေရို့ကို ဘာဘာမခွဲပါဝေ။ ယေကေလည်း အဘုချေ သူ့ကို လက်ထပ်လို့မရ။ တပ်က ခွင့်မပြုလတ်။၊ “ကိုယ့်သမီးကို ကိုယ်ပြန်ခေါ်ပါ” ဆိုလို့ ဘာဘာရို့ ပြန်လာခေါ်စွာ။ ကျော်သက်မှာ မယားနှင့် အချေနှစ်ယောက်ဟိလို့ တပ်ကခွင့်မပြုနိုင်လတ်"

--------------
သူမအဖ စကားအဆုံးမှာ ဆူဆူနှလုံးသား တောင်ပြိုယှောင် ပြိူကျလားရပါသည်။ ဆူဆူက ကိုကျော်သက်နှင့် နောက်ဆုံးတအောင့်ချေတွိချင်ကြောင်းပြောသော်လည်း တပ်အရာဟိက ကျော်သက်ကိုဖမ်းလို့ ကြိမ်ချောင်းသို့ပို့လိုက်ပြီးဖြစ်ကြောင်း ဆိုသည်။ ဆူဆူရို့ သားမိသားဖသုံးယောက် အရှက်တကွဲအကျိုးနည်း ရွာသို့ပြန်လာကတ်ရသည်။ သို့သော် တခြားတဲတလုံးက ချောင်းကြည့်နီသော ကျော်သက်ကိုကား သူရို့မတွိမြင်နိုင်ခပါ။

ဘုန်းစည်သူ
(6/15/2009)

(ဖြစ်ရပ်မှန် ဇာတ်လမ်း ဖြစ်ပါသည်။ လွန်ခရေ မေလအတွင်းက ရန်အောင်မြင်ကျွန်းရွာတွင် အဂယင့်ဖြစ်ပျက်ခသောအဖြစ်အပျက်ကို " ဘုန်းစည်သူ" က နရဉ္စရာဝပ်ဆိုက်၌ ရွီးဖွဲ့ထားခြင်းဖြစ်သည်။ မြန်မာပိုင်ယှောင်ရွီးထားသည်ကို ရခိုင်ဘာသာသို့ ပြန်ဆိုထားသည်။)

ခြံစည်းရိုးကြားက ရင်ကွဲနာ (Version 2)

ခြံစည်းရိုးကြားက ရင်ကွဲနာ (ဖြစ်ရပ်မှန် ၀တ္ထုတို)(Version 2) (စကားပြောပုံစံ)

ဆူဆူဆိုစွာက ခမီးမချေတယောက်ဖြစ်ပါရေ။ အသက် (၁၇) နှစ်အရွယ် တရွာလုံးမှာ အလှဆုံးကွမ်းတောင်ကိုင်မချေပါ။ အသက်ကလည်းငယ် အသားကလည်းဖွေး ချစ်ဖို့ကောင်းလွန်းလို့ သူမကို တရွာလုံးလူပျိုချေတိ ၀ိုင်းပိုးကတ်ပါရေ။ သူမရို့ရန်အောင်မြင်ရွာစွာ မောင်တောမြို့နယ်မြောက်ပိုင်း တိုက်နယ်ကျွန်းရွာဖြစ်တေ ကြိမ်ချောင်းနန့် မလှမ်းမကမ်းမှာဟိပါရေ။ ယင်းရွာမှာ ရခိုင်၊ ခမီး၊ ဒိုင်းနက်၊ သက်လူမျိုးတိ ရောပြွမ်းနီထိုင်ကတ်ပြီးကေ အိမ်ခေါင်ပေါ် (၁၂၀) ကျော်ဟိပါရေ။ ရွာသားတိအားလုံး အဓိက လယ်လုပ်ကိုင်စားသောက်ကတ်ပါရေ။ ဆူဆူမိဖတိကလည်း တောင်ယာလုပ်ပါရေ။ ဆူဆူမှာ သူ့အထက်က အေးမတယောက်၊ မောင်တယောက်ဟိပါရေ။ သူမ စာလေးတန်းအထိ စာသင်ခပြီးကေ မူလတန်းပြီးစွာနန့် စာဆက်မသင်နိုင်ဘဲ ကျောင်းထွက်လို့ အိမ်မှုလုပ်ငန်းတိကို ကူညီလုပ်ကိုင်နီသူဖြစ်ပါရေ။

ဆူဆူရို့ရန်အောင်မြင်ရွာရေ အင်တန်လောက်ချောင်ကျလို့ ဖက်ခွက်စစ်သားတိ တခါတရီရောက်လာစွာကလွဲလို့ ရက်ကြာကြာ တည်းခိုနီထိုင်လေ့မဟိပါ။ ယင်းပိုင် ဖက်ခွက်တိ အရောက်အပေါက်နည်းလို့ တရွာလုံးမှာအလှဆုံးဆူဆူစွာ အပျိုဖော်ဝင်စမှာ မြန်မာစက်ကွင်းထဲက လွတ်နီခပါရေ။ ယေကေလည်း နောက်ပိုင်းမှာ ရမ္မက်သားဖက်ခွက်စက်ကွင်းကို ကောင်းကောင်းကြာကြာ မယှောင်နိုင်လိုက်ပါ။

---------------
တနိ

၂၀၀၉ ခုနှစ် မတ်လ နောက်ဆုံးပါတ်ထဲက တနိဖြစ်ပါရေ။ ယင်းနိမှာ ဘီအီးလို့ခေါ်ရေ စစ်မြီပြင်အင်ဂျင်နီယာတပ်ရင်းက တပ်စုတစု ခြံစည်းရိုးစီမံကိန်းအတွက် ဆူဆူရို့ရန်အောင်မြင်ရွာကို ရောက်လာပါရေ။ မြန်မာစစ်သားများ၏ "အိမ်ကြီးကြီး၊ ရီတွင်းနီးနီး၊ ဖင်ကြီးကြီး" ဆိုရေ ဆောင်ပုဒ်အတိုင်း အချက်သုံးချက်နန့်ပြည့်စုံရေ ဆူဆူရို့အိမ်ဘေးနားက အိမ်ကြီးတဆောင်ကို သိမ်းလို့စခန်းချကတ်ပါရေ။ စခန်းချလို့ ကောင်းကောင်းမကြာလိုက် မြန်မာနည်းမြန်မာ့ဟန်အတိုင်း "အမေတို့
အဖေတို့ နေကောင်းကြပါသလား" ဆိုပြီးသနာ စစ်သားအုပ်စုတစု ဆူဆူရို့အိမ်သို့ ပေါက်ချလာလတ်ပါရေ။ ဆူဆူကိုမြင်စွာနန့် စစ်သားတိစွာ အကြောင်းမဟိအကြောင်းရှာပြီးကေ ဆူဆူအမိနန့်အဖကို ရရေနည်းနန့် ၀င်ရောကတ်ပါရေ။ ဆူဆူအမိအဖတိကလည်း တောသူတောင်သားတိဖြစ်လို့ စေတနာကောင်းစွာကတဖက်၊ ဖက်ခွက်တိကိုကြောက်သည်ကတဖက် အိမ်မှာဟိရေ ပြောင်းဖူးအစ နပျိုးသီးအဆုံး ဟိဟိသမျှကို ဖက်ခွက်တိကို ဧည့်ခံခွမ့်ကျွေးရပါရေ။ စစ်သားတိကလည်း ပြန်ဖို့မိပျာ ဆူဆူအိမ်မှာ နှာမွှမ်ပြီးသနာ တပျင်းတီးကတ်ပါရေ။ ကျွေးသမျှကို မြန်မာ့ပရိယာယ်နန့် "အားနာစရာကြီး မလုပ်ပါနဲ့၊ မလုပ်ပါနဲ့" ဆိုပျာ ဆို့ကတ်စွာ အငတ်တိုင်းပြည်ကလာရေလူတိ အတိုင်းပါ။ ဆူဆူတယောက် ထမင်းချက်ခန်းနန့် အိမ်ရှိဒန်ခံ ၀င်လိုက်ထွက်လိုက် အစာခွမ့်ကျွေးနီရခါ တဏှာစိတ်ဖြင့် သူ့မနောက်ဖက်ကို ရှုစားတော်မူနီသော မြန်မာစစ်သားတယောက်နန့် မျက်လုံးချင်းဆုံမိပါရေ။ ယင်းမြန်မာစစ်သား၏တဏှာအကြည့်ကို အတွိအကြုံမဟိရေ ဆူဆူအဖို့ ဇာပိုင်ခံနိုင်ဖို့လဲ။ စစ်သားတိပြန်လားရေခါ လက်ယားပိုင်တွိရေ။

----------------------
နောက်နိမိုးလင်းခါ ရွာထဲက မင်းကျွန်ပျိုနှစ်ယောက် ဆူဆူဘက်သို့ပေါက်ချလာပြီးကေ စာတစောင်လာပီးပါရေ။ "နင်ရို့အိမ်ကို ညကလာလည်ခရေ "တပ်ကြပ်ကျော်သက်" ဘားကစာ။ ညကလာခရေ စစ်သားတိထဲက ဆရာချေကျော်သက်ကို နင်မှတ်မိရေမလား" ဆိုပြီးကေ စာပီးပြီးသနာ ထွက်လားခကတ်တေ။ စာကိုဖတ်ကြည့်လိုက်ခါ "သိပ်ချစ်မိသွားပြီ ညီမလေးရယ်" ဆိုရေစကားနန့် ဆူဆူကို မြင်မြင်ချင်း ချစ်မိရင်ခုန်မိကြောင်း၊ ဆူဆူပိုင်လှရေ မမချေမျိုး ရခိုင်မှာတာဝန်ထမ်းဆောင်နီရေ (၅) နှစ်တာကာလအတွင်းမှာ မတွိဖူး မမြင်ဖူးကြောင်း၊ စာမျက်နာ (၂) မျက်နာကျော် ငါးသလောက်ချွဲ ချွဲထားပါရေ။ စာကိုဖတ်ပြီးစွာနန့် ဆူဆူစိတ်တိ ငါးသလောက်မြှုံးမိလားခရပါရေ။

------------------
နောက်တနိ ဆူဆူရို့အိမ်ကို ကျော်သက်က သေနတ်ချေလွယ်ပြီးသနာ ရောက်လာပါရေ။ ဆူဆူကို ညကပီးခရေစာကိုရလားလို့မီးပြီး အဖြေတောင်းပါရေ။ ဆူဆူကလည်း မြင်မြင်ချင်း ရင်ခုန်ရသူဖြစ်လို့ ခေါင်းညိတ်ပြလိုက်တေ။ ယင်းနိကပင် ကျော်သက်စွာ လုပ်ငန်းခွင်ကပြန်လာတိုင်း သူ့အချစ်ကိုသက်သီပြဖို့ ဆူဆူဘားသို့ တန်းရောက်ပါလတ်တေ။

------------------------------
ကောင်းကောင်းမကြာလိုက် နယ်စပ်ခြံစည်းရိုးစီမံကိန်းအတွက် ရောက်လာကတ်တေစစ်သားတိစွာ ရွာထဲကနီ ခြံစည်းရိုးကာရေ ယာယီစခန်းသို့ ပြောင်းရွှိလားခကတ်ပါရေ။ ယင်းအထဲမှာ တပ်ကြပ်ကျော်သက်လည်းပါရေ။ ယေကေလည်း တပ်ကြပ်ကျော်သက်စွာ အားလပ်ရက်တိုင်း ဆူဆူရို့ရွာသို့လာရောက်ပြီး ဆူဆူနန့် ချိန်းတွိပါရေ။ ယင်းပိုင် ချိန်းတွိနီစွာကို ဆူဆူ့မောင်က တနိမြင်လားရေခါ ဆူဆူကို ဆူဆဲပါရေ။ ယင်းပိုင် ဆူဆဲစွာကို တရွာလုံးကသိလားရေခါ ဆူဆူလည်းရှက်ပြီး ကျော်သက်ဘားသို့ ခိုးရွာလိုက်ပြီးပါရေ။ ဆူဆူ၏အပျိုစင်ညစွာ မြန်မာစစ်သားတယောက်နန့် နယ်စပ်တနီရာက ယာယီတဲချေတလုံး ကြယ်ရောင်မတောက်တေ ညဥ့်အမှောင်အောက်မှာ ပျောက်ကုန်ဆုံးလားခပါရေ။

-----------------
နောက်နိ မိုးလင်းစွာနန့် သူမဘေးနားမှာ ချစ်သူကျော်သက်မဟိစွာကို သတိထားမိပါရေ။ ထထိုင်လိုက်စွာနန့် ဆူဆူအဖသယ်နန့် အမိသယ်အသံကို တဲအပြင်ဖက်က ကြားရပါရေ။

"သမီးချေ ထွက်လာလတ်။ အိမ်ပြန်ကတ်မည်"

ဆူဆူလည်း အသံကိုကြားစွာနန့် တဲအပြင်သို့ထွက်လာလတ်တေ။

"ဘာဘာ အခု အကျွန် ကိုကျော်သက်မယားဖြစ်နီပါယာ။ အပျိုလည်းပြန်မဖြစ်ပါယာ။ သမီးရို့ကို မခွဲပါကဲ့"

ဆူဆူရေ သူ့အဖခြီကို ဦးတိုက်တောင်းပန်ပါရေ။

ဆူဆူအဖက ဆူဆူကို ရင်ကွဲပြီးကေ "ဘုချေရို့ကို ဘာဘာမခွဲပါဝေ။ ယေကေလည်း ဘုချေ သူ့ကို လက်ထပ်လို့မရ။ တပ်က ခွင့်မပြုလတ်။၊ “ကိုယ့်သမီးကို ကိုယ်ပြန်ခေါ်ပါ” ဆိုလို့ ဘာဘာရို့ ပြန်လာခေါ်စွာပါ။ ကျော်သက်မှာ မယားနန့် အချေနှစ်ယောက်ဟိလို့ တပ်ကခွင့်မပြုနိုင်လတ်"

--------------
သူမအဖ စကားအဆုံးမှာ ဆူဆူနှလုံးသား တောင်ပြိုယှောင် ပြိူကျလားပါရေ။ ဆူဆူက ကိုကျော်သက်နန့် နောက်ဆုံးတအောင့်ချေတွိချင်ကြောင်းပြောသော်လည်း တပ်အရာဟိက ကျော်သက်ကိုဖမ်းလို့ ကြိမ်ချောင်းသို့ပိုိ့လိုက်ပြီးဖြစ်ကြောင်း ဆိုပါရေ။ ဆူဆူရို့ သားမိသားဖသုံးယောက် အရှက်တကွဲအကျိုးနည်း ရွာပြန်လာလတ်ကတ်ရပါရေ။ သို့သော် တခြားတဲတလုံးက ချောင်းကြည့်နီရေကျော်သက်ကိုကား သူရို့မတွိမြင်နိုင်ခပါ။

ဘုန်းစည်သူ
(6/15/2009)

(ဖြစ်ရပ်မှန် ဇာတ်လမ်း ဖြစ်ပါသည်။ လွန်ခရေ မေလအတွင်းက ရန်အောင်မြင်ကျွန်းရွာတွင် အဂယင့်ဖြစ်ပျက်ခသောအဖြစ်အပျက်ကို " ဘုန်းစည်သူ" က နရဉ္စရာဝပ်ဆိုက်၌ ရွီးဖွဲ့ထားခြင်းဖြစ်ပါသည်။ မြန်မာပိုင်ယှောင်ရွီးထားသည်ကို ရခိုင်ဘာသာသို့ ပြန်ဆိုထားပါသည်။)

မှန် (နန့်) မှားခြင်း

မှန် (နန့်) မှားခြင်း
----------------
မိုးသောက် စောစောစီးစီး
ရီမိုးချိုးအပြီးမှာ
စိတ်သန့်လူသန့်
ခန့်ခန့် ငြားငြား
ဟန်ပန်သသောနန့်
လူများဆင်ထားရေ
“ မှန် ” တချပ်ကို
ယုံကြည်မှု ပုံအပ်လို့
ကောက်ကြည့်လိုက်တေခါ --။

ငါ့ရုပ်သွင်ပြင် ငါမြင်
မှတ်လို့ပင်မရ
တောက်ချီးကျပနာ
စိတ်ညစ်လားခရရေ --။

ဟား ဟား ဟား … ဟော
လောဂျိတ် ပုံသဏ္ဍာန်
“ မှန် ” ….
မညီညာရေ ပြင်ညီတခု
အဖုအထစ်တိနန့်
ကထစ်ကရစ်ဖြစ်နီလို့
ငါ၏ပကတိရုပ်သွင်
သိမြင်ရစွာက….
“ မှား ” နီရေ အရိပ်ထင်းလို့
မင်း “ မှန် ” စွာ
ဧကန် “ မှား ” နီ စွာရာ မနားယေ --။

မှတ်ချက် ။ ။ (လောဂျိတ်ကို Logic ဟု ဖတ်ပါ)

(မောင်ကျော်လှ)

မိုးထက်မင်္ဂလာ

မိုးထက်မင်္ဂလာ
---------------
အိုလူရို့
ထကတ်ဖိ
မိုးလင်းပျာ --။

ရှောက်ပနီငှက်ချေ
နီဆာလှုံလို့
အကိုင်းဖျားမှာ
နားနီပျာ --။

စာချေတရွီ
ညီညီညွတ်ညွတ်
တသုတ်ပြီး တသုတ်
တအုပ်ပြီး တအုပ်
လှည့်ပျံလားခပျာ --။

အလယ်တရိုး
ဝက်မတိုးရအောင်
ခြံထိုးလို့ ကာကွယ်ရဖို့ --။

ကျီးကျလို့ မပျက်ရအောင်
မီးထလို့ ဖော်ကတ်ရဖို့ --။

ရွာဦးကျောင်းက
ခတက်ခေါက်ပျာ
မချေလားလို့ ဆွမ်းပို့ခီ --။

မောင်ချေ ပျိုးကြဲ
အကိုကြီး လယ်ထွန်
အကိုလတ် ငါးရှာလားကတ်လီ --။

မကြီးဆန်ဖွတ်
အမိဆန်ပြာ
အဘာ တောသို့လားပတ်စီ --။

တက်ညီလက်ညီ
ရီကြိုင်မြမြ
ဂစ္ဆပနဒီ
နှင်းဝီ၀ီမှာ --။

(သာလှဦး)

ခွီးချီးနတ်

ခွီးချီးနတ်ရာဇဝင်
-----------
လွန်ခရေ နှစ်ပေါင်းခုနှစ်ဆယ်လောက်က ရခိုင်ပြည်ကလူတိ ဗမာပြည်ကိုခရီးလားရေခါ ရိုးတောင်ကို ခြီကျင်လားကတ်ပါရေလတ်။ ယင်းခါက ကားလမ်းမဟိပါသိမ့်။ ခရီးလားဖို့ လူသုံးယောက်လေးယောက်စုပြီးကေ စီလားကတ်ပါရေ။ ရိုးတောင်မှာလည်း ကျားက
ကကောင်းပေါရေဆိုပါကားယင်းခါ။ ယေခါ ခရီးလားလူတိစွာ ကျားရန်ကိုကြောက်ရစွာတကြောင်း၊ အရောင်းအဝယ်ကောင်းဖို့တကြောင်း ခရီးမလားခင် ရွာဦးကနတ်၊ လမ်းမှာတွိရေ တွိသမျှနတ်တိအားလုံးကို ပသကတ်ပါရေလတ်။ နတ်အနှောင့်အယှက်ပီးကေ မအောင်မြင်လို့ယူဆထားကတ်ပါရေ။

တရက်ခါ ခရီးလားရေလူတစုမှာ ခွီးတကောင်ပါလာပါရေဆိုကား။ ရိုးတောင်ထက်မှာ အမောပြေအနားယူပြီးကေ ပါလာရေအစားအသောက်ချေတိကိုစား၊ ရီချေသောက်ကတ်တေခါ ခွီးကလူအနားမှာပင် ချီးစိုက်ပါရေလတ်။ ယေခါ ခွီးသျှင်က ထမင်းဆုပ်ကိုစားနီးယင်းကနီ ခွီးကို ဟိုင်းခွီးဆိုပြီးကေ ယောင်လို့လက်ထဲကထမင်းဆုပ်နန့် ပစ်မိပါရေ။ ထမင်းဆုပ်က ခွီးကိုမကျဘဲနန့် ခွီးချီးထက်မှာ လားတင်နီပါရေလတ်။ ယေပြီးကေ အေသူရို့တိလားခကတ်ပြီးကေ နောက်တဖွဲ့ခရီးလားလို့လာကတ်ပါရေလတ်။ အေအဖွဲ့တော့ခါ တခါလည်းသင့် အေလမ်းမှာလားဖူးရေလူတိမပါ။ ရှိကလူတိလားခရေလမ်းကိုကြည့်ပြီးကေ နောက်ကနီမျှောင်လိုက်လာရေ။

ယေခါ လားယင်းလာယင်းနန့် ခွီးချီးထက်မှာ ထမင်းဆုပ်တခုကိုလားတွိပါရေလတ်။ ယေခါ တယောက်ကပြောရေ “အဝေရို့ အေမှာ အသျှင်မကို ပသရဖို့သိမ့်တေ” လို့ပြောပါဆိုကား။ တယောက်ကပြောကေ နောက်လူတိကလည်း ပါလာရေမုန့်ပဲသရေစာတိနန့် ခွီးချီးမှာတင်ပြီးကေ “ဖီးကင်းပါစီ၊ အောင်မြင်ပါစီ၊ လားရေလမ်းမှာ ခလုတ်မတိုက်၊ စူးမထိအောင်စောင့်ယှောက်ပါ” ဆိုပနာဆုတောင်းကတ်ရာမဟုတ်လားယေ။

သူရို့ခရီးလားခါနီးမှာ အယင်လားဖူးရေလူက မှာလိုက်စွာကို “လမ်းမှာနတ်တင်ထားစွာတွိကေ နတ်ရာတင်လီ။ မဟုတ်ကေ ကျားကိုက်လိမ့်မယ်" ဆိုခါ ရှိကလူတိလုပ်လားခစွာကိုကြည့်ပြီးကေ နောက်ကလာရေလူတိက လုပ်ကတ်စွာပါယေ။
ယင်းပိုင်နန့် အရာတဖွဲ့လာပြန်ခါလည်း ခွီးချီးနားကိုရောက်ပြန်ကေ “အဝေးပါစော်ကိုတင်ဖိတေ” လို့ဆိုကေ တဖြည်းဖြည်းနန့် လားသမျှလူတိနတ်တင်ယင်း ရိုးတောင်မှာ “ခွီးချီးနတ်” ဆိုပနာ နာမည်ကြီးပါလတ်တေ။ တရက်ခါ ကြက်ရောင်းဖို့လားရေလူတယောက် လမ်းမှာနီမကောင်းဖြစ်လို့ ခွီးချီးနတ်မှာ ကြက်တကောင်လိုင်လှီးပြီး ပ,သကေ ကောင်းလားခလို့ ယင်းနိကစပနာ နတ်ကအဆင့်မြင့်ပြီးကေ ယင်းလမ်းကဖြတ်စွာနန့် မုန်ချေပဲချေနန့်မရဘဲ ကြတ်တစ်ကောင် လိုင်လှီးပီးရပါသိမ့်ရေလတ်။ အေပိုင်နန့် အရာနောက်ဆုံးမှာ “ခွီးချီးနတ်” ဆိုကေ အားလုံးသီအောင်ကြောက်ကတ်ပါဆိုဝါး။

အခုလည်း ရှိကလူကိုအကြောင်းပြုလို့ တင်မှန်းမသိ တင်ပ,လာကတ်စွာ (AMP) လည်းသင့် “ခွီးချီးနတ်” ဖြစ်လားယာထင်ပါရေကား။

(ငစည်မောင်)

နှုတ်မဆက်ချင်ပါ ပြန်လတ်ဖို့

နှုတ်မဆက်ချင်ပါ ပြန်လတ်ဖို့
----------------------------
ခရီးဆောင်အိတ်တလုံးကို
ခိုင်မာရေ လက်ချောင်းအစုံနန့် ဆွဲမ
ခွဲရဖို့ အသိချေက မြှားတစင်းပိုင်
ငါ့ရင်စိုင်ကို ဖြတ်ဝင်လားစွာ နင့်ခနန့် --။

ဇာသူမဆို
မွီးရပ်မွီးမြီကို ခွဲရရေအခါ
ဒေပိုင်ရာ ကြုံလာတတ်စွာမျိုး
အဆိုးဆုံးက
အဖရခိုင်ပြည်နန့် ၀ီးနီရရေဘ၀အဖြစ်
လွမ်းရစ်လွမ်းဖြေ လွမ်းမပြေနိုင်စရာမလား --။

တချက် မှင်သက်မိခါပြီးမှ
ကောင်းခင်ပြင်တခုလုံးကို
မျက်ရည်စက်လက်နန့် ပြုံးပြ
ငါပြန်လာမည် စိတ်ချလို့
ငါ့စိတ်က ပြောမိရေစကား
သူကြားရေပိုင် ငါနားလည်
အံကြိတ်ပျာယ် ထွက်လာမိပါရေ --။

အော်...
လွမ်းလိုက်ပါ့မည် တနင့်နင့်
လှမ်းလိုက်ပါမည် တဆင့်ဆင့်
ကြွီလွင့်ပြီးဖြစ်တေ သမိုင်းအပင်အို
ကိုင်းရွက်ညို ကြွီချင်ကြွီပါလီ
သွီးရောင်နီ အလင်းစက်ချေအောက်
အဆင်းတလှ ပြန်ပျာယ်ပေါက်ကေ
ငါ... ပြန်လာလတ်မည်
နှုတ်မဆက်ချင်ပါ ပြန်လတ်ဖို့ --။

(အဖရခိုင်ပြည်နန့်ဝီးကွာနီရရေ သူငယ်ချင်းရဲဘော်အပေါင်းအား ဦးထိပ်ထားလျှက်)

(ပန်းနုဇံ)

ဆန္ဒတခုနန့် ပျံသန်းခြင်း

ဆန္ဒတခုနန့် ပျံသန်းခြင်း
------------------------
မဦးမစိုက်
ဗြုန်းစားကြီး ဆိုက်လာရေ အလင်းအောက်
နမော်နမဲ့ ဖြတ်ပျာယ်လျှောက်ခြင်းမဟုတ် --။

ငါ့ကိုယ်မှာ ပျောက်ဆုံးနီရေ အိမ်မက်တခုကို
ရုတ်ချင်း ကောက်ရလိုက်တေပိုင်မျိုး
ရခိုင်သားဘ၀ဆိုရေ အနှစ်သာရကို
ဝမ်းသာအားရနန့် ဧည့်ခံ
ကျေနပ်စွာ လက်ခံလိုက်ချိန်မှာ
ဘ၀၏အမှောင်ကောင်းခင်က
ပရောမီးသယပ်စ် (Prometheus) လက်ဆောင်ပီးခရေ
နီမင်းလင်းရောင်ခြည်ပိုင်ပျာယ် ငါ့ရှိမှာ
ဖြင်းခနန့်….လင်းလို့ --။

မွီးလာရေအချိန်ကပင်
ဘ၀၏နိဒါန်းတံခါးဝမှာ ရွီးထိုး
“နီထွက်ဘုရင် ကျွန်တော်မျိုး” လို့
ရိုက်ချိုးခံလိုက်ရရေ အသိတခုကို
နိတိုင်းစားသုံးယင်း စားသုံးယင်းနန့်
အဆိပ်လည်း ပြင်းပြင်းလာတတ်တေ
အတိတ်လည်း ယှင်းယှင်းလာလတ်တေ
ယေပိုင်နန့် ရာ
ငါ… ကျွန်ဖြစ်နီခရေ --။

အိမ်မက်တခုထဲက ဗြုန်းဆိုနိုးပြီးမှ
မပျိုးလိုက်ရရေ ပြဇာတ်တခုအတွက်
ပြန်ထွက်ကပြဖို့ကား မရေရာ
သေချာရေ ကျောက်ထွင်းအနုပညာတိက
အဖရခိုင် အသဲပြင်တခုပိုင်ပြောပြ
အခုတိုင် ရင်ကွဲပက်လက်နန့် --။

ငါတွေးကြည့်မိရေ…
ငှက်ချေတကောင်ကို အတောင်ဖြတ်ပျာယ်
လှောင်အိမ်ထဲက လွှတ်ပီးလိုက်စွာပိုင်
ငါချစ်တေ အဖရခိုင်ပြည်ကို
ကြိုးရှရှည်နန့် တွဲလျောင်းချိုင်
မိုင်တိုင် (၂၂၅) အထိ
သူရို့တိ ကျောင်းထားနိုင်ရေဆိုတည်းက
ငါ့ကိုယ်ငါ သတ်သီဖို့ကောင်းယင့် --။

ယေပိုင်နန့်ရာ
ငါလူဖြစ်နီရေ နိရက်တိုင်း
နှလုံးသွီးကို ဖောက်ထုတ်အစားခံ
တခါပြန် တခါပြန်နန့်
ဇာခါအမှန် မလွတ်လပ်နိုင်သရိ
ဆယ်ခါပြန် အကျဉ်းချခံလိုက်မည်
(အဖရခိုင်ပြည်အတွက်) ငါ့ကိုယ်ငါ…
ဒုတိယ ပရောမီးသယပ်စ် (Prometheus) ဖြစ်ချင်ရေ --။

(ပန်းနုဇံ)

ရခိုင်လို့ ခံယူမိရေနိက

ရခိုင်လို့ ခံယူမိရေနိက
---------------------
ဘ၀မှာ
ငါ့စိတ်ငါ လိမ်မရစွာက ဒုက္ခ
ဟုတ်သမျှ အားလုံးကို အစုလိုက်
မီးတိုက် င်္သဂြိုဟ်လိုက်ချင်ရေ...
ရင်ဖတ်ကြီး ဟက်တက်ကွဲနန့်
အသက်လည်း ဆက်မရှင်လိုပါ --။

အားနည်းချက်တခုအတွက်စိုင်းစား
ရိုင်းလားရေ သမိုင်းကြောင်းတခုအတွက်
အခုထိ နီတောင်မထွက်နိုင်သိမ့်
ယေနန့်ရာ.... တလမှာ
သုံးဆယ့်တရက်လကွယ်ခ --။

အချေခါပိုင်
ဝါးနန့်ကျောက်နန့်ထုကတ်လို့
ဝတ္ထုဖြစ်လားကေ ကောင်းယင့်
ပုပ်သိုးဟောင်းနွမ်းပြီးသား အမာရွတ်ကို
မိတ်ကပ်ထူထူနှိမ်းဖို့လည်း
ငါကား သတ္တိမဟိကာ --။

ယေနန့်ရာ
အိပ်မောကျရေနိရက်တိကို ဆုတ်ဖြဲယူ
ဘ၀တူ မောင်နှမတိကြားထဲ
ငါလည်း တေးခြင်းဆိုလိုက်တေ...
(ရခိုင်ပြည် xxx ငါရို့ပြည် xxx ငါရို့ပြည်ကို ငါရို့အုပ်ချုပ်မည် xxxx)

(ပန်းနုဇံ)

သေချာမှုတခု ရွီး

သေချာမှုတခု ရွီး
----------------
ရင်ထဲအသိစိတ်ဟိယင့်နန့်ရာ
ဘောင်ခတ်စည်းတားခံဘ၀မှာပျော်ပိုက်
ရက်ပြတ်.. ငိုက်နီကတ်ဖို့လား --။

ဘ၀၏အနီရောင် တန်းခါးတချပ်ကို
မဖွင့်ဝံ့ ဖွင့်ဝံ့နန့်ရာ တွန့်ဆုတ်
ဂျောင်မှာကုတ်ဖြစ်ခရေ နိရက်တိပင်
ငါရို့ကို ရယ်ချင်ရယ်နီမည် ..ထော --။

ရခိုင်ပြက္ခဒိန်တချပ်ကို ကြည့်လိုက်
အမျိုးသားနိ မဟိ
တော်လှန်ရေးနိလည်း မလာ
လွတ်လပ်ရေနိသစ်လည်း မပါ
ဗလာဗလာ ကွင်လပ်ထက်မှာ
ပြသဒါးရက်တိရာအပြည့် --။

ယင်းနန့်ရာ
ရာဇ၀င်ထဲကရခိုင်ပြည်
ညောင်ပင်သဆီချေပိုင်တွဲလဲလဲ
တစစနန့် လွဲလွဲပါလတ်တေ မိုင်တိုင်အောက်
လူမျိုးလည်း ပျောက်ပျောက်လာလတ်ပျာယ်
အပူဆိုးနန့် ခြောက်ခြောက်လာလတ်ပျာယ် --။

ပန်းမျောက်ကဇတ်တေပိုင်
ဆန့်ကျင်ဖက်မျက်နှာပြင်နှစ်ဘက်
ကျချင်ရေဖက်ကျ လန်ချင်ရေဖက်လန်
ပန်းနန့် မျောက်
အမှန်နန့် အမှား
အဖြူနန့် အမဲ
ကျွန်ဘ၀နန့် လွတ်လပ်ရေး
ဇာကိုအမှန် ရွီးဖို့လဲ --။

တခုတော့ဟိရေ
တနိ... လွတ်ကိုလွတ်မြောက်ဖို့လိုရေ --။

(ပန်းနုဇံ)

ရရိုးချချင်းချေပါ

ရရိုးချချင်းချေပါ
----------------
ပုပ်ထဲကစပါးတိ ရာဆိုကေ
အနင်းခံသမျှ လှလှပါလတ်ဖို့ …။

အိမ်ပြတင်းဖွင့်လျှက်နန့်ပင်
အလင်းတစမျှင် မ၀င်နိုင်ရေ အိပ်ခန်းထဲ
လဲလျောင်းအိပ်စက်မိရေ အဖပြည်ခမျှာ
ခြီလေးချောင်း ရုန်းရွိမရရေ စားပွဲခုံတလုံးပိုင်
အနည်ချေထိုင်နီခစွာ ကြာပျာယ်
ဖုန်တသောနန့် …။

ဗါဒီချေအပေါက်တလုံးနန့်
ရီခတ်မိရေ ဘ၀တိဆိုရေပိုင်
လ္ဘက်ရည်ဆိုင်စကားဝိုင်းမှာ
ဝင်ဆန့်လားရေ နာမည်တခုအတွက်
ဂုဏ်ယူဖို့အင်အား ထွက်လာကတ်စွာအမှား --။

ထော…
မှန်ဘီလူးခုံးထက်မှာ ဖြောင့်စင်းရေဓါးကို
အပြင်မှာ တံဇဉ်တလက်ရာလို့
ဇာသူယုံကြည်နိုင်ဖို့လဲလို့
တွေးလိုက်ကြည့်လိုက်မိတိုင်းမှာ
အပျင်းတချက် ဆန့်တတ်တေစိတ်နန့်
ညချေ… အိပ်အိပ်လားစွာမနည်းပျာယ် --။

ယေပိုင်နန့်
ကျောက်ခဲရော မီးသွီးရော ဒြပ်အရောအနှောထဲ
ပျောက်ပျက်လားရေယိုင်ကျေးမှုတခုကို
အခု…တွိနိုးမြင်နိုးလိုက်ရှာမိသူမှာ
ပွိုင့်ကမ်းမှာ ခရုကောက်ခံစားမှုနန့်မတူမှန်း
(အကျွန်ရို့လူငယ်တိုင်း)
သိဖို့တော့ ကောင်းယင့်ထင်ပါရေ --။

(ပန်းနုဇံ)

သွီးပျက်

သွီးပျက်
--------
ကောက်စရီတခရွီနန့် ပိတ်ဖုံး
တိတ်တိတ်ပုန်း ကန်ရီပြင်ချေမှာလည်း
မိုးငွေ့မိုးလျှံဖြစ်ဖို့ ရီအပြည့်နန့်ရာ
တိမ်ရေကာလို့ ပြောပစ်ဖို့
မြင်ကမမြင်နိုင်မလား --။

အဇ္ဈတ္တကောင်းခင်ပြင်တခုထဲ
ပျံဝဲလိုက်မိရေ စက္ကူစွန်ချေမှာတောင်
ကြောက်တတ်တေအသဲမဟိ
မိုးထိရောက်ချင်ရောက်လီဖိယေ --။

ထော...!
ကတ်ထူစက္ကူပုံးခွံချေတပုံးနန့်
တန်းဗျထက်မှာ ရီခံလို့မဖြစ်တေအခါ
ရီကိုရာ ခဲအောင်လုပ်မိကတ်တေ ဘ၀မှာ
အိမ်မက်ဆိုးရာ ထူထူလာလတ်တေ --။

လူသားဘ၀ဆိုရေ အခန်းတခုမှာ
အတ္တကြပ်ခိုးတိ တွဲလီတွဲလောင်းနန့်
မွန်းကျပ်ပိတ်လှောင်နီကေတောင်က
ဘ၀ကို မလှောင်တတ်စွာထားဖိ
သိသိနန့် ရောင့်ရဲမိသူ နှလုံးသားထဲ
သူ့တကိုယ်စာတည်းကိုဖက်တွယ်
ပြက္ခဒိန်လည်း ရက်ရှည်လားခပျာယ် --။

ယင်းပိုင်နန့်ရာ...
ကျောက်သင်ပုန်းဘောင်ချေအဆုံး
စီးစိုင်တခုလုံးကို တင်ရွီးယင်း
မြင့်မားခြင်းဟူသည်ကို လိုက်ရှာ
သွီးပျက်တေ ဘ၀ကမ္ဘာအဆုံးယေ
ပြာပုံဘေးမှာ ပိတုံးချေကုတ်လို့ --။

(ပန်းနုဇံ)

ပြောင်းလဲခြင်း

ပြောင်းလဲခြင်း
--------------
ပင်လယ်ပျော်လို့ခံယူခပါယင့်
ရီကူးမတတ်တေ ကျွန်းချေပိုင်ပျာယ်
နှုတ်မရရေ ခြီနှစ်ချောင်းကို ဆွဲမယင်း
ကျမွတ်အိုင်က လိုင်ပင်းရောက်လာရေခါ
ပုတ်သမျှလှိုင်း ခတ်သမျှဒဏ်ကို
ခါးစီးခံရကတ်စွာက မဆန်းပျာယ် --။

ယေနန့်…
ညဇာက ရွာချလိုက်တေမိုးတစက်
ရိုးမကို အရည်ဖျော်ချပျာယ်
ကျုပ်ရုပ်လုပ် ကဇတ်ခံလိုက်ရရေ
နဖားကြိုးတန်းလန်းနန့် --။

ယင်ပိုင်နန့်ရာ ဘ၀တိက
နီရိုဘုရင့်တယောတလက်က ကျကျန်ခရေ
မီးတိုက်ခံ သံစဉ်တိကိုအာခံယင်း
ဖနောင့်ပြတ် ဖနပ်ပါးချေကထွက်တေ
စည်းဝါးကျခြီသံချေကို မက်မောတတ်လာရေ --။

ဇာပင်ဆိုဆို...
ပျော့ညံ့နီရေ ကျုတ်အိုင်ချေအဖြစ်နန့်
အနင်းခံလိုက်ရဖန်များလာရေအခါ
ရီချေခမ်းခြောက်ယင်း အသားကျ
ပြန်ပျာယ် မာမာလာကတ်ရရေမလား --။

(ပန်းနုဇံ)

ရွင့်ရာ ရွင့်လီ

ရွင့်ရာ ရွင့်လီ
------------
အစ်ကိုချေ
ချင်းလား
ကရင်လား
သျှမ်းလား
မြန်မာလား --။

ယင်းပိုင်ဆိုကေ
အကျွန့်ကို လာနှုတ်ဆက်ပါ --။

ယေကေလည်း အစ်ကိုချေ
“ယခိုင်” “ယခိ” ဆို
အကျွန့်ကို အဖတ်လုပ်စရာ
မလိုပါ --။

အခင်ကြီး
မွန်လား
ကယားလား
ကုလားလား
တရုတ်လား
ယင်းပိုင်ဆိုကေ
အကျွန်နန့် ပြောဆိုဆွေးနွေးပါ
ယေကေလည်း အခင်ကြီး
“ယခိုင်” “ယခိ” ယာဆို
အကျွန့်ကို ပြောဆိုဆွေးနွေးစရာ
မလိုပါ --။

အရီးချေ
ထိုင်းလား
တိဘက်လား
ဗီယက်နမ်လား
အိမ်ဒိုနီးသျှားလား
ယင်းပိုင်ဆိုကေ အရီးချေ
အကျွန်ရို့အိမ်မှာ လာတည်းပါ --။

ယေကေလည်း အရီးချေ
“ယခိုင်” “ယခိ” ယာဆို
အကျွန့်အိမ်တည်းစရာ
မလိုပါ --။

ဂိုးချေ
ရိုမီးနီးယားလား
ဂျာမန်လား
အမေရိကန်လား
ပြင်သစ်လား
ယင်းပိုင်ဆိုကေ
အကျွန်ရို့ တိုင်းပြည်လာလတ်ပါ
ယေကေလည်း ဂိုးချေ
“ယခိုင်” “ယခိ” ယာဆို
အကျွန့်တိုင်းပြည် လာစရာ
မလိုပါ --။

တမျိုးတော့ခါ
မထင်ကတ်ပါကဲ့
“ယခိုင်” နန့် “ယခိ” ကို
သီအောင်ကြောက်လို့ပါ --။

အေးမောင် (ရင်အုံတော်ဓာတ်)
၃၀၊၀၅၊၂၀၀၉ (၁၈:၄၆)

မြန်မာမ

မြန်မာမ
----------
အနာပြည်ပုတ်တိကို
ဖုန်းအုပ်ထားမရ
ရဲရဲကြီးခွဲထုတ်
မြီမြုတ်ပစ်ရမည် --။

ချစ်ကြည်ရေးဆိုရေ
“မလာဥ” စကားတိနန့်
အတွင်းပြည်နာ လှိုက်စား
တရိရိဝေဒနာ
ခံနီရစွာက ပြည်သူ --။

တနိကျ
အောင့်မရလို့
ပြည်ပုတ်တိ မီးတောင်ပိုင်ပေါက်ကွဲ
မြန်မာပြည်မှာ (၈၈၈၈)
အရေးအခင်းဖြစ်တေ --။

အခုလည်း
ကျန်နီသိမ့်ရေ အနာပြည်ပုတ်တိကို
နှုတ်ပစ်ဖို့
ပြည်မြန်မာမှာ
ဆရာဝန်တိလိုရေ --။

အေနီရာမှာ
(ကြောင်ချီး) တိ မပါ --။

”ပြည်ထောင်စု” လတ်
သကာလူးထားရေ
အာလူးဂါထာနန့်မန်းမှုတ်
ဆီသုတ်ဖို့ ကြိုးစားအားထုတ်သူများစွာ
လက်တွိမှာ
စိန်နားကပ်နန့် ပါးပြောင်
အယောင်ဆောင်တိရာဖြစ်တေ
သူငယ်နာ နှပ်စားတိရာဖြစ်တေ --။

ယင်းပိုင်နန့်
တလင်ကွာ မဆမ
မိခင်မြန်မာမသည်
ဝမ်းတွင်းပါ ”မာဒြာ” ကို ချွတ်မရ
အနိစ္စဖြင့် ဈာန်ကြွ
(မရဏ)
ဘ၀ပြောင်းရလီကုန်သတည်း --။

(မောင်ပေါက်)

မောင်ကြီးသျှင်သို့

မောင်ကြီးသျှင်သို့
-----------
စောင့်နီပါရေ မောင်းမောင်
ဇာခါလာဖို့လဲ
သွီးတောင်ဆုံးလားယာ --။

တိုက်စိုးရို့ပိုင်
လက်နက်ချရစွာကို
မှိုရရေမျက်နှာနန့်
ပြန်ဝင်လာဖို့လား --။

မောင်းမောင်ရို့ကို
တချို့က ပြောကတ်တေ
“လက်နက်ရှာဖွေရေးအဖွဲ့“ ဆို --။

မယုံပါ မောင်းမောင်
မနာလိုလို့ ပြောစွာရာဖြစ်ဖို့ --။

မောင်းမောင်ရို့ အစွာလောက်
မျိုးခြစ်စွာကို သိပါရေ --။

မောင်းမောင်သူရဲကောင်း
မင်းအလောင်းကို
ပန်းကွင်းစွပ်လို့ င်္သဂြိုဟ်ပါဖို့ --။

လာရာလာလတ်
ပြန်မရွှတ်ပါ --။

လက်ရွီးမလှ စာလုံးကျ၍
သတ်ပုံမှားက
သည်းခံ၍ဖတ်ပါ --။


(လက်မှတ်)

ဆရာတော်ဦးဥတ္တမ

ဆရာတော်ဦးဥတ္တမ
-------------------
သူ့ကျွန်သဘောက်၊ နယ်ချဲ့အောက်မှ
လွတ်မြောက်ဖို့ရန်၊ စိတ်အကြံဖြင့်
နိုင်ငံမြောက်မြား၊ ခက်ခဲကြားက
လားရောက်လေ့လာ၊ ကြိုးပမ်းပါသည်
အာဂမျိုးချစ်ဆရာတော် --။

သူ့လူမျိုးခြား၊ စာစကားကို
သင်ကြားတတ်လွယ်၊ သိနားလည်မှ
နယ်ချဲ့အကြံ၊ စိတ်ထားမှန်ကို
အမြန်ဆုံးသိ၊ ခံယူမိ၍
ရောက်ဟိနီရာ၊ ဘာသာစကား
မြောက်အမြားကို၊ သင်ကြားလေ့လာ
တတ်မြောက်ပါသည်၊ အာဂမျိုးချစ် ဆရာတော် --။

ရောက်သည့်နိုင်ငံ၊ ၀ီးရပ်ဌာန်မှ
ဝံသာနုစိတ်၊ မျိုးချစ်စိတ်ကို
ယိုဖိတ်စီရန်၊ စိတ်ထက်သန်လျှက်
မြန်မာပြည်အား၊ စာရွီးသား၍
ကြီးမားစေတနာ၊ သွန်းဖြိုးရွာသည်
အာဂမျိုးချစ်ဖြစ်ပေသတည်း --။

ကျွန်စိတ်ကင်းပျောက်၊ မမှုကြောက်ပဲ
လွတ်မြောက်ခရီး၊ လမ်းညွှန်ပီး၍
ဖမ်းဆီးပြစ်ဒါဏ်၊ များစွာခံလည်း
နိုင်ငံအတွက်၊ ယုံကြည်ချက်ဖြင့်
ထက်မြက်စွမ်းဆောင်၊ ထွန်းလင်းပြောင်သည်
ဂုဏ်ရောင်နီသို့တောက်၏တည်း --။

မင်းရွှေမင်း (အင်းစိန်)
ရခိုင်မဂ္ဂဇင်း အမှတ် (၂၅)

မိုးမျှော်တမ်း လွမ်းခြင်း

မိုးမျှော်တမ်း လွမ်းခြင်း
--------------
(၁)
တက်သီးတချက်
ပြင်းပြင်းခေါက်လိုက်မိသည် --။

ရင်ထဲမှာ မကျေနပ်ချက်တိမွန်းကျပ်
အသက်လျှူမ၀ --။

လက်သီးကို နနောင်းဆုပ်
အကြောင်းမဲ့ ကြမ်းပြင်ကို ထုလိုက်မိရေ --။

ပါးစိကို တင်းတင်းကိုက်ထား
မိတ်ရိုးများ ကားထွက်လာ၏ --။

ဂေါင်းထဲမှာ ထိုအတွေး ဒေအတွေး
အတွေးပေါင်းများစွာ ယောက်ယက်ခတ်
ချုပ်ထွီးလျှက်ဟိရေ --။

မျက်စိကို စစိမှိတ်
ထွက်သက်ကို နခေါင်းထဲက
မှုတ်ထုတ်ပစ်လိုက်တေ --။

ဒေါသအငွေ့ကြောင့်
ထွက်လီ၏အပူရသ
ကြောင်းလို့ ခံစားလိုက်ရရေ --။

နားဂျီနှစ်ဖက်က
စမုတ်ကြောများ ထောင်တက်တင်းမာ
သံချောင်းများပမာ --။

ကုတ်ထားသည်မျက်မှုန်
ရှုန့်တက်လာရေ တွန့်ကြောင်း
အပေါင်းများစွာ --။

ခံစားချက်များပြင်းထန်
အောင့်အည်း သည်းမခံနိုင်ရေအဆုံး
ငါးသလောက်ပြုံး ပြုံးလိုက်မိသည် --။

(၂)
နီရာတကာ မသမာမှုတိကြီးစိုး
ကကောင်း အရုပ်ဆိုး၏ --။

ဒုက္ခကို ဂြင့်ခါးသီးပိုင်
ချိုမြိန်စွာ စွဲလမ်း
တမ်းတမ်းတတ လောဘရမက်
သက်ပြင်းချရ အခါခါ --။

မကောင်းမှုကို ချိုမြိန်စွာသောက်သုံး
ယစ်မှုးနီကတ်သူများ
ဝင်းကြွားမင်းမူ အောင်လံထူလျှက် --။

အဆိုးအညှက် အမှိုက်သရိုက်တိကို
တိုက်စားပစ်ဖို့
တော်လှန်ရေးမြစ်ရီခမ်းခြောက်
မျက်တွင်းဟောက်ပက် လူမမာ --။

နာရီစက်ဝန်း၏မိနစ်စက္ကန့်ရို့သည်
အခိုက်အတန့်လိုက် ကုန်ဆုံး
နီလုံးညိုညို ညရိပ်ခို --။

အတ္တ အတ္တ
အတ္တ အမှောက်ထု တွင်းနက်အောက်
တယောက်ပြီးတယောက်
ဒိုးယိုပေါက် တောက်လျှောက်ကြီးဆင်း
ခွာသံပြင်းပြင်း --။

နောက်ကျိကျိ အမှောင်အတိပြီးသော
ငရဲအိုင်ကြီးထဲက
လွတ်လမ်းမဲ့ ငါးချေတိပိုင်
ကျုပ်ပုတ်ရည် ညစ်ညမ်းသည်ရာ
အသက်ရှင်ရာလား လွတ်မြောက်ရာလား --။

အရောင်နှမ်းနှမ်း မွဲခြောက်ခြောက်
လိုင်တံတို ပျိုင်းအိုတချို့ကလည်း
ပွက်သည့်ငါးကို အလိုက်ချောင်း
အကြောင်းအားလျှော်စွာ --။

ဘုရားသခင် ဖန်တီးထားသည့်
ဤကမ္ဘာမြီကြီးသည်ကား
ဒုက္ခအတိမွှမ်း ဆိုးသွမ်းလှပါဘိတကား --။.

ပူလောင်ထန်ပြင်း
ဆင်းရဲလှပါဘိတကား --။

အပူမီးများချုပ်ငြိမ်း
အီးချမ်းသော အနာဂါတ် မိုးထက်ကောင်းခင်
စက္ကြာဝဠာတခွင်လုံး
လှပသာယာ ကြည်လင်လာဖို့
ရတနာမိုး ပေါက္ခရ၀ဿမိုး
ထိန့်ကြိုးရွာသွန်း လောင်းဖြန်းပီးပါဖိလော့ --။

(သာလှဦး)
29/5/2000

သဇင်သတ္တိ

သဇင်သတ္တိ
-------
နယ်ပယ်တခု၊ ကိုယ်စားပြုလျှက်
နှိုင်းထူပုံထင်၊ မြတ်သဇင်သို့
ပင်ယံမြင့်မြင့်၊ မာန်ချီဝင့်ပြီး
ဖူးပွင့်ဝီဆာ၊ မွှီးကြိုင်စွာလျှင်
မြလွှာတမူ၊ ပန်းမိဉ္စူတည်း ---။

လူမျိုးရခိုင်၊ ပြည်မဏ္ဍိုင်တွင်
သာကီနွယ်မြတ်၊ တိုင်းလေးရပ်၏
ပြုမှတ်တံဆိပ်၊ အောင်နိမိတ်ဖြင့်
ရက္ခိတမည်၊ မျိုးဂုဏ်ရည်ဖြင့်
စည်ပင်သာယာ၊ သာသနာနှင့်
ကမ္ဘာ့အလယ်တွင်
ထည်ဝါရပ်တည် ဟိလတ်၏ ---။

ရပ်တည်ထည်ဝါ၊ မျိုးမဟာကို
မိစ္ဆာဝင်ရောက်၊ သစ္စာဖောက်ကြောင့်
နန်းပျောက်ထီးပျက်၊ စစ်ဒဏ်ချက်နှင့်
သက်ပေါင်းလည်းခ၊ ကျွန်ဖြစ်ရ၏
ဘ၀ယှုံးနစ် ---
သက္ကရာဇ်နှောင်း၊ သမိုင်းကြောင်းကို
သွန်းလောင်းထုဆစ်၊ အားမာန်သစ်ဖြင့်
ဖက်ဆစ်၏ရန်၊ တိုက်တွန်းလှန်မည်
တာဝန်အသိ၊ အားလုံးဟိ၏
ကတိခိုင်မြဲ၊ လက်ချင်းတွဲ၍
အောင်ပွဲတဖန်၊ ကိုယ်ပြန်ရယူ
ပြိုင်တူရှိသို့ လှမ်းချီတက် ---။

အို -- ရက္ခတိုင်းသား၊ မျိုးချစ်များရို့
ရှိသို့တူပြိုင်၊ လှမ်းတက်နိုင်ရေး
ငိုင်ငေးတွေဝေ၊ ထိုင်နီရေလား
နောက်ထားကျန်လိုက်၊ ထိုစနစ်မှ
ကူးပြောင်းသည့်ခေတ်၊ အမှီလိုက်လို့
နည်းသစ်ပညာ၊ ဆည်းပူးကာလျှင်
ပြည်ရွာကောင်းကျိုး၊ ထမ်းပိုးရွက်ဆောင်
မုက္ချအောင်မည်
ရွှီရောင်ဝင်းပ အနာဂါတ် ---။

ဝီဆာခန့်ငြား၊ မာန်ဝင့်ကြွားလျှက်
ထင်ရှားမျိုးမှန်၊ ဇာတိမာန်ဖြင့်
ညှာတံမကျိုး၊ ကြွီမညှိုးအောင်
ပျိုးထောင်ကာလျှင်၊ ခိုင်သဇင်ကား
ရှိတွင်မားမတ်၊ ဦးတည်ရပ်လျှက်
သတ္တိစွမ်းရည်ပြတော့မည် ---။

မောင်သာလောင်းဖြူ (ရမ်းဗြဲ)

ဘုရားကိုကျားကိုက်ခြင်း

ဘုရားကိုကျားကိုက်ခြင်း
------------------------
အယင်ကခါ ဗာလာရွာမှာ
အသေ၀နာဗိုလ်
အုပ်ချုပ်တေ --။

တရက်နိ နဂါးငမိုက်
အသေ၀နာခါးပိုက်က
မရွှေဥကို ကျားကိုက်တေဇာတ်
ကပြလတ် --။

တေမိယဇာတ် ကဖို့စွာ
ချက်ချင်းပြန်ပျင်လိုက်ရရေ --။

ကျားကဖို့လူ
ကျားရီယူဝတ်
ကျားဂေါင်းစွပ်ပျာယ်
အလှည့်ကိုစောင့်
ဇာတ်စင်ဒေါင့်မှာအိပ်နီရေ။

ယလောက်စွာမှာ တယောက်က
ဇာတ်စင်ကိုဓါးနန့်ခွတ်လို့
သိဒ္ဓတ္ထမင်းသား
တောထွက်ခန်း က,ဆိုခါ..

ခန္တိကကို ပရုန်းနရုန်းကြိုးတုတ်
တယောက်က မောင်စံလုပ်ပျာယ်
ဇာတ်ခန်းပျင်လို့
မာရ်နတ်တောင်မတားရသိမ့်
ကျားသမား
ပတ်သံကြားစွာနန့် ယူထည့်လိုက်စွာ

သိဒ္ဓတ္ထ
ကျားကိုက်ခံလိုက်ရရေ --။


ပန် (စစ်တွေ)
ရိုးမမဂ္ဂဇင်း အမှတ် (၃)

မိုးသထအာရုဏ်

မိုးသထအာရုဏ်
----------------
ညဉ့်သန်းခေါင်လေ၊ အမှောင်လွန်မြောက်
အာရုဏ်ရောက်လို့၊ ခတက်ခေါက်ကေ
စိတ်ရောက်ရည်မှန်း၊ သဒ္ဓါဆွမ်းကို
လှူဒါန်းဖို့လေ၊ ချက်လတ်တေ --။

ဂြိုးငှက်လူပျို၊ တေးခြင်းဆိုလို့
စိမ်းညိုရွက်နု၊ နှင်းထုဝီ၀ီ
လီချေသွတ်သွတ်၊ တိုက်ကာခတ်ကေ
ရင်ဖတ်အီးရေ၊ ချမ်းလတ်တေ --။

အာရုဏ်ပျိုးလို့၊ မိုးသထမှာ
နိုးထအားမာန်၊ ဗြိန်းစောင်းသံလေ
တောင်ယံကိုဟပ်၊ ဂလိုင်ထပ်ပျာယ်
ရိုက်ခတ်မြည်ဟိန်း၊ စည်တော်ကြိမ်းကေ
ကြက်သိမ်းထရေ၊ အားရရေ --။

ရောင်နီသန်းကေ၊ ဆွမ်းပန်းရီချမ်း
လှုဒါန်းမျှဝီ၊ မိတ္တာမြီမှာ
ပီတိနှိုးဆော်၊ သာထုခေါ်မိ
မှန်းမျှော်နိဗ္ဗာန်၊ သံစည်သံလည်း
မာန်စွယ်နှိမ့်ချ၊ ငြိမ်းချမ်းစွ --။

မောင်နန်းလှ (မြောက်ဦး)

သင်္ခန်းစာ

သင်္ခန်းစာ
---------
လှပပြိုင်းပင်
ရွက်သစ်ဆင်လည်း
ညောင်ပင်ကဖျက်
ကျီးဘောင်းဖျက်က
မူလသစ်ပင်
သီပွဲဝင်ပနာ
သစ်ပင်လည်းပြုန်း
မျိုးလည်းတုံးရေ --။

(ကိုယ်တော်)
၂၉-၅-၂၀၀၉

လောကသာရပျို့

လောကသာရပျို့
----------------------
အသက်ရှည်စွာ၊ အနာမဲ့ကြောင်း
ကောင်းလှစီချင်၊ ပဲ့ပျင်နိစ္စ
ကွပ်ဆုံးမသား၊ မိဘဆရာ
စကားနာ၍၊ ကျမ်းစာသိမြင်
တတ်အောင်သင်လော့၊ ပေါ်လွင်မပြု
ကောင်းရာတုလျှက်၊ ကောင်းမှုမြတ်နိုး
ကောင်းအောင်ကြိုး၍
ကောင်းကျိုးကိုယ်၌ တည်စီမင်း --။

မိခင်ဖခင်၊ ကျေးဇူးသျှင်ကို
ချစ်ခင်မြတ်နိုး၊ ဂူပုထိုးသို့
ရှိခိုးဦးတင်၊ ကြည်လင်မြတ်လေး
လုပ်ကျွေးခယ၊ ရိုတုပ်ကွလျှက်
ကြီးလှသက်အို၊ မျိုးဆွီကိုလည်း
ကြည်ညိုညွတ်တိမ်း၊ ပိုက်ထုပ်သိမ်း၍
မယိမ်းစင်းလျှင်းငြိမ်းစီမင်း --။

ထုံးမှီးနည်းနာ၊ အဖြာဖြာ၌
ပညာရှာမှီး၊ မကြီးသက်ရွယ်
အငယ်သော်က၊ ကြိုးလုံးလလျှက်
တုပ်ကွပုဆစ်၊ ဆရာစစ်သို့
ကြောက်ချစ်ရိုသီ၊ စာပီတတ်ကြောင်း
တချောင်းချောင်းလျှင်၊ ငြိမ်အောင်းသည်းခံ
ဆရာထံ၌၊ သင်အံမှတ်သိ
တနိတခြား၊ ပွားများစုံစီ
ဝမ်းထဲခွီ၍၊ တလီတထူး
ဂုဏ်ကျေးဇူးကို
ဆည်းပူးသိမြင်ကြွယ်စီမင်း --။

(ရခိုင်သူမြတ်)

မတတ်သာလို့ရာ

မတတ်သာလို့ရာ
-----------------
ခွီးသူတောင်းစားတိက
ငရို့ပြည်ကိုလာအုပ်ချုပ်
လူလုပ်နီကတ်တေ --။

သူရို့တိက
အနူလက်နန့်
ရွှေခွက်ကိုင်ချင်နီကတ်တေ --။

သောက်ပုံမလာရေမျက်နှာနန့်
ခွက်စားတိ --။

အကုသိုလ်ရုပ်နန့်
အယုတ်တမာတိ --။

အခုကျမှ
ငိုပြတတ်ကတ်တေပင်
ကကောင်း
သနားဖို့ကောင်းလှပါ၏ --။

ကွကွကွကွ
မျောက်မအိုနာတိ --။

အားနာပါယင့်
မင်းရို့ပါးစပေါက်ကို
ဂွမ်းဆို့ထားလိုက်ချင်ရေ --။

(ခတ်ကျောက်သီး)
မေလ (၂၅) ရက်၊ ၂၀၀၂ - ခုနှစ်။

ငိုခြင်းစီလို့ ငိုလိုက်ချင်

ငိုခြင်းစီလို့ ငိုလိုက်ချင်
---------------------
အဘာလေး အဘာ ... !
အဘာဟိခါက
အဘာသားသမီးတိ
ရွာအလယ်မှာ
မျက်နှာပွင့်ခစွာတိ
ဒေဂုခါမှာ
ခွက်ကိုင်ပျာယ်
ရွာစိုင်လျှောက်မတောင်းရကေလည်း
အရပ်သျှစ်မျက်နှာမှာ
ကျွန်ခံနီကတ်ရပျာယ်ထော
အဘာ... !

အဘာလေး အဘာ ... !
အဘာဟိခါက
အဘာရို့အိမ်မှာ
ဧယိုင်သာခြင်းသံညံလို့
စာပီလင်္ကာ
ထထိန့်ကြိုးခကေလည်း
ဒေဂုခါမှာ
အဘာသားသမီးတချို့
ကိုယ့်စကားကိုမပြောချင်
ကိုယ့်စာကိုတောင် ရွီးဖို့ရှက်နီကတ်ပျာယ်
အဘာ ... !

အဘာလေး အဘာ ... !
အဘာဟိခါက
အဘာသားသမီးတိ
အမျိုးစောင့်ထိန်းရေလို့
ရာဇ၀င်မှာ ထင်ပေါ်ခကေလည်း
ဒေဂုခါမှာ
ရစွာယူလို့
ဘဘောင်းဆုံးနီကတ်ပျာယ်
အဘာ ... !

အဘာလေး အဘာ ... !
အဘာဖိုးဖီးရို့
ဆယ်သက်စားမကုန်
ထားခကတ်ကေလည်း
ရွာလယ်မှာ ပြောစရာဖြစ်လားစွာစကားက
“မ,မ” နန့် “ဗျ” ရာကျန်ပျာယ်လတ်
အဘာလေးးး .... !
အဘာတချက်လာကြည့်ဖိ ... !

(ကိုမင်း) (Ko Mum)

ဒေးဝန်းကြီးအောင်ကျော်ရွှီရတု

ဒေးဝန်းကြီးအောင်ကျော်ရွှီရတု
-------------------------------
နောက်သားနောင်လာ နောက်ထပ်ပါရို့
ဆရာသုံးလက် ရှိကံဖက်၍
အသက်ခန္ဓာ လူရို့မှာကား
တခါတရံ အဘိုးတန်၏ ---။

တရံတခါ ဆိုတုံပါလည်း
သူသာလာလျှက်၊ ဖိနှိပ်စက်က
အသက်ထိုခါ ဆုံးတတ်ရာ၏ ---။

ပြည်ရွာတိုင်းဖွား မျိုးလေးပါးရို့
တရားလမ်းမှန် ကျင့်ကြောင်းကြံလျှက်
အမှန်မုက္ချ သက်စွန့်ကြလော့ ---။

ဓမ္မတာလမ်းမမှန် ဆိုးကြောင်းကြံလျှက်
တန်စိုးကိုစား လိမ်လှည့်ဖျားသော်
နောင်သားတဖန် သည်းမခံနှင့် ---။

နိုင်ငံတကာ ဟူရာရာ၌
ပညာနှင့်ညာဏ် သင့်စွာဖန်၍
တာဝန်မပျက် သစ္စာရွက်လျှက်
အသက်ကိုလှီး သွီးချောင်းစီးမှ
အပြီးကြံ့ခိုင် နိုင်ငံတိုင်းမြို့
အစို့စို့နှင့် ကိုယ့်ရို့ရပ်စည်
ကိုယ့်တိုင်းပြည်ကို ရမည်မုက္ချ
ဤလောကသည်
အောက်ကျမခံချင်သောကြောင့် ---။

(ဒေးဝန်းကြီးအောင်ကျော်ရွှီ)

ဆရာကြီးဦးသာထွန်း၏သမိုင်းဝင်မိန့်ခွန်းများ

(ALD) ၏ နာယကကြီးလည်းဖြစ်၊ ရခိုင်မြန်မာပဏ္ဍိတ်ကြီးလည်းဖြစ်သော ဆရာကြီးဦးသာထွန်း၏သမိုင်းဝင်မိန့်ခွန်းများ (ပထမပိုင်း)

ကြွရောက်လာကတ်တေ ရခိုင်အမျိုးသားပုဂ္ဂိုလ်များထဲမှာ ကျွန်တော်ထက်အသက်ကြီးရေပုဂ္ဂိုလ်များကို ရှိခိုးပါရေ။ ကျွန်တော်ထက်အသက်ငယ်ရေပုဂ္ဂိုလ်ရို့ကို ကျွန်တော်အလေးအမြတ်ဂါရ၀ပြုပါရေ။ ကျွန်တော်ပြောဖို့စကားက ရခိုင်ပြည်မှာ ရခိုင်လူမျိုးရို့သည် နောင်ကိုဘဇောင်ကံကြမ္မာဖန်တီးပြီး နီကတ်ရဖို့လဲဆိုစွာကိုပြောဖို့စွာပါ။ ကကောင်းအရေးကြီးပါရေ။ အေစကားတိကို ကျွန်တော်ရို့ ရခိုင်ဒီမိုကရေစီအဖွဲ့ချုပ်ဥက္ကဌကြီး လူမျိုးစုများ၏နာယကကြီးဖြစ်တေ ဦးစောမြအောင်က ပြောလားခပါယာ။ တနာရီကျော်လောက်ပြောလားခတောင်မှမ၀သိမ့်။ ဇာဖြစ်လို့လဲဆိုကေ လိုရင်းတိကိုပြောစွာပါ။ ယင်းလိုရင်းတိမှာ တပုဒ်တပုဒ်စီ၏ဖွင့်ဆိုချက်စွာ ကကောင်းအများကြီးပါ။ ယကေ ပြောပြီးနားမလည်လိုက်ကေ ဒုက္ခရောက်ဖို့၊ နားမလည်လိုက်ကေ ဇဝေဇ၀ါဖြစ်ဖို့။ ထိုပုဂ္ဂိုလ်၏ဖွင့်ဆိုချက်တိကို တင်ပြပါဖို့။ ယင်းခါမှ ကျွန်တော်ရို့ရခိုင်သားတိ ဇာလုပ်ရဖို့လဲ နားလည်ကတ်ပါဖို့။ လုပ်ဖို့စွာမှာ ဇာနီရာကစရဖို့လဲ အရေးကြီးပါရေ။ ကွက်ကျော်ကေမှားပါလိမ္မည်။ ရခိုင်သားတိ ကွက်ကျော်တိကိုမြင်လာရပါလိမ္မည်။

နောက် အေလမ်းခရီးမှာ ဇာစူးငုတ်ခလုတ်တိက အတွင်းရန်၊ အပရန်လဲဆိုစွာ အာရုံစိုက်ပြီးကြည့်ရပါဖို့။ အေနိဥက္ကဌကြီးပြောလားခရေပိုင် တခြားတခြားသောလူမျိုးတိမှာ စုပေါင်းပြီး ဘုံရန်သူတည်းဟူသော (တစည) မဆလကိုတိုက်တေနီရာမှာ အင်အားအပြည့်နှင့်တိုက်ရဖို့ဆိုစွာကိုသိထားရေအတွက် အင်အား နောင်းနီကတ်ပါပျာ။ ကျွန်တော်ရို့ရခိုင်သားတိမှာကြည့်လိုက်တေခါ အင်အားက ထထွတ်ကြီးကြီနီပါရေ။ ကကောင်းဝမ်းနည်းဖို့ကောင်းပါရေ။ ဂေါင်းဆောင်တိကလည်း ပြောခီကေ သတိရရေဆိုပါရေ။ ဆိုရေခါ ရခိုင်သားမှာ မျက်စိမဟိပါ။

ကျွန်တော်ရို့ရခိုင်သားတိမှာ ခံနီရစွာဇာကြောင့်လဲ။ တဦးတည်းတယောက်တည်းကောင်းစားရေးကို မ၀သိမ့်ရေဂေါင်းဆောင်တိက တခုလည်းမလိမ္မာမသိနားမလည်ရေရခိုင်ပြည်သူတိကို အမျိုးမျိုးလိမ်စား၊ ၀ါစားနီကတ်တေအတွက် ကျွန်တော်ရို့ရခိုင်ပြည်ကြီးပြိုဖို့ကြံနီပါရေ။ ယေဇူးနှင့် ဥက္ကဌကြီး မိန့်ခွန်းပြောလားခရေပိုင် ကမ္ဘာ့အလယ်မှာ ကကောင်းရှက်ဖို့ကောင်းနီပါပျာ။ ယေကေလည်း သူရို့လူတစု ပျော်တုန်းပါ။ ယင်းကိစ္စကိုသတိထားဖို့ ပြောလိုပါရေ။ ဆိုရေခါ ကျွန်တော်ရို့ဗုဒ္ဓဘာသာရခိုင်လူမျိုးစွာ ဘုရားဟောဒေသနာတော်နှင့် သီလကိုစောင့်ရေအတွက် ရခိုင်လို့ခေါ်ပါရေ။ အမျိုးနှင့်သီလကို ကနိမစောင့်ကေ ကနိရခိုင်မခေါ်ပါပျာ။ (ကပျက်) လို့တောင်ခေါ်ဖို့မရ။ မျိုးဖျက်အဆိုးလို့ခေါ်ရပါဖို့။ ယင်းအတွက်နှင့် ကျွန်တော်ရို့ သတိထားပြီးကေ လူတစိချေကျန်စွာက လားကတ်ရဖို့စွာပါ။ ပထမ ယင်းအကြောင်းကိုမပြောခင် ကျွန်တော်ပြောပါဦးမည်။ ရခိုင်ပြည်လားဖို့အင်အားကို ကြည့်လိုက်တေခါ တော်တော်ခိုင်ခိုင်ခန့်ခန့်နှင့် လားကတ်ရပါဖို့။ ဇာဖြစ်လို့လဲ၊ ကနိလူဦးရေကိုကြည့်လိုက်တေခါ (၂ ဒသမ ၀၆) သန်းဟိပါရေ။ ယင်းအထဲမှာ စပါးကြီးမျိုရေပိုင် အမျိုးမျိုးသောနည်းလမ်းနှင့်ဝင်လို့ ဘူးသီးတောင်၊ မောင်တောကျလားခပါယာ။

ယင်းအထဲမှာ ဘလောက်ပါရေလဲဆိုခါ တဒင်္ဂမသန်မန်လူမျိုးတိ ရိုဟင်ဂျာဆိုပြီး ဟိတ်ဟောနီပါရေ။ ရိုဟင်ဂျာလို့ ရခိုင်ပြည်မှာမဟိမှတ်ထားပါ။ ယင်းအချက်ကိုကြည့်ကေ ဇာဖြစ်လို့လဲ။ မျိုလားခလို့။ ဖြစ်တေနည်းနှင့်မျိုရေ။ ခြောက်လို့ခြိမ်းလို့မျိုရေ။ ငွေနှင့်ပေါက်လို့မျိုရေ။ ကနိဘူးသီးတောင် မောင်တောရောက်ကေ ဥက္ကဌကြီးဦးစောမြအောင်ပြောရေပိုင် နက်ဖန်ခါ ကုလားတန်ကိုရောက်ဖို့။ ရခိုင်သားရို့ အရာ (၅) နှစ်အတွင်းမှာ ကျောက်ဖြူမြို့တဖက် ရခိုင်ရိုးမကိုကျော်လို့ ပြီးဖို့ပျင်ထားကတ်ဖိ။ မိမိယော့ယော့နှင့် (ငါရို့နိုင်ငံရေးလုပ်ဖို့မဆိုင်၊ ထမင်းတဆုပ်စားနီရစွာအဖမ်းခံရဖို့။ ငါရို့နှင့်နိုင်ငံရေးဇာဆိုင်လဲ) လုပ်နီကေတော့ ရခိုင်သားရို့ ပြီးဖို့ပျင်ထားကတ်ဖိ။ အရာမပြောလိုပါယာ။

ကျွန်တော်ပြောရဖို့စကားပြောင့်ပြောင့်ပါ။ ၁၁၄၆ ခု ဘိုးတော်မောင်ဝိုင်း ရခိုင်ကိုသိမ်းရေနိကပင် ကနိမှာ (၂၀၅) နှစ်ပြည့်ပါဖို့။ ကျွန်သားပေါက်ဖြစ်တေ (၂၀၅) နှစ်ကာလမှာ ကျွန်စိတ်ပေါက်နီကတ်တေ။ ရခိုင်သားတိ ကနိ တဒင်္ဂလူမျိုးတိကိုမှီလို့ ကြီးပွားနီရေအတွက် ယင်းအတိုင်းလားဖို့ကြံနီကတ်ပါရေ။ ကနိ ယင်းအခြေအနေမဟုတ်ပါ။ သတိထားကတ်ပါ။ (၂၀၅) နှစ်မျိုသိပ်ထားရေစကားကို ကျွန်တော်ကနိဖွင့်ပါဖိ်ု့။ ကျောက်တော်၊ စစ်တွေမှာဖွင့်ခပါပျာ။ ဇာဖြစ်လို့ဖွင့်ရဖို့လဲ။ ကိုယ့်အမျိုးသားအတွက် ကျွန်တော်ရို့ ခုလောက်အသက်အရွယ် (၇၄-၇၅) ဖြစ်နီပျာ။ မတန်ကေလည်း ရခိုင်တိမသိရေအတွက် အေပိုင်ဒုက္ခခံလို့ မဖွင့်ခကေ သမိုင်းကြွီးဆပ်လို့ကုန်ဖို့မဟုတ်။ လူမျိုးအတွက် ဒေ၀ါကြီးတိထွက်လို့ လားနီကတ်စွာပါ။ ကျွန်တော်နှင့် တခြားပါလာကတ်တေပုဂ္ဂိုလ်တိအားလုံး ၀ါကြီးတိပါ။ ထိုင်နီဖို့တန်ရေအချိန်မှာ မထိုင်ဘဲနှင့် ဇာဖြစ်လို့လားနီကတ်တေလဲ။ အယင်က အဖျက်သမားပါတီတိက ဇာပြောလဲ။ (၀ါကြီးတိရာလုပ်ဖို့ တက်လာကတ်တေ) လို့ပြောပါရေ။ ကျွန်တော်မပြောချင်ပါ။ အခုရခိုင်ပြည်မှာ ဇာဖြစ်နီလဲဆိုခါ ကျွန်တော်ရို့ရခိုင်ပြည်သည် သျှမ်းပြည်၊ ချင်း၊ ကရင်၊ ကယား၊ မွန်နှင့်မတူပါ။ အနောက်ဖက်က စပါးကြီးတကောင်မျိုနီပါရေ။ ဒေအထဲမှာ မျိုးဖျက်တိ ကွဲအောင်ဖျက်နီရေ။ အေပိုင် ကိုင်ဖို့မရအောင် ဖြစ်နီစွာကို ကုဖို့လာစွာပါ။ သတိထားကတ်ပါ။

ဆိုခါ ကနိ ဥက္ကဌကြီိးဦးစောမြအောင်ပြောခရေပိုင် ရခိုင်ဒီမိုကရေစီအဖွဲ့ချုပ်ပါတီကို စဖွဲ့ရေနိကပင် ဇာလောက်ရောက်ပျာလဲဆိုခါ မနှစ်ကစဖွဲ့စွာ အခု တနှစ်နှင့် (၃-၄) လရောက်ပါယာ။ သျှမ်း၊ ချင်း၊ ကရင်၊ ကယား၊ မွန်စရေ တခြားတခြားသောလူမျိုးတိမှာ ကကောင်းနောင်းလားပါယာ။ သူရို့တိမှာ တဖွဲ့နှစ်ဖွဲ့ရာဟိရေ။ ရခိုင်မှာ ပါတီဘလောက်ဟိရေလဲ။ (၁၅၅) ဖွဲ့။ ဘလောက်ကြောက်ဖို့ကောင်းပါရေလဲ။ လူကိုကြည့်ကေ (၂) သန်းနှင့် (၆) သိန်း။ ကုလား (၈) သိန်းဟိရေ။ ကျန်စွာအားလုံး ရခိုင်မဟုတ်သိမ့်။ မာရမာကြီးတမျိုးပါရေ၊ ချင်းပါရေ။ မြိုပါရေ။ ခမီးပါရေ။ ယင်းအထဲမှာ ကမန်ဆိုရေလူမျိုးတမျိုးပါသိမ့်ရေ။ ဒိုင်းနက်ပါရေ။ သက်ပါရေ။ တခြားတခြား ကုလား၊ တရုတ်၊ တရုတ်ကပျက်၊ ဗမာပါရေ။ ယေခါ ရခိုင်သားတိက အေလောက်လူနှုတ်လိုက်ကေ ဘလောက်ကျန်ဖို့လဲ။ ရခိုင်သားတိထဲက အေလောက် ကျန်စွာတိထဲက တဆယ်နှင့်သျှစ်သိန်းခွဲနှုတ်လိုက်ကေ ဇာကျန်ဖို့လဲ။ နင်းပြားဖြစ်နီကတ်ဖိ။ တခုလည်းမလိုပါပျာ။ မပြောလိုပါယာ။

ယလောက်စွာကိုဖျက်လို့ မဟောသထာပြဿနာပိုင် အမျိုးမျိုးဖြစ်နီရေ။ တချို့ပါတီတိကလူတိ ရွာတိုင်းဆင်းပြီးကေ အေက မိခင်ရခိုင်လူမျိုးစစ်စစ်ကို ဘေးဖယ်ထားကတ်တေ။ မဟောသထာ ပြဿနာကိုကြည့်ပါ။ ကျန်ရေ ပြည်ဖျက်သစ္စာဖောက်တိက ဘီလူးမကိုအစွယ်ဖြတ်တေပိုင် ဖြစ်နီကတ်တေ။ သတိထားကတ်ပါ။ ကျွန်တော် မြောက်ဦးမြို့နယ်ကလာပြီးကေ အကြောင်းကြောင်းကြောင့် ကျောက်တော်မြို့နယ် မဲဆန္ဒအမှတ် (၂) ကို ရောက်လားခပါရေ။ ကျွန်တော် ကျောက်တော်မြို့ကို စထွက်တေလောက်ကပင် ကျွန်တော်ရို့မရောက်ဖူးရေရွာတိ ကကောင်းအများကြီးပါ။ ဇာပိုင်ပျင်လို့ စည်းရုံးကတ်ဖို့လဲ။ ကျောက်တော်မြို့အကြောင်းပြောရကတ်ဖို့ဆိုကေ ကျောက်တော်မြို့မှာ ရွာပေါင်း (၃၃၅) ရွာဟိပါရေ။ ကျွန်တော်ရို့ ရခိုင်ဒီမိုကရေစီအဖွဲ့ချုပ်က ကိုယ့်ဖေသာနှင့်ကိုယ် ထူထောင်ထားရေအတွက် လားဖို့စားစရိတ်၊ ဘုတ်စရိတ် မတတ်နိုင်ပါ။ ခြီကြောင်းလားရပါရေ။ ကျောက်တော်မှာ ရံပုံငွေထည့်မည့်သူဟိပြီးကေ မြောက်ဦးမှာ ဒင်္ဂါး (၁၀၀၊ ၂၀၀) ထည့်မည့်သူမပေါ်။ ထည့်မည့်သူတချို့လည်း ဟိကောင်းဟိပါလိမ္မည်။ ယကေ ဇာနှင့်အလုပ်လုပ်ပါဖို့။ ယင်းအတွက်နှင့် မြောက်ဦးမြို့ညံ့လားပါရေ။ ကျောက်တော်မြို့မှာ ကျွန်တော်လာရေခါ ကကောင်းများကြီးတွိရပါရေ။ (တစည) ပါတီ သူတောင်းစားအလှူခံပိုင် ရံပုံငွေတိလျှံလားပါယာ။ ကကောင်းရလားပါယာ။

ယေခါ ကျွန်တော်ရို့အချေတရွီ ကိုယ့်စွာကိုယ်စားပြီးကေ အငတ်ခံနီလို့ အေအနီထားရောက်စွာ။ ရခိုင်ပြည်မြောက်ပိုင်း ကျောက်ဖြူ၊ တောင်ကုတ် သူရို့ပါတီ သံမဏိပိုင်နောင်းနီယာ။ ကျောက်တော်နယ်မှာ ကျွန်တော်တရားဟောခါ ရွာလိုက်လာပါရေ။ မြောက်ဦးမြို့ကရောက်လာဝေးဆိုခါ မရောက်ပါ။ ကျွန်တော်စိတ်ညစ်ပါရေ။ အခုနားက ဥက္ကဌကြီးဦးစောမြအောင် အခြားလူမျိုးစုတိနှင့်ယှဉ်ပြိုင်ခါ စိတ်ညစ်ရေပိုင် ရခိုင်ပြည် (၁၇) မြို့နယ် အရပ်ရပ်အမြို့မြို့၊ အနယ်နယ်ကို ပါတီတာဝန်နှင့်စည်းရုံးရေခါ ပုဏ္ဏားကျွန်းမှာ ခရမ်းတောင်ကိုရောက်ခီပါရေ။ ကျွန်တော်မြောက်ဦးမြို့သားအနီနှင့် မြောက်ဦးမှာဖြစ်ရစွာကို အားလည်းငယ်၊ ရှက်လည်းရှက်ပါရေ။ ဇာပိုင်ပျင်ကတ်ပါဖို့လဲ။ တောင်ပိုင်းမှာ အားလုံးဝင်လားခယာ။ ရခိုင်သားဆိုစွာ တခါဝင်ကေ ပြန်ထွက်ဖို့မလွယ်။ ရှက်တတ်တေ။ ယင်းအတွက်နှင့် ရခိုင်ပြည်နယ်အတွင်း (၁၇) မြို့နယ် ကတောက်ကရောက်လုပ်နီကတ်တေအထဲမှာ သူရို့မှာ ရမ်းဗြဲမြို့နယ်က ဇာပိုင်လူတိပါလဲကြည့်ပါ။ ကျွန်တော်ရို့မှာလဲ မပါစွာမဟုတ်။ ပါပါရေ။ မြောက်ဦးမြို့ ဇာဖြစ်နီရေလဲ။ ကိုယ့်မြို့ကို အပြစ်တင်စွာပါ။ အေအတိုင်းဖြစ်နီကေ ကျွန်တော်ရို့မြောက်ဦးမြို့ နောက်ဆုံးကျဖို့။ ယေကေလည်း ဟောပြောပုံဟောပြောနည်း လိုပါသိမ့်ရေ။ ထိုကထိုးနှက်ချက်တိကို မိမ္မရန်ဖြစ်နီစွာထက် ဖြေယှင်းပစ်စွာက ကောင်းပါရေ။

ယင်းထိုးနှက်ချက်တိကိုမဖြေယှင်းကေ ဖြီလို့မပြီပါပျာယ်။ ယင်းအတွက်နှင့် ကျွန်တော်ပြောဖို့စွာက ကနိ ကျွန်တော်ရို့ဇာလုပ်ဖို့လဲဆိုခါ အေနိနိုင်ငံရေးမဟုတ်ပါသိမ့်။ နိုင်ငံရေးအတွက်စည်းရုံးရေးပါ။ ဥက္ကဌကြီးမိန့်ခွန်းမှာပါရေပိုင် စည်းရုံးရေးကဏ္ဍမှာ စည်းရုံးရေးမအောင်မြင်ကေ အခု (၁၀) တန်းစာမီးပွဲဖြေရေပိုင် စာမီးပွဲမှာစာမရကေ စာမအောင်လိုက်ကေ ဂေဇက်ထွက်ခါ ကိုယ့်နာမည်မပါ။ ယင်းအတွက်နှင့် ကျွန်တော်ရို့သည် စည်းရုံးရေးမှာ စည်းရုံးရေးကို အောင်မြင်အောင်လုပ်ရပါဖို့။ အလားတူ ကျောင်းသားမှာလည်း စာမီးပွဲမစစ်ခင် စာရအောင်ဖတ်ရပါဖို့။ ဖတ်ရုံလား။ ဘာသာတိုင်း၌ နားလည်အောင်လေ့ကျင့်ရဖို့။ ယင်းနည်းတူစွာ မြောက်ဦးမြို့မှာ စည်းရုံးရေးဆိုစွာ ဇာပိုင် ဇာဘာသာနှင့်လားဖို့လဲ။ ဇာပိုင်လားဖို့လဲဆိုစွာမသိလို့ ကကောင်းစိတ်ဓါတ်ကျပါရေ။ တခြားတခြားမြို့နယ် စည်းရုံးရေးနံပါတ် (၁-၂) အထဲက တက်တက်ကြွကြွမြင်ရလို့ ၀မ်းသာပါရေ။ ဆိုင်းဘုတ်ကြီးတင်လို့ တဟဲဟဲနှင့်လူစုနီလို့ နောက်ဆုံးဂဇက်ထွက်ခါမပါကေ လားပျာလို့မှတ်။ ယေကေ ဇာပိုင်လုပ်ရဖို့လဲဆိုခါ အေနိစည်းရုံးရေးအချိန်။ စည်းရုံးရေးအချိန်မှာ ဇာလုပ်ဖို့လဲ။ စည်းရုံးရေးလုပ်ရဖို့။ လုပ်ခါ ဇာမူနှင့်ဟောဖို့လဲ။ စည်းရုံးရေးမှာ လူထုစိတ်ပါလာအောင် အချက်ကြီးလေးချက်ဟိပါရေ။ အခုသေနားက ဥက္ကဌကြီးပြောရေပိုင် (၁) တန်းတူရေး။ (၂) ဒီမိုကရေစီစစ်မှန်ရေး။ (၃) မူမှန်ရေး။ ရခိုင်ဒီမိုကရေစီအဖွဲ့ချုပ် မူမှန်ဖို့လည်း အရေးကြီးပါရေ။ မူမမှန်ကေမကြိုက်။ ယင်းမူချထားစွာကိုသုံးသပ်ဆောင်ရွက်ဖို့။ (၄) လူမှန်ရေးလို့ (၄) ချက်ဟိပါရေ။ ယင်းလေးချက်မှာ ရခိုင်ရိုးမတဖက်က (၁၇) မြို့နယ်၊ ရန်ကုန်တမြို့နယ်၊ (၁၈) မြို့နယ်ထဲမှာ ရခိုင်အမျိုးသားကိုယ်စားလှယ်ရို့သည် ဘဇောင်ပိုင်ပုဂ္ဂိုလ်တိပါရေလဲ ရွီးချယ်လို့တင်ပြထားစွာ ဖတ်ကြည့်ကတ်ပါ။ ပါပါယင့်။ ယင်းအချက်မှာ မိုးဦးကျငပြီတက်တေပိုင် (သူတက်ဖို့၊ ငါတက်ဖို့) ဖြစ်နီကတ်တေခါ ရခိုင်ပြည်နယ်မှာ (၂၆) နီမှာ (၁၅၅) ယောက်ဆိုခါ ကျွန်တော်ရင်ဖတ်ဆို့ပါပျာ။ နိုင်ဖို့လား ယင်းသူရို့မနိုင်။ မနိုင်ကေဇာပျင်ဖို့။ မဲဖျက်ကတ်ကေ အေကလျှော့ဖို့။ လျှော့ကေ ကျားသီအသက်ဝင်ပျာ ကိုက်ဖို့။ ကျားသီအသက်ဝင်ကိုက်ကေ အေလူတိ တကောင်လဲမကျန်ပါပျာလို့မှတ်။ ကောင်နှင့်သုံးစွာ ကျွန်တော်လည်းပါပါရေ။ အားမရလို့ပြောစွာပါ။ ယင်းအတွက်နှင့် ယင်းစခန်းကို ကျွန်တော်ရို့ နနောင်းလားကတ်ရပါဖို့။

ကျွန်တော်ရို့သည် တန်းတူရေးကို ဥက္ကဌကြီးပါးစကထွက်လားခရေပိုင် (သျှမ်း၊ ကရင်၊ ကချင်၊ ကယား၊ မွန်၊ ချင်း၊ ရခိုင်) လူမျိုး (၇) မျိုးသည် (၄၂) နှစ်တာကာလပတ်လုံး လွတ်လပ်စွာတန်းတူမရခလို့ ပြောက်ကျားလည်းမကန်၊ ပြည်သူလည်းနှိပ်စက်ခံလို့ တတုတ်သီပျာ။ ကိုယ်တွိပါ။ ထိုခါ တနားက ဥက္ကဌကြီးပြောခရေပိုင်ပါ သဘောပေါက်ပါလိမ္မည်။ ကျွန်တော်ရို့လည်း သဘောပေါက်ပါရေ။ ရခိုင်နှင့်တကွ ကျန်လူမျိုး (၆) မျိုးက သဘောပေါက်သောကြောင့် ရခိုင်သည် ဘဇောင်ဥာဏ်နှင့် ဘဇောင်ပိုင်ပျင်နီလဲဆိုခါ ရိုသေမှုမဟိ။ ကိုယ်ရို့မှာ ခြံပြိုလို့။ အခုခြံပြိုစွာကို ပျင်ဖို့စွာပါ။ လုပ်နိုင်ကေလုပ်၊ ကြားမှာ (၁) လခွဲရာ ဟိယာ။ နောက်စည်းရုံးကေရယင့်။ အခုဆင်းခီကေအခုရယင့်။ ချက်ပြီးသားထမင်းကိုစားဖို့လားစွာယာလို့ မထင်ပါကဲ့။ မြောက်ဦးမြို့ကို အကြိမ်ကြိမ်ကျွန်တော်ပြောလိုပါရေ။ ကိုယ့်လူလို့မှတ်လာ။ မလွယ်ပါ။ လေးမြို့ချောင်း တချောင်းနှင့်အစပိုင်း ဒေဖက်ပိုင်း။ ယင်းအတွက်နှင့် ကကောင်းသတိထားရပါဖို့။ တခြားတခြားမြို့တိမှာ ၀မ်းမြောက်လို့ လက်ခုပ်တီးနီကတ်ပါယာ။ မြောက်ဦးမြို့မှာ မဆင်းရပါသိမ့်လတ်။

ဇာအချိန်စည်းရုံးဖို့စိတ်ကူးရေလဲ။ အခုသေနားကစကားကို ပြန်စပါဖို့။ အေမှာ ညီမျှရေး၊ တန်းတူရေး၊ ဗိုလ်ချုပ်အောင်ဆန်းသည် ပင်လုံကိုလားခီရေ။ လူမျိုးခြောက်မျိုးကိုစည်းရုံးရေ။ ယင်းတိုင်းရင်းသား လူမျိုးတိထဲမှာ ရခိုင်မပါလို့ ရခိုင်ပြည်ကိုချန်လှပ်ထားခရေ။ သူရို့ မြောက်ဦးမှာ ကျွန်တော်ရို့နှင့်တွိလို့ ပြောလို့ဟိပါရေ။ ထိုပုဂ္ဂိုလ်သီလားရေခါ မရလိုက်ပါယာ။ တန်းတူရေးကို ကိုင်ခစွာပါ။ တဒင်္ဂလူမျိုးကို ကိုင်စွာမဟုတ်။ ရလတ်တေခါ (၄၂) နှစ်ကာလပတ်လုံး ရိုးမတောင်ထိုဖက် ရန်ကုန်ကိုလားကေ မြင်ပါလိမ္မည်။ မှန်ကြည့်ဖို့ရရေလမ်းတိ။ တိုက်တကတိုက် တာတကတာ၊ အလုပ်ရုံကြီးတိ၊ စက်ရုံကြီးတိ ဟိန်းလို့။ ဒေဖက်ကိုကျော်ကေ၊ ပြာပြာဟဟောက် ကျွန်းရွာချေတရွာဖြစ်နီရေ။ (၄၂) နှစ် လွတ်လပ်ရေးရစွာ အသူခံစားရေလဲကြည့်လိုက်ပါ။ မျက်စိဖွင့်ကြည့်လိုက်ပါ။ (ပထမပိုင်းပြီး၏)

(ALD) နာယကကြီးလည်းဖြစ်၊ ရခိုင်-မြန်မာပဏ္ဍိတ်ကြီးလည်းဖြစ်သော ဆရာကြီးဦးသာထွန်း၏သမိုင်းဝင်မိန့်ခွန်းများ (ဒုတိယပိုင်း)

ထမင်းထုပ်ကိုပြလို့ မိသားစုစားနီရစွာဝမ်းသာပြီးကေ ကိုယ့်လူမျိုးကို အောက်တွင်းသွင်းပြီး စည်းရုံးနီကတ်တေ။ ကောင်းကောင်းသတိထားကတ်ပါ။ ပြည်ဖျက်လား။ တိုင်းဖျက်လား။ ရခိုင်ပြည်ဖျက်ဖို့ကြံနီကတ်တေလားလို့။ ကကောင်းကြောက်ဖို့ကောင်းပါရေ။ အခု ကျွန်တော်ရို့ ရခိုင်ဒီမိုကရေစီအဖွဲ့ချုပ်ရေ လူမျိုးစုတိနှင့်စုမိပါပျာယ်။ ၀မ်းသာကတ်ပါ။ တန်းတူရဖို့အရေးဆောင်ရွက်ထားပျာယ်။ ၀မ်းသာကတ်ပါ။ ကိုယ့်လူကိုကိုယ် ပြုစုကတ်ပါလို့ တိုက်တွန်းလိုပါရေ။ (ကိုင်) ဘဇောင်ပျင်ဖို့လဲ။ စစ်တွေမြို့မှာ တပ်ပေါင်းစုဆိုပြီးကေ ကျောင်းသားဂေါင်းကို ရောင်းပြီးကေ ရက္ခိုင်ကျောင်းသားများအဖွဲ့ ငါရို့ဖက်ပါရေဆိုပြီးကေ စာအုပ်တိထုတ်နီကတ်ပါရေ။ စစ်တွေမြို့က ရခိုင်ကျောင်းသားများအဖွဲ့က မခံမရပ်နိုင်လို့ပြောရေ။ ငါရို့မပါကိုး။ အကိုရို့ ဇာလုပ်ကတ်စွာလဲလို့ ပြောပါရေ။ ယင်းပိုင်ရောင်းစားနီကတ်လို့ ပုဏ္ဏားကျွန်းမြို့တမြို့ပြိုလားခရေ။ အေအချက်တိ ဇာလုပ်စွာလဲ။ ကျွန်တော်ရို့ဥက္ကဌကြီးပြောရေအတိုင်း စစ်တွေမြို့မှာ အလီလီ။ ကျောက်တော်မြို့မှာလည်း အလီလီ။ မြောက်ဦးမှာလည်း ကျွန်တော်ရို့ပါးကိုလာကတ်တေ တခုပိုင်လည်း စည်းရုံးလို့မရခပါ။ မရခစွာ အသူ့လက်ညှိုးထိုးလို့လဲ။ ရခိုင်ဒီမိုကရေစီအဖွဲ့ချုပ် ရခိုင်ပြည် တစည်းတရုံးတည်း အင်အားတခုတည်း လားဖို့စွာကိုမရ။ ရခိုင်တမျိုးသားလုံး၏အဖျက်သမားဆိုပြီးကေ စာတန်းထုတ်ပါရေ။

ယင်းပိုင် ပေါင်းစည်းလို့မရရေအကြောင်းပြောခါ ပေါင်းစည်းရေးကိစ္စနှင့်ပတ်သက်လို့ အစည်းအဝေးချခါ ဟုတ်စွာမဟုတ်စွာ မသိ။ မကြားဖူးခါ ပါလားခစွာမြို့တိဟိပါရေ။ ပေါက်တောမြို့ပါလားရေ။ ကျောက်ဖြူတခြမ်းပါလားရေ။ ယင်းသူရို့နှောက်ယှက်လို့။ အခုယင်းသူရို့နှောက်ယှက်စွာကိုလိုက်ပြီး လုပ်နီရပါရေ။ စည်းရုံးရေးကိုပစ်ခလို့ ဘလောက်နောက်ကျပါလဲ။ လပိုင်းဟိပါပျာ။ ထိုတရက်နိက စစ်တွေ ရခိုင်ဒီမိုကရေစီအဖွဲ့ချုပ်က စာရွက်ချေတရွက်ထုတ်လိုက်ပြီးမှ အရှက်ရလို့ ငိုသူငို ရယ်သူရယ် ဖြစ်လားခပါရေ။ ဘလောက်နှောက်ယှက်ပါရေလဲ။ စာရွက်ထုတ်ရအောင်ထိဖြစ်လားပါရေ။ ကျွန်တော်ရို့ရခိုင်သားတိထဲက ကျွန်တော်တနားက လူဦးရေပြခရေပိုင် ဒေဖက်ကကျန်ရစ်တေ လူဦးရေ (၁) သန်း (၂) သန်းမျှလောက်နှင့် လားရဖို့စွာပါ။ အားလုံးညီညွတ်နိုင်မှ ဖြစ်ပါဖို့။ သျှမ်းမှာ (၆၂) နီရာရစွာ အပြိုင်အဆိုင်ဆိုကေ (၂) လီတိုး။ ဥပမာအားဖြင့်ဆိုကေ (တစည) (၆၂) နီရာ၊ သျှမ်း (၆၂) နီရာ (၁၂၄) နီရာလားရပါဖို့။ (၁၂၈) နီရာလောက်ရာဝင်ပါရေ။ ယင်းပိုင်စွာမှာ (၂၆) နီရာမှ (၁၅၅) ယောက်။ (ရခိုင်သားရူးလာ) လို့မီးစရာ ဟိပါရေ။ လူမျိုးစုတိက ရယ်နီပါပျာ။ ဘဇောင်စွာလဲဥက္ကဌကြီး ရှက်တေ။ ကျွန်တော်လည်း ရှက်ပါရေ။ တခါတခါ တိုင်ပင်ပါရေ။ (ငါရို့လုပ်စွာမှားပျာယ်ဟန်) လို့။ ကိုယ်စွာကိုယ် လက်ကိုင်မရကား။ (ရခိုင်သားအရူးတိကို) လို့ စဉ်းစားကတ်ပါရေ။ ကျွန်တော်နှင့်တကွ ကျွန်တော်ရို့ရခိုင်သားတိအားလုံး ပါရေလို့မှတ်ပါ။ သို့သော် ကျွန်တော်ရို့မရသိမ့်ကေလည်း သည်းခံလို့နီရဖို့လားဆိုခါ မနီပါ။ ကျွန်တော်ကိုယ်တိုင် ဓိဌာန်ချက်နှင့် သီအောင်လုပ်ပါရေ။ ကျွန်တော်ကိုယ်တိုင် (၁) လနှင့် (၁၀) ရက်လောက် ကုလားတန်တရိုး၊ ပြိန်းချောင်းတရိုးတက်ကေ မတန့်ခပါ။ ထိုမြို့ဒေမြို့က အကူတောင်းလို့ ပုဏ္ဏားကျွန်းမှာ ကူခရပါရေ။ ပိုးရီပြင်ကလာစွာပါ၊ မိုးရွာကေ ထီးဆောင်းလို့။ ဆိုရေခါ ကျွန်တော်ရို့ စိတ်မပျက်ကတ်ပါကဲ့။ ရရေပိုင် တတ်နိုင်သည့်လမ်းကြောင်းက ၀င်ပြီးနီပါ။ မြောက်ဦးမြို့တောင်ခြမ်းနှင့် မြောက်ခြမ်းမှာ (၄) သောင်းကျော်ထိ ဟိပါရေ။ မဲဆန္ဒသျှင် (၂) သောင်းကျော်ရကေ ကျွန်တော်ရို့နိုင်ပါဖို့။ အခြားသူတိ ခွဲချင်ပိုင်ခွဲလီ (၂) သောင်း (၅) ထောင်ရကေ ကျွန်တော်ရို့လက်ခုပ်တီးလို့ ကကတ်ဖိ။ ယင်းအကြံကို ပီးလိုပါရေ။ ထိုင်မနီကတ်ပါကဲ့။

ကျွန်တော်ရို့အားလုံး ကျီလားပါယာ။ ကျောက်တော်မြို့ကို ၀င်လိုက်ကေ ကျောက်တော်မြို့နယ် ကောင်းကောင်း ကြောက်ဖို့ကောင်းပါရေ။ ကုလားရလားဖို့ပျင်ခါ ကျောက်တော်မြို့အတွက် မီးပိုင်ပူပြီးကေ လူကြီးရွယ်တူ (၁၅၀) လောက် ကျွန်တော်ရို့နှင့်တွဲပြီးလိုက်ပါရေ။ လူလတ်တိ၊ လူငယ်တိ အားလုံးတွဲပြီးကေ ဖေသာဟိရေ ဆီစက်ပိုင်သျှင်တိ၊ စက်ရုံပိုင်သျှင်တိ တယောက်တယောက်ကို (၅) ထောင်၊ (၆) ထောင်ထည့်ပြီးကေ လုပ်လိုက်လို့ အဗြင်းအောင်လားခပါရေ။ မြောက်ဦးမြို့မှာပိုင် (၅၀၀) မလှူဝံ့၊ (၁၀၀၀) မလှူဝံ့ကေ ကျောက်တော်မြို့ကျပါရေ။ ကျကေ ဆင်းပါယာ။ တချိန်တည်းနှင့် ပိုင်းဖြတ်နီကတ်ပါရေ။ ဇာဖြစ်လို့လဲဆိုကေ ရွာတိုင်းရွာတိုင်းမှာ ထိုးနှက်ချက်တိ ပြည့်လားခရေအတွက် စည်းရုံးရေးဆိုင်ရာမှာ ကိုယ့်ဖဲသာနှင့်ကိုယ် လိုက်နီရရေ ရခိုင်ဒီမိုကရေစီအဖွဲ့ချုပ်ရေ လှူဖို့သူမဟိကေ စည်းရုံးရေလူမှာ တာဝန်မဟိပါ။ မြောက်ဦးမြို့သားတိမှာ တာဝန်ဟိရေလို့ မှတ်လီပါကတ်။ ကနိ ဖွင့်လို့ပြောပါရေ။ အမျိုးဘာသာအတွက် အေပိုင်လုပ်လို့လဲမရလိုက်ကေ ပြည်ပျက်ဖို့၊ အများ နှစ် (၂၀) မကြာပါပျာယ်။ အကုန်သူတိ နက်ဖန်ခါ တတုတ်ကုန်ဖို့စွာ မှတ်လီပါ။ ပြည်ကိုတည်ထောင်လို့ မရလိုက်ကေ ပြောစွာပါ။ အခုဇာလဲ။ စည်းရုံးရေး။ စည်းရုံးရေးမှာ ဇာလဲ။ တန်းတူညီမျှရေးနှင့်ပြောလို့ စည်းရုံးရပါရေ။ တန်းတူညီမျှရေးကို နက်ဖန်ခါ အစိုးရမှာ ဖွဲ့စည်းလားဖို့။ မရကေ အရာ (၂၅) နှစ်တောင်မကသိမ့်လို့ နှစ် (၅၀) ခံပျာလို့မှတ်လီ။ နောက်ကုန်းမှာ ဖဖြုတ်ရီ ထနီပျာ။ သံခွါရာ အရာလည်း ခံချင်ကတ်သိမ့်ရေ။ (ငါ့အိမ်သားလွတ်ကေကျီ။ ပြည်သူကို နှိပ်စက်ကေ စက်ပတ်စီ) ဆိုစွာ ဇာပိုင်စွာအမျိုးလဲ။ ရခိုင်ပင်ဟုတ်သိမ့်ယင့်လားလို့ ကျွန်တော်ပြောစွာပါ။ တန်းတူရရေးကို ကျွန်တော်ရို့ဥက္ကကြီး အကြံပီးချက်အရ ရခိုင်က အကြံပီးချက်အရ၊ အားလုံးတူညီထားပါပျာ၊။ လူမျိုးများထဲမှာ မြန်မာတမျိုးကိုပယ်ကေ ကျန်လူမျိုးစုတိရေ ဆင်းရဲခံဖက် နှိပ်စက်ခံဖက်ဖြစ်လို့ ကနိ စုရုံးပျာ အင်အားစုတခု ဖြစ်နီပါပျာယ်။ လူမျိုးစုထဲမှာ လူမျိုးချေတိ ဟိပါရေ။ ကချင်မှာ (၃၇) မျိုးလောက်ဟိပါရေ။ သျှမ်းမှာလည်း (၃၀) ကျော်ဟိပါရေ။ ကရင်မှာလည်း ယင်းပိုင်ပါ၊ ကွဲဖို့ဆိုကေ ယင်းလူမျိုးစုတိစွာ ဘာသာမတူ။ အ၀တ်မတူ။ ကွဲဖို့သင့်ပါရေ။ အခု နှစ်ဖွဲ့မဟိပါ၊ ဇူမီးချင်းနှင့် တောင်ပေါ်ချင်းစွာ အမျိုးမတူ။ စကားမတူ၊ သို့သော် တဖွဲ့တည်းပါ။ ဇူမီးချင်းလည်းချင်း။ တောင်ပေါ်ချင်းလည်းချင်း။ သို့သော် ချင်းပြည်ကို (တ-စ-ည) မ၀င်ဝံ့ပါ။ အနည်းငယ်မျှရာ ၀င်ဝံ့ပါရေ။ ခိုင်စွာ တပ်ကောင်းစွာကိုမြင်လို့ မ၀င်ဝံပါ။ ချင်းမှာ အောင်ပြီးသားပါ။ အနီအထားကောင်းပါရေ။ ဒေလူမျိုးစုထဲမှာ ချင်းအတော်ဆုံးပါ။ တနားက ဥက္ကဌကြီးပြောခရေ နောက်မွန်။ ကချင်၊ သျှမ်း၊ အားလုံးတော်ပါရေ။ အေရခိုင်လူမျိုးစုရေ ဇာဖြစ်နီလဲ။ ကျွန်သက်ရှည်လို့ ကျွန်စိတ်ဝင်နီရေ။ ပြောင့်ပြောင့်ပြောဖို့ဆိုကေ အေလူတိအပြစ် မဟုတ်ပါ။ (၁၁၄၆) ခု ရခိုင်ပြည်ကြီးပျက်ပြိုကတည်းကပင် အေနိအထိ (၂၀၅) နှစ်တိုင်တိုင် ကျွန်စိတ်ပေါက်နီရေရခိုင်သားသည်၎င်း၊။ လွတ်လပ်ရေးရလို့ လွတ်လပ်ရေးအရသာ မခံစားရရေ (၄၂) နှစ်ကာလအတွင်း ရခိုင်သားသည်၎င်း၊ အမြတ် (၂) ခုထွက်ပါရေ။ ဇာအမြတ်လဲ။ (တစ်) ကြောက်စွာနှင့် (နှစ်) မွဲစွာ (၂) ခု အမြတ်ထွက်တေမှတ်ပါ။

အရာ အေအမွီကိုယူဖို့ဆိုကေ အေအတိုင်းထိုင်နီကတ်ပါဖိ။ ယင်းအတွက်နှင့် ကျွန်တော်ရို့ရေ ဇာပိုင်စည်းရုံးလားရဖို့လဲ။ တန်းတူရေးကို လူမျိုး (၁၉) မျိုးသဘောတူလို့ ချပြီးဆွဲထားပါပျာ။ ဇာအခါတင်ဖို့လဲ။ ကျွန်တော်ရို့ အခု ဇာပိုင်ထင်မြင်ကတ်တေလဲဆိုကေ ကျွန်တော်ရို့က တခြားတခြားသော အဖွဲ့အစည်းရို့သည် သိလျှက်နှင့်မိုက်နီစွာတမျိုး။ သိလျှက်နှင့် ကိုယ်လူကြီးဖြစ်ပြီးကေ ကိုယ့်မိသားစု ထမင်းတဆုပ်စားရကေ ကျီပျာဆိုရေ ပါတီတိပါပါရေ။ ယင်းချက်က ဇာခါလဲဆိုကေ အယင် (ဖဆပလ) ပါတီ ပါလီမာန်မှာအမတ်ဖြစ်ပြီးကေ တက်ဆွေးနွေးခီရဖို့ပိုင် အလားတူထင်လို့ပါ။

ယလောက်ထိ အထင်သေးသောရခိုင်လူမျိုးသည် ဇာပိုင်လူမျိုးလဲ။ ကနိ ယင်းမျိုး အနီအထားမဟုတ်ပါ။ မဟုတ်ကြောင်းကို ကျွန်တော်ပြောပါမည်။ ရခိုင်ပြည်ကြီးသည် တိုင်းကြီး (၁၂) တိုင်း၊ ၀တီ (၇) ရပ်နှင့် ဖွဲ့စည်းလာရေ ရက္ခပူရနိုင်ငံတော်ကြီးသည် အရှိတောင်အာသျှမှာ နှစ်ပေါင်းငါးထောင်တိတိ ကြီးမားနီခရေနိုင်ငံကြီးပါ။ ကနိဇာဖြစ်လို့ ခွီးဖြစ်လားခရေလဲ။ အေပိုင်သစ္စာဖောက်တိကြောင့်။ ရခိုင်ပြည်ကြီး ခွီးဖြစ်လားခပါရေ။ အေကန္တ ဇာပိုင်ခွီးဖြစ်လားခရေလဲဆိုစွာ ကျွန်တော်ပြန်ပြီး ၀တ္ထုပြောပြပါဖို့။ ရခိုင်ပြည်ကြီးပျက်ပြီးသည်နောက် အသူပိုင်ရေလဲ။ မြန်မာမြို့ဝန် အနှစ် (၄၀) ပိုင်ပါရေ။ စစ်အာဏာနှင့်အုပ်ချုပ်လားခရေအတွက် ကျွန်တော်ရို့ မော်ကြည့်ဖို့ မရ။ နောက် အင်္ဂလိပ်သိမ်းလာလတ်တေ။ အနှစ် (၁၁၂) နှစ်ပိုင်ရေ။ နောက်ဆုံး ဆရာတော်ဦးဥတ္တမအာသျှနီဝန်း အလင်းရောင်ပြလိုက်လို့ တိုင်းပြည်ကြီးလွတ်လပ်လားခရေ။ လွတ်လပ်ပြီးသည့်နောက် (ဖဆပလ) အဖွဲ့ချုပ်ဖွဲ့ရေ။ မဖွဲ့ခင်မှာ အင်္ဂလိပ်အစိုးရလက်ထက်ခါ အေမှာရောက်ဟိနီရေထဲက အသက် (၆၀) ကျော်ဟိရေ လူကြီးတိသိပါလိမ့်မည်။ (၉၁) ဌာနနှင့် ဒိုင်အာခီအုပ်ချုပ်ရေးလို့ တခုလည်း ရခိုင်သားကောင်းစားဖို့စွာမပါ။ အနှစ် (၁၁၂) နှစ်ခံခပါရေ။ သို့သော် ကိုင်တွယ်ပုံသည် ညှင်းပမ်းလို့မအုပ်ချုပ်။ လျှော့ပြီးအုပ်ချုပ်တေအတွက် အစာဝရေ၀က်ပိုင် ပျော်ပါရေ။ (၁၁၂) နှစ် အုပ်ချုပ်ပုံသည် (၉၁) ဌာနနှင့် ဒိုင်အာခီအုပ်ချုပ်ရေး အရေးကြီးစွာတခုလည်းမပါကေလည်း လွတ်လပ်စွာ စပါးတိရောင်းချနိုင်ရေအတွက် ဖဲသာတပြားတချပ်ချမ်းသာလို့ ကျေးဇူးသျှင်လို့ ပြောဖို့ကျပါရေ။ ယင်းပိုင် ဘ၀က နီမ၀င်နိုင်ငံဖြစ်တေ အင်္ဂလိပ်မင်းနိုင်ငံအစိုးရကို အိန္ဒိယပြည်က သန်းပေါင်းထောင်ကိုချီလို့ ဟိရေ။ ပညာဟိအပေါင်းလည်းဟိရေ။ မပြောဝံ့။ ထိုဖက်က ဂျပန်ပြည်မပြောဝံ့။ အေဖက်က ကမ္ဘာမှာ လူဦးရေအများဆုံး တရုတ်ပြည်ကြီး မပြောဝံ့။ မြန်မာပြည် မပြောဝံ့။ ယလောက်ထဲမှာ ရခိုင်မသားထဲက မွီးလာရေ အာဇာနီပုဂ္ဂိုလ်ကြီး ဦးဥတ္တမပေါ်လာပါရေ။

ယင်းအချိန်မှာ ရန်ကုန်မှာဘုရင်ခံမင်းကြီးသည် မစ္စတာကရက်ဒေါက်ပါ။ ကရက်ဒေါက်လွန်ပြီးမှ လွတ်လပ်ရေးရခါ (ဆာကိုပတ္တလာ) လက်ထက်မှာရစွာပါ။ ကရက်ဒေါက်လက်ထက်မှာ မစ္စတာကရက်ဒေါက်ကို မော်မကြည့်ဝံ့ကတ်။ ကျွန်တော်ရို့အရွယ်လောက်ဟိရေ အေပုဂ္ဂိုလ်ရို့သိပါလိမ့်မည်။ မြောက်ဦးမြို့မှာ မြိူ့ပိုင်ချေတယောက် ရှိကဖြတ်သန်းလားကေတောင်က (ရှိခိုးပါရေအသျှင်ဘုရား) လို့ ရှိခိုးနီရရေအချိန်ပါ။ လျှောက်လွှာမှာလည်း (သနားခံရှိခိုးလျှောက်ထားအပ်ပါ၏) လို့ ရွီးရရေအချိန်ပါ။ ယင်းပိုင်အချိန်မျိုးမှာမှ ရခိုင်အာဇာနီ အာသျှနီဝန်းဆရာတော်ဦးဥတ္တမက မစ္စတာကရက်ဒေါက်ကို (ကရက်ဒေါက်မင်းထွက်လားလီ) လို့ နှင်ပါရေ။ ကမ္ဘာမှာ နာမည်တထွက်ကြီး ထိုးတက်လားခပါရေ။ ယင်းအကြောင်းနှင့် ဆရာတော်ဦးဥတ္တမ စည်းရုံးလိုက်တေခါ အိန္ဒိယမဟာသပအသင်းကြီးမှာ ဥက္ကဌနာယကဖြစ်ပါရေ။ နောက် ဂျပန်ပြည်၊ တိုကျိုမှာ ဥက္ကဌနာယကဖြစ်ပါရေ။ ထိုနည်းတူ တရုတ်ပြည်ကဂေါင်းဆောင်ကြီးဆွန်ယက်ဆင်ခေါ်လို့ လားခီပါရေ။ အာသျှနီဝန်းကြီး ဆရာတော်ဦးဥတ္တမ၏အမြင်ကို ကျွန်တော်ပြောပါမည်။ ရခိုင်ပြည် လူတသန်းချေဟိစွာက ငါရခိုင်သားဖြစ်ယင့်သားနှင့် ဦးဆောင်လိုက်ကေ ကကြွတ်ကြီးချိုးပစ်လိုက်ဖို့ပျာ။ အေအချက်သည် စုပေါင်းလုပ်ဆောင်မှ ဖြစ်ဖို့ဆိုပြီးကေ အာသျှတိုက်တတိုက်လုံးကိုစုပေါင်းပြီး အလင်းရောင်ပြခရေအတွက် ဆရာတော်ဦးဥတ္တမသည် (အာသျှနီဝန်း) ဟူသောစကားကို ရခပါရေ။

ကနိရခိုင်သားတိမသိ။ ကျေးဇူးမသိရေအတွက် အဖကိုပုန်ကန်လို့ အခုပိုင်ဆင်းရဲနီရေလို့မှတ်။ ဆရာတော်ဦးဥတ္တမတရားဟောရေခါ စစ်တွေမြို့မှာ ရွှေပေါင်ခံရေ။ ငွေချီးစားရေ။ လယ်ငှားစားရေ။ စပါးစိုက်တေ။ စားနီရရေခါ လူတိစွာ နိုင်ငံရေးကိုစိတ်မ၀င်စားရေအပြင် ဇာပြောလဲ။ (ဘုန်းကြီးဆိုဝါ နိုင်ငံရေးလုပ်တေ) လို့ဆိုခါ ဆရာတော်ဆွမ်းခံလို့ဆွမ်းမရ။ ရခိုင်သားတိ ရခိုင်သမတိစွာ ယင်းပိုင် ပုန်ကန်ခလီရေအတွက် ဆရာတော်ဦးဥတ္တမရေ ရခိုင်ပြည်ကိုစွန့်လို့ တခါတည်းနှင့် အိန္ဒိယပြည်ကြီးနှင့် ဂျပန်ပြည်မှာနီလီစွာ နောက်မြန်မာပြည်မှာနီပါရေ။ သခင်ကိုယ်တော်မှိုင်းအတုပ္ပတ္တိ သိန်းဖေမြင့်ရွီးရေစာအုပ်ကို ကြည့်ပါလီ။ ယင်းစာအုပ်မှာ ဆရာတော်ဦးဥတ္တမကို ခွီးပိုင်ရွီးထားပါရေ။ ဇာဖြစ်ပါလို့လဲ။ ဆရာတော်ဦးဥတ္တမသည် အာသျှတိုက်ကိုစိုးခလို့ အင်္ဂလန်တိုင်းပြည်မှာ ဟုမ္မရူးကိုတောင်းဖို့လားခီရေ ဦးဘဖေ၊ ဦးရှိန်တည်းဟူသော (၂) ယောက်။ အေဦးဥတ္တမတရားကြောင့်။ သခင်ကိုယ်တော်မှိုင်း သခင်ပါတီကိုထူထောင်ရေ။ မြန်မာပြည်ကြီးမှာ သခင်လို့ပေါ်လီရေ။ အသူ့ကျေးဇူးကြောင့်လဲ။ ဆရာတော်ဦးဥတ္တမကျေးဇူးကြောင့်။ နောက်ဆုံး ဆရာတော်ဦးဥတ္တမကို မန္တလေးအစည်းအရုံးတခုကို ဖိတ်တေဆိုခါ ကမ္ဘာနှင့်အရေးကြီးရေ ကမ္ဘာ့မှာညီလာခံကြီး တရုတ်၊ ဂျပန်၊ အိန္ဒိယပြည်ကြီး သုံးပြည်မှာ အိန္ဒိယမဟာသဗအသင်းကြီးက ဖိတ်ထားစွာယင်လို့ လားခီရေအတွက်ကြောင့် (ငါရို့ကိုအရေးမစိုက်) ဆိုပြီးကေ ခွီးပိုင်ရွီးထားပါရေ။ ဟုတ်ဖို့လားမှန်ဖို့လား ကြည့်ကတ်ပါလီတချက်။ နောက်ဆုံး မြန်မာပြည်သို့ ပြန်လာလတ်တေခါ ဆရာတော်ဦးဥတ္တမကို အရေးမစိုက်သည့်အပြင် တချို့တချို့လူတိ ယှဉ်းကပ်ပလိုက်စွာမှာ ဆရာတော်ဦးဥတ္တမ ရူးလားခပါရေ။ ရန်ကုန်မြို့မှာ နပျိုးသီးခွံကောက်စားလို့။ ဆီးလိပ်ပိုင်းကောက်စားလို့။ နောက်ဆုံး ညောင်တုံးတိုက်မှာ ကွယ်လွန်လားပါရေ။ သတိထား။ ယင်းအတွက် အေလောက် ကျေးဇူးသျှင်ကြီးဖွင့်ခလို့ ကနိမြန်မာပြည်ကြီးလွတ်လပ်ရေးရနီစွာ။ ဆရာတော်ဦးဥတ္တမရုပ်ထုသည် ကမ္ဘာပေါ်မှာတက်လို့မဟိ။ ဦးဝိစာရကတော့ ရွှေတိဂုံဘုရားနောက်က ဟိလီပါယင့်။ သို့သော် ရခိုင်သားတိ ယင်းအချက်တိကို မသိလိုက်ကေ အာသျှတိုက်ကိုအလင်းရောင်ပီးခရေ ဆရာတော်ကို အိန္ဒိယကထုတ်တေ အိန္ဒိယသမိုင်းကြီးမှာ အင်္ဂလိပ်ဘာသာနှင့်ထုတ်တေစာအုပ်မှာ ရွီးထားပါရေ။ ဇာရွီးထားလေ။ ဘုရားရုပ်တော်ပိုင် ရွီးထားပါရေ (The Light of Asia) (အာသျှတိုက် အလင်းရောင်) လို့ ရွီးထားပါရေ။

ကနိ ရခိုင်သားရို့ရေ ကျွန်တော်ရို့အဖမဟိလို့ အေပိုင်ခံနီရရေ။ (ငါရို့၏ ကမ္ဘာကိုဂေါင်းဆောင်ပြီး ဖခင်ပြုလားခရေ ရခိုင့်ဂေါင်းဆောင်ကြီးကို အေနိ မမိခြင်းအားဖြင့် ငါရို့သည်အောင်မြင်အံ့) ဟူ၍ ပထမဆုံး ဆရာတော်ဦးဥတ္တမကို ဂါရ၀ပြုကတ်ပါ။ ကျေနပ်ကတ်ပါ။ ကျောက်တော်မြို့မှာကျခါ အေအချက်ကို လွမ်းလွမ်းဆွီးဆွီး တေးခြင်းချေတပုဒ် (၃) မိနစ်၊ (၃) စက္ကန့်လောက်လုပ်ပြီးကေ ဖွင့်ခပါရေ။ (အိုအသျှင်၊ ကျေးဇူးတော်အသျှင်ဦးဥတ္တမ ရခိုင်သူရခိုင်သားရို့၏မြီးငယ်မြစ်ငယ်ရို့ကို အခုအခါ ဇာဘုံဘ၀မှာပဲဖြစ်ဖြစ် တချက်ချေလာပြီး ကြည့်ပါ။ ကျွန်တော်ရို့ ဦးချပါ၏) လို့ ဦးချခပါရေ။ ဆရာတော် ဦးဥတ္တမအရုပ်နှင့်တကွ ကျွန်တော်ရို့ဦးချစွာပါ။ (ဒုတိယပိုင်းပြီး၏) ဆရာကြီးသည် မီးခွန်းဟောပြောရာ၌ ဆရာတော်ဦးဥတ္တမကဲ့သို့ မကြောက်မရွံ့ ပြတ်ပြတ်သားသား၊ ပွင့်ပွင့်လင်းလင်း ဟောပြောတတ်သဖြင့် (တစည) ပါတီမှ သူရဦးစောဖြူ၊ ဦးညီညီလွင်ရို့သည် သက်သီခံပစ္စည်းများနှင့်အတူ မြန်မာတိုင်းမှူးထံမှာလည်းကောင်း၊ န၀တအကြီးအကဲရို့ထံမှာလည်းကောင်း အရေးယူဖမ်းဆီးရန် လားရောက်တိုင်ကြားကြသောကြောင့် စစ်တွေအကျဉ်းထောင်၌ ဤသို့ မသီသင့်ဘဲ လျှင်မြန်စွာသီဆုံးလားရခြင်းဖြစ်ပါရေ။

(ALD) ၏နာယကကြီးလည်းဖြစ် ရခိုင်-မြန်မာပဏ္ဍိတ်လည်းဖြစ်သော ဆရာကြီးဦးဦးသာထွန်း၏သမိုင်းဝင်မိန့်ခွန်းများ (နောက်ဆုံးပိုင်း)

ကျွန်တော်ရို့၏ကိုယ့်တိုင်းကိုယ့်ဒေသတိမှာ တဒေသနှင့်တဒေသမတူပါ။ တိုင်း (သို့မဟုတ်) ပြည်နယ်တိမှာဆိုကေ ကိုယ့်ဒေသ၏စီးပွားရေး၊ လူမှုရေး၊ တရားစီရင်ရေးတိကိုဆွဲရပါဖို့ မပေါ်ပါသိမ့်လည်း အခုထိုမှာ ဇာပိုင်မျိုးဖြစ်လာမည်ကားမသိ။ ဆိုကေ အသူ့ပါးကတောင်းရဖို့လဲ။ လာဘန်ပျာကား ရခိုင်သား။ ကကောင်းပညာဟိရေကား၊ ယင်းသူရို့ပီးမှ ရမည်နှင့်။ ဥပမာတခုပြောပါမည်။ ဒီမိုကရေစီလမ်းကြောင်းမှာ ဒီမိုကရေစီဆိုစွာကိုပြောပါမည်။ ယင်းပိုင်ပြောနီရေရခိုင်သားလူကြီးတိ စာတတ်တိ အသံချပ်ချပ်နှင့်ပြောနီစွာတိ နိုင်ငံရေးခေါင်းဆောင်တိ ၀ါရင့်တိ တချို့က ရခိုင်ဒီမိုကရေစီအဖွဲ့ချုပ်ကဦးစောမြအောင်ကို မတတ်၊ နိုင်ငံရေးနားမလည်၊ ပလင်စနီတလုံးလတ်။ ကွက်စိတပိုဒ်နိုင်လိမ့်မည်ဆိုပါရေ။ ဆိုပတ်စီ ကိစ္စမဟိပါ။ သူရို့ပြောလိုက်ကေ နိုင်ငံရေးဝါတော်ကြီးတိ နိုင်ငံရေးမှာ အနှစ် (၄၀) လုပ်ခရေ (၃၀) လုပ်ခရေလတ်။ ယင်းချက်ကိုပြောရပါဖို့။ စစီးနားထောင်ကတ်ပါ။ ကနိထမင်းငတ်ပျာယ်မှတ်ပါဖိ။ မစုံကေမကောင်း ပြောရဖို့။ နိုင်ငံရေးဝါတော်ကြီးကို ကျောက်တော်နှင့်စစ်တွေမြို့မှာ ပြောခပါပျာ။ နိုင်ငံရေးဝါတော်ကြီး။ အဝေ ဆရာတော်ကြီးဝါတော် (၄၅) ၀ါရရေ။ ဓမ္မစရိယရွှေထီးဆောင်းလာလတ်စွာ ကနိပါရာဇိကကျကေ အသုံးမကျပျာ။ မင်းရို့နိုင်ငံရေးခေါင်းဆောင်တိ ၀ါတော်ကြီးတိ သွီးစွန်းသောလက်ဖြင့် ပါရာဇိကကျနီပျာ။ ရခိုင်ပြည်ကိုခေါင်းဆောင်ဖို့လာစွာ ဘစောင်မျက်နှာနှင့်လာရေလဲလို့။ ဗြောင်ပြောခပါရေ။ အသာချေပြောလို့ မရပါပျာ။ ယေခါ ကျွန်တော်ရို့ဘဇောင်နည်းနှင့်၊ ဇာဥပဒေပင်ရရ ဖယ်ဒရယ်ပင်ရရ ဖယ်ဒရယ်မဟုတ်ကေ တခြားရချင်စွာကိုရရ ဒီမိုကရေစီအစစ်ရကေ ကျွန်တော်ရို့တန်းတူရေးကိုဆွဲရဖို့။ ယင်းအတွက်နှင့် ဗမာအသုံးအနှုံးကိုဖျောက်လို့ မြန်မာလို့ဆိုရေကား။ အကြောင်းက သူရို့စွာ လူမျိုးစုနှင့်မသင့်မမြတ် ဖြစ်ပါလတ်တေ။ လူမျိုးစုနှင့်မသင့်မမြတ်ကေ ပြည်တွင်းပြည်ပ သူပုန်ထလို့ အစိုးရမှာ ငွေကုန်ကျရေ။ တိုင်းပြည်တည်ဆောက်ရေးကိုလုပ်ဖို့မရ။ ယင်းအတွက်နှင့် တိုင်ပြည်မွဲလားခရေလို့မှတ်ပါ။ ယင်းအချက်ကို ဖက်ခွက်တပ်မတော်က မလိုလားပါ။ မလိုလားရေအတွက် (ပြည်ထောင်စုမပြိုကွဲရေး) လို့ ဟောနီစွာပါ။ ဆိုခါ အေခရီးကလားရေခါ ကျွန်တော်ရို့ကို အနာရှာလို့မရပါ။ စည်းရုံးရေခါ စကားမလွန်ပါစီကဲ့။ လူမျိုးရေးကိုထိခိုက်၍မရပါ။ ဥပဒေနှင့် ဆန့်ကျင်၍လည်းမရပါ။ စည်းရုံးရာမှာ စကားတိမလွန်ပါစီကဲ့။

ယင်းပိုင်လားဖို့ဆိုခါ ရခိုင်ပြည်မှာ ဥက္ကဌနှင့်ဖွဲ့စည်းလို့ရဖို့လား။ ရခိုင်တိုင်းဒေသတခုလုံးမှာ ဥက္ကဌနှင့်ကောင်စီကိုရာ အဆင့်ဆင့်ဖွဲ့ဖို့လား။ လွန်ခရေဆယ်နှစ်လောက်က မေဇူတိသူပုန်ထရေခါ ပလက်ဝကိုကျရေလတ်။ ကြားဖူးကြပါလိမ့်မည်။ အခု ပလက်ဝချောင်းဒေဖက် မကျေးပင်ချောင်း ထိုဖက်ကိုကျော်ခါ မီဇူရမ်ဆိုပြီးကေပြည်နယ်ရလို့ သမ္မတနှင့်ပါ။ အိန္ဒိယအစိုးရကပီးလိုက်စွာ အခုထိုဖက်ကမ်းကိုကြည့်လိုက်တေခါ တိုက်တာအဆောက်အဦးတိ ဟိမ်းနီယင့်။ ရခိုင်သားမျိုးမှာဝါ နှစ်ပေါင်း (၂၀၀) နှစ်ဟိလတ်ပျာ။ ဂန်ဒဂေါက်နှင့်၊ အုန်းထရံနှင့်။ ၀ါးထရံ၊ အုန်းထရံကို ဂန်ဒဂေါက်နှင့် နီချင်တုန်းသိမ့်။ ကနိ ထိုဖက်ကိုကျော်လိုက်ကေ ဟိမ်းလို့မြင်ပါလိမ့်မည်။ ယေကေလည်း ကြေနပ်နီကေ ဇာဖြစ်လားခရေလဲ။ ၀မ်းနည်းဖို့ကောင်းပါရေ။ အေပိုင်မကျချင်လို့ ကျွန်တော်ရို့အသီခံလို့ လုပ်နီကတ်စွာပါ။ သို့သော် ကျွန်တော်မှာကြားချင်စွာက အေလူကြီးတိတော့ခါ သင်းချိုင်းကုန်းတဖက် အိမ်တဖက်ကျနီပါယာ။ ကျန်လိုက်ဖို့အချေတိစွာ ကျွန်တော်ရို့တည်ဆောက်ခရေအုတ်မြစ်တိစွာ အေပိုင်ကြီးကျယ်ဖို့မြင်လို့ အခု ကျွန်တော်တို့ရှိတွင်မှာပင် ပျက်အောင်ဖျက်ပါလိမ့်မည်။ ခိုင်ခန့်အောင်ထားပါလီကတ်။ ခိုင်မြဲစွာထားလို့ဟိကေ တိုင်းရင်းသားလူမျိုးစုတိနှင့်တန်းတူဖို့ဆိုကေ နောက် (၂၄-၂၅) နှစ်အတွင်းမှာ ထိုသူရို့နှင့်တန်းတူ ဖြစ်ပါလိမ့်မည်။ ယင်းအခါမှ ကျွန်တော်ရို့၏စီးပွားရေးကို ဘဇောင်ဆွဲဖို့လဲ၊ ရခိုင်ပြည် နိုင်ငံတကာနှင့် ဆက်ဆံရေး၊ ပြည်တွင်းစီးပွားရေးကို ဘဇောင်ဆွဲဖို့လဲဆိုစွာ လိုပါဖို့သိမ့်။ ယင်းဆွဲဖို့စွာက ရဖို့ပြည်အပေါ်မှာ မူတည်ပါရေ။ ဖယ်ဒရယ်မူကတော့ ပီးဖို့မဟုတ်ပါ။

တဆင့်တဆင့်ပီးကေ ဇာလုပ်ဖို့လဲဆိုစွာလိုပါရေ။ ယင်းအခါ လုပ်လာခါ ယင်းဥပဒေကိုဆွဲဖို့ ပညာတတ်တိ ကကောင်းလိုလာပါရေ။ ဆိုခါ ပြည်တွင်းထဲမှာ ပညာဟိတိမဟိလို့မရ။ ဆွဲဖို့စွာမှာ ကိုယ်စားလှယ်မှရာ ဆွဲရဖို့။ ကိုယ်စားလှယ်မှာ ၀က်ချုပ်နာတိကို မတင်နိုင်ပါ။ သူရို့မှာဇာတိပါလဲ။ ၀က်ချုပ်၊ မာဒရာမစင်စွာတိပါပါရေ။ ကြည့်ပါ၊ မျက်စိဖွင့်လို့။ ယင်းအတွက်နှင့် (၂၆) နှစ်တိုင်တိုင်စားလို့မ၀သိမ့်လို့ အရာလိမ်ပြီးကေ လုပ်နီစွာတိကိုကြည့်ကတ်ပါ။ ဆိုခါ ယခုမျက်မှောက်အမှားပါ။ မျက်မှောက်အမှားနောက်ကပါနီကတ်လို့ ၀မ်းနည်းလို့ ကျွန်တော်ပြောစွာပါ။ သတိထားပါ။ လွန်လီပြီးသောအခါက ဇာမှားခရေလဲ။ အတိတ်က လွန်လီပြီးသောအခါက မှားခစွာကိုမပြောကေ အတိတ်နှင့်ပစ္စုပ္ပန်ကိုမပေါင်းကေ အနာဂါတ်ကို ခြီလှမ်းမလှမ်းနိုင်လို့မှတ်ပါ။ ယင်းအချက်တိကိုသတိမထား ရုပ်ဝါဒီနှင့် ကွန်မျူနစ်ဆန်စွာက ကျွန်ဖြစ်လာသောလူမျိုး။ ရခိုင်သမိုင်းကို မကြားဖူးသူ (၁၀၀) မှာ (၁၀၁) ယောက်ဖြစ်နီပါယာ။

ကျွန်တော်ရို့ ရခိုင်လို့ဇာဖို့ခေါ်ရေလဲ။ နားထောင်ကတ်ပါနန်း။ အမျိုးသီလနှစ်ဌာနကိုစောင့်လို့ ရခိုင်လို့ခေါ်ပါရေ။ အေနိ သီလမဟိ၊ အမျိုးကိုမစောင့်၊ အမျိုးစောင့်တရားမဟိကေ ရခိုင်ပျက်ပါယာ။ သတိပီးပါရေ။ အေနိကပင်စပြီးကေ ရခိုင်ကိုချက် အစစ်လုပ်ပါကတ်မည်။ ရခိုင်ကပျက် ရခိုင်နခေါင်း မဖြစ်ပါကတ်ကဲ့။ ရခိုင်သားနခေါင်း ကောင်းကောင်းများလားခပါယာ။ ဆိုခါ ရှည်လျှားလှစွာသော သမိုင်းကိုထားလိုက်ပါဖိ။ ရခိုင်ဟူ၍ခေါ်သောသမိုင်းကိုပဲ ကျွန်တော်ရို့ပြောပါမည်။ ဇာနိကခေါ်ပါရေလဲ။ လွန်ခရေအနှစ် (၅၀၀၀) ကဖြစ်ခကတ်ပါဖို့ ရခိုင်ခေါ်စွာ။

ကျွန်တော်ရို့သည် လွန်ခရေ အနှစ် (၅၀၀၀)က ကုဿမင်းသက္ကရာဇ် (၅၉၅) ခုမှာ ဘီစီ (၃၃၀၀) ကျော်က ကျွန်တော်ရို့ရခိုင်ပြည်မှာ ပထမဓည၀တီမြို့ကိုတည်ပါရေ။ မာရာယုမင်းကြီးဆိုစွာ လူတိုင်းသိပါလိမ့်မည်။ မာရာယုမင်းကြီးသည် ဇာကလာပါလဲဆိုစွာ ဆန်းစစ်ဖို့လိုပါလိမ့်မည်။ မာရာယုမင်းကြီးသည် အိန္ဒိယပြည် ကပ္ပိလ၀တ်တိုင်းက အသူ့သားလဲဆိုစွာ သိဖို့လိုပါလိမ့်မည်။ သစ္စနမင်းကြီးသားပါ။ ကပ္ပိလတိုင်းနှင့် ကောသလတိုင်းစစ်ဖြစ်ကတ်တေ။ လယ်ထွန်ဖို့ရီကိုလုလို့ ဂင်္ဂါမြစ်ရီကြောင့် စစ်ဖြစ်စွာမှာ သူရို့၏ငြိမ်းချမ်းရေး ဘုရားသခင်တည်းဟူသော ဘူးသီးစောင့်ရေဘုရားသခင်က ကောင်းခင်ကစောင်းတီးလိုက်တေ။ ထိုအခါ ငြိမ်းချမ်းပြီး ငြိမ်းညောင်းသောအသံကိုကြားရ၍ ကောင်းကင်ကိုမော့ကြည့်လိုက်သောခါ ဘုရားသခင်က ကောင်းခင်ကတရားဟောပါရေ။ ဟေး အဇ္ဇုန၊ သင်စစ်ပွဲအောင်လို့ ကောင်းကောင်းပျော်ရေလား။ နောင်ခါ မင်းမျက်ရည်အသွယ်သွယ်စီးကျလိမ့်မည်။ ဇာဖြစ်လို့လဲ။ မင်းမျိုးမင်းအသွီးနှင့် တိုင်းပြည်ကသွီးကိုနင်းပြီး သျှင်ဘုရင်လုပ်တေ။ ကကောင်းကောင်းရေထင်လား၊ ဆိုခါ ကောင်းကောင်းသံဝေဂရပြီးကေ အားလုံးစွာကိုစွန့်ပနာ တောထွက်လာလတ်စွာပါ။ ရခိုင်ပြည် ဂစ္စပနဒီမြစ်၏လက်ဝဲလက်ယာ ကိုးဆယ့်ကိုးမြို့ဟိစွာမှာ ဤအကြောင်းအရာကို ပုဏ္ဏားကျွန်းမြို့မှာဟောရေခါ တယောက်ထပြီးကေ ဇာပြောလည်းဆိုကေ ပုဏ္ဏားကျွန်းဝကနီပြီးကေ ပလက်ဝထိဟိစွာမှာ ရွာချေတောင်မှ ကိုးဆယ့်ကိုးဟိဖို့မဟုတ်ပါဆရာကြီး။ ကျွန်တော်ရို့က မယုံဆိုပါရေ။ မှန်ပါရေ။ ဇာဖြစ်လို့လဲဆိုကေ ရခိုင်ကံမကောင်းလို့ ဆုတ်ယုတ်လာလတ်လို့မှတ်ပါလီ။

ယင်းခါ အဇ္ဇုနသျှင်ရသေ့သည် တောတလျှောက်က ရခိုင်ပြည်ကိုလာရေပလက်ဝကို ရောက်ဖူးလူတိုင်း သိပါလိမ့်မည်။ အရှိဖက်ကို ရက္ခပူရတိုင်း။ ပလက်ဝ၊ မီးဝကပင်အထက်ကို ဥဿလင်းတိုင်းလို့ခေါ်ပါရေ။ တိုင်းတတိုင်းကိုခွဲစွာမှာ အနည်းဆုံး မြို့ဆယ်မြို့ပါပါရေ။ ရခိုင်၏ဖွဲ့စည်းပုံအရပါ။ ရခိုင်စွာ သာမညနိုင်ငံ အနည်းချေကားမဟုတ်။ ပျက်စီးလားခစွာ အခုမျိုးပြုတ်ဖို့ကြံနီပျာ။ ကောင်းကောင်းသတိထားကတ်ပါ။ ယေကေ ဥဿလင်းတိုင်းအရှိဘက်ကိုဆန်လိုက်ခါ ဇာခေါ်လဲဆိုကေ အရှိဘင်္ဂလားတိုင်း။ အခု ဘင်္ဂလားဒေခ်ျနိုင်ငံရေ ကျွန်တော်ရို့ပိုင်စွာပါ။ ယေကေ ၄င်း၏လက်ယာဖက်ကိုကြည့်လိုက်တေအခါ နာဂသေနတိုင်း။ အခု ထရိပူရပြည်ပါ၊ ယင်းဘက်မှာ ရခိုင်သားကိုကြည့်လိုက်ကေ အခုတသန်းခွဲဟိပါသိမ့်ရေ။ မြုံတိ၊ ဖလံတိ ရခိုင်စကားပြောပါရေ။ အခု ကျွန်တော် ဒေကဥဿလင်းတိုင်းအလယ်တရိုးကိုကြည့်လိုက်ကေ ဇာတွိလဲ။ ကာမရူပတိုင်းပါ။ ၄င်း၏အနောက်ဘက်ကိုကြည့်ခါ မဟိံသကတိုင်း။ ရခိုင်ပြည်ပိုင်ရေတိုင်းတိပါ။ အခုဇာသူရို့ဝင်နီလည်းကြည့်ပါ။ အားလုံးအသီးသီးဝင်လားခပါယာ။ ရခိုင်တိတောင်တန်းကပ်လို့ တ၀ိုင်းချေကျန်ပျာ။ အခု ယင်းဖက်ကရခိုင်သားတိ ထိုဘက်ကိုကြည့်လိုက်ကေ လူနှစ်သန်းခွဲလောက် ဟိပါသိမ့်ရေ။ လာချင်နီကတ်ယာ။ ထိုဘက်မှာ အ၀ကျွန်းဆိုစွာ ပပေါ့ချေရွာကြီးတိမဟုတ်ပါ။ အခု ကုလားတိဝင်လာပါယာ။ တဖြည်းဖြည်းစိမ့်ဝင်လို့ စုစုပေါင်းလူနှစ်ထောင်မဟိပါယာ။ အားလုံး ဘုရားစေတီတိနှင့် ကျောင်းတိရာကျန်လိုက်ပါရေ။ ယင်းပိုင်ထိုးဝင်လာရေပိုင် ကျွန်တော်ရို့၏နီရာကို ထိုးဝင်လာရေ။ ဇာခါထိုးဝင်ရေလဲ အင်္ဂလိပ်သက္ကရာဇ် ၁၆၆၆ မှာထိုးဝင်လာစွာပါ။ ဇာဖြစ်လို့လဲ ယင်းအခါ ရခိုင်အင်အားညံ့လာလို့ပါ။

ရခိုင်တိမညံ့ခင် ဂွဖက်မှာ ဟိုင်းကြီးကျွန်းဟိပါရေ။ ထိုဖက်က ကတ္တရာပူရကျွန်း၊ သောင်းကြီးကျွန်း၊ ဒေကအ၀ကျွန်း ကျွန်းစုတိပါ။ ရခိုင်ပြည်၏ကျွန်းကြီးသည် သောင်းကြီးကျွန်း။ ကတ္တရာပူရကျွန်းလို့ခေါ်ရေ။ ကမ္ဘာ့အရပ်ရပ်မှလူတိစွာ အခုရခိုင်ပြည် သံတွဲငပလီသို့ အပန်းဖြေဖို့လာကတ်တေပိုင် ရခိုင်ဘုရင်လုပ်ထားလို့ အကောက်ခွန်ရနီရေကျွန်းစွာ သောင်းကြီးကျွန်းပါ။ ဘဇောင်ရွီးထားကတ်လဲဆိုကေ အင်္ဂလိပ်နှင့်ဟိန္ဒူကျမ်းတိမှာရွီးထားစွာက ကမ္ဘာပေါ်မှာ အလှဆုံးကမ်းခြီပါ။ အခုအသူပိုင်လားခရေလဲ။ ရခိုင်သားတိအကျင့်ပျက်လို့ ဆုတ်လာစွာပါ။ အရာလည်းမလွတ်သိမ့်ဆိုကေ ဥက္ကဌကြီးပြောခရေပိုင် ပျူလူမျိုးပိုင် တခုလည်းမကျန်ပါပျာလို့မှတ်ပါလီ။ ယင်းအတွက်နှင့် ၁၆၆၆ ခုနှစ်လောက်က စစ်တကောင်းထိုဘက်ကို မိုင် (၅၀) ထိပိုင်ခရေ။ အယင် ပထမ၀ါလို့ဆိုကေ ထိုမှာ ဗြမ္မာပုတ္တမြစ်ကြီး ဒေဘက်မှာ ကူကသိမြစ်ဝ။ ယင်းမြစ်ထိုဘက်မှာ လွန်ခရေ (၁၀) နှစ်လောက်က ဘင်္ဂလားဒေ့ခ်ျအစိုးရက တူးဖော်ရေးလုပ်ရေခါ ထိုမှာ စိုင်းဒြားမင်း၏လက်ရာဘုရားနှင့် အနုပညာလက်ရာတိ ကကောင်းပေါ်ထွက်လာလို့ အားလုံးကိုမော်ကွန်းတင်ပျာ ရွီးထားခပါရေ။

ယင်းချင့်တိအားလုံး ရခိုင်သားစွာတိပါ။ ဘလောက် ပိုင်ခရေလဲဆိုခါ အဇ္ဇုနသျှင်ရသေ့တောထွက်ရေခါ ယင်းနားမှာ ထိုဖက်ကအိန္ဒိယ ဒေဖက်ကရခိုင်ပါ။ ခြီတလှမ်းလှမ်းလိုက်စွာနှင့်ရောက်တေအတွက် အနီးချေနှင့် ရခိုင်ဒေသကို ရောက်လာစွာပါ။ တရားအားထုတ်ဖို့ ရီကြိုင်ရာမြက်နုရာကိုရှာရေအခါ ကုလားတန်မြစ်ကို ကျပါရေ။ အဇ္ဇုနသျှင်ရသေ့လည်း ကုလားတန်မြစ်ကိုမှီ၍ တရားဆောက်တည်ပြီးနီပါရေ။ ယင်းအနားမှာ သက်ပြည်တပြည်ဟိပါရေ။ သက်ပြည်ကို သက်မင်းစန္ဒြသိဒ္ဓိဆိုရေမင်းက အုပ်ချုပ်နီပါရေ။ စန္ဒြသိဒ္ဓိဆိုရေ သက်မင်းရေ ထိုသျှင်ရသေ့အဇ္ဇုနကို မြင်တွိဖူးမျှော်ရရေခါ ကြည်ညိုသဒ္ဒါတရားပွား၍ ပစ္စည်းလေးပါးဖြင့် ဆွမ်းကွမ်းယာခုတ်တိကို အမြဲမပြတ်ပူဇော်လျှက်ထားပါရေ။ ထိုအခါ တနိသောအခါ သက်မင်းစန္ဒြရသိဒ္ဓိ၏ သမီးတော်ဣန္ဒာမာရယုကို ဆွမ်းပို့ဖို့ခိုင်းစီပါရေ။ ထိုအခါ ဘ၀အနန္ဒကကုသိုလ်ရီစက်ကြောင့် ရသေ့လူထွက်ပျာ ဣန္ဒာမာရယုနှင့် ရလားခကတ်ပါရေ။ တချို့တချို့သော ရာဇာဝင်က တိရိစ္ဆာန်ဆတ်မနှင့် ရရေလို့ဆိုပါရေ။ မဟုတ်ပါ။ တခါလည်းမရကောင်းပါ။ ဇာဖြစ်လို့လဲဆိုကေ တချို့က ရခိုင်သားကို တိရိစ္ဆာန်ဟု ဆိုလိုချင်သောကြောင့် ရွီးထားသောကျမ်းတိရာဖြစ်ပါရေ။

ရခိုင်ရာဇာဝင်ဆိုတိုင်း မယုံကတ်ပါကဲ့။ ကျွန်ဘ၀မှာ ရွီးပစ်ခရေစာတိ ကောင်းကောင်းဟိပါရေ။ ငါ့အဖိုးသျှင်စာ၊ ငါရို့ဆရာတော်ကြီးစာကိုလည်း ကောင်းကောင်းအားမကိုးကတ်ပါကဲ့။ ကြည့်ကြည့်ချင်း ကျွန်တော်ရို့ကမြင်ပါရေ။ ယင်းအတွက်နှင့် ဣန္ဒာမာရယုမည်သော စန္ဒြသိဒ္ဓိသမီးတော်နှင့် သကျသာဂီဝံသ၊ မဟာဝံသ၊ ခတ္တိယမင်းမျိုးမှဆင်းလာသော သစ္စနနှင့်ထိမ်းမြားလို့ မာရယုမင်းသားကို မွီးပါရေ။ ဥပမာအားဖြင့် ဂေါတမဘုရားသည် ကပ်ကမ္ဘာမှာပွင့်ဖို့ သာသနာစောင့်နတ်များနှင့်တကွ သိကြားဗြဟ္မာရို့ရေ သုသီတာက အလောင်းတော်နတ်သားကို မည်တော်မာယာ၏၀မ်း၌ ပဋိသန္ဓေတည်ပြီးသကဲ့သို့ အခုလည်း အနောက်မဉ္စိမဒေသမှာ ဘုရားပွင့်ရေခါ ရခိုင်ပြည်ဓည၀တီကို ဘုရားသျှင်ကြွတော်မူဖို့ ထိုအခါ ထုံးစဉ်အတိုင်း ပျာတိတ်ပီးရန်အလို့ငှာ ရခိုင်ပြည်မှာ မင်းဆက်ပြုတ်မလားဖို့အတွက် မင်းဆက်ဆက်ပီးစွာလို့မှတ်ပါ။

ထို့ကြောင့် သုတိသာနတ်ပြည်က သောနသိဒ္ဓိယနတ်သားကိုပင့်ပြီးကေ အဇ္ဇုနမင်းကို တောထွက်အောင် လုပ်လိုက်စွာပါ။ ယင်းမှာ သစ္စနနှင့်ဣန္ဒာမာရယုရို့ဇနီးမောင်နှံနှစ်ဦး ပျော်ပါးနီကတ်ကေ တခါလည်းဆုံးဖို့မဟုတ်လို့ ကုလားတန်မြစ်မှာရီချိုးရေခါ မြစ်မှာတယောက်တခြားမျိုးလို့ပါလားခစွာပါ။ လင်သစ္စနက ဇာကိုရောက်လားလဲမသိ၊ ဣန္ဒာမာရယုကလည်း ဇာကိုရောက်လားမှန်းလဲမသိ ဆိုခါ ကျန်ရစ်တေ သုံးနှစ်သားအရွယ် မာရယုမင်းသားငယ်က တငိုငိုနှင့်နီရေလတ်။ ယင်းခါ မြိုတောင်မင်း ငအောင်ကလည်း တောခရီးထွက်လို့လာရေ။ ထိုအခါ အချေတယောက်တောထဲမှာငိုနီရေဆိုကာ လားကြည့်ခါ အမိမဲ့သား ရီမဲ့ငါးပမာ ဒုက္ခသည်မာရယုမင်းသားငယ်ကို မြိုတောင်မင်းက ကောက်ယူမွီးစားထားပါရေ။ မွီးစားထားရေခါ မြိုတောင်မင်းမှာလည်း သမီးချေတယောက်ဟိပါရေ။ နာမည်က မဗညှာလတ်။ ဆိုအခါ မာရယုမင်းသားငယ်ကို ဒါး၊ ဒုတ်၊ လှဲအစဟိသော အဌာရသ (၁၈) ပါးသောယောက်ျားရို့တတ်အပ်သော ပညာရပ်တိကိုသင်ပီးလို့ တောင်မင်းရာထူးကိုပီးလိုက်သဖြင့် ၀ါးအလုံး (၁၀၀) တိုင်အလုံး (၁၀၀) ရို့ဖြင့် မာရယုမင်းသားငယ်ကို နန်းတင်ပါရေလတ်။ ကျွန်တော်စီ မကြာမကြာပြောပါရေ။ ဒေအကြောင်းကို။ ထိုအခါ ဓည၀တီပြည်ကြီးကို တည်ထောင်ပြီး ဗုဒ္ဓဂေါတမပွင့်ဖို့စွာကိုအကြောင်းပြုလို့ သိကြားမင်းဖန်ဆင်းပြီးကေ သံလျှက်တော်ကို ဆက်သက်လီပါရေ။ ဆက်တေခါ ဒေချက်မှာပျော်ပိုက်နီကေမဖြစ်ဆိုရေခါ နောင်မှာ သမီးမဗညှာနှင့် ပေါင်းဖက်လို့ သမီးချေတယောက်မွီးကျန်ရစ်တေ။ နာမည်က (မာရ)။ သူရို့မြို့စကားနှင့် (အမာရ) လို့ခေါ်ပါရေ။ အဖအသူလဲ။ သကျသာဂီဝင်မင်းသား ရခိုင်မင်းမျိုးကဆင်းလာရေ။ အမိဝါ မြိုတောင်မင်းကြီးသမီး မြိုမ။ ရခိုင်သားနှင့်ရကေ ရခိုင်သားကပျက်မချေတယောက်ကျန်ရစ်တေ။ မြိုထက်ဝှက်၊ ရခိုင်ထက်ဝှက်။

ကိုင်ယေကေ မြိုဇာဖို့ခွဲချင်ကတ်လဲ။ မီးကြည့်ကေ ဖေသာမဟိလား၊ ဟိပါရေလတ်၊ နောက် ကျွန်တော်ရို့ မဟာမြတ်မုနိဘုရားကြီးကို သွန်းပြီးရေနောက် မင်း (၁၀၁) ပါးထီးဆောင်းလို့ စန္ဒာသူရိယမင်းအပြန်မှာ လက်ဆောင်ပီးပါရေ။ ဇာပီးလိုက်တေလဲ၊ မြိုမင်းကို နဗက်ကြီး (၉) ရံပီးလိုက်တေ။ ငွေလက်ကောက်နှစ်ရံ ပီးလိုက်တေ။ လောင်ဗွန်းတချပ်ပီးလိုက်တေ။ ကြီးဟင်းဇားနှစ်လုံးပီးလိုက်တေ။ ထိုအခါ ပျော်လို့ မြိုတိကောင်းကောင်းမကကတ်လားဆိုခါ ကပါရေလတ်။ ယင်းလက်ကောက်တိဟိပါသိယင့်လားဆိုခါ ဟိပါရေလတ်။ နားဋောင်းကို တောင်မင်းကဆုံနှင့်ထောင်းလို့လည်းမပျက်လို့ ၀တ္ထုပြောလာပါသိမ့်ရေ။ မြိုတောင်မင်းက ယင်းပိုင် ဘုရားလက်ထက်ကပင် ရခိုင်အမျိုးနှင့်ဆက်ပြီးလာစွာ ဘုရားပွင့်ခါလည်း မြိုနှင့်ဆက်ပြီး ဗုဒ္ဓဘာသာဖြစ်လာစွာပါ။

အခု ကိုယ်ရို့မြိုအမတ်လောင်းကနီပြီး ခရစ်ယာန်ဝင်လာခါ ထားပါဖိ။ မခံချင်ပျာဆိုခါ မြိုလူကြီးခြောက်ယောက်စွာ အ၀တ်ဖြူဝတ်ပြီး ခေါင်းပေါင်းကြီးတိနှင့် ကျွန်တော်ရို့နှင့်တတူ ၀တ်လို့စားလို့ လိုက်လတ်ပါရေ။ ဇာဖြစ်လို့ ဖြစ်ရပါရေလဲဆိုကေ ကျောက်တော်၊ မြောက်ဦးပိုင်းမှာ မဲဆန္ဒသျှင်ငါးသောင်းနှင့် နှစ်ထောင်ဟိပါရေ။ မဲဆန္ဒပီးဖို့လူပါ။ ဆိုခါ ကုလားမောင်မောင်ခင် (လွှတ်တော်တရားယုန်း ဗဟိုရှိနီချုပ်) သူက ကိုယ်စားလှယ်၊ သူ့မှာ ကုလားဘလောက်ဟိရေလဲဆိုကေ (၁၂၇၀၀) ဟိပါရေ။ မြောက်ဦးမော်လဗီနှင့် ကျောက်တော်မြို့မှာ သူရို့ဟိပြီးသားပါ။ ဆိုင်းဘုတ်တင်ဖို့မလို။ ဘလောက်ကောင်းလဲဆိုရေခါ မြိုခေါ်ခမီးအမျိုးသား ကျော်ဇောလှ၊ မြောက်ဦးမြို့မှာ စာသင်ခပါယင့်။ သူ့မှာအားလုံး (၉၇၀၀) ဟိပါရေ။ မဲဆန္ဒသျှင် သူ့မှာလည်း သီးခြားတက်နီရေ။ (၉၇၀၀) နှင့် (၁၂၇၀၀) ပေါင်းလိုက်ကေ (၅၀၀၀) မဲကို နှုတ်လိုက်ပါ။ တစညပါတီမှာ ဘဇောင်မဆို တရားသူကြီးဥက္ကဌ၊ ကောင်စီဥက္ကဌသားသမီး (၃၀) က (၅၀) ရွာတိုင်းရွာတိုင်းမှာ မဟိပါလား၊ ပြိုလို့ ထွက်လို့မလားနိုင်ပါ။ ဟောစရာကလည်းမလို၊ ပြောစရာလည်းမလိုပါ။ သူရို့ ကျော်တော်မြို့နယ်မှာ ရွာပေါင်း (၃၃၅) ရွာဟိစွာမှာ ခွဲပစ်လိုက်ကေ ဘလောက်ဖြစ်လာပါလဲ၊ (၁၇၀) လောက်ဖြစ်ပါရေ။ ယင်းကို တစညလူ (၅၀) နှင့်မြှောက်လိုက်ကေ အလျှော့မဲလို့မှတ်ပါ။ အေအချက်စွာ ကျွန်တော်ရို့ မဲချင့်ချိန်စွာပါ။

မြောက်ဦးမြို့မှာ ယ္ခုထက်ထိမဟိပါသိမ့်။ မဟိကေ ကုလားပါးမှာယှုံးပါဖို့။ စည်းရုံးပုံကမတူပါ။ ဆိုခါ လျှော့မဲဘလောက်ကျန်လိုက်တေ (၂၀၀၀၀) ဆိုလိုက်ပါဖိ၊ (၂) သောင်းကို ကိုယ်စားလှယ် (၄) ယောက်က၀ီပါဖို့။ ရခိုင်ဒီမိုကရေစီအဖွဲ့ချုပ်အပါအ၀င်ဆိုခါ တယောက်ကို (၇၀၀) လောက်စီရလိုက်ပါပျာ။ ယေကေ မဲအများဆုံးအသူလဲ။ ကုလား (၁၂၀၀၀) ရပျာဆိုကေ ကျောက်တော်မြို့သားတိပြိုပါယေနှင့်ရာ။ ဆိုခါ အခုဆင်းလို့ ၀ါကျီးတိပါဆင်းလို့စုဖြစ်ကတ်ပါရေ။ ကျောက်တော်မြို့လယ်မှာ တရားဟောရေခါ ကျွန်တော်ဟောခစွာပါ။ ကျောက်တော်မြို့ကိုစည်းရုံးလို့မရ၊ လူတတ်တိ ရေဒီယိုနားထောင်ရေ။ အောင်ဆန်းစုကြည်ကိုကောင်းရေလို့ အထင်ကြီးနီရေ။ တစညပြန်နိုင်ဖို့လားမသိလို့လည်း ကြောက်ကတ်ပါရေ။ ကျွန်တော်ဟောခါမှ ကျောက်တော်မြို့လေးခွဆုံမှ ပြိုထွက်လာပါရေ။ အခုလုပ်ကတ်ရဖို့။ နက်ဖန်ခါဆိုကေ ကုလားအောက်ကိုရောက်လားပါလိမ္မည်လို့ ကျွန်တော်ယှင်းပြခါမှ။ ယကေ ဇာလုပ်ကတ်ရဖို့လဲလတ်။ ကျွန်တော်က ကုလားမဲဆန္ဒသျှင် (၁၂၀၀၀) ဆိုကေ ကျွန်တော်ရို့ ရခိုင်ဒီမိုကရေစီအဖွဲ့ချုပ်က မဲပြား (၁၅၀၀၀) ရမှနိုင်ပါဖို့။ ယင်းတွက်နှင့် အခုရောက်ဟိလာကတ်တေ ကျောက်တော်မြို့သားမဲဆန္ဒသျှင်တိစွာ မဲပြား (၁၅၀၀၀) ထက်မနည်းစီဖို့ အိမ်တိုင်းလူတိုင်း အိပ်သွန်ဖာမှောက် ကြိုးကြိုးစားစားနှင့် ကိုယ်စီကိုယ်ငှ ကျွန်တော်ရို့ရခိုင်ဒီမိုကရေစီအဖွဲ့ချုပ်၏သင်္ကေတဖြစ်တေ ဆီမီးခွက်ကို မဲပီးကတ်ဖို့ ကျွန်တော်ပြောကြားလိုက်ပါရေ။

ဆရာကြီးသည် ချမ်းအီးလှရေဆောင်းရာသီမှာ ပုဆိုးပါးချေနှင့် စစ်တွေအကျဉ်းထောင်မှာ အလှူးအလှိမ့်ခံယင်း (၁၉၉၀) ပြည့် သြဂုတ်လ (၁၄) ရက်နိမှာ တိုင်းပြည်နှင့်လူမျိုးအတွက်အသက်ပီး၍ တာဝန်ထမ်းဆောင် လားခပါသည်။ ကျန်ရစ်သူများမှ ဆရာကြီးအားသတိရလျှက် သျှစ်သောင်းဘုရားရှိတွင် အရိုးဇာတီတဆူ တည်ထားကိုးကွယ်ထားပါကြောင်း စာရွီးကာဂုဏ်ပြုလိုက်ရပါသည်။

အသျှင်ဣန္ဒာစက္က (ဗေဒင်နှင့် သမိုင်းသုတေသီ)