နိုင်ငံတကာဟာသ (၁)

အိုင်ယာလန် နိုင်ငံသား
----------------------
တခါက အင်္ဂလိပ်လူမျိုးတယောက်၊ စကော့လူမျိုးတယောက်၊ အိုင်ယာလန်လူမျိုးတယောက် (၂၆) မိုင် အရှည် မြစ်တမြစ်မှာ ရီကူးပြိုင်ကတ်တေ။
စကော့လူမျိုးက (၁၂) မိုင် ကူးပြီးရေခါ ညောင်းပနာ လက်လျှော့လားရေ။
အင်္ဂလိပ်လူမျိုးက (၁၆) မိုင် ကူးပြီးရေခါ လက်လျှော့လားပြန်ရေ။
အိုင်ယာလန်လူမျိုးကတော့ခါ (၂၅) မိုင်ကူးပြီးရေခါမှ ငါပန်းတိုင်ရောက်အောင်မကူးနိုင်ပျာယ်လို့ စိတ်ဓါတ်ကျပနာ နောက်ပြန်လှည့်လို့ ပန်းတိုင်အစကို ပြန်ကူးလားရေလတ်။

အိမ်ထောင်ဟိ ယောက်ကျားတိအတွက်ရာ
------------------------------------
အမေရိကန်ပြည်ထောင်စုက မြို့ချေတမြို့မှာ အိမ်ထောင်ဟိရေ ယောက်ကျားတိရာ အလုပ်ခန့်ရေ စက်ရုံတရုံဟိပါရေ။
တရက်နိ ကုလိမ္မေနှစ်ယောက် မ,မတိ အလုပ်မခန့်စွာကို မကျေမနပ်နန့် စက်ရုံမန်နေဂျာကို လားပြောကတ်တေ။
ယင်းခါ စက်ရုံမန်နေဂျာက "အိမ်ထောင်ဟိ ယောက်ကျားတိက မယားတိအမိန့်ကို နာခံနီကျ အသားကျပြီးသားပါ။ ယင်းအတွက်နန့် ကျွန်တော့်အမိန့်ကို နာခံတတ်ဖို့ တကူးတကလေ့ကျင့်စရာမလိုလို့ အလုပ်ခန့်စွာပါ။" လို့ ယှင်းပြလိုက်ပါရေလတ်။

အမှန်တကယ် ကြားယင့်လား
-----------------------------
တခါက နားထိုင်းရေလူတယောက် အသစ်ဝယ်တပ်ထားရေ နားကြားကရိယာကို သူငယ်ချင်းကို လိုက်ကျောလိုက်တေ။
"အဝေး သူငယ်ချင်း၊ အခု ငါတပ်ထားရေ နားကြားကရိယာက ဒေါ်လာ (၅၀၀) တောင်ပီးရရေ။ ငါတပ်ဖူးသမျှထဲမှာ ဈီးအကြီးဆုံးပျာယ်"
သူငယ်ချင်းက "ဟုတ်လာ ဝေး။ ဇာခါက ၀ယ်လိုက်စွာလေ" လို့ မိန်းလိုက်တေ။
ယေကေမှာ နားကြားကရိယာအသစ် တပ်ထားရေလူက "လေးနာရီခွဲပျာယ်" လို့ ပြန်ဖြေလိုက်တေ။

မူးကေ မမောင်းကဲ့
-------------------
တခါက ရဲအရာဟိတယောက်စွာ အမှောင်ခိုပနာ (Night Club) က အရက်မူးမူး ကားမောင်းတတ်တေ အမူးသမားတိကိုဖမ်းဖို့ စောင့်နီရေ။ ထွက်လာပျာယ်တယောက် ...

ဒယောကို လိုင်ဖင်းမှာချိတ်ပနာ။ လှကားက ဖင်တောတောပနာ ဆင်းလာရေ။ အောက်ကိုရောက်တေမှာ ရှိကို တလှမ်းလှမ်းဖို့ နောက်ကို သုံးလှမ်းဆုတ်ပနာ အသျှိန်ယူနီရရေ။ ဂုတ်က ငိုက်စိုက်ကျပနာ၊ ကား (၁၀) စီးလောက်ကို တစီးစီ သော့လိုက်ဖွင့်နီရေ။ ကိုယ့်ကား ဇာနားမှာတောင်မသိ။

ရဲအရာဟိက ယင်းအမူးသမားကို အာရုံစိုက်နီရေ အချိန်မှာ (Night Club) က လူတိ တရောင်းရောင်းဆင်းလာပနာ ကိုယ့်ကားကို ကိုယ်စီမောင်းလို့ အီးအီးသက်သာ ထွက်လားကတ်တေ။ အေလူလောက်ဆိုးရေလူ တယောက်လည်းမဟိ။

အမူးသမား ကားထက်ကိုရောက်လို့ စက်ဖွင့်လိုက်စွာနန့် ရဲအရာဟိက အနားကိုလားပနာ အစစ်ဆီးခံဖို့ပြောလိုက်တေ။ အစာအိမ်မှာဟိရေ အရက်ပမာဏတိုင်းရေ ကရိယာကို အမူးသမားပါးစထဲထည့်ပနာ လီမှုတ်ထုတ်ခိုင်းလိုက်တေ။

“ယာ...ဇာပိုင် ဖြစ်စွာလဲ။ အေလူဝမ်းထဲမှာ အရက်တစက်လည်း မဟိ”

ရဲအရာဟိလည်း ဂျီဝိဂျီဝါနန့် ကားမောင်းပနာ (Night Club) ရှိက ထွက်လားရေ။ အေနိခါ အရက်သမားတယောက်လည်း မဖမ်းမိခ။

ဇာဖမ်းမိဖို့လဲ။ အရက်မူးသမားတိ အီးအီးသက်သာကားမောင်းလားလို့ရအောင် ဒေလူကို ဖေ့သာပီးပနာ ရဲအရာဟိကို မျှားထားရေဆိုစွာကို သိကမသိလိုက်။

လိမ္မော်သီးဆွတ်ရစွာ လွယ်လား
------------------------------
မသာစိန် လိမ္မော်သီးဆွတ်တေ အလုပ်တခုလျှောက်လိုက်တေ။ အလုပ်က ကကောင်းလွယ်ကေလည်း ကိုယ့်စွာကိုယ် အရည်အချင်း မပြည့်ဖို့စွာကို စိတ်မချဖြစ်နီရေ။ အလုပ်အိန်တာဗျူးမှာ အလုပ်ကြပ်က "အယင်က လိမ္မော်သီးဆွတ်တေအလုပ် လုပ်ဖူးပါလား" လို့ မီလိုက်တေ။ မသာစိန်က "အယင် နှစ်နှစ်လောက်လုပ်ဖူးပါရေ။" လို့ ပြန်ပြောလိုက်တေ။ အပြီးကေ ကိုယ့်စွာကိုယ်အားတင်းပနာ "အိမ်ထောင်သုံးဆက် အကွာခံရဖူးစွာ တခုပါရာ။" လို့ ယုံကြည်မှုအပြည့်နန့် ပြန်ပြောလိုက်တေ။

လယ်သမား သားသမီးတိနာမည်
----------------------------
တခါက လယ်သမားတယောက်မှာ သားသမီးများလွန်းလို့ အချေတိကို မျက်နှာပေါက်နန့်လိုက်ပနာ မှတ်မိရလွယ်ရေနာမည်တိ ပီးထားရေ။ ဇွန်လကျောင်းဖွင့်ရက်ရောက်တေခါ အချေတိ ကျောင်းလားအပ်ကတ်တေ။ ကျောင်းသားလက်ခံရေဆရာက မျက်နှာဝိုင်းဝိုင်းချေနန့် လယ်သမားသားချေတယောက်ကို ခေါ်ပနာ "မင်းနာမည် ဇာလဲ" လို့ မီးလိုက်တေ။

"နွားဂါရီ တာယာ ပါ"
"ဇာပြောရေ ဝေ။ နာမည်ကို မီးနီစွာ"
"ဟုတ်ပါရေ။ နွားဂါရီ တာယာပါ"
"အေး မင်းတနားစောင့်နီ။ ငါ ဆရာကြီးပါးကို ခေါ်လားမည်"

အချေက နောက်ဘက်မှာ တန်းစီနီရေ မျက်နှာခခွက်ချေနန့် အေးမသယ်အနားကိုလားပနာ "မမ ကြက်စာခွက်၊ မမနာမည်ကိုလည်း ဆရာယုံဖို့ မဟုတ်လားမသိ" လို့ မျက်နှာငယ်ချေနန့် ပြောလိုက်တေ။

မချစ်လို့ အမွီပီးရေ
--------------------
သာစိန်နန့် သာအောင် ညီအကိုနှစ်ယောက် တရားယုန်းမှာ အဖအမွီကိစ္စနန့် အမှုရင်ဆိုင်နီကတ်တေ။ တရားသူကြီးက အဖသယ်ထားခရေ သီတန်းစာကို ဂရုတစိုက်ဖတ်ပနာ အမှုကို စီရင်ချက်ချလိုက်တေ။

"အင်း ကောင်းပျာယ်။ မင်းရို့အဖ ပိုင်ဆိုင်သမျှ လယ်တိအားလုံးကို သာစိန်ရာ ယူရဖို့"

သာစိန်က ညီသာအောင်ဖက်ကိုလှည့်ပနာ မျက်ရည်စမ်းစမ်းနန့် "ငါ ပြောရေမလားဝေး သာအောင်။ ဘာဘာက မင်းကိုရာ ချစ်တေလို့။ ငါတော့ အေဘ၀နန့် တုံးလီဖို့ပျာယ်" လို့ ပြောလိုက်တေ။

ချွေတာရေး အသုဘကြော်ငြာ
----------------------------
မြို့ခံ သတင်းစာတိုက်ကို ဖုန်းတကောလ် ၀င်လာရေ။
"အဘောင် နာရေးကြော်ငြာ ထည့်ချင်လို့ပါ။ စ်ီး ဇာပိုင္ယူလဲ မသိ"
"စကားလုံး တလုံးကို င်္ဒဂါး (၅၀၀) ယူပါရေ"
"ဟုတ်လား။ ဘောလ်ပန်နန့် လိုက်မှတ်လိုက် အချေ"
"ဟုတ်ပါယင့်။ ပြောပါ အဘောင်။"
''ဖိုး စိန် သီ ပျာယ်'' ယင်းလောက်ရာဟယ်"
"အော် ကျွန်တော် ပြောဖို့မိလားပါရေ။ အနည်းဆုံး စကားလုံး (၇) လုံးမှ လက်ခံပါရေ။ အခု စကလုံး (၄) လုံးရာ ဟိပါသိမ့်ရေ အဘောင်"
တဖက်က အသုဘသျှင် ၀ါကြီးမ အသံတိတ်လားရေ။ တနား ကြာခါမှ
"ယင်းပိုင်ဆိုကေ (ဖိုး စိန် သီ ပျာယ်။ ပန်း ရောင်း သည်) လို့ ရွီးလိုက်ပါ" လို့ ပြန်ပြောလာရေ။

လိပ်စာ မှားလားရေ Email
-------------------------
လင်မယားနှစ်ယောက် မြို့တမြို့မှာ တွိဖို့ချိန်းထားကတ်တေ။ လင်သယ်က တရက်စောပနာ ယင်းမြို့ကိုရောက်လားရေ။ ရောက်စွာနန့် ဟိုတယ်ကွန်ပျူတာကနီပျာယ် ကမန်းကတမ်း မယားပါးကို Email ပို့လိုက်တေ။
ယင်း Email က နာမည်တလုံးကျန်ခပနာ ပူပူနွီးနွီး အိမ်သျှင်သီကျလားရေ မဆမတယောက်ပါးသို့ရောက်လားရေ။ Email ကို ဖတ်ပြီးစွာနန့် မဆမအသစ်စက်စက်ရေ သတိမိပနာ မူးလဲကျလားရေ။ Email မှာ ရွီးထားစွာက

"ကို့အချစ် သက်ထား၊
ကို အခု ဒေမှာ ရောက်နီပျာယ်။ နက်ဖန် သက်ထားလာရေခါ အဆင်သင့်ဖြစ်အောင် အားလုံးအသင့်ပျင်ဆင်ထားရေ"

(စံဂိုးအောင်)