Thursday, April 2, 2009

အသဲကွဲနွီရာသီ


အသဲကွဲနွီရာသီ
----------------
အနီဝီးလို့ သွီးအီးလားခရစွာလားပန်းနု။ ကျနော့်ရင်ထဲမှာ နွီဦးမှာတိုက်တေ လီပွီလီရူးတိ ပြာပြာလဲ့လဲ့တိုက်ခတ်နီကတ်ပါရေ။ စိတ်ထဲမှာ ခံစားရစွာလောက်ရာ လီလွှင့်ပစ်လိုက်ရဖို့ဆိုကေ ကျနော်ဟာ လူတပိုင်း မီးခိုးတပိုင်းဖြစ်လားပါပျာယ်။ ဒေပိုင်ပါ..တချိန်က ကျနော့်မှာ ပန်းနုဆိုရေ ချစ်သူတယောက်ဟိပါရေ။ နာမေနန့်လိုက်အောင် ကကောင်းအလှပချေဖြစ်တေအတွက်နန့် ကျနော်လည်း ကကောင်းချစ်ခပါရေ။ တချိန်ကစွာယေ ဒေဂုမဟုတ်တေအတွက်နန့် ပန်းနုဆိုရေချစ်သူ ကျနော့်မှာမဟိပါပျာယ်။

မိုးမှုံတိ တုန်ခါဝဲယိုင်ကျပြီးကေ ပိတောက်တိပွင့်ရေ လတလမှာ ပန်းနုကို ကျနော်စတွိခစွာပါ။ ကျေးလက်ဆန်ရေ တောမြို့ချေတမြို့၏ အတိတ်နိစွဲတိမှာ ကျနော်ရို့နှစ်ယောက်၏အချစ်တိစွာ ခိုင်ခိုင်မာမာဖြစ်ပေါ်လာခပါရေ။ အသက် (၁၇၊၁၈) အခါတုန်းက ဆင်းရဲခြင်းချမ်းသာခြင်း၊အဆင့်အတန်းနန့်ဂုဏ်ဒြပ်တိကို နားမလည် မတွေးတတ်ခကတ်ကေလည်း အချစ်အကြောင်းကိုတော့ခါ နားလည်တွေးတတ်ခပါရေ။

ယင်းပိုင်နန့် ကျနော်ရို့နှစ်ယောက် တယောက်ကိုတယောက် ကကောင်းချစ်မိလားခကတ်တေ။ ပန်းနုနာမည်က နှစ်လုံးရာဟိပြီးကေ ကြသားပတီးနံနန့်စပါရေ။ ပန်းနုနာမည်ကို သဲမြီဖုံဖုံမှာ မှုံနီအောင် ကျနော်ရွီးဖူးပါရေ။ ပန်းနုမိဖတိက ကုန်စုံစတိုးဆိုင်ဖွင့်ပြီးကေ တခြားစီးပွားရေးလုပ်ငန်းတိလည်း လုပ်ပါရေ။ ရွာမှာဆိုကေ ပန်းနုမိဖတိက ရွာမျက်နှာဖုံးတိပါရာ။ ကျောင်းအားလပ်တေရက်တိမှာ ပန်းနုကို စတိုးဆိုင်ထဲမှာ အမြဲတမ်းပိုင် တွိရတတ်ပါရေ။ ပန်းနုရို့စတိုးဆိုင်ရှိမှာ မထည်ဝါ မခန့်ညားရေ အုန်းရည်ဆိုင်ချေတဆိုင်ဟိပါရေ။ အုန်းရည်ဆိုင်နာမည်က မူကြိုအုန်းရည်ဆိုင်ဆိုဝါ။ ကျနော်ကနားမလည်လို့ ဆိုင်သျှင်ကို လားမီးကြည့်ရေခါ အရက်မသောက်တတ်သိမ့် လူတိအတွက် အရက်သောက်တတ်အောင်သင်ပီးရေအခါ အုန်းရည်က စသောက်ရစွာဖြစ်လို့ ဆိုင်နာမည်ကို မူကြိုအုန်းရည်ဆိုင်ပြီးကေပီးထားစွာလို့ပြောယင့်။ ပန်းနုနန့်ကျနော် ချစ်ကြိုက်နီကတ်စွာကို မနာလိုပြိုင်ဖက်တိဟိပြီးကေ ကျနော့်ဘ၀ အဆင်မပြေမှုတိကို ပန်းနုကိုတောင် ထုတ်ဖော်မပြောတတ်တေ ကျနော်စွာ ယင်းမူကြိုအုန်းရည်ဆိုင်မှာ ထိုင်ပြီးကေ ပန်းနုအကြောင်းတိကို အုန်းရည်သောက်ယင်း ထိုင်စိုင်းစားဖူးခပါရေ။ ပန်းနုကို ကျနော် ဇာကြောင့်ဒေလောက်ချစ်မိခရစွာလဲ။ ပန်းနုက၀ါ ကျနော့်ပိုင် အဖက်ဖက်ကနိမ့်ကျလှရေ လူတယောက်ကို ဇာကြောင့်ပြန်ချစ်ခစွာလဲ။

ကျနော်ရို့နှစ်ယောက်ဘ၀တိခြားနားနီမှန်းကို ယင်းအချိန်ကပင် ဂဂနန သေသေချာချာ စိုင်းစားဝေဖန်ချင့်ချိန်နိုင်ခဖို့ဆိုကေ ပန်းနုကို ကျနော်ချစ်ချင်မှချစ်မိခဖို့ပါ။ လုံလောက်တေ စိုင်းစားဥာဏ်တိမဟိခသိမ့်ရေအတွက်နန့် ပန်းနုနန့်ကျနော် တယောက်ကိုတယောက်မခွဲနိုင်၊ မခွာနိုင်လောက်အောင် အချစ်တိကို ကိုးကွယ်ထားခကတ်စွာဖြစ်ပါရေ။ ပန်းနုက သူဌီးသမီး၊ဥစ္စာပေါ ရုပ်ချောပြီးကေ အတန်းထဲမှာဆိုကေလည်း ကကောင်းစာတော်ရေ ကျောင်းသူမတယောက်ပါ။ ယင့်အတွက်နန့် တခါတခါ ကိုယ့်ကိုကိုယ် အားငယ်စိတ်တိဝင်ပြီးကေ ၀မ်းနည်းမိခစွာလည်း တကြိမ်တခါထက်မကခပါ။ ယေကေလည်း ယင့်အချိန်က တယောက်နန့်တယောက် အချစ်စိတ်တိမွှမ်နီအောင် ဖုံးလွှမ်းထားကတ်တေအတွက် အချစ်ကလွဲပြီးကေ ကျန်စွာကို ကောင်းကောင်းမစိုင်းစားခကတ်။ ယင့်အချိန်က ပန်းနုနန့်ကျနော့်အချစ်စွာ ကကောင်းဖြူစင်ရိုးသားခပြီးကေ ဟန်ဆောင်ဖုံးကွယ်မှုတိမဟိခကတ်တေ အချစ်မျိုးတိနန့် တယောက်ကိုတယောက် ကကောင်းချစ်ခကတ်စွာပါ။ ဒေအချိန်မှာ ယင့်ချင့်တိကိုပြန်တွေးမိကေ ကိုယ့်ကိုကိုယ် ဂုဏ်ယူကြေနပ်အားရနီမိပါရေ ပန်းနု။ ပန်းနုက ပင့်မြင့်မှာ လှနီရေ ပန်းနုနုချေတပွင့်ပါရာ..ကျနော်မခူးဝံ့ မခြွီဝံ့ပါ ပန်းနု။

ကုန်လွန်လားခရေ အတိတ်တိကို ကွန်ပျူတာထဲက Document ထဲမှာထည့်ထားရေမှတ်တမ်းဖိုင်တိပိုင် ပြန်ပနာထုတ်ကြည့်လို့ရကေ ကကောင်းကောင်းပါဖို့ ပန်းနု။ ရွာဦးက မောင့်ထောင့်တောင်ဘုရားပွဲကျရေခါ ပန်းနုနန့်ကျနော် ကြမ်းတမ်းရေ ကျောက်ခင်းလမ်းထက်မှာ စက်သီးတတူစီးပြီးကေ ဘုရားပွဲလားကြည့်ဖူးပါရေ။ ဇာလောက်ပင်လမ်းကြမ်းကြမ်း ကျနော်ရို့နှစ်ယောက်အတွက်တော့ ကျောက်ခင်းလမ်းစွာ ပန်းခမ်းလမ်းပိုင် ထင်မှတ်မိခကတ်ပါရေ။ ပန်းနုဆိုရေ ကျနော့်ချစ်သူစွာ နာမည်နန့်လိုက်အောင် စိတ်ထားတိလည်း ကကောင်းနုညံ့ပါရေ။ မောင်းထောင့်ဘုရားပွဲမှာ နှလုံးသားထဲကစောမဲကျီဆိုရေအော်ပဒါပြဇာတ်ကိုထည့်ရေခါ မင်းသားမောင်ရွှီသီးနန့်မင်းသမီးစောမဲကျီမရို့တိ၏ ၀မ်းနည်းကြွီကွဲစရာအဖြစ်တိကို မြင်တွိရလို့ လိုက်ပနာမျက်ရည်တိကျတတ်တေအထိ စိတ်ထားနုညံ့ပါရေ။ ပန်းနုပါးပြင်ထက်က တလိမ့်လိမ့်တလိမ့်လိမ့်နန့်စီးကျလာရေ မျက်ရည်တိကို ကျနော့်လက်ကိုင်ပုဝါနန့်သုတ်ပီးဖူးခပါရေ။ ယင်းလက်ကိုင်ပုဝါစွာ ဒေဂုထက်ထိ ကျနော်အမှတ်တရသိမ်းထားလို့ဟိပါသိမ့်ရေ ပန်းနု။

"မောင်စာရွီးဆရာဖြစ်လို့ဟိကေ ပျော်စရာကောင်းရေ ဇာတ်လမ်းတိကိုရာ ရွီးရဖို့နန်း၊ ၀မ်းနည်းစရာကောင်းရေ ဇာတ်လမ်းတိကို မရွီးပါကဲ့"

"ဇာတ်လမ်းတပိုဒ်ကို ပျော်စီလွမ်းစီဆိုပြီးကေ ပုံသီတွက်ထားလို့က မရ ပန်းနု၊ ပျော်စရာ လွမ်းစရာတိစွာရေ ကာလံဒေသံ အချိန်အခါနန့် အကြောင်းကြောင်းတိကြောင့် ဖြစ်ပေါ်လာရရေ အကျိုးသက်ရောက်မှုတိရာဖြစ်တေမနားယေ"

ယင်းအချိန်က ပန်းနုနန့်ကျနော့်ဇာတ်လမ်းက၀ါ...ပျော်စရာတိနန့်ဆုံးဖို့လား၊ ၀မ်းနည်းစရာတိနန့်ဆုံးဖို့လားမသိနှမ်းဆိုပြီးကေ တယောက်တည်း ကြိတ်ပနာ စိုင်စားကြည့်ခပါရေ။ ပန်းနုနန့်ဝီးဖို့ဆိုရေအတွေးထက် နီးရဖို့ဆိုရေ စိတ်ကူးတိကရာ အနိုင်ယူထားခပါရေ။ ကြိုမသိနိုင်ရေကြောင်းအရာတိက အနာဂါတ်ကာလမှာ ကကောင်းဟိနီခပါရေမနား။

ကံကြမ္မာလီရိုင်းနန့်လောကဓံမုန်တိုင်းတိက နာဂိစ်မုန်တိုင်းတိုက်တေပိုင် ကျနော်ကို တိုက်ခတ်လားခပါပျာယ်။ ဘ၀ရီစီးကြောင်းထဲမှာ စီးမျောလိုက်ပါယင်း ကျနော်ဟာ လုံးဝအံဝင်ဂွင်ကျ လွဲချော်လားခပါယာ။

"ပန်းနုနန့်ကျနော် ဇာခါကပင် ၀ီးကွာလားခရစွာလဲ"

"ဇာခါတုန်းကပင် သွီးအီးလားခရကတ်စွာလဲ"

"ဇာကြောင့်ဝီးလားခရကတ်စွာလဲ"

"ဇာကြောင့်သွီးအီးလားခရကတ်စွာလဲ"

ကိုယ့်ဖာသာကိုယ်လည်း မီးယင်း၊ ဖြေယင်း

ထပ်မီးယင်း၊ ထပ်ဖြေယင်း

မသဲကွဲခပါဝါ ပန်းနု။

ပန်းနုက မကွေးဆီးတက္ကသိုလ်မှာ ဆီးကျောင်းတက်နီခရေ။ ကျနော်က ပြည်ပမှာ ပန်းနုကိုလွမ်းယင်းနန့် ဘ၀အတွက် ရန်းကုန်ကြိုးစားနီခရရေ ဘ၀သမားတယောက်ပါရာ။ တယောက်နန့်တယောက် ယင်းပိုင် အလှမ်းကွာဝီးနီရရေအချိန်မှာ တတူတူတွိဆုံဖြစ်ဖို့ဆိုရေကိစ္စက လုံးဝမဖြစ်နိုင်ခပါ။ သူကဆီးတက္ကသိုလ်နောက်ဆုံးနှစ်ရောက်ပါလတ်တေခါ အွန်လိုင်းမှာလည်း တခါတရီမှရာ တွိဖြစ်ကတ်ခပါရေ။ ကကောင်းအလုပ်တိများလို့ မကြာမကြာမတွိနိုင်ကတ်စွာလို့ထင်ပါရေ။ အွန်လိုင်းမှာတွိရေအခါလည်း ပန်းနု၏အလေးထားမှု၊ဖော်ဖော်ရွေရွေဆက်ဆံမှု၊ အကြင်နာယုယမှုတိကို မရနိုင်လိုက်ပါပျာယ်။ ပန်းနုက ငွေရေးကြေးရေး၊ စီးပွားရေးနန့်အလုပ်အကိုင်အကြောင်းတိကိုရာ အချစ်နီရာမှာ အစားထိုးပနာ ပြောပြောလာစွာတိကို တွိရပါရေ။ အချစ်အကြောင်းကို ပြောရစွာလောက် ဇာမှာ အရသာဟိနီပါဖို့လဲ ပန်းနု။ ကုန်ခရေအပါတ်က ပန်းနုနန့် အွန်လိုင်းမှာတွိရစွာလောက် ဇာခါတုန်းကမှ ၀မ်းနည်းကြီကွဲစရာမကောင်းလို့ ကျနော်ထင်လိုက်ရပါရေ။ ပန်းနု၏လီစိမ်းတိုက်မှုတိကိုတွိရစွာရေ ကျနော့်အတွက် သီမိန့်ချခံရရေ လူတယောက်ပိုင် တုန်လှုပ်မှုတိဖြစ်ရပါရေ။

ပြည်ပမှာ မိဝီးဖ၀ီး ဆွီဝီးမျိုးဝီးနန့် ကြမ်းတမ်းရေ ဘ၀စိန်ခေါ်မှုတိကို နိစိုင်ရင်ဆိုင်ဖြတ်သန်းနီရရေကျနော့်ကို ပန်းနုက အယင်ကပိုင်မဟုတ်ပါပျာယ်ကာလတ်။ ကကောင်းနီနိုင်ရေ၀ါလတ်။ ပြောင်းလဲလားခစွာက ကျနော်မဟုတ်ပါ ပန်းနု။ ပန်းနုရာ အစစ အရာရာ ပြောင်းလဲလားခစွာပါရာ။ ပန်းနုက အရင်ကထက် စာတိတတ်လာပျာယ်။ M.B.B.S ဆရာဝန်ဘွဲ့ကိုလည်း ရလားခယာ။

"အိမ်က ဘာဘာနန့် အီးယောင်ရို့တိ သဘောတူပီးစပ်ဖို့လုပ်နီကတ်တေ အိန်ဂျိန်နီယာစစ်ဗိုလ်တယောက်ကို ပန်းနုလက်ခံလိုက်ရဖို့လား" လတ်။ အကျိုးအကြောင်းကို ကျနော်ကို ဆွေးနွေးတိုင်ပင်စွာမဟုတ်ပဲနန့် အသိပီးခစွာလောက်ရာဖြစ်တေဆိုစွာကို ကျနော် နားလည်သဘောပေါက်လိုက်ပါပျာယ် ဆရာဝန်မကြီး ဒေါ်ပန်းနု။ ကျနော် ပန်းနုကို ကကောင်းချစ်ပါရေ ပန်းနု။ ယေကေလည်း ပန်းနုရို့မှာ ဒေအခြေအနေတိကိုရောက်ပြီးခါမှ ကျနော် ဇာတခုမှ စောတကတိမတက်ချင်ပါပျာယ်။ ကျနော့်ကို ထားပစ်ခပါ ပန်းနု။ ပန်းနုလားချင်စွာကို ဆက်လားပါ။ ကျနော်က အချစ်ဆိုစွာကို စွန့်လွှတ်အနစ်နာခံခြင်းပါရာဆိုပြီးကေ ပန်းနုကို လွတ်လပ်ခွင့်ပီးလိုက်ပါရေ။ ဒေါက်တာ ဒေါ်ပန်းနုတယောက် ရောက်လီရာ နီရာမှာ ပျော်နိုင်ပါစီလို့ ကျနော်ဆုတောင်းပီးလိုက်ပါရေ။ ကျနော်ကတော့ သင်္ကြန်လီတိနန့်တတူ ရူးမတတ်ခံစားရပါဖို့သိမ့်။

(ခိုင်မျိုးသူရိန်)

No comments:

Post a Comment